JAWNG SARA A LAHKAWNG LANG HKRAT AI MYIPRWI

Naw Naw Seng gaw, dakkasu kaw na janmau gup la ngut ai hpang, laika hpaji lam hta grai naw hpang hkrat taw nga ai Wunpawng buga Hka san mare e, hpaji dap hku nna hpo da ai lapran tsang jawng hta sharin sara hku nna, wa apnawng nga nu ai. Shi sharin ang ai tsang 8 gawk hta jawngma num/la yawng 32 rai nga ai. Dai jawngma marai 32 hta Maran Dut La ngu ai la gasha gaw jahpawt shagu ngu na jawng lung hpang hkrat hkrat rai nga nu ai. Jahpawt mi hta, sara Naw Naw Seng ri shingna langai mi hta lang da kra rai, kaga jawngma ni hpe gaw laika hti da shangun nna, tsang gawk chyinghka lam kaw Dut La hpe la tsap nga nu ai.

Loi hkring rai yang, Dut La du shang wa ra ai hte sara Naw Naw Seng Dut La hpe lata hkintum tsap da shangun let: "Dut La nang hpa majaw jahpawt shagu jawng hpang hkrat ai?" ngu san tim, Dut La hpa ga hkaw mi mung n hang tsun ai. "Sara nang hpe san nga ai na ai i?" "Na ai sara" Dut La du gum tawn htan ai. "Nang jahpawt shagu jawng pang hkrat ai hta n-ga, amyu sha dawnghkawn npu kaw dinggreng tsap let, amyu sha mahkawn hkawn ai kaw mung galoi mung n lawm ai, nang tinang amyu hpe n tsawra ai i?" "Tsawra ai sara." Dut La sara hpe galang praw rai mada let htan sai. "Nang jawng hpang hkrat ai majaw, sara nang hpe 3 lang gayat na hkam la na i?" sara riduk shingna lang shatsaw tawn san ai. "Hkam la na sara" Dut La hkra lata lahpan hpe sara hpang de ladawn dat nu ai. "E, daihpawt gaw 3 lang sha gayat ai, bai hpang hkrat jang gaw 5 lang gayat katut na, chye na ai i?" ngu 3 lang gayat let hta sharin shaga nna, laika sharin gawk de shang wa shangun nu ai.

Raitim hpang shani hkan mung loili gaw hpang krat nga nu ai. Sara Naw Naw Seng hpe hpa n tsun ai zim nga nu ai. Jawng lung ai shaning gaang hkup jan wa sai. Tsang 8 jawngma ni a matu sharin ginhpan grai ahkyak ai ten mung rai wa sai. Ndai zawn ahkyak wa sai ten hta, Dut La shawoi na hta grau aten hpang hkrat nga ai majaw, sara wa grai myit gahtet pawt mayu bu nga nu ai. Jahpawt hkying 9 hta jawng lung ai, rai yang hkying 9 chyen pyi rai wa sayang she Dut La gale pru wa ai, dai majaw sara Naw Naw Seng gaw Dut La hpe jawngma ni yawng a shawng kaw shatsap da hkra rai nna: "Dut La nang gaw jawng a tara mung n hkan, aten ahkying hpe mung n chye hkungga, shingna hpe mung n hkrit ai, ganu gawa sharin n hkut ai ma she rai nga ndai. Shingrai sara nang hpe shingna hte mung n gayat sai, nang matsing mi achye rai na matu shinggan jan prang kaw lata baw kaw mara, lagaw maga mi hte sha manit 30 tsap u, shaloi she nang matsing na ndai!" ngu tsun let, dam jaw sanu ai. Hpang jahpawt jawng lung ten hta, Dut La jaujau du nga na sai ngu sara Naw Naw Seng myit nga nu ai.

Raitim ndai shani Dut La jawng pyi n sa mat hkra rai nga sanu ai. Shaloi she sara Naw Naw Seng a myit hta, mani ngai shi hpe jaw ai dam ari a majaw ma ndai myit hta grai hkra mat sai kun? Shing nrai jan prang kaw shatsap da nna hkum n ngui n pyaw hkrum mat sai kun? Sara wa a myit kraw hta nchyi nmu hkam sha nga nu ai. Ganing rai hpa baw byin ai chye lu na matu Hka san mare salang hpe woi nna, Dut La a nta de sa du manu ai. Sara Naw Naw Seng hte mare salang wa du sa wa yang, masha lahkawng nba hpun let galeng nga ai pe sa mu ma ai. Langai gaw Dut La a gawa rai nna, dawdap chyen maga mi de galeng nga ai gaw sara a tsawra ai jawngma Dut La rai nga ai. Sara Naw Naw Seng gaw grai myit gahpra myit tsang la ai hte Dut La a gahtan hpe masop yu u yang, grai gahtet nga ai majaw sara wa gaw shi a hpa-jet hpe hka gatsi hta tsing madit la rai, Dut La a gahtan ntsa e mara da ya nga nu ai. Loi hkring rai yang, Dut La dum hprang wa nna my hpo dat yu yang, shi a sara Naw Naw Seng a myiman mu ai hte rot wa u ai. "Dut La hkum rot hkum rot, galeng nga u, nang jawng n sa ai majaw sara sagawn sa wa ai re." shaloi she sara hte rau sa wa ai mare salang wa gaw: Sara hpe naw shachyen ya na, ndai Dut La a gawa Maran Sing Gawng gaw lai wa sai ten hta, Shanglawt hpyen la re.

Shawng lam majan pa hta shi a hkra maga lagaw hkam bawm gabye la hkrup nna daw kau ai, ningrum ningtau jan gaw Miwa hkran de nchyang chyang nna shanwa hpe bau nga ai. Kanu n nga ai majaw, gasha Dut La chyu sha ganu a malai dinghku mu hpe galaw, gawa dingla hpe madi shadaw nga ai wa re." nga shachyen ya ai ga hpe na nna, sara Naw Naw Seng a kraw kata matsut matsat ngu hkam sha nga sai. Ndai zawn ndang nla dinghku amu a majaw jawng hpang hkrat ai Dut La hpe matsan dum ai myit a jaw sara wa a myi jut hku gahte hkrat ai myiprwi hpe gadai n mu hkra mayun gatsut kau sanu ai. Shingrai sara Naw Naw Seng gaw: "Myit su mare salang wa e, Dut La gaw jawng laika hta mung ningtawn ai jawngma ni hta lawm ai.

Dut La hpaji chye chyang ai masha langai byin tai wa hkra, ngai hku nna dang lu ai made karum madi shadaw la na, mare kawn mung madi shadaw karum ya marit ngu ga sadi jaw let hpyi shon nngai. Ya du wa na shata hta, anhte amyu sha jawng ni yawng "Myu tsaw myit" ngu ai ga baw hte laika ka shalat shingjawng lamang hta, Dut La hpe anhte jawng a gawng malai shingjawng shang lawm shangun na myit da nngai." ngu tsun dan let, Dut La shanwa hpe n-gun jaw ga tsun nna bai wa manu ai. Gaja wa sara Naw Naw Seng a myit kraw kata hta mung "Myu tsaw myit" ngu ai a lachyum hpe grau nna chye na nga sanu ai. 2022 ning a lapran tsang jawng yawng shang lawm ka shingjawng ai "Myu tsaw myit" ngu ai ka shingjawng poi hta, Dut La a kum yai laika pa hpe nambat langai lata la ai hkrum sai. Dai majaw Hka san lapran tsang jawng ni hku nna wuwu didi hte Dut La hpe mung alak mi shagrau kumhpa hte hkalum la manu ai. Kumhpa ni hpe ahpum pai let pru wa nga ai Dut La hpe yu nna, sara Naw Naw Seng a myi jut hku myiprwi gahte hkrat wa nga nu ai. Raitim ndai lang gahte hkrat ai myiprwi gaw atsam ningja hpring ai kabu myiprwi she rai na sai.

Ngawla Bum