LUNGHPRA BUM NTSA NA PANLAWNG MAJAWM

LUNGHPRA BUM NTSA NA PANLAWNG MAJAWM

Bum Lai

Jappawt u lat goi pru ai hte galu grawm grawm re Brang Mai a kawa gaw, gala nba mi lawai kau nna, dawdap wanmang kaw lahput pyi gahpa kaw lai hkra chyajawm dung nna wan rawt wut let, myi gaw myan myan rai, mayu kaw krawp krawp nga, "Aha, buk! Ahka, buk!" nga mahka gaw kaba ba law ai dap she mawng hkra hkra mahtoi let: "Yi... Daihpawt bai jan shalawng kau na e, Brang Mai! Ngai Nam! Rawt manu, rawt manu, daihpawt lamu nip ai zawn mung rai nga ai, le, mana de ningnu hte an dup tawn da ai mam dang shi daram du n du re mi re, daihpawt sa jawm gun la kau ga, daining gaw kam auba n htuk ai, mam mung ma san dingdung mat sai, e gaja law..." Nga anyam dung nga ai. Hkum shing yan gadun rai nhkaw satsaw kam la ai Brang Mai a ganu gaw, yupgawk kaw nna htinggrum nsen hte aga gaw ma-um maa nga: "E... Ningwa e, hpa baw kam auba gaw hkum tsun sa, hkauna eg kru sha rai nga yang she, namhpun atsawm n bang ai majaw re." "Ningnu e... Nang n chye ai, namhpun gaw she bang nga le, ahka n manu mat nga ai, ahka hkyet mat nga ai, matsaw ntsa gapaw ai la ra mat nga ai, nang vi chye da nu?" "Dai hka hkyet wa ai gaw hpa rai hkyet wa ai chye da nu? Dai gaw hka hku de na hpun hte kran kau nna, sha-mu hpun bai hte hkai bang tawn ai majaw rai nga ai le, ngai jau kaw nna Brang Mai nan wa hpe tsun sangai, hka hku de na hpun hkum kran kau ngu sai." "Ahka hkyet ai gaw mungkan ting wa hkyet nga ai law."

Galu rap rap re Brang Mai jan Hkawn Sen gaw, yup gawk de nna kara masit let pru wa ra ai hte rau, loi masen masen nga ai nsen hte: "E... Gu yan moi e, daining bai ahku hku sai ga rai nga ai, raitim myit nhtum ra ai, ngai ningnam jan nga nga nngai, labu dinglun kau nna shakut na rai nga ai le!" Ngu u ai. Hkum ngau galu kaba batbat re Brang Mai hpa hkai lawng hpun nna azet atsang rai yupgawk de nna pru wa ra ai, ta lahpum hkan gaw shan shari ri nna, n-gun grai rawng na zawn rai nga ai. Shi gaw laika hpa- ji grai shakut kam ai wa re majaw, jahpawt shagu laika rawt hti hti rai u ai he maren, dai jahpawt mung nta shachyang na punra e laika yu dung nga u yang, ganu gaw shingnoi kaba hpye kau, tingsan lang kau rai punra de sa wa nhtawm, tintin mama nga: "Brang Mai e, mam sa gun la ga she ngu yang me, laika bai yu nga i?" Ngu jang, Brang Mai ganu hpe mada let: "Nu e, mam gaw sa gun la na rai nga ai le, laika mung yu ra nga ai, lai sai ten annu ni kun hta yak hkak ai majaw, ngai lahta tsang jawng n lu matut lung mat ai re, ya ngai ten lu shagu yu ai laika gaw, lahta tsang jawng na tan laika hte Jinghpaw laika ni re.

E nu e, raitim nan nu yan wa hpe n shara ai, nan ngai hpe num grai tsawm grai kyet ai la ya masin dai, shi grai tsawm la ai num kasha mung shangai tawn ya sai sha nrai, ma hpe Miwa laika Jinghpaw laika, mahkawn mangwi ni mung sharin ya nga ai, nta masha yawng hpe mung grai chye tsawra nga ai, jawng sara ma hte bung ai num rai sai, shing rai, ngai myit n dik ai lam hpa n nga sai, ndai lam gaw nan nu yan wa chye chyalu rai nga ai le. AWh, jan lawng wa sai, sa sa, mam gun mat wa saga." Nga dawdap chyinghka shingjut na buri hta hpai rai pru mat wa hkyem nga yang, asak 4 ning jan sai kasha Hkawn Tsawm gaw, ntsa palawng raw lang kau, kara gaw tsip tsip rai gawk de nna kagat pru wa nhtawm: "Nu, wa, dwi num, dwi la, ngai mung mam gun sa na, nu dai nye a shingnoi kaji la ya ni." Nga ganu a ta kaw gang noi taw nga u ai. Ganu gaw garap rap ja na shingnoi shayu ya nhtawm: "Hkawn Tsawm, maw maw, le shawng de kagat su yaw." Ngu nu ai hte rau, nta ting mam gun sa wa sai. Brang Mai shannu wa ni mam sa gun la nna ndaw ya e wa dung hkringsa nga ma yang, gwi chyangdut chyahpung de yawng nna wau pru wa ra ai hte rau: "E hkau Brang Mai, nga nga nni ye? Gwi naw yu ya ni law." Nga shaga pru ai mi nga ra ai.

Brang Mai rawt ngoi rai chyahpung de sa wa nhtawm: "E, hpa nra ai hkau Tang Nau, jinghku ni hpe gaw shachyan wau she re. E, ya kaning sha nga nna du pru nta?" Ngu u yang, hkum dut dut, n-gup pa pa re Tang Nau gaw pai ta hte baw mahkyit let: "E... Mare salang wa da nga yang, daina bum maling garan zuphpawng hpawng na re da, kaning di garan na re mung n chye sai, nkau gaw jau kaw nna hpun tu tsawm ai shara hkan madu kau ai mung nga masai, anhkau chyu she lamu shaming, u tu a mung lu nna rai nga ga ai, e, ngai Nhkap nta ni kaw naw sa ra ai, nang loi jau nna sa wa rit e!" Ngu shana da jang, Brang Mai gaw ndaw ya e dung nga ai nta masha ni hpe mada yu nna: "E law, anhte nta ting sa lawm ra na re." Ngu htan nu ai. Shana de ningsin u ni pyen kashai, hkatawn gakrik ni garu bang wa sai ten hta, zuphpawng sa ai mare masha ni datmyi hte lam rai langai hpang langai rai zuphpawng shara de du bang wa mara ai. Mare salang wa gaw: "E! E, nu wa myitsu ni e, naw zim yu saga, daina na zuphpawng gaw bum maling garan ai hte seng ai zuphpawng re, kaga gahtawng ni gaw jau jau garan kau masai, anhte gahtawng ni chyu sha hpang hkrat nga saga ai." Ngu ga tsun hpaw dat jang, chyinghka lam makau kaw chyajawm dung nga ai hkum galu rai n-gup pyet pyet re Lawt AWng ngu ai wa gaw aga akya angwi sha nga: "E... Salang wa e, kaning di garan na mung lawan hkren ngu tsun yu law... " Ngu dat nu ai.

Shaloi salang wa gaw AWng Lat hpang de ta sharawt dat let: "E law, Lawt AWng nang naw zim yu, anhte gahtawng ni a bum maling gaw kaga gahtawng ni hte n bung ai, dai majaw hpang hkrat nga ai re. Kaning law nga yang, anhte gahtawng ni htinggaw 30 rai yang, bum maling hkaraw gaw 31 rai nga ai, dai langai mi jan ai gaw shawa bum re. Rai yang, ya hpun tu tsawm nga ai bum hkaraw ni gaw, Samda bum, Maibau kawng, Galeng bum, Hka-ya bum, Maichyu hkaraw, Lakang kawng re ni rai nga ai. Bai kaga bum hkaraw ni mung lawu hprut re hkrai re. Rai yang Lunghpra bum chyu sha bum loi tsaw loi dam nna, hpa hpun mung n tu ai hkringmu maling sha rai nga ai, ndai gaw yawng chye chyalu rai nga ai." Ngu u ai. Yawng a shingdu kaw "Tarawk rawk rawk, Tarawk rawk rawk." nga malut tauba marawp dung nga ai hkum gaw shawng rawng shawng rawng rai nna n-gup sumju la ai Hpan AWng wa gaw, salang wa hpe myi kaba hte yu nga nhtawm: "E... Salang wa e, dai Samda bum gaw ngai jau kaw nna madu tawn sai law, dai hta n-ga, amoi jiwoi jiwa prat kaw nna anhte Gumhpan ni a bum re da law!" Ngu u ai. Mare salang wa Hpan AWng hpe ta layung di rai ga ja nsen hte "Hpan AWng nang dai hku hkum tsun, dai gaw asuya tara hte nhtan shai ai lam re. Nang tsun ai hku she galaw yang gaw, bum maling n mai garan mat ai sha nrai, mare ting gasu gabrawng rai mat na sha re, nrai i?" Ngu dat u ai. Chyinghka lam kaw tsap shanat nga ai hkum buk buk rai myi rimrim re Hkawn Lum ngu ai hpawmi jan gaw ga ja nsen hte: "E, mare ni e, ngai myit yu yang mare salang wa tsun ai jaw ai, Hpan AWng tsun ai hku rai yang gaw, nkau gaw lu, nkau gaw n lu rai, prat tup myi hpraw myi lau hte jawm pra ra na rai nga ai." Ngu u ai. Mare salang wa gaw shawa hpawng de yawng nna ta ganu sharawt let: "Um... Ngai hkri Hkawn Lum gaw myitsu ga chye shaga ai. Um... Rai jang ya lawu de bum maling hpe kaning di garan na lam bai tsun yu ga.

E, bum maling dinghkri gata e, kawa wuyan hte lalam hte lalam, dawng hte dawng, lahkam hte lahkam hkan shadawn na gaw n mai byin na re, dai majaw yawng tawt tak yu nna garan, shing nrai shadawn jang lang yang chyu sha mai nhten, gara hku re? Yawng jawm myit yu ga le." Ngu u ai. Shingjut kaw lamyin matep dung nga ai rung gung wa Zau Myat gaw aga loi lawan lawan nga: "E mare ni e, salang wa tsun ai hku ngai myit hkrum lawm ai, hka, gade lang myit yu tim dai hku mi she ang nga ai law!" Ngu u ai. Shaloi shawa ni mung: "E re le." "Dai hku di na re law." "Mai ai law." "Mai na re." "Zau Myat tsun ai jaw ai." Nga jawm garu ma ai. Gawng galu seng seng rai tsawm la ai Dau Nan ngu ai jan gaw: "Hkak hpu!" Nga hkra hkalap de mayen prat kabai kau rai: "Shoi! Ngai gaw gara kaw garan ya tim hkraw ai law." Ngu dat jang, myiman wawm wawm re Ying Myaw ngu ai jan mung: "Ngai mung ning Dau Nan tsun ai hku arai dam nngai law." Ngau ai. Ndai zawn shawa ni garu nga yang, mare salang wa "Kawk kawk kawk!" nga saboi akawk dat nna: "E, e, e, hkum garu masa, yawng zim yu saga, um, anhte a bum garan ai lam, nang ndai bum la, ngai wawra bum la ngu nna garan yang mung mai ai baw n re, dai majaw maisau hkyep kaw bum mying ka shakap nna, maisau nambat manaw la ai hku di ga, shaloi gaw gadai wa gadai jan gara bum lu manaw la tim, hpa ga kaji tsun na lam n nga sai. Bai bai, Dau Nan hte Ying Myaw nanning maisau tam la nna, mausau pa sumshi zen la nhtawm, bum mying nambat ka bang tawn mu, maw maw, ndai gaw bum mying jahpan rai sai." Ngu u ai.

Dau Nan gaw kabu gara atsang arang nga: "E, e, anning grai lawan nna lajang na ga ai. Ning Ying Myaw, nang nambat jahpan bang na maisau kawk kaji re mi naw wa tam la su e!" Ngu u ai. Shawa masha ni gaw: "Um, bum garan ai mu gaw n loi ai law." "Tsun yang she loi ai law." "Galaw wa jang gaw yak ai lam re." Nga rai jawm garu nga ma yang, Ying Myaw gaw tin tin ma ma nga: "Salang wa e rai sai law, maisau hkyep 30 kaw bum mying jahpan 30 hkrak rai sai, yawng ndai maisau kawk hkrai rai sai." Ngu u ai. Salang wa gaw, maisau kawk tawn ai de sit sa wa nna: "E, rai sa, ngai nam Ying Myu gaw kyet ai. Um. Rai jang gaw, bai bai, Hkawn Lum nang ndai matsing buk kaw htinggaw hte htinggaw lu manaw la ai maisau hkyep na bum jahpan hkap matsing da u, langai hte langai matsing ngut ai htawm, ta masat dip shangun ra ai yaw." Ngu u ai. Hkawn Lum salang wa hpe mada yu nna: "E, e mai ai." Ngu sai. Mare salang wa gaw tingnyang up saboi punra de wa tsap nna: "E! Le ra jahtum e dung ai la kasha lahkawng, num kasha yan nang de lung wa marit, ndai Hkawn Lum a makau e wa tsap nna, sakse wa tai garum mu, nanhte jahtum e manaw mu yaw, dai maisau kawk kaw lahkawng masum lang naw garu mu lu, gai gai, ya gaw htinggaw hte htinggaw hpalen nna, ndai maisau kawk na maisau hkyep langai ngai manaw la nhtawm, Hkawn Lum a matsing buk kaw ka matsing da, ta masat dip da di mu, ndai ngut ai htawm kaw nna gaw, gadai wa gara bum lu manaw yang, dai bum gaw madu gawnhkang na sha rai sai." Ngu u ai hte rau, shawa masha ni langai hpang langai maisau kawk na maisau hkyep manaw bang wa sai hte maren: "E, rai sai law ngai gaw Samda bum lu manaw la sai law." "Ngai gaw Maibau kawng lu manaw la sai law." "Ngai gaw Galeng bum lu manaw la sai law." Nga kabu gara ai mung lawm nga ma ai. Brang Mai gaw Lunghpra bum lu manaw la ai majaw: "Akam nde n rawng ai gaw." Nga myit la nna: "Sa sa, Hkawn Tsawm yan nu, nu yan wa hkawm saga." Nga zuphpawng rai n ngut yang wa mat masai. Ginhtawng ta na hpuntsing galang bai ganan wa ai hte rau, ulat hpunggam galang goi gya ra ai majaw, Brang Mai a kawa gaw, dawdap wanmang kaw wan rawt wut let aga gaw nyap nyap nga: "Aham e... E, rawt manu, nhtoi san sai law, daihpawt gaw anhte nta ting mana Brang Mai lu manaw ai bum maling naw sa yu ga law." Ngu dat u ai.

Gashu Hkawn Tsawm gaw yup gawk de nna kagat pru wa nhtawm, kaji dwi a lahpawt kaw sa ahpum dung nga let: "Dwi la, ngai mung sa na, ngai hpe singga hkyem ya ni, ngai namsi di gun wa na." Nga aput u ai. Brang Mai kara gaw tsip tsip rai, palawng kaba hpe kra gahpa kaw mara kau rai, yupgawk de nna pru wa nhtawm, dawdap wanmang e wan sa kra dung nga let: "Wa, bum maling n sa yu ra sai, Lunghpra bum she re gaw e, hkringmu maling she re, hpun langai mi pyi n tu ai shara she rai yang mi e, hpun bai hkai bang na mung n mai byin ai, hpun n mai tu ai shara she re gaw e." Ngu u ai. Brang Mai a ganu mung gala nba mi lawai kau rai, dawdap wanmang e dung bang wa ai hte rau, mayu krawp krawp nga let: "Brang Mai e Lunghpra bum a lam gaw ningwa hpe n tsun dan ra ai, ningwa shi grau chye ai, annu ni a gam maka rai sam nga ai gaw e. Raitim bum n garan yang gaw hpa mung n lu ai, nlung bum lu tim rai sai, hpun maling wa mi n lu tim, bawnu shamawt shakut shaja nga jang gaw, sutsu nga mai wa ai nhtoi mung chye nga a dawng gaw e." Nga wan nawn let tsun u ai. Brang Mai jan gaw dawdap rap ja makau e sa tsap nga nna aga gaw loi lawan, nsen loi ja ja nga let: "Amoi tsun ai jaw ai, anhte sha nhtum nwai shakut nga yang gaw, Lunghpra bum raitim akyu rawng ai nhtoi mung she n nga wa na kun na." Ngu u ai hte rau, Hkawn Tsawm gaw kawa a hkra lata kaw gang noi let, ganu a myiman de mada yu nga nna: "Nu, lunghkrung hkan dung chyai yang she pyaw ai i?" Nga jang, ganu gaw Hkawn Tsawm a baw masawp ya let: "Nu a kasha Hkawn Tsawm tsun ai she grau teng re nga ai." Nga htan ya sai.

Bum maling garan ai htawm kru ya din ai jahpawt, Brang Mai nta ni manap shat sha bang wa masai hte rau, Brang Mai hka-wan hkoize tawn kau rai, yawng hpe yu shara let: "Nu yan wa, Hkawn Tsawm yan nu e, masha ni hpun maling lu garan la ai ni gaw, hpun ngau kran dut sha, hpun hta dut sha rai kyin bang wa masai, annu wa ni gaw hpa baw galaw nna nga na re ni ye?" Nga jawm mau dung nga u ai. "E hkau Brang Mai!" Brang Mai shan nu wa ni shat sha nga ai ten hta, nta chyahpung de utu chyangngau u numji ni a nsen hte gayau gaya nga shaga pru ai masha mi nga nga ai. "Oi! Gadai law e?" Ngu htan let Brang Mai kagat pru wa sai. "AWh, hkau Tang Nau i? Kaning sha ngu du pru ndai rai?" "E, daini nan nu wa ni yawng ngai hpe hpun naw sa hta garum mani law, masha hkum mi hpe gumhpraw lap sumshi shi jaw na, yi mai byin na kun? Mai byin jang gaw ya ngai hte rau sa wa saga ngu ai le." Tang Nau mani sai sai rai ga sa saw nga u ai. "E, she mai gaw e, nang naw la nga u, ngai nhku de nta ting hpe naw wa ginrawn la na e." Brang Mai nhku de nhtang shang wa nna kabu kabu nga ai nsen hte: "Gai gai, wa, Hkawn Tsawm a ganu, lawan shajin yu mu, daini hkau Tang Nau kaw hpun hta nehyang sa ga, dai shat lu sha ni shajin gun ga, Hkawn Tsawm e, nang dwi num hte nta sin yaw." Ngu tsun hparan dat nu ai. "Wa daina de ashu hkwi wa ya yaw."

Hkawn Tsawm kawa hpe mada let tsun u ai. "E law, e law, nta atsawm sin yaw." Brang Mai kasha hpe hta pawn masawp da nna rawt mat wa sai Hpun hta shara kaw sa du ai shaloi, kawng de gatsi bungli wa, hkaraw de hka shi lwi hpraw hpra, makau grupyin utu chyangngau hte nyet nyet u ni ngoi garu, grau nna jingling u ni gaw shanhte hpun gatawng nga ai kaw htep htep shaga gasu shajang ai majaw, n dum shami ba ai zawn garai n nga yang shani shingtung du mat sai. Shani shat sha ai ten hta, Tang Nau gaw mani sai rai Brang Mai hpe yu nna: "He he, hkau Brang Mai e, nan nu wa ni a hkauna nga yang gaw Ega kru sha re hta n-ga, hka bai n manu, matsaw ntsang gapaw na la ra ai rai malit dai, e, hkau Brang Mai e, na gam maka wa gwi a nra ningpau tat ngu ai baw wa rai nga ndai law, hka, bum garan ai lam hta mung, nang lu manaw la ai gaw Lunghpra bum she bai rai le, nang prat tup nlung bum dai sin nga na i? Na nlung bum dai gaw, ten na wa magang grau tsaw grau kaba grau law wa de she rai na, hpa raitim galu kaba chye ai hkrai re. Dai majaw, hkau Brang Mai e, ngai kaw hkan rit, ngai nang hpe kawsi hpang gara sha gaw n jahkrum na, nang atsawm sha sumru yu." Ngu u ai majaw, Brang Mai gaw tsawmra na hkra ga mung n shaga ai mau dung nga u ai Shana de jan du wa sai hte maren, Brang Mai kawa hte hpun tawng hpai, madu jan hpun hta gun rai nta wa masai. Lam tup Brang Mai gaw Tang Nau shi hpe jahpoi asang ai "Nlung mung kasha hkai chye ai." Nga ai ga hpe n ra sumru let nta du wa yang, shi hpe nchyang sa saw ai brang la masum dung nga mala ai. "Aga, hkau Brang Mai e, e taw, jan grai du hkra wa i ye? Tang Nau nang hpe ningchyang gumhpraw gade wa hte jaw a ni ye? Anhte nang hpe sa la ai hkying hkum masum daram pyi du na sai."

Hpan AWng hkap shaga dat sai. "E, sa dung chyai marit law, daini na hpun gaw maibau hpun dingla hkrai rai nna, garai n kran ma ai wa re, hpawtni naw sa ra na tai ai, nanhte rau sa wa ai re i? Hpa baw mu hte seng nna du sa ai rai?" Brang Mai chyinghkyi hkai kaw n-ga raw noi kau let san dat nu ai. "E, ngai shawng du ai rai nga ai, ngai hpalap lu dung nga yang she hkau Hpan AWng bai du, dai hpang hkau Zau Myat bai du re rai nga ai. Um' Ndai hku rai nga ai hkau Brang Mai e, ngai du sa wa ai lachyum gaw, nan nu wa ni a hkauna nga yang lamu marang la ra ai bai rai, kumshu hkai nga yang mawdaw lam hte bai tsan, bum maling nga yang lunghpra bum she rai, nang a majoi lung hkrung dai ni gaw, gade tsa ning la tim apu pu asi si wa na n re, lunghtawn lungma kaw achyu mai chyu ai i? Asau mai shaw ai i? E, dai majaw le, ngai kaw hkan rit, ngai Lawt AWng ngu ai wa nang hpe labu gadun sha pyi n shabu ai gaw n woi hkawm na ungai, nrai i?" Nga Lawt AWng tin tin hte shawng gashun tsun u ai. "Hkau Brang Mai e, ya hkau Lawt AWng tsun ai gaw jaw ai hkrai re, raitim arawng mala ai nsen loi lawm ai hku re, nye a ana kaw n shang ai. Um... Hkauhting hkauna hpe n mai kam, bum maling mung n lu rai jang gaw nchyang bungli shang ai baw rai nga ai le. Dai majaw hkau kaw kan rit, ngai Hpan AWng ngu ai wa nan nuwa ni pe ajum pyi n lu gahtawk ai gaw n woi hkawm na nngai, nang ngai kaw n hkan jang gaw, htaw... Nannu wa ni a lunghpra bum na sung htum ai lungpu kaw nta shatai nna sa rawng nga ra na rai nga myit dai, nrai i hkau Brang Mai, n kam taw yu nga yu." Ngu Hpan AWng gaw Brang Mai hpang de sit dung hkra rai abwi sha tsun nga sai.

"E, hkau Brang Mai e, manang ga madat ai gaw mayam, hkringmau sha ai gaw Bainam da, ya hkau Lawt AWng yan hkau Hpan AWng tsun ai ga gaw, nten kaw sau chya ai ga she re, lauban ga hte grai naw tsan gang ai masa rawng ai, chye madat nga ndai i hkau Brang Mai? Ndai prat gaw prat dep prat rai sai, dai majaw nchyang shang tim prat dep nchyang shang ra ai, hkrap myiprwi si hte mu galaw ra ai nchyang gaw hkum shang, ngai ninghkau Zau Myat gaw, mawdaw, mawdaw buk, na htu jak, wutdek nta, yi sun hkauna alaw alam hte tut arau rai nga nngai, dai majaw ngai kaw hkan nang rit, nang ngai kaw hkan nang jang gaw, ngai ba-lam hku-awn lu yang, nang mung ahkying ashai lu na re, kam sham u yaw hkau Brang Mai, ngai tsun ai ga gaw lauban ga majing nan re yaw!" Nga dung sharai la hkra hkra rai tsun u ai. "E... Hkau ni e nanhte tsun ai yawng jaw ai hkrai re, nanhte hkau ni hpe ngai kam sham ai, yawng kaw ngai hkan nang mayu ai." Ngu u ai hte maren, gaja wa sha Brang Mai shannu wa ni gaw, yawng yawng kaw nchyang bungli galaw hkawm nga ma ai. Lana mi hta nta ting dawdap wanmang e grup rai wan kra nga ai shaloi, Brang Mai gaw: "Nu yan wa e, Hkawn Tsawm a ganu e, yawng myit yu ga, Annu wa ni masha ni kaw nchyang shang ai 5 ning rai saga ai, sutsu wa ai lam mi n nga, grau matsan jat wa ai zawn hkrai she nga nga ai, masha ni gaw hpun ngau kran dut sha, shaban kumgau, sha- rin, bagaw, nbusi, kumshu, malut hkai dut sha rai sutsu nga mai wa ai hkrai rai masai sha nrai, sha-mu hpun, layang hpun alaw alam hkai tawn shajang ai hkrai rai masai.

Annu wa ni yawng kaw nchyang shang yu ai hkrai re, masha ni a hpang gaw n mai hkrat nga sai, dawdan lama ni gaw nga ra sai, manang ni pyi mai lu yang, anhte nta mung mai lu na htung re." Ngu wanmang na wan nhtaw hkrai nawn let tsun u ai. Lahpawt mi ntsa malen u ni ngoi garu ai ten hta, Brang Mai n-ga hte htep, gyihta tingse hte yep rai, Jahproi kawng kaw dung nna: "Goi ye... Nra rutrung ngu ai gaw, daini rai sai law..." Nga mahkawn hkawn nga u yang, gahtawng nhtawn tsawm htum shayi Hkawn Lum wa-lai sa di nna wa ai jan sa mu na kau u ai. "E... Ning Dau Nan, ning Ying Myaw, nang de lau sa wa marit le, ngai ga mi tsun dan na le!" Ngu ndau dat sai. "Hpa baw shiga gaja tsun na law e? Tsun dan yu mi le e!" Dau Nan yang-yi nai sep let pru wa ra ai. "Ning yan e, Brang Mai wa le, mi yat ngai Maichyu krung kaw wa- lai sa di ai shaloi, Jahproi kawng kaw dung nga nna, galang gaw aga lahtum yu, galang gaw lungdin hte lamu kabai yu rai, grai na yawn na zawn nga ai mahkawn bai hkawn yu rai dung nga ta sai le, lamu ga n lu mat nna yawn ai masa rawng ai, shi a mahkawn ga hpe madat yu yang 'Lunghkrung bum' nga ai mi rawng ai, yi, Brang Mai na-kya ndai shawng de ngai hte nga mat ga ngu yang gaw n madat ai, ngai hte nga ai rai yang wawra zawn re gam maka mi nhkrum na me!" Ngu gashi tsun dan u ai. "Yi, ning Hkawn Lum e, shing hkum nga law, Brang Mai gaw grai myitsu ai masha re, masha kaji kaba yawng hpe grai chye hkungga ai, ngai shi hta asak manga kru ning kaji tim, 'Hkri Dau Nan e' nga nna chye shaga ai. Htawm de anhte buga na salang kaba galaw na masha gaw Brang Mai rai na ra ai, n kam yang gaw yu nga ga e!" Dau Nan tsun ai.

"Teng ai law, Brang Mai gaw Myitsu ai masha re, ma-ni ngai shi a nta kaw sa chyai yang, ngai hpe ning nga ai, hkri Ying Myaw e, bungli lam nang hpa myit hkum htum, ngai shakut ai gaw nang a mung lawm na re, nga nna ngai hpe myit shalan ya ai, shing rai ngai nachying chyeju dum ai. Brang Mai ya na zawn dangam shakut nga yang gaw, anhte buga ting hta grau sutsu ai shi rai na ra ai, anhte yu nga ga e!" U chyahkye zawn galawp nhkring ai Hkawn Lum a n-gup hpe myijut hte jinghkyen kau da nu ai. Aten ladaw gaw, mangai maga de bai du shang wa sai. Lana mi de, Brang Mai shannu wa ni gaw, dawdap wanmang e bai jawm dung nga masai, Brang Mai a kawa dap hkun kaw mahka jahkru prat bang kau nna, aga abwi sha nga: "E... Brang Mai yannu ni e, daining na hkauna wawra gaw, mam gade wa lu shu la na tai nga ni ye? Le ra lunghkrung tu ai lawu daw de na gaw, nbut but mat ma sai, amu gung na la ra ai hkauna re nga yang gaw, du hkra ladaw lai mat ai majaw rai nga ai law." Ngu san u ai. "Wa e, anwa ni a hkauna ndai gaw, mam hkai sha ai baw hkauna n rai mat sai, htaning gaw kumshu madaw hkai kau ga, ya anwa ni a hkauna htumpa hku asuya ni mawdaw lam htu shalai ya na hkyem nga ma ai, shaloi gaw dai mayan hku hku kumshu hkai ai mung law wa na mara ai." Ngu u ai. "Mai ai mai ai, Brang Mai tsun ai jaw ai, ngai yu yang masha ni kumshu hkai nna lu su wa ai mung law law rai ma ai." Brang Mai a ganu mung myit hkrum lawm nga ai. "Aga! Hkawn Tsawm nang gaw yaw, ta hkum gaya, wan hkrai numshut shala nna me, shat di n prut hkraw nga ai ngu yang, lawk! Lata gayat ya de yaw!" Hkawn Sen gaw kasha hpe lasik hte gayat dat nu ai.

"Aka law! Nu ngai naisam ju sha ai she rai yang, yi...Wu... Awa nu ngai hpe gayat ai law, Yi... Wu..." Hkawn Tsawm hkrap npyet let kawa hpang de wa u ai. "Ma, wa a Hkawn Tsawm e, wa pawn de yaw!" Brang Mai kasha hpe woi la nu ai. "Wu hkau! E hkau!" "E gadai loi" Brang Mai kasha Hkawn Tsawm hpe pawn kau rai npan de pru wa yang, wudang makau kaw masha marai lahkawng tsap nga ai. "AWh, du Hpau Tsun i? E rai sa, rai sa, shang wa marit, shang wa marit." Brang Mai manam yan hpe nhku de woi shang wa nu ai. "E, gadai manam law e?" "Sa chyai marit law!" "Dung ga law!" Nga nta masha ni manam hkap tau nga ma ai. "Hkau Hpau Tsun e, kaning sha ngu nna wa du pru wa myit ta? Ndai manang wa myitsu gaw?" Ngu Brang Mai hpa-hka hkap du jaw let san dat u ai. "Brang Mai e, anhte nhtawn rung kaw nna mung, nan nu wa ni ru yak ai lam hpe chye ya nga ga ai, ndai nhtawn rung ngai Hpau Tsun kaw nna hkawt, rung dung nga ai ni yawng gaw, nang hkau Brang Mai a ruyak lam hpe malap kau na n rai nga ga ai. Anhte nhtawn rung na ni pyi nannu wa ni hpe kaning di garum la na kun ngu naw myit ru nga yang she, ndai nta galaw hkawm ai Jau Lau Ta nlung alaw alam ra ai nga nna tam hkawm ai majaw, nan nu wa ni sin ai Lunghpra bum hpe apu shapu, asi jasi shangun ga ngu nga ai law, manu gaw achyen akau naw shawng jaw magang nna, shata masum tup jang galang bai wa sawn jaw jaw rai na hku re, kaning law nga yang, ndai lauban wa ra ai n lung gaw law la ai le, nan nu wa ni a Lunghpra bum ma hkra pyi ra nhten, laning mi shing nrai lahkawng ning laman e gaw, shani shagu mawdaw lawri kaba shi hte hkun daram dingyang garawt ra na re." Hpau Tsun gaw chyinghkyi kaw nhpye n-ga raw noi kau rai, abwi sha nga tsun nga u ai.

"E, hkau Byang Mai e, ngai zun mayu ai ga mung ya ninghtawn du wa zun kau sai, ngai yu yang nang a Lunghpya bung gaw, mawdaw lan kaba hte ani sha gaw rai nga ai, dai majaw hpaw ni kaw nna mawdaw lan htu bang wa manu, ngai gumhpyaw mung gu rung na yaw, anhte jawng shakut jang gaw, nlung bung mung gu twi... mang(Mam) bung tai wa na re." Jau Lau Ta malut rawt gam let, aga gaw apai alai nga bai tsun u ai. "Brang Mai e, ya lauban wa Jau Lau Ta tsun ai teng ai, nang Lunghpra bum de mawdaw lam htu bang wa jang gaw, asuya hte mare ni mung chye garum ai, nang hpa n myit htum ra ai yaw." Hpau Tsun gaw Brang Mai hpang de sit dung nna tsun ai. "E... Lauban yan e, shat naw sha la ga, simai gaw n mu la ai wa re law, raitim chyeju nshat rai u ga le." Brang Mai jan Hkawn Sen dawdap de gayin pru nna tsun u ai. "E... Re re, shat sha let she jahta chyai ga, shat sha let tsun ai ga she ga nshat tai ai da." Brang Mai a ganu mung atsang arang nga bai saw dat sai. "Nhawn du hte lauban wa e, lai sai ten hta ngai gaw hkrung nga na pyi n myit sai re, ya daini nang a ning nga ai mungga bai na lu ai majaw, dinghta ga galang bai nhang pra ai daram hku rai sangai, shing rai ya bungli mahkrun mu sai re majaw, mare shawa yawng a matu du hkra shakut na ga ai law."

Brang Mai a kawa hpa-lap du jat ya let shali dan nga ai. "E... Hkau ninghtawn du wa te lauban wa e, nan gaw annu wa ni a hkye la madu, shingbyi lunghkrung rai masin dai, dai rai, ndai mungchying asuya a shingwan gata hta, an nu wa ni da-sang shakut nna, nhtawn buga gaw maden ai lam hta hkawm sa wa ga ai, grai chyeju kaba sai law!" Brang Mai gaw malut galang bai shaw ladawn nga u ai. "E, gaja ai, nang myit ai lam awngdang lu na ra ai. Hkau Brang Mai e, an mung naw hkawm sana, hpawt de ginwang daw rung de zuphpawng sa lawm ra ai wa rai nga ai law." Nhtawn du Hpau Tsun hpa- lap lu la rai rawt mat wa masai. "Shat sha naw jawm sha la ga ngu yang me." "Abwi sha hkawm mu rang." "Bai sa chyai yaw!" Brang Mai shannu wa ni yawng gaw, chyinghka lam e sa tsap nna, ata hte lam rai manam yan hpe hkan yu sa dat masai. "E... Dwi salang wa, nga nga nni ye?" Brang Mai nji n-gu mare salang wa kaw lung wa nu ai. "E, Brang Mai, ngai pyi nannu wa ni kaw naw sa na ngu nga yang she nang bai du pru nga ndai. Nang du ai lachyum gaw Lunghpra bum de mawdaw lam htu bang na matu aga saw mayu ai nrai i? Nang kaw du ai nhtawn du wa hte lauban wa gaw, ngai kaw shawng du nna, ngai nanwa ni kaw bai madun bang dat ai re, aga gaw ngai saw sa na, nang shawng wa shajin magang su, hpawtni ngut hkra htu kau na re." Ngu hkap tsun dan sai. "E... Dwi salang wa e, grai chyeju kaba sai law, anhte nhtawn buga yawng a matu shakut na ga ai." Brang Mai kabu gara hte nta bai nhtang mat wa sai. Brang Mai yan nu wa ni gaw mare salang wa e aga saw ya ai majaw, nachying kabu ma ai hte maren, sa garum ai mare masha ni mung: "Yaw mu le!" "Shaja mu le!" "Lawan mu law!" "Yan mu law!" "Ndai nlung kaba shawng shachyai dat ga" Nga garu hte chyi rai galaw bang wa masai. "E... Yan mu law! Hprawng mu law! Ngai Tang Nau n lawm yang ganang mai na, um, watchi, nlung ndai loi nawt gaw rai wa sai, e, e!" Tang Nau makan makan nga ai hkra shakut lawm nga ai. "He he, hkau Tang Nau e, arawng mala, n-gun gaw n ja, ngai Lawt AWng hta n lai sai.

Um! Um! Watchi!" Lawt AWng mung nten maka kau hkra rai, nlung mala nga u ai. "He he... Nanhkau galaw ai mu gaw galoi mung la-shawp n sha ai hkrai re, gai gai, ndai hku di ga, Zau Myat dai ahkawn kaba la wa rit, anhte yawng jawm mala sharu kau ga." Hpan AWng gaw galu shawng rawng n-gup sumju ai hte shabung nna, dumlawng mahku zawn nga ai nsen hte makau kaw sa tsap n yu ji taw nga ai "E, ara, mi kaw nna dai hku ngu u le." "Gai gai, hkyem saga, Langai, lahkawng, masum, awh le le le le wwi!" Mare masha ni garu hte chyi nga niung mala sharu nga ma ai. Ndai zawn Lunghpra bum mawdaw lam hkrang sai majaw, jahpawt ulat goi ai kawn, shana de ningrim rim u goi mahka du hkra "Teng tang! teng tang...", "Pawtpawt... Pawtpawt..." nga nlung shaw garawt gahkrang nga sai. Brang Mai yan nu wa ni hte nchyang ni nlung mala kyin nga yang, bum pungding de nna Miwa ga hku nchyun chyun ai nsen na dat sai. "Ha ha ha ha... Htaw... Kawng pungding de Sama Miwa ni lawm re ai." Brang Mai jan gaw bum pungding de mada nna mani dat u ai. "Sama ni lawm yang she abun lum ai ngu nna, daihpawt ngai madun bang dat wa re. AWh, ngai nam nang nta shawng wa nna shat wa shadu magang su, jawng de Hkawn Tsawm hpe naw sa woi la ra nga ai." Brang Mai a kawa gaw ganam jan hpe nta shawng wa na hku tsun u ai. "Ahut de, um, Hkawn Tsawm hpe gaw shanhte a sara ma wa sa ya na re da. Taw, le ra mawdaw kaw nlung hpai bang ya ai ni hpe sha pyi shat shadu shalawm ya ga le." Hkawn Sen madu wa hpe san nga ai. "Ahut de, dai ni hpe hkum sa tsang u, le ra hkaraw de nhkut mawng sai, nang shat lawan wa shadu su, kan gata de mung nlung mala shara wa sai."

Brang Mai hkaraw de du shadap let madun dat nu ai. "Ahi, i... Nye hkum ndai wa salat htaw kam kam la ai law. Brang Mai hpawtni na gaw htaw ra kaw nlung hkum sharu tawn ngu tsun u, ndai wawra pantsun tu gadit kaw sharu tawn ngu tsun u yaw." Brang Mai a ganu gaw kra ta hte jan myilat shingga tawn rai tsun u ai. "Nu yan wa ningsin bat manam sai, wa saga, le maichyu hkaraw hku rai ga, daihpawt ngai hpuntawng kawan da sai, wa shat naru mung dan da sai, sa sa." Brang Mai gaw shi shawng hpundu e mara tawn ai palawng hta hpun la nhtawm, tin tin ma ma rai hkawm mat wa sai. Brang Mai shannu wa ni maichyu hkaraw kaw du yang ningrim rim wa sai hte maren, hka nam maga de "Hkanghkang, hkanghkang." Nga u shaga. hka hku maga de "Kawk chya, kawk chya kre kre kre..." Nga, hka laying hkan "Bade bade bade..." Shutawk shuka ni garu n hkring, lam dung makau de "Sik sik sik..." Nga ngoi garu ai nsen ni hte alum ala ndum shami nta du wa sai. "Nu, e nu, dwila dwi num, wa ni wa ra ai, dwila hte wa gaw hpun tawng hpai, dwi num gaw wa shat gun rai wa mara ai le." Hkawn Tsawm gaw chyinghka lam kadun e tsap nna ganu hpe jahtau let hkap kabu tau la nga u ai. "Law law law, galang ta shat saboi de wa dung manu, shat sha ngut jang she hpa gamung mung dup na re." Ganam jan gaw lu sha shajin da nga sai. "E, daini na nlung krawk gaw, ndai hkaru tum kaw ahkawk hkra kau nna, lam hkawm pyi yak yak nga wa ai." Brang Mai lahput masawp let tsun u ai.

"Hka, kaning rai hkra hpye mat sa." Brang Mai jan masin grai na machyi nu ai, gumgai yan dingla hpe ana nna, kaning rai sa ngu lagaw sa malu yu ya hkyem ai ta dawm la kau nu ai. "E, yawng naw zim yu mu, kabu hpa shiga mi tsun dan made, daina de Hkawn Tsawm annu shat shadu nga yang, nlung lauban wa nlung gumhpraw nkau mi shawng wa ya sai, maw maw, Hkawn Tsawm a kawa nang yu yu." Hkawn Sen gaw Brang Mai hpe ladawn ya dat nu ai. "Ataw, maisau lap wa mi she rai i rang?" Brang Mai a kawa gaw ganam jan kasha hpe ladawn nga ai maisau pa yu mau nga ai. "Wa, gumhpraw lakmat rai nga ai le, hkaimu gumhpraw sa shaw la ai baw lakmat rai nga ai le, um. Lap sen mi tup rai nga ai" Brang Mai gaw mani sai rai kawa hpe yu nna tsun dan nu ai. "Awa, gumhpraw sa la jang ngai hpe nlung htang mari wa ya yaw." Hkawn Tsawm kawa a shingma e wa ba gumlet aput dat sai. "Ma, Hkawn Tsawm e, nang de wa rit, andwi ni shani shagu Lunghpra bum de sa ai gaw, nlung hang sa krawk ai rai nga ai le." Brang Mai a ganu gaw, Hkawn tsawm hpang de ta wak nna gashu hpe shaga u ai. "Um... E! Teng ai re, shakut yang zigut lu ai da, nta ting madat yu mu, gumhpraw ndai byek mi mung n mai lang kau ai, gumhpraw dum de bang tawn na re. Um... Dai hta n ga, buga mare ni hpe chyeju htang ai akyu ara alu bungli mung galaw na re, nrai i Brang Mai yan ngainam?" Brang Mai a kawa gaw kabu ai nsen hte loi zet zet nga tsun nga ai. "Um, agu tsun ai jaw ai, agu tsun ai hku galaw na re." Brang Mai shannu wa ni gaw, ndai zawn shakut mat wa ai 5 ning a htawm na lana mi hta, mare salang wa hpe mung shaga la rai, dinghku gamung galang bai jawm dup hpang wa sai.

"Ma, Hkawn Tsawm e, dai sumla hkrung nsen kaji kau u, dwi ni, awa ni gamung dup na rai nga ai." Ngu Brang Mai a kawa gashu pe tsun u ai. "E, dwi salang wa e, daina nang hpe htet dat ai lachyum gaw, annu wa ni a dinghku gamung dup ai lam hpe sa madat ya mi ngu ai lam re law." Brang Mai gaw angwi nga ga hte salang wa hpang de sit dung wa nu ai. "Hkau salang wa e, mungchying sha asuya rung, nhtawn rung, laban ni, grau nna gaw nanhte buga mare masha ni hpe an nuwa ni nachying n chye tsun hkra, shadawn shadang ai chyeju dum ga ai law." Brang Mai a kawa mung salang wa hpe malut shaw ladawn dat nu ai. "Dwi salang wa mung du dung lawm nga sai majaw, ngai grai kabu ai, shingrai ngai yaw shada ai lam hpe nta masha ni hpang de tang yan dan na: 1, Lunghpra bum na nlung sha ashaw nga dingsang gaw, annu wa ni nta kaw gumhpraw mung dangam shang chyalu re. 2, Annu wa ni wutdek nta mung lu galaw la saga ai, mawdaw jip langai, gatrai garawt mawdaw langai, na htu jak langai mung lu mari saga ai, ndai gaw Lunghpra bum a chyeju re, Lunghpra bum gaw mungchying asuya hte buga mare salang shawa masha ni e, an nuwa ni hpe garum la ai gata hta apu pu asi si wa ai re. Dai majaw ndai nlung si machyim yawng hpe chyim shangun na. 3, Mare numshang kaw nna mare baw hkren hkra na lam dung ni hpe pyilat ga nyep kau na. 4, Dau Hkawng dingla, Marip Lu gumgai, Ving Nam gumgai, Mwihaw dingla, Chyang Ta Shan dingla re shingkra gaida ni hpe nta galaw ya na. 5, Mare na zuphpawng nta hpe wutdek nta hku shanglawng htingwan kum hkra di galaw nhtawm, shat gawk masat tawn, di dam, hka wan, saboi, lahkum ni alaw alam lajang tawn nna, htawm de mare gata e dawjau ra ai lam nga yang, shawa shara kaw jawm zup jawm dawjau na. 6, Datwan hte hka pyun gaw asuya kawn lajang tawn ya sai.

Rai yang, dat htawng sumla hkrung hta n-gun naw dat ra nga ai, gaida gaina hkrai ningmai, baudung gumgai dingla, dawhten masha ni hpe dat sumla hkrung shabrai bang ya na. 7, Mare ting na lahta tsang jawng, kawlik jawng, dakkasu jawng lung nga ai ma ni hpe tsang madang hta hkan nna ja gumhpraw garum jaw na. Bai nna machyi makaw hkrum nga ai ni hte tsi rung rawng nga ai ni hpe, machyi ai sat lawat hta hkan nna gumhpraw garum jaw na. 8, Nta masha yawng myit hkrum rapra let, mare na myitsu salang ji nban yawng hte rau, nanghpam ka-ni, lagu lagut, mawp lu mawp sha, masu magaw, gashun lu gashun sha, agung alau re lam hpe htek gasat sa wa nhtawm, sanseng chyoi pra, kunghpan dingman, tsawm htap ngwi pyaw, sutsu nga mai ai buga gaw maden la na. Brang Mai shannu wa ni yaw shada da ai lam hpe mare salang wa hpe tsun dan nu ai. "Shakut na hkrai rai nga ai le, Brang Mai tsun ai lam hpe anhte nta masha ni yawng myit hkrum lawm ai, alu bungli galaw, akyu ara tam yang she sak galu ngwi pyaw ai da, shingrai, shawa hte seng ai bungli gaw ngai nam yan Brang Mai lit la mu, nadap de na bungli gaw ningwa hte an lit la na ga ai." Ngu u ai. Mare salang wa hpa-hka lu let aga abwi sha nga: "E, hkau yan nu wa ni e, ngai shu Brang Mai a ga hpe ngai nachying na kabu ya sangai, n-gun mung jaw nngai. Dai majaw ngai mare salang wa kaw nna, n-gun aga saw ginrawn ya na lit hkam la na nngai. Um, jawm shakut na re." Brang Mai a ganu malut hpaw maya let bai matut tsun u ai. "E, hkau yannu wa ni e, ngaishu Brang Mai a ga hpe nachying na kabu sangai, n-gun mung jaw nngai.

Dai majaw, ngai mare salang wa kawn aga saw ginrawn ya na, jawm shakut na re." Mare salang wa hpa-hka lu let abwi angwi nga tsun u ai. Lahpawt mi hta Brang Mai gaw, gashu kasha n lu ai gumgai dingla ni a nta galaw ya ai shara de sa reng hkawm nga u ai. Nta galaw ai ni mung kawng kawng kang kang, htem htem htam htam garu hte chyi nga galaw nga ma yang, mare salang wa mung malut makrang kau, ta lahkawng shingdu de lale kau rai sa wa ra ai. "E, Dwi salang wa, sa wa rit law, lau kawan yu su, jep yu u, jahproi yu law! Ya lam mung galaw ngut sai rai, nta galaw ai mu gaw, wawra jahtum na sha garai n kre lu nga ai, Chyang Ta Shan dingla a matu re." Brang Mai gajawng gaja kabu gara ga hte tsun nga sai. "E, hkau Lawt AWng, hkau Brang Mai nta ni gaw, lahkawng masum ning laman hta sha ndai daram lu su mat ai, mau hpa rai nga ai i?" Nta galaw ai kaw wuttawng kagam kabai shalun ya nga ai Tang Nau hte Lawt AWng jahta let mu galaw nga ma ai. Tang Nau gaw ta lahkawng maga wuttawng langai ngai lang tawn rai Lawt AWng hpang de sit sa wa nna, loi gahte ai nsen hte tsun nga ai. "Hkau Tang Nau e, hpa baw wa mau na rai i, hkau Brang Mai chyawm gaw grai shakut kam ai wa re, raitim asuya ni kaw nna, anhte gahtawng ni hte hkau Brang Mai yan wa ni matsan ai hpe chye ma ai hta n-ga, anhte gahtawng makau sinna maga de Lunghpra bum ngu ai nga ai hpe mung chye ma ai. Dai majaw ginwang ting na nta galaw ai nlung garawt lauban ni yawng hpe, Lunghpra bum de madun bang dat dat rai nga ma ai mu e." Lawt AWng mung malut shaw lang tawn rai, loi gahte ai nsen hte bai gahte dat sai. "E, raitim hkau Lawt AWng e, hkau Brang Mai shannu wa marai rawng nna lu su wa ai gaw madung re, nkyet ai wa hpe gumhpraw shingnoi wa mi shagun tawn tim, chye gatsap shamat jahkrat kau ai yaw."

Tang Nau gaw ta lahkawng maga lang tawn ai wuttawng hpe aga kaw tawn kau nna, Lawt AWng gam ai malut shachyi lang let tsun u ai. Lagat gahtawng sinna maga Lunghpra bum lam de, shani shana nlung garawt ai mawdaw dangam gadu nga sai hte maren, Brang Mai mung shi mare salang wa a man e tsun ai ga hpe galaw shatup nga sai. Shing rai, mare masha ni gaw Brang Mai yannu wa ni hpe chyeju kaning di hang na kun nga, mare salang wa hpe sa san ma ai. "Salang wa e, Brang Mai yannu wa ni e chyeju kaning di htang na re ni e?" "Chyeju gaw nachying dum ai law." "Brang Mai yan nuwa ni a chyeju gaw prat tup n malap ai law!" Nga garu nga ma ai. "Nu wa myit su ni e, dai lam anhte hpa n tsang ra ai, mana ngai salang manang ni hte jawm dup hkut tawn sai, ya na gat hpang shani gaw, anhte nampan daw poi nhtoi mung rai nga ai, shingrai dai shani gaw, Brang Mai shannu wa ni a Lunghpra bum sinpraw maga na panlawng yang kaw e, sumtsan manam ni du hkra lawm ai nampan daw poi galaw na re, Brang Mai shannu wa ni dumsu lahkawng, wa lahkawng shapraw na hkam la masai, hkum shapraw ngu tim shan nuwa ni hkraw na mung nrai. Um... Anhte shawa ni mung shapraw na rai nga ai le. E, dai shani gaw shawa nampan daw poi mung rai, Brang Mai shannu wa ni hpe kumhpa shagrau jaw ai poi rai na re. Dai kumhpa hpe "Lunghpra bum ntsa na panlawng majawm" ngu ai re.

Shi gaw bum maling a mying kring rai nga ai. Anhte nu wa myitsu ni le, yi myit hkrum lawm ai kun?" Mare salang wa gaw maram mara galu kaba ai hkumhkrang kaw hkahku nhkaw sha hkaw kau, hkahku dangpai lawai kau rai, atsang awang nga tsun dan dat sai. "Myit hkrum lawm ai law!" "Mai ai law!" "Gaja ai, gaja ai." "E, dai hku di na re law." "E, rai sa, rai sa." Shawa masha ni bai jawm garu bang wa masai. "AWh, Ying Myaw, ya nampan daw poi shani, manam hkap tau, manam shachyan rai na lit gaw nang hkam la nu lu yaw." Mare salang wa gaw masha pawng ga-ang de sit tsap nna, Ying Myaw hpe yu nhtawm mu ap bang wa nu ai. Mare salang ni hte shawa masha ni kaw nna, Brang Mai shannu wa ni a atsam marai hpe "Lunghpra bum ntsa na panlawng majawm" ngu shagrau ya ma ai sha nrai, dai "Panlawng majawm" atsam hte buga gaw maden ga nga ai atsam ginrawn ndau nga ma ai. "Buga shagu na nu wa myitsu ni, hkamja nga ga law! Du sa marit, sa chyai marit, hkap tau la ga ai! Ya shawng ningnan du shang wa ai gaw Pan Tsun gahtawng ni re, matut nna gaw Lungsha yang ni, Numri pan gahtawng ni, Hkindu yang ni, Lungja gahtawng ni, Sengda bum ni, Panlawng hku ni, Huwa gahtawng ni, Zahkung gahtawng ni, Lashi lahkung ni, Lisu gahtawng Jau kya jai ni re. E ya jahtum e du shang wa ai yan gaw, lauban kaba Jau Lau Ta hte nhtawn du Hpau Tsun re, hkap tau la ga ai." Madum sumpyi yungwi nsen hte rung, hpaujang mahku he pung nga ai gata hta, nhtawn buga law malaw de na ni hpung hte hpung rai yan shang wa mara ai hte rau, Ying Myaw gaw nsen htawn jak kawn atsang awang kabu gara ga hte du lasa she kawng hkra marawn tsun nga u ai.

Shawa masha ni yawng Panlawng yang na tsingdu prang kaw garu hte chyi nga hpawng jawng nga yang, mare salang wa tingnyang up mandat punra de du lung wa ai hte rau, pret pret nga ai lahpawk nsen hte shingrau nna, poi lamang mungga hkaw bang wa sai. "Nu wa myitsu ni, ram rawt ningtsing ni, daining na "Panlawng majawm" nampan daw poi hpe ya hpaw hpang wa saga. Shawng ningnan e ngai mare salang wa kaw in Lagat gahtawng ni a gawng malai tai nna, nampan daw poi paw gram hpe tang shana dan na: Langai, Lagat gahtawng nunum hpung mu madu rai nga ai Dau Nan kaw nna, nampan daw poi kungdawn ai ga shagawp shagrau ya na. Lahkawng, Brang Mai a kawa shanhte nta ni a gawng malai mungga hkaw na. Masum, nhtawn du Hpau Tsun nhtawn rung hte lauban kaba Jau Lau Ta a gawng malai hku mungga hkaw na. Mali, Lagat gahtawng salang ngai kawn, Brang Mai yannu wa ni hpe "Panlawng majawm kumhpa" shagrau masat na. Manga, Brang Mai hte shi a ningrum ningtau jan kaw nna, ( Shakram bai shakram) ngu ai yungwi hpe shapyaw na. Kru, lu sha dawjau ngut ai htawm, shawa htawngka ka na. Ya shawng nnan, num hpung mu madu shayi Dau Nan kawn, nampan daw poi hpe kungdawn ai ga shagawp tang shagrau ya na re. Pret pret pret nga ai lahpawk nsen gata hta Dau Nan gaw nsen atsang awang nga ai hte: E, Hkawp hkungga ai nu wa ni, Sutsu hkrun lam hpe sumli. Ndai maten ya hte yang, Ginhtawng bungshi bung shajang. Wwi wwi bungli bung ahpawt, Gatsing hpunlap ni lali rawt. Kukdwi Koirawng shaga du, Pantsun palawng lali pu.

Panlawng yang a shingkang wa, Brang Mai atsam shagrau ya. Daini mali shata wa gu, Panlawng majawm nhtoi du. Brang Mai a atsam hpe shakawn, Lwi Fung marai re ngu hkri- awn. Panlawng majawm hpe shingja, Prat dep buga gaw maden la. Dau Nan ga shagawp hti ngut ai hte rau ta lahpawk nsen ngoi gara ai gata hta, mare salang wa gaw tingnyang up punra de bai lung wa sai. "Ya matut nna Brang Mai a kawa mungga hkaw na re, yawng kabu ta lahpawk dum la ga." Ngu matut tsun u ai. Lahpawk nsen zim mat wa ai hte rau, Brang Mai a kawa gaw shawa masha ni hte tingnyang salang ni hpe galang naw da nna, azet atsang nga ai nsen hte hkaw bang wa nu ai. "Nu wa myitsu salang ji nban yawng hte e, yawng ngwi pyaw hkamja nga ga law! Ya shawng nnan buga nhtawn du Hpau Tsun, lauban kaba Jau Lau Ta hte mare salang, mare shawa ji nban yawng hpe chyeju dum hkungga jaw nngai law! Ngai madung tsun mayu ai lam gaw, daini anhte buga hpe gaw maden hpang wa lu ai gaw, mungchying asuya a chyeju hte mare salang, shawa ji nban a chyeju re. Bai nna, daini kaw nna Lunghpra bum gaw an wa ni a krai nrai sai, mare shawa yawng rapra ai hku jawm jai lang nna, htinggaw shagu mawdaw, na htu jak ni lu mari la hkra, htinggaw shagu dakkasu jawngma lu maka la hkra shakut sa wa ga ngu mayu nngai, chyeju kaba sai." Nga tsun ngut ai hte htingnut yu mat wa sai.

"Ya bai matut nna nhtawn du Hpau Tsun ga shaga na hku re, yawng ta lahpawk hte shagrau la ga!" Ta lahpawk galang bai ngoi kashaw wa ai gata hta, salang wa galang bai rawt tsap na, nsen pyi grai ja hkra marawn dat nu ai. "Hkawp nu wa hpunau ni, hkam ja nga ga law! Daini ndai Panlawng yang hta hkrum zup lu ai hpe ngai nachying kabu nngai. Ya sha Brang Mai a kawa hkaw ai mungga hpe nachying na kabu n-gun jaw nngai, Brang Mai shan nu wa ni a kasi ningli kaw hkan sa wa ga. Anhte buga na nlung zaibru, hpun kawa ni manu dan ai sutgan hkrai re. Dai majaw tara shang ai hte jai lang nhtawm, hpun kawa hpe alaw alam matut manoi hkai mat wa ga. Hkaimu hpaji masha dakkasu jawngma alaw alam maka na lit mung anhte gun hpai ra ai. Lunghpra bum na nlung shaw ai bungli dangam galaw na re. Kunghpan chyoi pra ai, ka-ni nanghpam ningtuk n nga ai, tsa chyaru n nang ai buga gaw maden la ga! Chyeju kaba sai." Nsen loi li li nga ai nhtawn du Hpau Tsun ga tsun ma ai hte, ta lahkawng hpe gayep la nna shawa dawtsa hpe shakram ai hku ganga yu wa sai. Ta lahpawk galang bai zim mat wa ai hte rau, mare salang wa galang bai rawt tsap dat sai. "Ya ngai mare salang wa kaw nna, Brang Mai shannu wa ni hpe kumhpa shagrau ya na nngai.

Ndai kumhpa gaw, Lunghpra bum ntsa na shawa ni a Wa naura bum re. Ndai bum hpe daini kaw nna "Lunghpra bum ntsa na panlawng majawm" ngu mying galai kau sai, bum ndai hpe gawnhkang na gaw Brang Mai shannu wa ni rai sai, maw maw Brang Mai a kawa ndai gaw bum gawnhkang na lakmat re yaw!" Ngu maisau pa kaba langai ya ai hte rau, shawa masha ni gaw kabu nsen hte ta lahpawk dum shakawn shagrau nga ma ai. "Wu! Kabu ya sai law!" Nga ta lahpyaw dum ai gaw dum. "Myit hkrum lawm sai law!" Nga garu nga sai. "Ya jahtum e Brang Mai hte shi a ningrum jan Hkawn Sen kawn < Shakram bai shakram) ngu ai yu ngwi hte yawng hpe shakram dat na re." Mare salang wa galang bai nsen ja ja hte marawn dat u ai. Brang Mai yan a yungwi nsen tsem nga ai hte rau, shawa yawng gaw htawngbau shupsheng nsen hte rung nga, panlawng numhtan sha lang kau rai myit hkrum htawngka jawm ka, shat jam jawm jam sha la rai, tingsa ja jan gadang wa ai hpang, nja hka shakram let gadai mung gadai a gahtawng lam de manawng ninghpa sha shaya rai hkawm mat wa masai.