SHINGGYIM MASHA NI SI POI GALAW HPANG WA AI MAUMWI
Tsun hkai ai:Pungga AWng
Ka lajang ai: Nhkum Ja Ra
Moi gaw hpan ningsang wa shinggyim masha hpe ningnan hpan shalat ai shaloi n si na hku hpan da ai. Bai nna masha Ningsen ni hpe: "Si si yawm yawm." Ngu si na hku hpan ma ai, Jan kasha ni hpe gaw: "Si si praw praw." Ngu nna hpan da sai da. Dai masha Ningsen gaw shinggyim masha ni hpe dingbai dingna jahpoi asawng jahpyek ai lam grai chye jaw ma ai. Dai masha Ningsen ni gaw si yang yawm wa ai hpe chye nna "Si poi." Ngu ai hpe dingyang galaw ma ai, si poi galaw ai shaloi shinggyim masha ni hpe ayan shaga ga re hta n-ga, bunghkaw lit mung nawng e sa gun jaw jaw rai ma ai, masha Ningsen gaw shinggyim masha mung shanhte zawn rai si si yawm yawm rai u ga ngu nna: "Anhte gaw si poi nga nna grai pyaw ga ai law, gabung re ni sha dum rai, grai pyaw ga ai." Ngu gumlau sai da.
Shing rai, shinggyim masha ni mung si mayu wa masai da. Nlung ninggam hkan sa gumhtawn hkawm, hpun kawn di hkrat yu rai si lam hkrai tam gatu nga ai sha n rai, poi mung grai galaw mayu nga ai, si mayu nna si lam tam jamjau nga ai ten hta, Hkrang hku ngu ai kaw na shalung hpun kaw galang tsip tsip da ai da, dai shalung hpunpawt de gaw tsahkai dingla langai nga ai. Lani mi, galang kanu gaw gasha ni hpe shat sa tam jaw mat ai shaloi, lapu gaw shalung hpun de lung nna galang gasha ni hpe sha kau ya sai. Galang kanu wa yang gasha ni hpe nmu nna grai pawt sai da, gasha ni hpe tam hkawm mat wa yang, shalung hpunpawt kaw tsahkai dingla jan kra taw nga ai hpe wa mu ai majaw, tsahkai dingla hpe shi a gasha ni hpe sha kau ya shadu nna sa htim achye dat nu ai. Tsahkai dingla mung gajawng ai ja Hkrang hka de rawt hprawng gumhtawn mat wa re gaw, dingla mat in sat lagaw li ai majaw, hkaraw de chyaileng bang mat wa nna hka kaw sa marit si mat sai da.
Tsahkai dingla a moimang gaw Hkrang hka hku yawng mat wa yang, shing- gyim masha ni ja da ai madim kaw wa chya daula rawng taw nga sai, shinggyim masha ni dai moimang hpe mu ai hte "Hkrak sai, ndai hpe mang ngu nna anhte si poi galaw ga!" Ngu sai da. Shinggyim masha ni gaw tsahkai dingla a moimang hpe la wa nna yawng hpe:"Si poi sa lawm, gabung sa dum marit!" Ngu lasu su masai da. Lamu de na Jan Ningsang gaw: "Shinggyim masha hpe n si na hku she hpan da ai wa, sak sumri mung n nu ai law." Nga mau taw nga sai, hpang e: "Jan ma ni e, sa yu yu masu, hpa wa galaw nga ai kun?" Ngu nna Jan ma ni hpe sagawn hkrat wa shangun sai da. Jan ma mahkawn shabrang ni gaw ginding ga de shinggyim masha ni si n si sa yu ngu nna yu wa yang, shinggyim masha ni si n si lam gaw n sa sagawn ai sha, poi kaw sa ka la rai, hpang jahpawt nhtoi htoi myi mu ai hte bai nhtang lung wa mat sai. Sumsing numshang makau kaw du wa yang she langai wa gaw: "Ya shinggyim masha si n si sa yu mu nga ai wa, dai lam rai n mazing shi ga ai law." Nga dum dat sai. Shaloi kaga ni mung: "Rai yang gaw bai sa nhtang tam ga law!" Nga nna Jan ma ni si poi galaw ai shara kaw bai sa du masai.
Shinggyim masha ni Jan ma ni hpe hkap mu ai hte grai tsang ai nsam hte: "Hpa rai bai nhtang yu wa ai rai?" Ngu hkrit let san dat ai shaloi, Jan ma ni gaw: "Anhte mana nau ka manawt kau nna tsigut jahkrat kau da ai." Nga nna nta nhku ting tam galap nga sai da. Tsawmra na hkra tam kau ai hpang she, wan jahpra gata na hka- wawn kaw tsahkai mang hpe mu masai, "AWh, ndai hpe she mang shatai nna si poi galaw nga ma hka!" Nga nna lamu de nhtang lung mat wa sai da. Jan ga de du ai shaloi Jan wa hpe: "Jan wa e, shinggyim masha ni gaw wa gaw ze ze, myi gaw hkrawk hkrawk re ai Tsahkai dingla a moimang hpe si poi galaw ma ai." Ngu wa tsun dan sai da.
Jan wa gaw: "N si na hku she hpan da ai mi, dai daram si mayu yang gaw punghpraw punglaw re dinggai dingla ni hpe si na hku ngu mu, ngu nna sa shana mu!" Nga grai pawt let bai tsun sai. Jan ma ni mung si aming sa jahkrat na hku galang bai ginding ga de yu wa sai da. Uju gahtawng kaw shawng du ma ai, Jan ma ni lai wa ai mu nna uju ni lam makau kaw dung taw nga nna: "Hpa baw sa galaw ai rai mata?" Ngu hkap san dat sai, shaloi, Jan ma ni gaw: "Shinggyim masha ni hpe punghpraw punglaw rai yang si na hku aming sa jahkrat ga ai law."Nga htan masai da. Ga dai na ai hte uju ni gaw puk hkrap marawn wa masai. Jan ma ni mau let: "Hpa rai wa sata?" Ngu san yang, "Anhte uju ni gaw baw kaw nna hkum ting hpraw ai, si ra sai ga re i?"Ngu tsun let hkrap nga masai da.
Jan ma ni bai tsun ai: "Anhte gaw shinggyim masha ni hpe she tsun ai, nanhte hpe n tsun ai." Ngu tsun shadan dan masai. Matut nna Uju gahtawng kawn lai mat wa yang, Sanyen gahtawng kaw bai du sai da. Sanyen gaw Jan ma ni lai wa ai mu jang: "Jan ma ni e, gara de sa ai rai?" Ngu bai hkap san sai. Jan ma ni shanhte hkawm sa ai lam tsun dan jang, sanyen ni mung: "N tara ai law, hpa majaw ngai na gasha Htoi Raw ma naw rai yang si mat ai rai, dai shinggyim masha ni hpe sa tsun mu, ma, salang gadai rai rai yawng si ra ai ngu nna sa tsun mu!" Nga bai puk hkrap wa masai da. Shing rai, Jan ma ni shinggyim masha ni hpe: "Nanhte daini kaw nna gaji gaba si hkam ra sai."Ngu sanyen tsun ai hku si aming sa jahkrat da ai kawn shinggyim masha ni si hpang wa sai. Rai yang, punghpraw punglaw dinggai dingla wai ai shaloi kawn si poi ngu ai hpe galaw hpang wa sai da.
