Moi, Batwa Naw Kra ngu ai makhkyu la langai mi nga ai da. Batwa Naw Kra gaw, kanu yan gawa hpe magam mu lam hta gachyi mi pyi n tau n garum lawm ai, shani shagu shan chyu gyam sha hkawm ai da. Mare masha ni tsun ai: "Batwa Naw Kra gaw, nau lagawn nna makhkyu chyu hkyu sha, shan chyu gap sha ai majaw, shi hpe num pyi gadai n kam ya sha ma ai. " Raitim, dai gahtawng na du wa chyawm gaw, Batwa Naw Kra hpe abawk sha sha re majaw, Batwa shan lu gap shagu nkawn magyi lu sha nna, Batwa Naw Kra hpe grai ra u ai. Mare masha nkau mi mung, shi hpe ra sharawng nga ma ai. Lani mi hta Batwa Naw Kra nrung pyi marawng marang rai hkra lakying ai shannga langai gap shut dat nna, dai ningma kap ai shannga a hpang lahkru hka hkan mat wa u ai, kawng marawn jahku lai re, bum gaba langai kaw, shannga lung mat wa ai majaw, shi mung grai shakut nna hkan lung wa sai, bum pungding du mahka e, agajawng sha shannga hka hkan shamat kau nu ai, shi lam nau hkawm ba mat ai hta n-ga, kawsi kya wa rai, lungrawk lungpu gaba langai mi a mahka na, dung chyai grai manu ai shara kaw, nampu nampan hkum sumpa pu tsawm nga ai hpe mu mada dat nna, dai shara kaw hkringsa bang wa nu ai.
Shi hkring sa let, shanhpyi nhpye kaw bang gun hkawm ai malut nhka hte hpaihkret shaw la nhtawm, nhka shachyi pak dung nga nu ai. Ndum shami e, shi shingdu na lungpu gaba kata kaw nna, agajawng sha hpuntang she gashaw garin hkra wu wu nga ngoi gadu ai nsen hte rau, gaba law ai mau hpa rai mi pru wa ai majaw, kara she marawng, shung shari hte prui, mashi marung she gatsin hkra hkrit gahpra kau nu ai. Dai mau hpa hkrung rai gaw masha zawn gaw san, woi lup dingla zawn gaw rai, tsawmra galu gaba rai, hkum ting aju zawn asep asap rai nna mun galu semsem tu nhtawm, myi gaw gaba din din rai, ladi gaw magaw noi hkra rai, nten gaw n tu akaw gaw bai kra re rai mi re. Shi yu hkrit ai majaw, ndan lali hte di di shachyen shading dat ai hte rau, dai mau hpa hkrung rai gaw, ga de gum dagup nhtawm, "Hkawp du makhkyu e, ram sai law, hkum gap law, ngai n dang hkam wa re ni ai law, si wa re nga nngai law! Ram sai law, nang hpa baw ra yang hpa jaw na, ngai hpe hkum gap sat law!" Nga tsun wa ai majaw, Batwa Naw Kra "Mai sa, ngai ra ai rai teng sha jaw lu na i? N jaw n ya jang gaw nang hpe sat kau na, ndai na a lungpu hpe ngai madu la kau na." Ngu tsun jang, mau hpa hkrung rai gaw "Nang hpa ra yang hpa tsun u, jaw na." Ngu sai da.
Shaloi, makhkyu wa gaw "Mai sa, ngai ra ai rai gaw: Gara ganang ga e du mayu, sa mayu yang pyen du lu re baw rai, bai nna lu mayu sha mayu ai baw rai lu lu lu sha shangun ai baw rai, ndai myu lahkawng sha ra nngai" Ngu tsun dat nu ai. "Nang dai sha she ra ai wa mi, ngai hpe ganoi gap sat kau ndai, dai na a n-gup na nang lu sha nga ai wan she lawan jasim kau u." Ngu bai hpyi lajin nhtawm, lungpu kata de gat shang wa sai ngu jang, marang htu yang hpun ai baw soyi zawn san ai arai langai mi hte yambu gasha zawn re rai langai mi la pru wa ra ai. Makhkyu wa a man e sa tawn nhtawm, "Madu du makhkyu nang ra ai rai ndai yan n rai i? Ndai gaw hpun nna pyen ai baw, pyen sam singkaw ngu ai re. Bai ndai gaw nang hpa baw lu mayu sha mayu yang ndai yambu kaw manaw shaw sha mai ai manaw sha nhtum re." Ngu tsun nhtawm, "Nang ra ai rai jaw sangai re majaw, ndai shara kaw nna lawan nhtang mat wa sanu law!" Ngu bai hpyi nyem u ai, makhkyu wa gaw manaw sha nhtum kaw na shi ra ai lu sha manaw sha chyam yu nna, hkrak sha lu manaw sha jang myit dik myit pyaw ai hte nhpye kaw bang kau nhtawm, pyen sam singkaw bai hpun dagraw la nna pyen chyam yu ai hte pyen mat wa nu ai.
Dai shani kaw nna makhkyu Batwa Naw Kra gaw, pyen chyu pyen hkawm, manaw chyu manaw sha let, shi ra ai hku pyen lu, shi lu mayu, sha mayu ai baw lu lu lu sha nna nga pyaw mat nu ai. Shi gaw ndan la-li sha gra, nhpye n-ga sha hpye rai, shani shagu pyen chyu pyen hkawm, kawsi jang manaw sha n htum kaw na lu sha manaw sha rai, mungkan gawan hkawm mat wa yang, grai hkikhkam ai hkawhkam hkaw hpe lamu ntsa kawn mu mada nna, ga de pyen shanyem hkrat wa yu yang, hkawhkam hkaw na nampan sun kaw, nampan di hkawm nga ai tsawm dik ai hkawhkam Nang shayi hpe sa mu hkrup nna, yu tsaw yu ra marit wa rai, gala uhkai magra rim ai zawn gra di hkawhkam Nang shayi hpe hta hpai pyen mat wa sai. Hkawhkam Nang shayi hkrit gajawng nna, ahprut ahprat rai gadau wa jang, makhkyu wa tsun ai: "E tsawmhtap shayi Nang gasha e, hkum hkrit, nang dai zawn rai gadau yang, ngai nang hpe tat kau dat nna gaman kaw hkrat si mat na ndai!" Ngu atsawm tsun nyem yang she, hkawhkam Nang shayi gaw azim sha hkan nang mat wa sai. Shan gaw tsaw dik ai Majoi shingra bum a tsawm dik ai lungpu gaba kaw wa pyen yu hkringsa nga masai.
Makhkyu wa, Nang shayi hpe "Ngai gaw shinggyim masha she rai ngai, ngai nang hpe tsawra nna woi mat wa ai re, nang hpe tsawra mat ni ai." Ngu tsun ai. Raitim, hkawhkam Nang shayi gaw shi hpe nat shadu nna hkrit chyu hkrit ai hta n-ga, shi hpe hkawhkam hkaw de lawan wa sa na chyu tsun u ai, raitim, makhkyu gaw shi hpe nau tsawra ai majaw, n kam tat da nu ai. Shan wa hkringsa ai Majoi lungpu gaw tsawmhtap ai hte lamu marang, nhung laru n du lu ai shara rai nna, dum nta hte bung ai lungpu rai nga ai, makau grupyin hkan nampu nampan hkum tsup hkra pu abya shajang ai majaw, marit maroi tsawm hpa ni hpring chyat ai ginra rai nna, makhkyu wa gaw lam shagu hta myit dik myit pyaw mat nga u ai, raitim hkawhkam Nang shayi gaw, shi tsawra ai la hte n rai nga ai re majaw, myit dik myit pyaw na lam n nga nga ai. Dai majaw, shani shana makhkyu wa a lata na ganing di lawt lu na lam chyu myit sumru nga u ai. Batwa Naw kra hkam tawn ai mahkam e lu ai u hte maren rai mat sai majaw, ntsa lam makhkyu wa hpe grai tsawra masu nna, hprawng na hpaji lagu nyan nga u ai.
Lani mi hta, shan nga ai lungpu lawu yang, grai preng grai tsaw nna tsawm la ai nampan hkye nampan hpraw myu lahkawng sha pu ai hpun langai hpe mu ai majaw, hkawhkam Nang shayi gaw, makhkyu wa hpe mani sumsai hte "Agu e, agu woi nga ai Majoi shingra bum shatung wa pyaw dik ai, nye matu myit dik myit pyaw shara hkrai rai nga ai, nang ngai hpe teng sha tsaw ai rai yang gaw, le ra hpun kaw na nampan ahkye hte ahpraw di la nna abaw kaw kai ya rit le!" Ngu u ai. Shaloi, makhkyu wa na gabu let: "She mai law, agu a ganam e, nang sha ra jang htaw lamu na shagan pyi di ya gwi nngai." Nga, nampan di sa wa nu ai. Hkawhkam Nang shayi gaw, makhkyu wa nampan hpun de, nampan di lung wa ai hte, makhkyu wa a pyen sam singkaw hpun la nna, "Agu e, naw wa mat sai yaw, dai nampan di la nna myit shapyaw la nu yaw!" Ngu kau da nhtawm pyen mat wa sai da. Hkawhkam Nang shayi pyen mat wa nhtawm bai gayin pyen wa nna, "Nang zawn san ai la anya, la manya e, dai kaw hkraw si nga ta nu yaw!" Ngu gayin asang kau da u ai da. Shaloi makhkyu wa ma-ja hkan jahtau yang, n hkring ai pyen mat wa sai majaw, nau myit yawn mat ai lata, nampan hpun kaw nna gumshut hkrat mat wa nu ai. Raitim, Batwa Naw Kra myit hpe alawan awai la nna, hpun kaw chyit chyit noi let, bai sumru yu ai: "Hpa mi byin yang byin, htawra nampan lahkawng a majaw, num hte pyen sam singkaw tat shamat kau sai, ganing mi raitim, nampan yan hpe lu di la hkra naw shakut na." Ngu, bai gumhpyau lung wa nhtawm, nampan ahkye hpe shawng di la nna, "Nye a num she tat kau hkra re nampan nang wa, gade wa manam pyaw nga nta?" Ngu manam dat nu ai.
Shaloi, shi a ladi agajawng sha galu she galu wa nna, aga de pyi gayan taw wa ai majaw, mau gajawng mat nu ai. Batwa Naw Kra gaw gashawt taw ai wa a dung shanaw nga ai hku "Shoi, byin mayu ai hku byin sanu ga." Ngu myit shatawng kau nna, nampan hpraw hpe bai di manam dat nu ai. Dai shaloi, shawng noi galu taw nga ai ladi, alawan wan rai nhtang htun bang mat wa, mi na zawn rai mat sai. Shi ga de angui sha gumshut yu wa nhtawm, hkawhkam Nang shayi shan nga ai Majoi lungpu de bai mahkyit lung wa nna, lungpu mahka na lunghkrung ntsa e wa mau dung nga let, ngai gara hku ganing rai sana i? Ngu myit sumru yu u yang, manaw sha n htum mu dat nna, num ndai shi hpe n tsawra tim, matsan dum ai myit gaw naw rawng nga ai ngu, chyeju bai dum nga u ai. "Ngai hpa mi byin yang byin, nye a tsawra jan kaw she hkan yu wa sana." ngu myit let Majoi lungpu kaw nna yat sha noi yu hkrat wa nu ai.
Rai yang, lunghpra kawn yu wa na matu ruyak dik nga ai, lama jum shut nna di hkawn mat wa yang, asak si sum mat na chyalu sha re. Shi noi yu ai nlung bum gaw, sanyen a marung zawn, tinggren nna shu nba kaw gabye ai zawn nga, manu mana jamjau nga ai. Raitim, Majoi lunghpra kaw nlung shanam hte pantsun tu ahpra ai majaw, shi a gam naw gaja ai hte maren, yat yat sha noi yu wa u ai. Shi gumshut gau yu wa ai nlung pai hkra mada dat yu yang, shi pyen hkawm ai shaloi na bumlang zawn baw she sin ai krung sinwa hkrai rai nga ai. Raitim, shi gaw nhpye n-ga, ndan la-li hte manaw sha ndum hpe sha manang shatai nna, lani mi lahkam hkam sha ganawt gau mahkyit yu wa u ai. Batwa Naw Kra shani shagu nsim nsa manaw sha n htum na lu sha manaw sha let, shakut shaja yu hkrat wa ai majaw, hpang jahtum Majoi bum lagaw kaw du yu wa nu ai. Bum lagaw du sai ngu tim, simsa myit pyaw na lam rai n nga nga ai. Hpa majaw nga yang, pyen sam singkaw n lu mat, lagaw lam hte nam maling mala hku lai hkawm wa na matu, nam na matse labye ni hpe hkrit tsang maja ra nga nu ai, raitim share ninghkring rai nga ai makhkyu wa gaw myit n htum ai, nyan ladat hte n-gun dat nna awngdang lai di mat wa lu nu ai.
Batwa Naw Kra bum pa layang, hkaraw nhkap, maling mala ni hkan sanit matsat ning jan hkawm yang she, hkawhkam Nang shayi nga ai hkawhkam hkaw de bai du wa sai hte maren, hkawhkam hkaw de lu shang hkra nga nyan hpaji myu myu daw nna, masu ang ai kaw masu, mayun makoi rai, hkaw kata de shi a nja jan hpe tam na matu, shang wa nu ai. Hkawhkam hkaw kata hkan nja jan hpe mayun tam hkawm nga yang, hkawhkam Nang shayi gaw, shayi gawk e, ja hkawot hpaw tawn nhtawm, lai mat wa sai sanit matsat ning jan na lam ni hte shi ganing rai lai mat wa yu sai shara Majoi lungpu pe bai myit sumru yu nna, makhkyu wa hpe matsan dum ai myit rawng wa nga u ai. Shi myit ai "Makhkyu wa gaw ganing nga tim, Majoi bum ga e nga nga na re." Makhkyu wa Majoi bum kawn lu yu wa na n shadu ai majaw, matsan dum ai rai nga u ai. Shi shawng shana na yupmang hpe bai myit yu nna, grai marit masin nsi da nu ai. Dai shana na yupmang gaw: Makhkyu wa hte shan lahkawng singkaw tu ai gumra ahpraw jawm jawn nna, shata mung de pyen lung wa ma ai. Makhkyu wa hkawhkam hpyen du hking sumraw nga nu ai.
Hkawhkam Nang shayi shi mung hkawhkam hkaw wang kata na poi shingra hta hpun palawng shakya la nna, ja lungseng arung arai ni gali, lakan ni hte mawn sumli la rai, makhkyu wa a lahpyen e dung nang mat wa yang, lamu na shagan langai mi di la nna shi a baw kaw kai ya ai hpang, Shata ga na masha ni gaw, shan hpe grai pyaw ai yungui nsen madum sumpyi ni hte hkap hkalum tau la ai yupmang mi mu nu ai. Raitim, hpang lam de bai gayin yu dat yang, shan hpe sat na nga ri nhtu hte mawng rai hkan shachyut ai hpyen ni hpe mu mada dat nna, gajawng hprang mat nu ai. Nang shayi yupmang hpe shingran pra pra mu nna, makhkyu wa bpe myit dum nga ai majaw, shi ganing re lam ni wa byin sai kun nga myit sumru nga ai. Dai ten hta makhkyu wa gaw, shi gun hkawm ai nampan myu lahkawng hpe bai masawp yu u yang, nampan dai yan gaw mi shi nnan di la ai shaloi na hte maren agatsing hprap hprap rai naw tsawmhtap nga ai, nampan dai yan gaw aten gade na tim hkraw kyip ngu ai n nga ai.
Dai majaw, shi myit dik myit pyaw nga u ai, hkawhkam shayi ja hkawot hpaw tawn nna shata jan azi yu let, myiprui si hkrat nga ai shi a tsawra jan hpe nampan sumwum kaw nna sa mu mada dat nu ai. Batwa Naw Kra makoi lagyim nga ai shara kaw nna, shi gun ai nampan ahkye hpe anut shamawng dat nu ai. Shaloi, ja hkawot kaw dung nga ai Nang shayi loi mau mau re hpang, jahtau hkrap wa ra ai. Hpa majaw nga yang, shi a ladi dawng mi daram galu wa ai mu nna rai nga ai. Dai ten hta Batwa Naw Kra chyawm shim ai shara tam la nna makoi mat nu ai. Dai shana kaw nna, hkawhkam wahte hkawhkam jan, hkringjawng hkringmang ni gaw, mau ai hte hkrit ai hte rai, chyaba wot ai gaw wot, tsi amyu myu hte tsi ai gaw tsi, mandan gawut ai gaw gawut rai kyin bu nga ma ai. Hpa baw yubak tsinyam wa rai wa sai kun nga hkrit gahpra shajang mat ma masai. Batwa Naw Kra chyawm gaw, hkawhkam mare shingnawm na gaida jan a nta e manam nna nga nga ai. Hkawhkam wa shi a mungdan ting hpe ndau shabra dat ai, hkawhkam Nang a ladi dawng mi daram galu mat ai majaw, dai ana hpe gadai wa lu tsi shamai ya yang, hkawhkam Nang shayi hpe ya sha nhtawm, mungdan daw chyen mi up sha shangun na ngu shiga shabra dat sai.
Dai ndau shabra ai shiga hpe gaida jan e Batwa Naw Kra a man e tsun jahta dan nga ai. Shaloi, makhkyu wa Batwa Naw Kra bai tsun ai "Dai zawn re ana sha gaw ngai chye tsi da we ai, raitim, hkawhkam wa ga sadi n dung na hpe tsang nngai." Ngu tsun jahta chyai ai ga hpe, gaida jan a n-gup kaw nna, gade n na ai masha langai hte langai htawn tsun nna, hkawhkam wa a na kaw shang sai, hkawhkam wa gaw, hkringmang gaba wa hpe nan lit jaw nna ana tsi chye ai masha hpe mu hkra tam sagawn na matu matsun dat nu ai. Shing rai, hkringmang gaba wa gaw, na gun ai shiga hpe hka hkrat ai wa a kashun pawt manat di san mat wa yang, makhkyu wa hpe mu sagawn nna, hkawhkam hkaw de woi mat wa nu ai. Batwa Naw Kra mung shi hpe Nang shayi n chye yu hkra, shi a myiman hpe jashai kau nna hkan nang mat wa sai. Hkawhkam hkaw kaw du ai shaloi, makhkyu wa gaw "Ngai teng sha lu tsi shamai nngai, hkawhkam wa nang ndau shabra ai hte maren, na a ga sadi shatup lu na i?" Ngu san shakyet jang, hkawhkam wa shatup na nga ga sadi jaw nu ai. Dai shana Batwa Naw Kra hkawhkam Nang shayi yup ai gawk de shang nna, angui sha naw jahta chyai rai, loi hkuhkau wa jang she, shi a nampan hpraw manam shangun nna, galu noi nga ai ladi hpe tsi shamai kau ya nu ai.
Dai hpang, Batwa Naw Kra hkawhkam Nang shayi hpe san yu u ai: "Ya tsawmhtap shayi nang gaw, mi shawng e nang tsun lai wa ai hte maren, shawng de nang hpe rim hpai mat wa ai makhkyu la wa hpe grai n ju nga nni?" "Mala la n ju ai gaw n re, chyeju madu langai mi chyawm rai nga ai. Nang sara tsun ai hte maren, la dai hpe ngai n ju ai lam gaw teng ai, raitim, shi ngai hpe dai zawn shapoi woi mat wa ai lam hte, shi hte rau dai marit maroi tsawm hpa pring tsup ai Majoi bumdung e wa nga sai lam chyawm gaw, nye a prat hta malap kau n lu na sai." "Ataw, makhkyu wa, shi a dum nta de yi bai lu wa sana kun?" "Ganang lu wa sana law e, dai shara kaw nna yu hkrat wa lu ngu ai lam gaw teng sha n mai byin ai. Ngai myit dum dum re, makhkyu wa gaw dai shara kaw na n yu n hkawm ai sha, prat tup shi a manaw sha n htum na shi ra ai lu sha sha manaw sha sha rai nga nga sana nu ai ngu nyit dum nga nngai. " "Ataw, makhkyu la wa dai shara kaw ganing rai nga nga ai lam hpe nang ntsa hku pyen nna wa gawan hkawm yu yang n mai a ni?" "Mai gaw e, ngai mung makhkyu wa ganing rai wa nga nga ai kun ngu chye mayu nna, galang mi wa pyen hkawm yu yang n mu ai, lungpu kata de mi rawng nga ngu myit let bai pyen nhtang mat wa nngai. " "Tsawmhtap shayi e, nang a myit hta dai makhkyu la wa lama shi shakut nna, bai du pru wa yang nang gara hku myit na kun?" Nang shayi, tawmra mi naw mau la nhtawm, nsa gaba shaw let "Ganing ngu n chye tsun mat ni ai, hpa majaw nga yang, ngai shi hpe hprawng kau da tim, ya gaw shi hpe bai matsan dum sai, shingran mung amu nga nngai.
Raitim, nu wa ni nang sara hte ga gadi tawn kau sai majaw, shi hpe matsan dum tim n mai dum sai lam sha rai mat sai n rai i? Sara e, daina she nye a myit ru ai lam sim mat nna, myit bai pyaw lu ni ai law!" Ngu u ai. Batwa Naw Kra bai: "Dai rai yang, lama ngai dai makhkyu wa rai yang, nang ganing di na law!" Ngu san nhtawm, mi na shi a myiman raw di madun dan dat nu ai. Shaloi, Nang shayi ndum ndam nga wa ai hte, makhkyu wa a lahpyen de htim ahpum bang wa ai lata, gabu myiprui lui hkrat wa ra ai. Batwa Naw Kra gaw: "Hpa rai hkrap nga nta? Hkum hkrap, byin ai lam yawng gaja ai hkrai re, an a matu grau nna htap htuk ai lam byin pru wa na rai nga ai." Ngu nyem nga ai. Nang shayi Batwa Naw Kra hpe: "Nang gara hku ganing rai nna, ndai shara de bai du pru wa lu nni?" Ngu san ai shaloi, makhkyu wa: "Nye a tsawra nja a myit wa, ngai hpe gade ruyak jamjau ai lung hkrung lunghpra hkan jum noi na shara pyi n nga tim, na a tsawra shawang myit kaw noi nna du yu wa ai rai nngai." Ngu jang, Nang shayi bai tsun ai: "Gu e, nang sha n du pru yang gaw, ngai prat tup ladi galu noi goiwat nna nga yak chyum sha si na rai nga ni ai, nang hpe hprawng kau da ai mara a majaw wa rai sam sai!" Ngu lajin maroi ai ga tsun u ai.
Dai hpang, shan gaw myit ngui myit pyaw hte, samram nhtoi htoi, u lat hpunggam goi ai pyi n dum hkra jahta kau ma ai. Hpang jahpawt jau jau, hkawhkam wa hte hkawhkam jan gasha a ladi mai sai kun nga sa yu ma ai, gasha a ladi galu noi ai mai mat ai majaw, grai gabu ai hte tsi sara hpe chyeju dum ga tsun nga ma ai. Hkawhkam yanla num sha shingtai sha lu ai majaw, nachying tsawra nja la nga malu ai. Raitim, gasha jan hpe nam masha wa kaw n kam ya sha nna myit ru nga yang, gasha jan kanu yan gawa hpe ndai tsi sara gaw shawng de shi hpe rim shapoi mat wa ai wa nan re lam tsun dan nhtawm, ya gaw ladi tsi shamai ya sai majaw, shi mung myit dik myit pyaw mat sai lam hkap tsun dan u ai. Hkawhkam wa gasha jan a ga na ai hte pawt kap rai, galang ta Batwa Naw Kra hpe gyit la nhtawm, lamu ga jarit de sa sa kau shangun sanu ai. Raitim Batwa Naw Kra gaw myit n htum, si n hkrit re share shagan myit hte hkawhkam hkaw de bai nhtang shang wa lu na matu nyan hpaji amyu myu daw nna bai nhtang shang wa nu ai. Batwa Naw Kra Majoi bumdung na lunghpra hte sung la ai krung sinwa, nam mali, matse labye hkan sharaw ni hpe pyi n hkrit hkra shakut yang she, hkawhkam Nang shayi kaw du wa lu nna, shan a tsawra myit hpe tsawm mari mara bai matut la lu ai rai nga ai.
Shi gaw hkawhkam hkaw wang kata de mayun shang wa nhtawm, shi gun ai nampan hkye hpe shara magup anut shamawng hkawm mat wa nu ai. Hpang jahpawt, hkawhkam hkaw ting na masha ladi galu mat ai hkrai rai sai. Nampan grau manam hkrup ai ni a ladi grau galu rai nga masai. Hkawhkam yanla a ladi tsawmra ra goiwat noi nga sai. Nang shayi gaw hkawhkam wa Batwa Naw Kra hpe tsan tsan de sa shadam kau ya ai chye nna, pyen sam singkaw hte hkan tam na myit nga yang, hkaw htingnu ting na masha ladi galu mat ai hta n-ga, shi madu a ladi mung galu mat ai majaw shinggan pru hkawm na gaya mat nu ai. Hkawhkam hkaw ting na masha ni gaw, tinang a ladi masawp yu, jamna yaw yu rai hkrap garu rawng nga masai. Batwa Naw Kra rai jang, agatsi sha gaida jan a nta kaw myit mi azim sha sa mayun nga nga nu ai. Hkawhkam hkaw ting ladi galu ai masha law malawng rai mat sai.
Dai majaw, hkawhkam wa myit htum nna, shi nja la ai gasha shingtai hpe Batwa Naw Kra hpe ya sha kau na hku myit dawdan kau sai hte maren, ladi n galu ai masha hte shi a Nang shayi hpe shalawm dat nna, shawng de na zawn ga gadi n gashai sana hta n-ga, shi a hkawhkam aya mung gahkri Batwa Naw Kra hpe ap ya na lam ni tsun shalawm hkra di, Batwa Naw Kra hpe sa tam, sa tau la na matu grai hkikhkam ai hku, dat gasa ni hpe shangun dat nu ai. Batwa Naw Kra kaw du ai hte, hkawhkam Nang shayi mung shi a tsawra ai makhkyu wa hpe: "Nu yan wa a shawng de na n gaja ai myit masin hkum matsing ya rit, ya daini nu yan wa myit malai masai. Anhte nang hpe woi la na matu, nu yan wa sa wa shangun ai re, ngai mung nang hpe shut ai yubak lu ai majaw, ladi bai galu mat ni ai, hkawhkam htingnu na masha hte nu yan wa mung ladi galu ai hkrai hkrai, anhte nta masha yawng hpe nang matsan naw dum la rit." Ngu tawngban sai, Batwa Naw Kra gaw shi a manaw sha n htum yambu hpe gaida jan hpe kumhpa kau da rai, Nang shayi kaw hkan nang nna hkawhkam hkaw de nhtang wa nhtawm, hkaw ting na ladi galu ai ni hpe wa tsi shamai kau ya nu ai. Batwa Naw Kra dai shani kaw nna hkawhkam hkaw kata kaw shi a tsawra nja Nang shayi hte myit pyaw myit dik ai hte prat tup jau lup rau nga lu manu ai.
Sawk ka ai: Marip Hpautsen Tawng Htawk
ka lajang ai: Ja Ra
