Hkarangleng lam, mare kaba langai a shingnawm, Myen Bukdaq makam masham Hpung ni masat da ai lupwa kawng gaw, mare na ka-niya ni a machyu shanu chyai ginra, shim ai shara laksan lawk langai mi zawn nan, rai nga malu ai. Yumaya masha ni a matu, lupwa ngu ai laksan shara gaw, shanaq aten hkum tsun, shani aten e pyi n ra yang, kadai majoi n sa gwih ai, sa n manu ai shara, rai nga ai. Hpa majaw nga yang, masha chyahkrung ni hte rau n mai nga mat ai, masha chyasi ni a wenyi n rawng sai hkumtsawp moimang guntawng ni hpe sa sah tawn, lup makoi kau tawn ai shara rai nga ai majaw rai. Kade n chye sa wa ai numla wenyi ni matsan mayan mau mau hkye hkye rai, majoi she kangu dung jawng hkawm nga maq dawng! Kadai n gawn mat sai lupsunghku dingsa htu alai nna masha mang nnan bai lup na shaloi, mang dingsa ni aq garai n tsam mat ai hkriqhkrawq lagaw lataq nrut nra, abaw pungkum ni hpe shawq kabai ayai da chye ai majaw, lupwa ting samuq samaq nga ai manam shagram bat hte sa tawn kau da ai si mat ai ni aq buhpun labu palawng dingsa ni hpe nam na dusat kaji ni ginsup hpa shatai, majoi sheq adun ayai amya tawn nna mung, laning mi kalangsha nan hkyen jasan ai lupwa jasan jaseng galaw ai majaw, shawa lupwa ting ting nam sumup gumwum sumwaw atsip atsap aru arawn anoi abya yu hkrit na hpa chyu, hpring lim nga ai hte lapu, lapawp, awawt, shingtai sumbraq, tuk rawng ai hpan, hkrung kanu ni rai nga ai, n-gawgawk, waq-nduyan, lagat sumhpa ni kade sheq sawng na shara, dingla ugut gu nna nhkah mun tsip tsip re ai zawn sheq noi abya nga ai kaba dik ai lagat hpun hpunnu hpun-gam ni mung, tsu-numla ni n shanu majawq tim, shanu majawq na zawn re ai dai lupwa kawng ngu ai gaw, mazuq mazaq n tsawm hkrit si na zawn, majoi sa chyai na ginra n mai byin nga ai.
Raitim mung, mi tsun ai dai wanleng lam ntsa na mare kaba aq Myen lupwa gaw shinggyim masha hte n bung mat sai ka-niya ni aq shimlum htaphtuk manuh dum dik ai yup-ra dum nta nga shara sheq, tai nga maluq ai. Tsawm tsawm san ai ka-niya yanlar, manap myi mu n mu nawq rai nga yang, dai lupwa Kawng kaw na pru wa nna, lapwa lam numshe na mazaq sumpum kaw hpri chyinghki kap ai shingnah langai hpraq lang nna, plastic ni hkan achyawq htaq nhtawm, shingma e baq dah ai buri shaje kaw anin bangbang rai, shan a kanbau bungli majing hpe atsam dat galaw shakut nga ma ai. Jan loi mi law wa sai ten hta, buri htungpah mung tsumra tit wa sai. Shaloi, hkumgawng li mahkum rai nga ai madu jan gaw, ahkum sha-myan let, "Agah! Ah Tang, ngai kan manai machyiq ai adingding rai wa reng nga ai le. Shat gaw kawsi ai hte kaning di na?" Maduwa Ah Tang gaw, tsawraq dik ai tinang a myit-rum manang jan Mai Mai (Bawk Mai) hpe chyan ahpum lah nhtawm, "Tsawraq e, Rat Shawng hpang de wa ga i?, Ma aq myiman tau nna, an hpe matsan dum la dam nhten!" "Ah Shawng hpang de n wa ai, shi an hpe si ten du hkra kabai kau sai nga nna gawt shaleq da ai sheq rai yang meq, tsirung de... Mungshawa tsirung de sheq sa gaq." "Tsirung sa na jarik n lu ai meq, kaning rai sa na law? sa-sa-sa Rat Shawng hpang de..." "N kam ai law!" "Rang!, kaning di na?" "Ngai myit da ai langai nga ai; nye manang jan Htoi Ja kaw garum sa hpyi ga; shi galoi raitim, garum la na nga ai." Ah Tang, Mai Mai yanlar dai jahpawt nah shan-yan aq koiyen n lu ai shinggyim shangai chyinghkai lam hpe shan aq myit hta tengman tsawraq sadiq dung kangkaq nna, Yesu aq n-gawq nwai tsawraq damlada shawang myit kaba rawng ai ngu shaduq ai manang jan Htoi Ja e ra mara gumhpraw hte luqshah hpun nbah ni garum ningtum jawq ya ai majaw, mungshawa tsirung de myiman n kaji ai sha du dep nna, mungkan-gah de pra sa wa ai shan aq saitung saipaq shadang lasha ma alat Gam Gam hpe n yak ai sha, shaprat lah lu maq ai. Ndai lam ni mahkra gaw shan hpe kabai da tim, kanau shingtai re ngu tsawqraq laq ai hte kanu kawa ni aq myiman tau let, hkam sharang nga ai kana myit-suh Srn. Hkawn Shawng lajang ai lam ni rai.
Mungshawa tsirung e hkum san ai 4 yaq rai sai hte, tsirung yuq na ahkangh lu sai. Shanih shanaq nsim nsaq hkrap ai Ma chya-ngaq yannuwa ni tsirung yuq sana re majaw, makau grup-yin na Ma Kanu Kawa ni kabu shajang nga masai. Lupwa kawng e sha, yup nna nanghpam luqsha hpe mahtang shawng numshawn dat ra ai shanlar wa mi, machyangai hkalung hpe gara de woi wa hkyen ai i?... Ah Tang gaw shannuwa ni aq tsupmi tsupnawn bang dah ai kaq hpe htaq lang, Mai Mai gaw Ma-ngaq hpe pawn rai, tsirung gawk na pruwa hkyen nga maq yang, n myit mada ai sha manang jan Htoi Ja e Mai Mai aq Kana Shawng (Jawng saranum Hkawn Shawng) hpe woi sa wa raq ai. Srn. Hkawn Shawng aq myiman hpe maram yu yang, Mai Mai yanlar htaq machya-ngaq hpe grau majen ai myiman nsam hpe adan aleng mulu nga ai. Mai Mai gaw kana shawng sa wa ai hpe kabu ai hta grau nna, shaluh ai de shanang nga ai lam, shiq aq sai n rawng ai zawn hprawhpraw san nga ai hpe mu lu ai. Srn. Hkawn Shawng gaw kanau Mai Mai, shi hpe yaq du hkra nawq pawt shaluh nga ai nsam mu jang, Machyangaq hpe yu nga ai myitum yan hpe dawm la nhtawm, kanau Mai Mai hpang de htawt mada let, myiman lasah galaw shajaq kau nna kaga masha ni, na n nah nga ai nsen hte anyam wu dat ai. "Ma Mai, nang yaq du hkra nawq shaluh nga nni? Ma ndai shangai sai lam Htoi Ja wa tsun dan ai kaw na ngai shanaq shagu Nu yan Wa hpe yupmang chyu mu nna sa woi la ai sheq re yaw. Nye myit hku sha nga yang, nan hpa mi tai tai, ngai ahkyak shatai na n re, chye i?" Ah Tang gaw Karat hpe agam laq ai nsam hte yu let, chyeju dum ga tsun dat wuq ai. "Chyeju Kaba sai law Rat Shawng e, Rat Shawng aq chyeju n malap na gaq ai." Srn. Hkawn Shawng, Karat yan kanau hpe myi n-geng hku kalang praw rai yu dat ai hte rau, Htoi Ja mung Ah Tang hpe myi Kalangmi grip dan let, n-gun jawq dat wuq ai.
Dai ten hta, machyangaq hkalung Gam Gam gaw zim nga ai kawq na shamu shamawt rai; ajaq awaq hkrap amyah bang wa raq ai. Srn. Hkawn Shawng maram yu nga ai gaw, machyangaq aq laklai ai kyang hpe nan, rai nga ai. Shanih tuptup hkrap nna shanaq shagu zim nga ai Ma, Kan nbung machyiq ai kun? Kanu yan Kawa Ma kan hte nawng, matsan mayan garen gari rai, woi chyalang hkawm ai majaw, hkritung nbung ana sheq lu mat sam ai. Raitim, Kade n naq yang, Srn. Hkawn Shawng mahtai lu sai. Ka-niya Karat Ah Tang gaw shanih tuptup U kanu zawn mazaq sumpum hkan, gumhpraw ahpre tam hkawm nna shanaq shagu shanlar jawm nat marawp na matu, nanghpam tsi mawan shadung ni lah wa nhtawm, tsihkrung tsinan majing hku sheq jawm langlang rai maq ai kawq machyangaq kasha mung, hkritung kawq nah hkan marawp man sai re majaw, yaq mung, dai wanhkut bat kut nna sheq rai nga aq hka! Dai majaw, shanih tuptup hkritung kawq nah tsi samaq hpe sai hta rawng matsing mat sai machyangaq gaw dai samaq n lu marawp jang, nchye nkaw nga wa-wa rai sam ai. Shingrai, hkrap nna chyu nga ai sheq, req hka!
Shanaq machyishim ai ten hta, kanu yan kawa tsi dai lu jawm marawp rawp rai jang sheq, Ma mung dai nsaq hte yup pyaw matwa wa re ai masa hpe kanu tung Srn. Hkawn Shawng e masam maram matsing dah lu nuq ai. Shingrai, Srn. Hkawn Shawng gaw kanau shingtai, Karat shingtai, Kasha shingtai yannuwa ni aq shawnglam hpe sumtsan mu nna yup n pyaw, shah n mu, myiprwi sha pru rai nga nuq ai. Srn. Hkawn Shawng hte Mai Mai shannau gaw, Kanu Kawa n lu sai sha n-gah, mi nah kahpu kanau mung, kaga n lu ai re majaw, Karat langai hpe sha Kam ai mung, maka n kap. Moi gaw Karat Ah Tang mung, masha kaba suthtih kasha re ai wa, yaq gaw chye hte maren, kadai pyi hkye lah n lu ai nanghpam luqshah aq mayamdu sheq, rai mat sai rai. Kalanglang Srn. Hkawn Shawng myit yu ai; Nu Wa ni htawng kau da ya ai ndai dum ntah htingbut htingra hpe dut nna shannau garan lah kau na i? Shing ngu yang mung, ka-niya yanlar sheq re gaw, kabu gara lachyum n pru ai kani nanghpam hta nat shamaq kau na gah lahtum n shut rai. Yaq ndai zawn, Machyangaq bai shangai tawn re ai gaw, shan Kanu Kawa hpe ntah masha jahpan n bang mat sai raitim, Ma aq myiman tau nna Ma hpe lu ging ai sali wunli garan ya mai ai ngu, Ma myiman madun nna hkalem lah na matu, shan lahkawng myit hkrum nna Ma jawm lah ai sheq, rai nhten! Kana shawng aq kya laq ai myitmasin hpe chye ya ai Ka-niya yanlar aq bawnuq majing sheq, rai sai. "Hum!" Srn. Hkawn Shawng nsaq kaba shawq dat wuq ai. Shi tengsha myit sumru magang, myit ruq magang, rai nga wuq ai. Kaning di na? ... Srn. Hkawn Shawng shiq aq kanau shingtai, shingtai, kasha mung kaga n lah sana masai majaw, kasha shingtai rai mat sai; ndai yannuwa ni aq matu, shanih shanaq nsim nsaq myit-hki litli myitpuq myitbah, yup n pyaw shah n mu rai nga yang, n myit mada ai shawnglam majanpa de na kajawng kajah shiga kahtet kamawt langai mi n sawq shagah ai sha, maqjah anin anawq rai, shangbang wa raq ai. "Du Myu Awng San, shawnglam majanpa e majan awng padang lu sayang sheq, Ka-ni jahpraw htuh shut nna majan ginra e nan, kalangtaq si lashan larawk mat sai" daq. Srn. Hkawn Shawng langai, baw pungding e nannan, ginhtawng chyagagak e muq achyeq bun ya dat ai hpar, myihprap she galam ai pyi mu kau dat hkra, hkamshah kau dat nuq ai. Shingrai, Srn. Hkawn Shawng myit hpe n sharai lah lu ai hte mungkan sheq kri gayin mat hkra, baw ginsin mat wuq ai. Minit 3 daram aten hta, shi gaw shiq aq baw hpe lataq lahkawng hte, jumtek madiq dah nna gadawng matwa sai.
Dai ten hta, shatgawk e shi shah na Ma sha-up kanu ni shah ai bawq luqshah galaw shah nga ai Mai Mai na kajawng dat ai hte, rapdawq de kagat pruwa yu yang, "Hin!...! Ah Shawng kadawng taw nga ai. Ah Shawng, Ah Shawng, Ah Shawng, ..." Ah Shawng n shamu ai. Bawk Mai Kaning nan, n chye di, maduq wa Ah Tang mung, n nga. Kalangtaq tsawraq manang jan Htoi Ja hpe sheq lawan ladan gan myit dumh dat sai. Dai majaw, Ah Shawng aq makau e taw nga ai phone htaq lang nna Htoi Ja hpe shana dat sai. Aten kadun laman e Htoi Ja sengke hte, du rau raq ai. "Mai Mai, Ah Shawng gara hku byin ai tah?" "Gara hku byin wa sai kun? Dai shawng e sha, phone shaga nga ai rai luq ai. Ngai mung, "Rung" nga ai nsen na nna sheq, kagat shang wa ai rai, nngai. Dai hpawt, Ah Shawng zengsha, rai saq. Ah Ja kaning di na?" Htoi Ja gaw Ah Shawng aq lataq laseng hpe jum yu, sindaq hpe nar hte shachyawq nna madat yu rai nhtawm, "Mai Mai, Ah Shawng aq phone lah dat yu uq. Phone nawq jep yu gaq." Nyan htauli htaular rawng ai Htoi Ja gaw Srn. Hkawn Shawng aq phone hpe jep yu wuq yang, hpang jahtum shangwa ai phone Number htihkum hpe mu sai. "Hello! miyet Srn. Hkawn Shawng hpe Phone matut wa ai ndai phone maduq myitsuh wa gaw, kadai rai kun i? Miyat hpa bawq shiga shana dat ai kun? Chye mayu nna le..." "Oh! ngai, Srn. Hkawn Shawng aq sumtsawq wa Du Myu Awng San aq manang wa 'Mung Jet' rai nngai law. Nye manang wa Du Myu Awng San aq yawnhkyen shiga shana dat ai re." "Oh! re i? Gara hku byin mat ai kun? loimi sanglang dan rit le... Ah Shawng aq kanau ni rai gaq ai. Yaq, Ah Shawng akajawngsha htan malap mat nga ai." "Oh!..., Oh!! grai sorry wa rai sai.. law. Du Myu Awng San majan gasat grai byin ai re wa! Majan dang ai hpang mare de gan wa na ahkangh hpyi ai majaw, 2 yaq ahkangh lu wuq ai. Manaq shi bai du wa yang, daihpawt jaujau shawnglam e taihpyen wa aq laknak hte n re sha, shi aq nanghpam tsi sa-myit laknak hte, shi nan achyawq lah nna hkalaq si matwa nuq ai shiga shana dat ai, rai nngai. Grai shalan la muq yaw. Shan grai tsawraq hkat maq ai re."
"Aw!" Htoi Ja aq mau ai nsen. Htoi Ja gaw larau ladau rai nna shaprai 3 modo kaji shagah lah nhtawm, Srn. Hkawn Shawng hpe tsirung de woi matwa sai. "Mai Mai, Ah Shawng gaw, sai tsaw ana hte salum ana lu ai re daq. Aten dep lu hkye lah sai hku re. Nan mung, wa gawan mai sai." Tinang aq bungli majing zawn, shanih tup Htoi Ja nhtiq nhtang kyin hkawm wuq ai. Shanaq deq Srn. Hkawn Shawng hpe sin lajang ya na masha sawq kau dah ya nhtawm, ntah de gan kagat wa let, ndai zawn Mai Mai hpe shiga wa jawq dah nga ai. "Ah Ja, Ah Shawng aq sumtsawq wa nanghpam gajam ai nga shiga n na gar ai re wa! Gara hku byin mat ai kun i? Grai sheq myit-suh shaduq ai wa mi! Ah Shawng hte n hkrum ai mung, majan bai byin ai kawq nah nga yang 3 ning jan masai rai saq. Dai majaw, Ah Shawng mung, shiq sumtsawq wa aq lam n chye mat sam ai. Shiga kahtet na ai hte n dang hkam mat ai rai na re i! Agah!." "Um! ngai mung, dai hku shaduq dah weq ai.
Majan nnan bai byin wa ai hte rau, dai Du wa, Myen du kaba hpe pyi jahkrung lu kamuq rim dun dah ai nga sheq, mying kaba buq ai rai nga le. Shaloi hkan, Ah Shawng pyi manang ni aq man e majoi sheq arawng lu, myiman pa buq ai rai saq." "E..le...e... Ah Shawng hpe grai matsan dum ai. Kanau langai hte Karat langai sha lu ai mung hkyiya hkyigang, sumtsawq lu ai mung, ....hi..hi...shut....shut.." Bawk Mai ga shaga gayan pyi n htum ai; nep hte prawk hkrap abya dung mat nuq ai. "Mai Mai e, nan Ah Shawng hpe matsan dum teng yang gaw, nanghpam dawn kau gaq le... Patjasan de sa gaq; shing nrai, ngai shiga jawq kau na, shanhte hpe mahtang sa woi lah shangun na hku le..., Nan asan aseng rai n nga mayu ai i? Ah Shawng mung, grai kabu na rai nga, yaq yang nan lama nanghpam lu dawn kau ai rai yang, Ah Shawng myit bai lu awai lah na rai nga ai. Gam Gam hpe mung, shi grai tsawraq matsan yu dumh buq nga ai le... Nan mahtang sheq myit yu muq, dawqdan muq, nanghpam hte hkaq na i? Ah Shawng hte mahtang, hkaq na i?" "Um le... Ah Ja e, an mung, grai sanpan mayu laq mat sagaq ai law, dainaq Ah Tang hte nawq bawngban yu na req." Ah Shawng tsirung na pruwa sai hte maren, Ah Tang yan Mai Mai mung Ma Gam Gam shata 6 hpring jang, Patjasan de ka-ni nanghpam dawn kabai kau sana hku, dawqdan kau masai majaw, Ah Shawng yan Ah Ja myit pyaw kabu buq nga maq ai. Dai zawn, myit dawqdan ai hte maren, gajawa tengteng byin wa yang gaw, yawng e Ha-le-lu-ya Chyeju shakawn na rai. Raiti mung, gajawa tengteng n byin wa ai gaw. "Hey....manang wa, jawng sa ga!" "Hey...nang, jawng n kam lung ai i???" "Hey...hkyiya...nang le...laika n chye mayu i?" "Hey... lar wora wa, nang kaba jang hpa galaw na?" "Ngai hpar galaw law, nanhte hteq nhpar seng ai mah? Ngai jawng n kam lung ai." "Hey, jawng n kam lung ai daq aw? Jawng lung yang sheq, laika chye ai gaw..." "Laika mai shah ai i? Mai shah ai bawq i?" Jahpawt hkying 8:30AM aten hta, jawng sa lam e lawnghpraw hte bu-tsit bu ai jawngma la kasha nkau mi hte buhpun palawng dingsa manggang hpe abut ayeq rai bu hpun dah ai rauram la kasha langai mi gaw ndai zawn, shadaq shaga htailai hkat nga maq ai. Laiwa laisa jawngnum kasha ni, masha nkau mi hte Srn. Hkawn Shawng ni gaw, shanhte hpe gayin yu, gayin yu rai, maram masam nga maq ai. Dai mabyin hpe n myit mada ai sha, mu hkrup kau dat ai Srn. Hkawn Shawng aq myit kraw kata hta, akajawngsha bai ju machyiq bang wa raq ai. Ma dai aq lam hpe chye mayu ai myit ni katuq pruwa ai raitim, 8:30AM jan mat sai re majaw, san shaga nga na aten n nga mat sai ai rai nna jawng lam de myit n pyaw let, matut lahkam matwa sai. Kalangmi nah laban hpang 6 yaq shanih Srn. Hkawn Shawng jawng n sa ra ai re majaw, shi nga ai mare kaba kawq nah bus jawn let, kaga mare de jinghkuq sa jahkrumh na matu, prusa wa ai. Shaloi, laiwa sai nhtoi 3,4 yaq e mu hkrup kau dat ai agang chyalang re hkiya ma hpe bai mu hkrup sai. Ndai lang gaw, Ma ndai shi hkrai lam ntsa e matsan mayan nep hte prawk rai sheq, hkrap abya hkawm nga ai.
Asak gaw 9-10 ning daram rai sam nuq ai, raitim, shiq aq hkumhkrang gaw 6-7 ning hkrang sha, nawq rai nga nna shat kawsi ai gwi damh kan zawn, garep nra lakrai Ithiyupiyah nah shanchyang ma ni zawn, rai nga ai. Dai shanih mung, Srn. Hkawn Shawng sumtsan modo daru de aten dep du ra ai majaw, Ma dai hpe shachyen shaga na aten n lu sai. Shingrai, tsawraq shawang amyit kaba rawng laq ai Srn. Hkawn Shawng gaw, bus ntsa e dung let, hkrunlam tup Ma deq aq lam chyu, myit sumru dung matwa ai ngu yang, shi aq kanau Mai Mai yannuwa ni aq teng byin matwa sai mabyin ni hpe shatlai bai lai hkrup nga nuq ai. Mai Mai yan Karat Ah Tang, nanghpam patjasan dabang de sa sana nga dawqdan dah masai majaw, hkanh karat Srn. Hkawn Shawng yan manang jan Htoi Ja grai kabu nga maq yang, lanih mi na nhtoi hta, shata 3 sha nawq re ai Machyangaq Gam Gam hte nawng, Mai Mai yan Ah Tang yanlar, ntah kawq nah mat mat wa sai. Dai shanih Srn. Hkawn Shawng, Htoi Ja hpe shana dat nna mare ting hkan tam maq ai.
Patjasan dabang de du hkra, tam ai. Mi shawng e, Srn. Hkawn Shawng pawt nna ntah nah gawt shaleq kau ai shaloi, Mai Mai yan Ah Tang sa nga mat ai Myen ni aq n sa ging ai matsat shabat lupwa kawng du hkra mung, sa tam sagawn sai. Mai Mai yan Ah Tang aq myitrum manang nanghpam ka-niya ni hte, hkrumh shagu mung, sanh sagawn yu sai. Hpang jahtum tsirung du hkra pyi, tam kau masai. Mai Mai yannuwa ni hpe tsepkawp n mu, shingran pyi n nah maq ai. Katek katak. "Ah Shawng, ntah kawq lamama masat masa mi mu tam kun? Atsawm nawq wa tam yu gaq. "Htoi Ja tsun dat ai hte Srn. Hkawn Shawng bai htang tsun ai. "Um! daihpawt, ngai shannuwa ni hpe akajawngsha tam shamat nna mau kajawng ai hte rai, hpa mung atsawmsha n tam yu shi nngai. Nang tsun ai hte maren, nawq wa tam yu gaq. Lama-mi gaw mi mu nhten!" Srn. Hkawn Shawng yan Htoi Ja ntah de bai nhtang wa ai ten gaw shanaq de hkying 2 pyi, rai sai. Du ai hte nji n-gu, Mai Mai yannuwa ni aq yupgawk de tam gasawk maq ai. Hpabawq masat masa mung, n mu tam maq ai. Srn. Hkawn Shawng aq gawk de mung, shingjut shingnawq shara shagu hte shi lu malu bang dah ai gumhprawjan du hkra sawk yu tim, hpar masat masa hkyep mi mung, n mu tam ai sha n-gah, gumhpraw mung pyek mi pyi, n yawm n mat ai hpe mu lu ai. Dai majaw, Srn. Hkawn Shawng yan Htoi Ja mau pahke sheq shawq dum mat masai. Dai shanaq tup mung, n mai yup maq ai. Shanaq Htoi Ja phone hte matut sagawn ai zawn, Srn. Hkawn Shawng mung, phone hte shara shagu sanh sagawn ai shaloi, Srn. Hkawn Shawng shiga kadun langai mi na lah sai. "Daihpawt jau e, Mai Mai shannuwa ni hpe wanleng daru e mu kau dat ai" daq. Hpang shanih shiga langai chyam bra wa sai. Hkarangleng lam ntsa e nga ai Hopin mare kawq nah Hpakant de rawt sa wa ai buhkawm modo langai lam e galau mat ai kawq, masha marai 5 si ai hta, shata 3 re Ma hte Kanu yan kawa mung, si lawm mat ai" nga ai shiga rai. Dai shiga na ai hte Htoi Ja hpe woi nna Srn. Hkawn Shawng modo laksan shap lah let, Hopin tsirung de den matwa masai. Kanau Mai Mai yannuwa ni aq n tsawm laq ai gammaka moimang ni hpe myichyawq sa mu mada yang, Srn. Hkawn Shawng n chye tsun hkra, salum bai hkrah machyiq dik mat sai hpe myit shajaq nna ra mara galaw shajin dah na ngu myit n-gun daqting tim mung, salum ana lu ai Ah Shawng gaw lahkap kya gumbaq matwa ai hte, tsap nga ai kawq kazut dung matwa let, "Mai Mai e ...hpar rai Ah Shawng hpe zingri kau dah ntah?" nga ai ga hkaw mi sha, lu tsun ai hte, Srn. Hkawn Shawng malap mat sai. "Ah Shawng myit shajaq uq ..., myit shajaq uq" Tsun nga ninglen Ah Shawng malap sheq, malap rai bang matwa sai. Htoi Ja gaw asak nawq rawng ai Srn. Hkawn Shawng hpe sheq, nji n-gu lajang ra mat nuq ai. Hopin tsirung na sarawun, saramaq ni mung, ahkyak la garum lakawn lanawn maq ai. Hpang shanih, Hopin Bugah Hkaqlup Hpung masha ni hte Mai Mai yannuwa ni aq makoi mayang lamang hpe atsawmsha galaw kau dah nna, shannu shanwa ni aq sawmrai ni hpe mung, nat kau dah na ngu, htungpah ni shawq alun yu yang, matsingbuk langai mi mu sawk ai. Matsingbuk hpe galam yu yang, hkringdat hte Phone No. ni ka matsing dah ai hpe mulu ai. Dai kawq, laika langai mi diq hkratwa ai majaw, htaq yu yang, nhtoi n shakap dah ai lawuq na laika hpe mu htih ai.
Tsawraq hkungga ai Ah Shawng,
Gam Gam annuwa ni Hpakant de Gu lauban Tu Lum kawq lung matwa sagaq ai. Ntah kawq nah ka-ni dawn yang, Ah Shawng hpe shayak shah ai tai na chyalu sha re. Gu Tu Lum kawq rai yang, annuwa ni aq matu, grau manu htaphtuk na re ngu mu mada ai. Gade n naq yang, annuwa ni myitmasin hkumhkrang mahkra, mai tsai hkamja let, Ah Shawng hpang de bai wa na yaw. Dai shaloi sheq, annuwa ni hte Ah Shawng rau prattup jawlup, pyaw pyaw re anhte aq mungkan nnan e jawm nga sagaq i. Kyu hpyi ya nga na kam ai.
Tsawraq ai hte, Kanau Mai Mai, Ah Tang, Gam Gam.
P.S/* Ndai Laika hpe annuwa ni ka-ni nanghpam patjasan dabang kawq ka-ni dawn hpangwa ai aten e sheq Ah Shawng hpe shagun dat na ngu, myit lu ai ten e ka da ai re. Ah Shawng tam shamat nna Htoi Ja hte tam kyin si na myit dumh tim, Ah Shawng hpe n kam sharuq shatsang ai majaw sheq re ngu, mara rawq ya na kam ai.
Laika ndai jawm htih ngut ai hte Ah Shawng matsan, bai nhtang htan malap mat sai. Htoi Ja mung, ndai lang n sadiq lu hkra sheq, marawn hkrap shabam mat sai. "Mai Mai e, myit malai lu nna myit-suh hkyen sayang sheq ...., ndai zawn rai matwa ndai i...., Ah Shawng an n dang hkamshah sagaq ai law! Myit nau suh shalai nna sheq, rai manit dai i. Goi ye ...., Bawk Mai e..., Mai Mai e..., maroi nni ai law! Ka-ni nanghpam aq majaw wa rai nit dai law! i?.... hiq..... hiq.... hiq..." Dai mabyin ni aq hpang e, Srn. Hkawn Shawng gaw, ndai kaji kaw na nga wa ai tinang aq bugah mare kawq sha a-nga nga yang, galoi mung shi aq man e byin lai matwa sai mabyin ni hte yawnhkyen myiprwisi ni wa, dang jahkoi kau lu na n rai sai. Tsawraq dik ai majaw, prattup shiq aq ningrum ningtau shatai sana ngu, gasadiq jawq kau sai myu tsawq share ninghkring Du Myu Awng San mung, n myit mada ai, shi grau n hkaq lu ai HPRAW JAN hpang de sheq, shatin shapun hkannang matwa sai majaw, myit dum shagu masin juh machyiq laq ai hte mau n maq nga ai re. Srn. Hkawn Shawng, yaq sheq grau mau mat sai. Nu Wa ni n nga mat ai hpang, ndai Nu Wa ni htawng dah ya ai dum ntah kata, Mai Mai yannuwa ni hte myit-suh tim, n suh tim, prattup arau nga sana ngu yang sheq, gammaka wa nanghpam luqshah aq majaw, shanhte ndai zawn tsawraq nga ninglen marung marang rai, hkaqbrah ra mat sai. Dai majaw, shawoi n du yu, n nga yu ai shara nnan de jawngsara bungli htawt lah nna, shalan shabran nga hkawm mat sana ngu, dawqdan ai hte dum ntah hpe shap shah kau dah nhtawm, hpaji magam bungli gawk de shara htawt ya na tangshawn hpyih lajin dah lu sai rai. Shi htawt na shara gaw, Sam mungh mare kaba langai kawq rai.
Srn. Hkawn Shawng shi du ra ai modo daru du sai. Dai kawq nah, shi du mayu ai jinghkuq ni aq ntah de shaprai 3 modo shap jawn nna sa matwa sai. Kruq yaq Laban lahkawng yaq tup jinghkuq ni kawq sa du chyai lah nna Laban shanaq de shi jawng saranum galaw ai mare kaba de bai nhtang wa sai. Langai yaq shanih jawng bai sa yang, "Lam Ntsa Nah Ma" hpe myit dum ai hte wo mada, le mada rai hkawm wuq ai. Daihpawt gaw jawng du matwa tim, Ma dai hpe n mu wuq ai. "E!, manang jan, nanhte ngai ndai de htawt du wa ai hte jawng nnan sa ai shanih kawq nah jahpawt shagu ngu na daramh, hkyiya ma langai hpe mu mu re rai saq. Nanhte Ma de aq lam i chye? Ngai laika ka mayu nna le ...., shi aq lam chye yang, loimi garan gachyan tsun dan yu marit oi." Saramaq manang jan ni tsun dan ya ai kawq nah lawuq nah hte maren, Srn. Hkawn Shawng, Lam Ntsa Nah Ma aq lam chye lah nuq ai. "Ma hkyiya de aq mying gaw, Awng Di daq. Kanu Kawa yan mung, hkyiya ya nna si mat masai. Ma dai mung, hkritung kawq nah hkyiya sheq rai yang, yaq kanu kawa si mat ai hpang, nang mu ai hte maren lam ntsa hkan sha, nga hkawm ai; Mazaq sumpum hkan sheq tam ahpre htaq dut shah hkawm ai. kalanglang shi aq kanu kawa ni aq hkyiya manang ni aq ntah hkan nchyang chyangshah hkawm ai. Laguh mung sheq, n laguh shah hkawm nga aq dawng! Shingrai, shiq aq prat jahtum sai gah, rai nga nuq ai:" Srn. Hkawn Shawng, Ma dai aq lam hpe chye lah ai kawq nah grau myit n pyaw mat sai. Oh! nyeq kanau shingtai yan karat shingtai aq kasha Ma shingtai Gam Gam mung, kaba jang ndai Ma Awng Di zawn sheq, n rai mat sana! Karai Kasang gaw tauchye nna matsan dumh ai hte, jaujau woi lah kau ai sheq rai sai ngu, myit mung awoi lah yu, rai nga ai.
"Ndai nanghpam aq majaw, mungkan gah ntsa e saidaw saichyen hkalut mat sai sha, n-gah, sumtsawq mung hkalut mat sai." "Awng Di, nang daihpawt wadi ni kawq bungli grai sa galaw garum sai majaw, nang raq ai shah-hpar mung jawq na, shat da mi mung jawq shah na yaw" "He..., he he, hah..., hah, Wadi, grai kabu ai; chyeju kaba yaw. Yaq bai sasa di na yaw Wadi ..., hi.., hi.. hi.." Dai nsen ni hpe na dat ai Srn. Hkawn Shawng gaw, 'Lam Ntsa Nah Ma' rai ang ai ngu, lam makau na ntah wang de mada dat yu yang, chyinghkrang hkaq jawh nga ai Ma Awng Di hpe mulu ai. Daihpawt gaw shi nanghpam hkruh sam ai, grai sheq myit pyaw buq nga ai. "Uhum!, ... ndai zawn re mabyin ni hpe malap kau mayu nna sheq, galoi mung n du yu, n nga yu ai mare bugah de shalan shabran htawt hkawm matwa hkra rai nga yang, mi nah rawq re ai mabyin ni hte, manchyawq bai sa hkrumh katut ai nyeq prat wa i! ...., Goi ..., anhte Kachin ni nga ai ginra bugah shara shagu gaw, ndai zawn re mabyin hkrai rai mat sam sai. Gara kawq wa shim ai bugah nga sana rai satah??? Uhum!!!" Srn. Hkawn Shawng nsaq kaba shawq let, shawnglam de matut hkawm matwa nuq ai ..., rai.
Shanghtawk Tsing Pan
