"Hkaw Bawm yan Hkun Awng! wa yu marit." Mana de na chyingdaw mi jawng hprawng ai tsang mali na nye a jawngma 2, nye a kaku makau de hkrit kamyin ai myiman hte wa tsap mara ai. "Nan shut ai mara hpe dum mani?" "Dum ga ai sara." ""Gai , dai rai yang, sharin-gawk ting rawt yu mu! Mani ndai yan jawng hprawng hprawng ma ai; dai hta n-ga, hkayawm lu ai hpe mung sara mu ai. Dai majaw ndai manang yan hte lakap nna sara, nanhte yawng hpe tsun mayu ai. "Naw kaji ai ten kaw nna ahkying hpe manu shadan chye ra ai; manu dan ai ahkying hpe lachyum n pru ai gaman lila n mai lahpawt kau ai. Myu kaba masha ni gaw ahkying aten hpe ja gumhpraw hta manu grau chye shadan ma ai. Dai majaw mung, shanhte gaw mungkan e kasi yu la mai ai ni rai nga ma ai. Ya she asak 10 ning jan sha naw rai nga ai nanhte a matu, hkayawm lu ai gaw kachyi mi pyi akyu n rawng, lachyum n pru nga ai hpe myit yu mu. Hpa majaw nga yang, hkayawm malut hta rawng ai, 'Nikutin' ngu ai Dat gaw grai n-gun ja ai gung myu mi re. Dai Dat hpe shaw la nhtawm, prangtai langai a ntsa e kahte mi jahkrat bun ai hpe sha pyi dai prangtai gaw htan si mat lu nga ai da.
Dai hte maren, nanhte mung hkayawm nsa hpe marawp bang bang rai, nsa dai ni mahkawng law wa jang, nanhte a hkalung la ai sinwawp hta jung kap nna mayu galim nga shangun ai hte kade n na yang, jahkru wa na ra ai. San pra nga ai nanhte a bawnu ni mung, hkanu ma nna matsing nyan n-gun ni kya mat ai hte ya sha sha malap ja ai lam ni byin shangun nga na ra ai. Ba ai mung, n hkam ai hte hkawm sa satlawat hpe mung, ali shangun nga ai. Hprawsan ai myisha ni mung, hkayawm wanhkut nsa a majaw htoi hkyeng ai nsam pru wa nna n hpraw san mat wa chye nga ai. Hkyeng tsawm ai nten ni mung, chyangmang ai de gale mat nna hkalung ai hpraw nsam ni mung ginsa mat wa ai majaw, hpraw nsam hpe jahten ya nga ai. Dai majaw nanhte a matu hkayawm gaw kachyi mi mung, akyu n rawng ai re, chye na sani?" "Chye na sai." "... kachyi mi mung, hkum chyim yu mu, hkum kajam mu ngu, sara htet mayu ai re, gai ... yawng dung mu."
Yupku ntsa e taw let, shani jawngma ni hte ngai tsun shaga ai lam ni bai sumru yu let lai wa sai (7) ning a jawngma prat hpe bai myit dum sumru nga nngai. Tsawra dik ai manang wa Brang Lawn hte ngai, Lahta Tsang Jawng tsang (9) hta sharin nga yang, ram ram hten byak lai wa saga ai. Ya sha sha jawng hprawng nna lawk shingjut hkan na kawa ginsum jabyak e ahkying shama chye ga ai. Ndai zawn jawngma sat hte nhtan shai nna ahkying shama nga ai gaw n dum shami sanpoi kaba du mat wa sai. Raitim, an gaw myit shamu shamawt lam n nga; bat mi hta she 2,3 lang jawng gawk de du chye nga ga ai. Sara, sarama ni mung, an hpe ya sha sha sadi jaw ma ai. Raitim, an gaw mani sum sum rai nna sha, aten shalai ga ai. Lahpawt mi hta sharin gawk de sarama shang wa ai hte an a shara de azi yu let, an hpe mu jang, "Gai, Brang Lawn yan Myu Li, sara kaba a magam bungli gawk de sa wa mu, sara kaba nan hpe ala nga ai" ngu tsun dat mi ai. An shang wa ai na jang, myiset shachyen jum nna sharawt mada let, "Shang wa marit, dai kaw dung mu" nga, shi a kaku makau na dung punghkum hta shara madun mi ai. An lahkawng sara kaba a hpung shingkang hpe n dang ai hpa, n sharawt mada lu ai sha gum da-krung nga ga ai.
Sara Kaba gaw galu kaba re ai hkumhkrang hte sari sadang shingkang rawng nna hpung ja la ai zawn re myi lahkawng hte masha hpe azi mada chye ai Myen sara wa rai nga ai. Shi mada hkrup yang, galoi mung n hkam lu ga ai. Ya mung, shi hpe n sharawt mada yu tim, shi a tu kabrim la ai myi lahkawng hte an hpe mada azi da ai gaw, kraw lawang kata de du hkra mu mada kau ya na daram rai nga a dawng ngu myit dum nga ga ai. "Nan lahkawng hpe sara kaba hkrum mayu ai na la sai, bungli law ai majaw aloi sha n lu jahkrum lu ai re." Si mani ai nsen hte Myen ga hku shaga nga ai. An lahkawng mung, kalang praw rai jawm sharawt mada dat ga ai. "Sara Kaba tsun mayu ai; anhte a jawng n-gun atsam gaw nanhte jawngma ni a ntsa e madung rai nga ai. Jawngma ni lam shagu hku nna atsam shapraw yang she, jawng ngu ai gaw galu kaba kunghpan wa na n re ni? Jawngma ngu ai mying hte bung hkra nga sa ra ai lit nanhte hta ra nga malit dai. Grau nna nan zawn tsang kaba sai, jawng a kahpu kaba tai sai ni gaw kasi kaja madun ra ai; nta langai mi hta kahpu kaba wa gaw kanau ni hpe kasi kaja madun let, sharin shaga ra ai hte maren sha re. Yu u, naw kaji la ai Lawu Tsang ma kasha ni gaw nanhte tsang kaba sai kahpu kana ni hpe yu nna kade sha myit rawt sharawng shajang nga ma ai i? Bai kasi hpan hkum hpe lawan dik ai hku hkan galaw chye ai asak 12 - 13 - 14 rai nga ai Lapran Tsang jawngma ni hpe nanhte kahpu kana ni gaw jawngma sat majing hku nna kasi kaja madun dan ra ai n rai ni? Sara Kaba tsun ai myit hkawn ma ni?" "Myit hkawn ga ai Sara Kaba" ngu , rawt tsun ga ai. "Raitaw, nanhte mahkawn nga ai Jawng Kawngsi mahkawn ga hta rawng ai nanhte jawngma ni a ga shaka hpe tsun yu mu." An lahkawng jawng kawngsi ga shaka hpe rau tsun ga ai. "Nye hkum hpe kaja hkra shakut na. Nye sharin gawk hpe kaja hkra shakut na. Nye Jawng hpe kaja hkra shakut na. Nye Mungdan hpe kaja hkra shakut na." "Rai sa, dung mu. Ataw!, daini nan a hkum hpe nan kaja hkra shakut nga myit ni? Nan hpa galaw ai lam lai wa sai bat hta she sara kaba chye lu ai majaw yawn dik ai. Nan jawng hprawng ai sha n-ga, nan a hkum hpe jahten shaza nga myit dai. No.4 ka-ni hpraw du hkra, nan kajam ai lam shiga teng, ngai lu da nga nngai; dai lam ni a majaw jawngma yawng a ntsa e tawn da ai nye a tsawra myit gaw nan a ntsa e yawm dik nga nngai. Nan a hkum hpe nan n kaja jkra, galaw la ai hte maren, nan a sharin gawk hpe mung jawng hprawng hprawng ai hte sharin gawk arawng jasum ya nga myit dai. Nan shinggan de dai zawn n shawp n kap galaw hkawm ai majaw, gara jawng na jawngma ni rai ta? nga yang, "Dai jawng na gaw e". Yu u, jawng a mying n hten i? Bai, mungdan a matu gaw hkum tsun, amyu a mying hpe nan makawp maga myit ni? Dai kasha, wora kasha nga nna madi tsun ma yang, tinang amyu n hkra i? Kanu kawa kahpu kanau ni myiman n kaji i? Bai, ngai nan hpe ja ja tsun mayu ai; rai n tsun yang, nan hpe san mayu ai. Nan a Kachin amyu hpe nan n tsawra myit ni? "Tsawra ga ai." "Kade daram tsawra myit ni?" "Grai tsawra ga ai." "E, rai sa. Nan dai daram tsawra ai nan a Kachin amyu sha ni a matu, daini nan hpa baw akyu galaw sani? Hpabaw mi ap nawng sani? Tsawra ai ngu ai hpe n-gup aga hte sha n rai; myit masin hkumhkrang hte ap nawng ra malit dai. Nan a myusha ni a matu, daini nanhte Kachin ramma ni bungli grai galaw ra myit dai, dum a ni? Shaning shagu tsang langai hte langai awng lai wa lu ai hte sha, nan a hkum a matu mung, amyu a matu mung myit dik mai sani? Sharin laika chye ai hpe sha ram dum mai sai kun? Shinggan hpaji hparat laika ni, mungkan labau laika ni, shilaika ni shani shagu n dang hti, hti she laja nga ai. Ahkying hpe lachyum n pru ai gaman lila shama kau na malai dai laika ni hpe hti mu. Hkumhkrang hkam kaja lam a matu,ginsup mu, tinang sharawng ai hpe tang du hkra shakut mu; la ngu ai gaw tinang a hkum makawp maga ai hpaji langai ngai hpe mung, chye da ra ai. Ga shadawn, jauhkyen, judo, karate zawn re ginsup hpan ni hpe chye da ra ai. Yu u, hpaji hparat lam hta hpanghkrat ai zawn kaja ai ginsup lam hta mung, nanhte Kachin ni n law la nga myit dai n rai ni? Ginsup awng padang lu ai a majaw mung, tinang amyu hte mungdan hpe mying sharawt ya lu nga ai n rai ni? Mungdan uphkang magam mung, ginsup ai lam hpe grai shagrau sharawt nga ai." Sara Kaba gaw loi mi hkring la nna bai matut tsun wu ai. "Nan lahkawng nyan kaja ai hkrai rai myit dai. Tsang langai hpe awng la lu ai hta grau nna jat shakut dat yang, ningtawn ai jawngma pyi tai lu na myit dai. Ndai zawnhpaji lam hte shakut nna mung, myu hte mungdan a matu kaja ai bungli galaw ai hte maren, amyu hpe tsawra ai rai sai. Na majaw, na a kanu kawa kahpu kanau, makyin jinghku ni hte sara sarama, mare buga ni yawng gaw kabu gara ai hte myit pyaw lu na n rai ni? Daini nan gaw, nan a kanu kawa sara sarama ni hpe shawng myiprwi pru shangun mayu nga myit dai. Nan lahkawng nyan ram ai sha n-ga, ja gumhpraw dang lu ai kasha ni mung rai nga myit dai. Dakkasu du hkra shakut jin lu na atsam rawng myit dai. Nanhte a manang nkau mi gaw, nyan kade kaja tim mung, ja gumhpraw n hkan nang lu ai majaw, kade sharin matut la mayu ma tim, Dakkasu hpaji ni hpe sharin matut la n lu ma ai. Tsang 10 awng jang, kan bau bungli tam galaw shajang mat ra ma ai; kade sha lahpawt lama re ni? Nan zawn rai hkumtsup ai kasha ni rai jang, laika hpaji hpe myit mada da ai lam n nga, kanu kawa lung shangun nna sha lit shaprai lung nga ai zawn, du na kaw n du, lapran hpatwat hkan hten byak mat nga myit dai. Ndai zawn re myu lahkawng gaw, amyu hte mungdan a matu kade sha lahpawt lama rai nga a ni? Hpabaw hte bung a ta? nga yang, Wutdek nta kaba gawgap ai shaloi, wuttawng 10 hpe hpai dang nga ninglen wuttawng 3,4 sha hpai chyai nga ai majaw dai wutdek nta kaba gaw ngut na aten hta n ngut rai, ahkying lahpawt kau ai hte bung nga ai. Nan mung dai zawn wuttawng 3,4 hpe sha hpai chyai nga na myit ni? Nan ya kaw nna magup sumhpa azin ayang myit yu chye ging sai. Asak mung, n kaji manit dai; laika tsang mung, kaba nga manit dai. Htaning hpraning e pyi mungdan magam hpe gunhpai na ten du wa manit dai. Manu dan ai ahkying hpe lila hkum shama kau myit, kaja ai lam de atsam dat ging manit dai; lam woi ningshawng kaja tai lu na shakut ra myit dat." Sara Kaba gaw, loi mi bai hkring sa la nga ai. An mung, nshung ta na jahpawt aten rai tim, salat she gali wa saga ai. Sara Kaba gaw pawt sindawng ai nsen kachyi mi pyi n shalawm ai sha, an hpe sharin shaga nga ai re. Kalang lang yawn ai nsen pyi naw shapraw dat chye nga ai. Shi a ga nsen hta masha a myit hpe gang dun da lu ai atsam rawng nga lu ai. Shing rai, ngai hkrai sumru nga yang, sara kaba gaw bai matut shaga dat wu ai. "Kadai amyu hpe raitim laknak lang nna ninghkap gasat anut ai hpe sha myu tsaw myit rawng ai n mai ngu, myu a matu machyi hkam ai; shakut sharang ai; n-gun dat ai; lam madun kasi kaja tai ai; kam ging ai ni mahkra gaw myu tsaw ai lam rai nga ai. Yu u, nan a Kachin amyu ni bumlang hkaraw hkan jawng n nga, laika n chye, hkamja lam n nga, moi prat na zawn yi hkyen sha nna sha naw nga nga malit dai; laika hpaji kata, hpungtang hpaji n chye ai majaw, myi n hpaw, na n tu, rai nga ma ai. Dai bum ga de jawng sara dat nna jawng hpaw na matu mung, yak la nga ai. Jawng hpaw da sai shara hkan pyi, dat na sara n nga ai majaw bai byak ma wa nga ai. E... dai zawn re shara hkan, nanhte myutsaw shayi shadang ni n sa yang, kadai sa na i? Tinang a sai majing rai nga ai nanhte pyi, n sa kam ai shara de kadai chyasam ni kam sa na da i? Myit hkawn ai n rai? "Myit hkawn ga ai sara kaba." "Dai rai yang, myutsaw shayi shadang ni a lit gaw kade sha law nga ai, nan myit dum na manit dai. Sara Kaba tsun ai mung, grai galu wa sai. Ya nan kaw na ga sadi ga hpe sara kaba ra nngai; nan a myutsaw myit hpe shadan shaleng sana ga ai ngu ga sadi jaw lu na myit ni? "Jaw lu na ga ai sara kaba", Manang wa an lahkawng rawt tsap nga ga ai. Sara Kaba gaw an hpe azi yu nga ai. "Mi nan tsun lai wa ai jawng kawngsi ga shaka hte maren, hkan sa na myit ni?" "Hkan sa lu hkra, shakut na ga ai." "E ..., rai sa; dai ga shaka hte maren galaw shakut shaja sa wa yang, nan teng sha myutsaw shadang la kaja tai wa lu na re ngu kam ai.; galoi mung, myit hkum malap mu. Gai, wa lu sai." "Chyeju kaba sai, sara kaba." "E... e... e..." An lahkawng sara kaba a magam bungli gawk na myit atsang awang nga let, pru wa saga ai. Dai shani gaw, an hkyehkrang la hkrum ai nhtoi ngu yang, n shut na re. Sara Kaba a tsawra myit gaw, an a ja la ai myit hpe shakya kau ya sai n rai ni? Oh, tsawra myit ngu ai a chyeju gaw shadawn n dang kaba la nga ai law.
Myit malai majing lu ai hpang kaw nna shakut ai akyu a majaw, tsawra manang wa Brang Lawn gaw Yanggung Jak Dakkasu e II ning ngu na tsang hta sharin nga lu sai hte maren, ngai mung Myitkyina kawlik e II ning ngu na sawnhpan hpaji ginhpan hpe sharin la nga ni ai re. Ndai zawn tsan gang hkat nga ai raitim, hkuhkau lam gaw n hten ga ai. Buga e ngam nga ai ngai gaw grau nna shi hpe myit dum lu ai. Shi hpe myit dum shagu n rai tim, rau ai aten ni hta Dapkawng lawk na kanu (Ni Ba) a nta de sa du chyai chyai rai nngai. Ni Ba hte kasha Hkawn Nu mung, ngai sa du jang, grai kabu gara hkap tau la nna hkum sumhpa jahta tsun chyai chyai rai ga ai. Grau nna Brang Lawn hpe kade tsawra ai lam ni, gumhpraw kade daram ram shagun jaw ra ai lam ni, kade myit mada ai lam ni hpe tsun dan n ma rai chye nga ai. Kanau Hkawn Nu gaw, asak (16) ning aten, pu tsawm ai numri pan zawn rai nga tim mung, ga n chye shaga ai num kasha matsan rai nga ai. Raiti mung, sari shadang hte hpringtsup nga nna myit hpaji mung rawng nga lu ai. Shatgawk bungli ni mung, kanu pyi n kayin yu ra hkra, kam ging nga ai. Buhpun palawng ni mung, shi law sha gaw chye chywi da nu ai. Rida maka numsha ni chye mai ai hpaji ma hkra mung, chye galaw da u ai majaw, kanu a sharin ya lu ai atsam hpe tak la lu nga ai. Lani mi ngai sa du chyai yang, Ni Ba gaw ngai du ai hte, "Myu Li e, daini gaw ningnam Hkawn Nu mare ka-ang na Miwa jak chywi seng de jak chywi sa sharin na nga aput ai aten na la sai majaw, sa sa na kun ngu, myit nga nngai law. Nta na jak mung hpaisa ra ra rai, nang rau yang gaw naw hkan nang garum rit ngu mayu ai law." "Rau gaw e, Ni Ba. Ataw ! Hkawn Nu, shi dai daram sharawng nga yang wa, na na hkum shingdang da gaw n mai law. Lau lau she, sa sa ga. Anhte Jinghpaw ni jak chywi sha ai masha n law hkraw nga ai n re ni? Ni Ba e, manang shagwi ai hta, tinang nan sharawng nna galaw ai bungli gaw grau awngdang chye nga ai. Hkawn Nu mung, awngdang ai jak chywi masha langai byin lu na re ngu kam ai." "Re; Ni Ba mung shing ngu myit mada nga nngai. Nta e shi hkrai akik akawk pyi yu la nna grai chye galaw nu ai. Ning rai sharawng nna awngdang wa yang mung, shi a kanbau bungli rai nu ga ngu ..." "She rai law, Ni Ba e. Jak chywi sha ai bungli she shang gumhpraw kaja dik nga yang ... Myu shayi ni yawng pyi chye ging nga ai." Shing ngu tsun hkat nga yang, Hkawn Nu shang wa ai majaw, ta yungnu shadap dan let, "Kaja ai Hkawn Nu, hkyen lajang la su. Mare ka-ang de sa sa na" ngu dat yang, shi mung chye na wu ai majaw, kabu gumlawt nna shi a gawk de gat shang wa nu ai. Dai shani na Hkawn Nu a kabu gara ai myiman nsam hpe ya du hkra, shingran mu nga ai. Anhte zawn ga chye shaga yang, shi kabu ai lam ni hpe tsun dan na re ngu, myit sumru let grai matsan dum kau dat ni ai. Manang hte n bung n pre ai raitim, tinang aprat hpe asum n jaw, tinang myit sharawng ai bungli hpe akyu jashawn shakung shalet jat na myit rawng ai Hkawn Nu hpe grai shakawn mayu ai hte, myu shayi Hkawn Nu masha yawng a matu akyu rawng nna awngdang ai jak chywi sarama kaba byin tai wa lu u ga ngu myit hta, kyu hpyi ya nngai.
Ginhtawng jawng dat ten bai du sai. Bat lahkawng du wa tim, tsawra manang wa Brang Lawn, Yanggung na garai n du wa nga ai. Shani shagu shi hpe la nga yang, Danai de na Ji Dwi n nga mat sai lam akajawng sha shiga na lu ai majaw, annu anwa ni yawng Danai de lung mat wa ga ai. Ji Dwi a makoi mayang poi hpe galaw ngut ai hpang, bat 2 jan naw nga nga ga ai hpang she, Myitkyina de bai yu wa ga ai. Du ai hte rau, Dapkawng de manang wa hpe hkrum mayu dik let, gat sa wa ni ai. "Ni Ba, manang wa rai n du wa a ni?" "Oh, Ma Myu Li!, galoi du hkrat wa myit ni? Na manang wa mung, du wa ra ai. Raitim, Ni Ba mau nga ai Ma e. Na manang wa nta mung, nau n kap ai she arai wa sai. Ya mung, mana de kaw na n pru wa ai le. Shi hpa wa myit nga ai kun? Shi hpe yu yang, sai n-gun n rawng la ai zawn asit awat san la ai majaw ngai san yu yang, hkum n pyaw nngai gaw nga, nta e azim sha hkring sa la u. Ngaisha laika nau shakut nna rai na re, ngu yang gaw, ndai zawn prang hkawm, kalang lang gaw, 2, 3 ya rai yang she, apru wa rai mau nga nngai law. Sumtsaw lam hta wa mi myit gawng garut hkrum nga ai kun? Ma nang she dai hku asan yu nu yaw. Ni Ba gaw nang hpe sha, kam nga nngai." Ni Ba hkap tsun dan ai ga hpe na ai hte nye myit hta myu mi ngu nga n pyaw mat sai. Manang wa hpa hkrum sha sai i? Moi kalang an htenbyak lai wa sai ten ni hpe bai sumru yu let, shi a matu ngai myit tsang nga nngai. Ni Ba tsun ai zawn, sumtsaw lam sha rai u ga. Dai lam gaw tsi la loi na re ngu kam ai le. Manang wa hpe mu mayu ai myit katu la ai majaw Ni Ba kaw hkang hpyi nna manang wa a gawk de shang wa ni ai; Kaku ntsa e shi hte ngai tsang 10 awng yang, Malizup de manang ni hte ginseng seng sha sa ga yang, dem da ai sumla gaw ngai hpe hkap tau la nga ai. Ngai shi a sumla hpe azi yu nga ai. Galu kaba ai hkumhkrang hte sai hpring ai shi a manisum myiman ni wa, ya Ni Ba tsun ai hte, shai la nga ai. Ngai nsa kaba shaw let, dung punghkum hta dung dat nngai. Yupku ntsa e taw nga ai tingse hpe hta la nna nye myit hta shawshishap nga ai hpe tingse dum mahkawn hkawn ai hte, shatsai kau mayu nngai. "Anhte Wunpawngsha ni shakut ra ga ai. Lam shagu hta, grai naw hpanghkrat ga ai. Myit sumru yu yang, myu hpe sharawt na matu nang hte nye a lit nan rai nga ai.... Tsawra manang ni ..., Wunpawng amyu hpe sharawt na matu ..., tsawra na matu grainaw shakut ga yaw ... myu hpe sharawt na matu, nang hte nye a lit nan rai nga ai ... Ndai mahkawn she hkawn chyai na ngu, yawshada ai lam n nga ai sha, mahkawn ndai hpe n dum shami mahkawn shapraw dat nngai. Manang wa hpe mung hkrum mayu, tsun mayu ai lam law la ai majaw, ngai du ai sha pyi chye u ga ngu, laika kadun mi mahkret da na myit yu tim, hpa n chye ka ai hte dai mahkawn ga hpe sha, lachyum n pru ai ka kau da se ai. Hpang shani manap shat sha ngut ai hte, tsawra ai manang wa hpang de bai sa wa ni ai. Hkawn Nu dawdap e jak chywi dung nga ai mu ai majaw, "Ni Ba gaw?" ngu dingsi san yang, "Gat sa wa sai" da. "Na kahpu gaw?" ngu bai dingsi san dat yang, "Mana myi n mu ai shaloi wa nna shat n sha ai yup, daihpawt hkying (9) e hkarangleng jawn na nga htingpa kaba gun nna pru wa sai" nga ai ga lachyum leng hkra, lata hte mawng rai, sanglang dan nga ai. Ngai mung, shi tsun ai hpe yau la nna manang wa a yupgawk de shang wa yu yang, ngai tak ai hte maren, ngai hpe laika kadun mi ka da ai mu lu ai. Tsawra manang wa, ngai hpe mara raw ya rit. Ngai masha ni a shangun ma tai mat ni ai majaw, lit hte maren hkawm sa wa ni ai. Ya hpang e she, bai hkrum ga yaw" da. "Um ...! ngai nsa kaba shaw let, dai laika hpe lang nna mau tsap nga nngai. Tsawra manang wa hpa galaw nga ai i? Grai chye mayu sai hte, n chye n da myit rawng wa ai majaw, hkan sagawn na ngu myit dawdan let, gawk na pru wa ni ai. Dawdap e Hkawn Nu, ngai hpe hkap azi yu nga ai. "Na myiman n tsawm nga ai; Hpu Ba n nga nna myit n pyaw nni? Shi n nga tim, dung u" ngu ai lachyum hte, dingsi da ni ai. Ngai mung, shi hpe mani dan let, shi a makau e sumpum nga ai sumpan ni hpe hta lang nhtawm, "Ndai ni ma hkra, masha ni ap ai hkrai rai ni?" ngu san dat nngai. Re lam hpe shi baw gum dan wu ai. Ngai mung, 'kaja ai' ngu ta yungnu shadap dan yang, shi gaw shabyi lahkawng maga she hkyawk hkawan wa hkra, kabu ai myiman hte mani dan wu ai; gaja wa Hkawn Nu gaw awngdang ai jak chywi langai byin tai wa nu ai. Shakut ai masha gaw myit ai kaw du lu nga ai, ngu ai sakse rai nga sai. Shi hpe shakram da let, mare ka-ang de lagawleng hte sa mat wa ni ai. Shani tup ngai zawn nawn ai shara hkan, pru pru shang shang sagawn hkawm wa yang, manang wa a lam hpe azin ayang n rai tim, 'hkrang' gaw mu lu sai re. Shana tup ngai myit n pyaw mat sai. Yup n lu ai... manang wa hpe chyu dum nga sai. "Oh! manang wa, nang hpe ngai kaning ngu htai la sana i? Moi an a sara kaba tsun madun ai ga ni hte an a ga sadi hpe nang malap sai i? Ya gaw nang ka-ni hpraw a hpung n dang mat ai majaw, lang ra ai ja gumhpraw ni law law a matu maigan hpaga salang ni kaw shangun ma tai mat nit hka i? Kalang mi shut lai wa sai hpe bai sharai la lu sayang, ya na zawn chye nga ninglen bai kahtap shut ai majaw, nang hpe ngai mau n ma ai hte yawn la nat ni ai le ... na a manu dan la ai ahkying aten ni hpe akyu n rawng ai wanhkut sha byin mat shangun nit dai i!. Manang wa e ... dai aten ni hpe myit dum lahpawt dik sai yaw. Jawng ni bai hpaw shajang sai. Myitkyina Kawlik na atsang htum sai hte maren, ngai mung Mandalay de jawng bai htawt sa mat wa ni ai. Du ai hte, Yanggung de manang wa hpang laika shagun yu yang, jawng hpaw ai bat lahkawng na wa tim, shi jawng de rai n du ai lam chye lu ai. Aten shagu shi hpe myit dum nga nngai re. Ni Ba mung, kasha a lam chye mayu nga ai re majaw ngai mung, tsawmhtap ai hku ka shana dat sai. Shata 2 daram na jang she, manang wa kaw na laika lu la hti ni ai gaw, 'Htenrun mat sai myit ni hpe kaning di sharai la sana kun? Myit grai sharai let, jawng laika ni hpe bai hkan sa lu na matu shakut nga nngai. Raitim, nye myit hpe n dang hkang mat nna hkum mahtang myit hpang chyu, hkan nang mat sai. N shawp ai lam hta, pyaw mat sai nye myit ni hpe sharai la lu na hpang hkrat mat sai kun? Manang wa e nye prat gaw magwi simang hpe sin let, dum nga ninglen hkanu kaba hta yawng nang mat wa nna n dum shami panglai nammukdara de du mat wa jang she, kajawng ai; 'N shawp ai Uhka' zawn mi rai wa sai kun? Myit dum nna bai rawt pyen wa yang gaw, kawng hkarang n mu mada mat ai, hka panglai hta di hkrat si mat wa sai dai Uhka hte mi bung mat ni ai kun?" da. Ndai zawn nga ai manang wa a laika hpe hti let, myit n pyaw mat ni ai. Tsawra ai manang wa, ngai nang hpe kyu hpyi garum ai hta lai, kaga hpa n chye garum mat sai yaw ... Nang malap da ai Madu Yesu gaw nang hpe n kabai da u ga.
Tinang galaw ai lam shut shai nga ai hpe manang wa n shadum ai sha chye la lu nna bai sharai la lu hkra, shakut nga ai wa gaw teng sha manu dan ai masha kaja byin wa lu na re ngu myit mada let, manang wa a shiga hpe dingyang madat nga nngai. Shalan shabran laika ni mung, ashagun jaw nga nngai. Jawng lung nga ai shaning ka-ang hkup jan daram hta, lani mi na nhtoi e, manang wa kaw na hprisin-yu laika kadun mi lu la hti nngai. "Manang wa, hkum grai n pyaw nga nngai; lawan sa wa rit" da! Ngai masin hpra nga ai hte loi mi mau la rai, dai hprisin-yu laika madun nhtawm, jawng kaw na ahkang hpyi la lu ai hte Yanggung de rawt mat wa ni ai. Lam dingdung manang wa hpa n byin u ga ngu, kyu hpyi let, yu wa nngai. Wanleng mung, lanyan la ai zawn she nga. Yanggung du ai hte, manang wa nga ai Jak Dakkasu jawngla nta de shap jawn modo hte sa wa nngai. Dai nta ndaw du ai hte, wudang hkyeng sumla kap ai tsirung modo hpraw langai mi dai nta npu e tsap nga ai sha n-ga, hpunpalawng hpraw buhpun ai tsirung magam gun ni mung, machyi masha hpai ai baw hta, sumpan hpraw hte magap da ai masha langai hpe dai mawdaw hpraw de hpai bang nga ai hpe mada mu dat nngai. Shanhte a myiman ni n tsawm la nga malu ai. Dai lam ni hpe mu nga ai ngai mung, myit kahpra la ai majaw, dai makau du ai hte modo ntsa na gumhtawn yu nhtawm, masha hpawng de gat bang wa ni ai. Makau na jawngma langai mi hpe aba shala san dat ai shaloi, "Shi, Brang Lawn re. Mana yup nga let, n nga mat ai wa re." Shi a ga rai n htum yang, dai modo hpraw kata de ngai kahkan shang mat wa nngai. Magap da ai sumpan hpraw hpe gang hpaw dat yu yang, Oh,... tsawra manang wa Brang Lawn le, hkum n pyaw ai na la sai zawn lasi la ai hte hprawsan ai; mi na shi a nsam ni mung she tsit mat salu ai. Myi di nga ninglen shi a n-gup hte nhka ni gaw myit n dik la ai nsam hpe shapraw nga ai. Shi a kahtan lasa, ladi nchyun hte shabyi ni gaw, myit malai lu ai lam hpe madun nga ai zawn rai nga ai. Ngai gaw kaning n chye di, n dang tsun ai yawn kaba hte mau kaba kayau let, myi n grip ai sha shi a nsoi nsa n rawng mat sai hkumtsawp hpe yu azi nga nngai. Grup-yin na masha ni hpa tsun nna hpa galaw nga ma ai hpe ngai n dum mat ni ai.
Oh... tsawra manang wa ngai ndai zawn nang hpe myit dum nga nngai. Myit dum shagu sen wan dan ai lungseng kaba hpe shamat kau ai zawn yawn la nngai. Ndai zawn yawn ai gaw ngai hkrai n rai, Na a chyinghkai kanu mung madung rai nga ai. Nang hpe chyusha kam kaba nga ai shi a yawnhkyen ningtsam gaw, n-gup hte pyi tsun n dang nga ai. Shi a yawnhkyen hkrap ga nsen ni hpe ya du hkra, nye a na hta hpring nga ai. "Nu a tsawra ma e, kanu kawa a matu mung, akyu n rawng, myu a matu mung lachyum n pru, na a matu sha pyiakyu n tai ai ningrai si mat ndai wa, Nu myit n dik la ai yaw, kade a matu si hkam ndai ngu Nu myit shapyaw la sana law e, gaman lila shaprat kau ai nye hkum ndai wa e, ma e..." Ndai zawn nga hkrap jahtau ai ningnu a hkrap ga nsen ni hpe nang na lu sai n rai. Byin mat wa sai mali ning na mat wa tim, kachyi mi pyi garai n malap lu nngai. Manang wa, nang n nga mat ai htawm, ngai mung myit grau da-ting let, hpaji sharin la ngut nna Jiwoi ni a buga Danai ga de jawng sara bungli hte, myu hte mungdan a lit hpe gunhpai shakut nga ai 2 ning pyi rai wa sai le. Jawng sara bungli gaw, shabrai n law la ai raitim, amyu a matu akyu grai galaw lu ai bungli langai mi re majaw, manaw manang ni shabrai n law la malit dai nga, kade wa jahpoi ahpyak tim, nye myit hta grai myit dik dum nngai. Tsawra manang wa, nang mung asak naw hkrung nga ai rai yang, ya gaw myu hte mungdan a matu manu dan ai shadangsha langai tai nga na nit dai; ngu myit dum dik ai yaw. Ya gaw nang, nang wa, kahkrun kagyin ni e sha kau ai ahkum chyatsam sha byinmat nit dai i! Myit dum shagu, sum dum la nngai oi...
Lamung pu ni pu ai ginhtawng ta bai du sai. Jawng bungli ni shajin da ngut ai hte, Myitkyina ga de yu wa nngai. Du ai shani jang, Dapkawng de Ni Ba kaw sa du nngai. Htap mi sha re ai wutdek nta ahpraw anem rai nga ai. Ni Ba yan nu a nta gaw lam kaw na yu yang, shingran katsi la nga ai. Wang de shang wa yang mung, shawoi na zawn n nga, nsam hkum pu tsawm ga ai numri pan hpun ni mung, yu lajang ai madu hte hka ai na la sai zawn, nyip hkraw shajang nga ma ai. Wang ting htoihkyeng ai hpunlap chyahkraw ni hkrat run sumpum jawng nga ma ai. Dai zawn re ai byin nga maka hpe mu ai hte rau, shanhte hpe yu lajang ai Hkawn Nu hpe myit dum dat ai. Hkawn Nu n nga ai i? Kade wa, sa mat ai i? Ni Ba gumgai chyu sha, kaning wa rai nga ai i? Myit mau nga let, lagawleng hpe jum nna lamung hpun npu e sumru tsap nga nngai. Shaloi dai hpun ntsa na hkruji langai akajawng sha ngoi shaga dat ai majaw, masin MYA nga hkra, kajawng kau dat ni ai. Marit maroi hkamsha shangun ai dai hpun ntsa de sharawt mada yu dat let, "Oh... hkruji, brang e..., nang..., manang wa Brang Lawn wa mi rai kun i? ngu, kalangta myit dum tsun hkrup kau dat nngai. Shingrai mau tsap nga yang, nta de na hkawm shara ai nsen hpe na dat ai majaw, mada dat yu yang, Ni Ba chyinghka lam e hkawm sa wa ai hpe mu dat nngai. Ni Ba gaw, hkruji ngoi shaga nga ai dai lamung hpun de mada yu nga wu ai. Ngai shamu dat jang she, ngai hpe mu dat nna, "Nu... i, Ma... Ma Myu Li wa i? wa rit, galoi me du nni?" Ngai mung lagawleng hpe tawn da nna Ni Ba hpang de sa wa nhtawm, ta ladawn shakram let, "Kaja i... Ni Ba? Ni Ba ni hpe nau dum nna du ai hte sa wa ai re", "Ni Ba mung, Ma nanghpe chyu sha, myit dum nga nngai." Ni Ba wa, tsun ai hte rau, hkrap dat nu ai. Ngai mung,ladi ahkri nga wa ai hte, ga hkaw mi mung n shaga lu mat ni ai. "Ma e, ya mung, Ni Ba gaw yawn kaba bai hkrum nga nngai. Na manang wa nga taw, ndai zawn n rai na wa ngu myit dum la ai hte yawn la ai; kadai hpe mung hpaji n chye hpyi, n chye tsun dan rai; Ni Ba a maka n tsawm la ai she, a-ngu mat sani ai." "Kaning rai yawn hpa bai hkrum nga ani? Ni Ba e... she tsun dan yu rit. An Ni Ba ni yawn ai baw rai yang, rau jawm yawn, kabu ai baw rai yang rau jawm kabu, hpaji jaw lu yang jaw hkat she rai law. Ataw! Hkawn Nu gaw kade sa wa sata?" Ngai ga htum ai hte Ni Ba gaw, "Hkawn Nu jan ... Hi...i...i... Hkawn Nu ... i... i..ik.. ik" nga bai hkrap nga nu ai. "Yaw! Ni Ba ... Hkawn Nu jan kaning re ta? Hpa byin a ta? Ya n nga a ni? Kade sa wa sata?" Masin kahpra ai hte nji n-gu san dat nngai. "Nga ai. Gawk e chyu rawng nga ai. Ya yup nga sam ai." "Hpa wa byin nga ni? Ni Ba e ..., Hkawn Nu jan daram myit pyaw simsa chye la ai wa, myit n pyaw ai lam nga u ni? Hkum gaw pyaw nga ni? "Goi e, ma e, n tsun yang mung, ngut na n rai, annu a n tsawm la ai maka hpe wa kam mung, n kam tsun ai yaw. Maning Hkawn Nu jan kaw lauban rai ga ai nga ai la masum mi sa du chyai chyai rai ma ai. Annu mung, garen gari rai nga la ai hte, myitsu nga ma ai gaw ngu kam shut kau nna jinghku galaw matut la nga ga yang she, dama kasha daw ai la kasha langai mi Hkawn Nu jan hpe matsan dum tsawra dik sai law nga, Ni Ba hpe tsun wa ai. Shingrai, Ni Ba mung myit hkrum ai lam tsun dan nna tawng marang mi nta masha daram pru pru shang shang rai nga lai wa sayang, "Naw hkawm n-ga, ginhtawng e Hkawn Nu jan hpe wa woi hkungran la na nngai' nga ga sadi jaw da nna hkawm mat wa ai ya du hkra, n pru wa mat sai."
Ngai masin na pawt ai hte, "Taw! Ni Ba, hpa wa hkrap nga nta? N wa timung yau sai le. Shi masu kau ai rai yang mung, hpa byin wa na n re gaw. Dai zawn re ai la kaw n jaw sha kau dat ai pyi raisai nmu? "Hpang hkrat sai, Ma e. Hpang hkrat sai. Ya Hkawn Nu jan, shi hkrai n rai mat sai. La dai, "Ninggyi" shabat kau da sai gaw. Ma e, gaida yan nu rai nna roi kau da mi ai oi, Ma e - i... hi... hi... ik... ik" Ndai zawn Ni Ba hkrap let, bai tsun matut dat ai ga hpe na kajawng ai hte masin hta hkra la mat ni ai majaw akajawng sha rawt tsap let, "Tawk! Ndai zawn nga ai gwila wa i? Ngai chyawm hkan tam sat kau yang... Ataw! Ni Ba, n-gyi kawa shadu di aging shawa sha ga le." "Ma e, rai nu ga. N-gyi kawa sa shadu yang mung, ngai sha ga n chye shaga ai jan she grau myiman tam kaji hkawm na re. Shawa sha yang mung, masha ni gaw ja gumhpraw lu ai ni nga yang, hpa zawn nawn na n re. Ja gumhpraw hte she, n kabai bun na i? Dai shawa sha lu ai ja gumhpraw gaw nye a kasha hpe myit shapyaw ya lu na mung n rai, shi hpe prat tup makawp maga ya lu na mung, n rai." "Rai taw, Ni Ba! tam sagawn nna Hkawn Nu hpe sa sa ya yang, n mai na kun?" "N mai na re - Ma e, Ni Ba sagawn yu sai; shi num ma hte re ai da. Sut mung, lu su ma ai da." "Tawk! aga! n-gun n ja ai num ma ni hpe myu shadang sha rai nga ninglen roirip gwi ai i?" Ngai wa wutik let, lata yan hpe ajawa latsup da nga nngai.
Dai shana tup, ngai yup n pyaw ai. Ni Ba a myit ru myit yak lam gaw nye a masin salum hta noi nang wa sai. Hkiba myit hte yupku ntsa sumru nga nngai. "Hkawn Nu - Hkawn Nu, na a gam maka hpe wa ngai kaning di garum lu na i? Hkawn Nu hpe shingran mu ai. Shi jak chywi sharin sa wa ai shani na shi a kabu myit pyaw ai myiman nsam hpe myit dum shingran mu dat yang, dai zawn bai kabu shangun lu hkra kaning di matut garum lu na i? ngu, myit sumru yak nga ni ai. "Ngai wa Hkawn Nu hpe hkungran la kau na rai wa sai kun?" Shing ngu yang mung, nye a tsawra dik ai Seng Pan hpe myit dum shingran mu wa ai. Tsawra ai Seng Pan gaw Sammung ga na tsawm shayi langai mi rai nhtawm, Mandalay Dakkasu e hpaji rau sharin la nga ga yang, Hpungbungli hpe rau jawm gun lai wa ga ai kaw nna tsawra sumri dun, hpaji hkum jang tsawra ai Hkristan dinghku jawm de ga ngu myit hkrum ga sadi jaw da hkat sai re. Shi gaw Hpung bungli hpe myit lawm la ai hte maren, Mandalay Dakkasu na hpaji janmau lu la ngut ai hte Intsing Ingalik Chyum Dakkasu BD course kaw bai matut lung nga ai; dai ning hpang jahtum shaning rai sai re. Nye a matu gaw Seng Pan hpe tsun shara n nga hkra, myit dik dum la ai re. "Oh - Hkawn Nu gaw n hkum tsup la nga ai hta n-ga, myu shada roirip hkrum ai hte myiman kaji la nga sai majaw shi a prat hpe myit tsang shara law la nga sai re. Hkawn nu hpe ngai n la yang, shingkang shingwang kata ai shi a prat hpe kadai wa hkam la sana i? La nkau mi gaw sutgan ra marin ai majaw sha sut su ai num kasha ni hpe gyam chye nga ma ai. Shi a prat ting hpe matut nna pyi n sumru gwi nngai. Um! ndai lam gaw nye kahpa ntsa e mara sai re; ndai li la ai lit hpe ngai n hpai yang, kadai hpai na n re. Ngai hte sha, shannu ni dik ai jinghku ngu yang, shut na n rai. Tsawra manang wa hpe mung, myit dum nga nngai. Shi lama nga yang, ndai zawn byin na n rai. Kayung wa myit n su ai majaw, daini kajan myiman kaji hkrum sai. Oh! Ngai - ngai, myutsaw myit rawng ai la majing rai yang, ngai tsawra ai manang wa a kanau kajan ni a ru tsang ai lam ni hpe kaga masha langai zawn yu shalai kau na kun? Manang wa e - nang hpe tsawra ai ngai, myu hpe tsawra ai lam hpe mung, shadan shaleng ra sai. Wunpawng amyusha ni a lit hta Hkawn Nu a lam gaw nye a lit nan n rai ni? Ndai lang na masha wa hpe garum matsan dum ai lam gaw nye a prat ting hte sha n rai, nye masin salum hte nan rai na sai.
Hkungga tsawra let, Ali a myutsaw myit majing lam hpe Apan chye na hkap la ya ai majaw, Ali hpyi ai ahkang hpe sanseng ai myit hte jaw dat ni ai. Dai num kasha hpe nachying matsan dum la ai hte gaja wa shi a prat gaw, Ali sha matsan n dum yang myit tsang hpa nan rai nga ai. Ali hte rau Apan a masin salum hpe dai numsha a matu jaw ya kau sai yaw. Bai, Ali hpe kahtap shana mayu ai; dai numsha hpe Apan hta grau tsawra matsan dum makawp maga u lu yaw. Shi myit n pyaw myit kaji ai baw hpa mung hkum galaw shut! Ya hpang de kaning re ruyak jamjau ni hkrum wa raitim, ngangkang myit masin hta prat hpe asum n jaw ai sha awngdang hkra, shakut lu ai marai ni mung rawng nga u ga yaw. Shing re marai rawng ai hpe she LA KAJA nga ma ai n rai i? Apan a matu hpa hkum tsang yaw. Ali hte tsan gang ra mat ai Apan a gam maka hpe yawnhkyen myiprwi hte ahkying hpe lila n shama kau ai sha, Hpung a magam bungli ni hpe hkumhkrang myit masin mahkra hte grau nna gunhpai shakut shaja nga na nngai. Ali myit simsa lu u ga; kyu hpyi ya dat ai yaw. Tinang a akyu n tam ai sha, "Myutsaw" myit hpe shagrau let, Yesu a tsawra myit hta, Seng Pan Kutkai.
Lawan dik ai hku lu la hti ai tsawra Seng Pan a dai laika hpe hti let, n chye tsun hkra kraw hta hkamsha mat nngai. Oh! Seng Pan! Seng Pan! na a sanseng ai tsawra masin salum hpe hkungga lara hte prat tup manu shadan na matu, nang matsan dum ai Hkawn Nu hpe teng sha prat tup tsawra matsan dum let makawp maga na ngu ga sadi jaw nngai yaw. Dai shana jang Nu Wa nta masha yawng hpe ngai myit dawdan ai lam tsun dan sai. Yawng Hkawn Nu yannu hpe matsan dum ai hte myit hkrum ma ai. Hpang shani Ni Ba yan Hkawn Nu hpe bai sa tsun dan yang, nye ga hpe grai mau nga ma ai. Shannu lahkawng aja wa hkrap wa ma ai. N-gun kya ai num ma shannu n rai i? Kabu timung, hkrap chye ai gaw num ma ni a akyang rai nga ai. Bat mi lapran Jinghpaw Htunghking hte maren, num hpyi num ya rai bang wa saga ai. May shata praw de hkungran poi galaw na nhtoi daw saga ai. Ahkying loi mi naw nga yang, Sarama Seng Pan gaw n myit mada ai sha Myitkyina de Hpung bungli hte seng nna du lung wa ra ai. Dai majaw hkungran poi sa du dung lawm na matu saw shaga dat sai. Hkawn Nu hpang de sa woi du jahkrum yang mung, mu ai hte kanau kana majing zawn tsawra hkat ma ai. Hkawn Nu gaw, sarama Seng Pan hpe hkungran poi hta numnawn tai ya rit ngu saw lajin nu ai. Ngai mung, sarama Seng Pan chye na hkra htai dan yang, shi mung hkraw ya nu ai. Hkawn Nu gaw nachying kabu la ai majaw, sarama Seng Pan hpe ahpum da u ai. Oh...! salum lahkawng hpawm sak jaw kau yang she, Hkawn Nu jan grai tsawm hkra, bai mani wa ra ai rai.
Jawng ni bai hpaw sai majaw, Hkawn Nu hpe shakram da nna Danai de bai lung wa mat ra sai. Tsingdu tsingman ni hte nam maling ni mung, lungseng tsit zawn bai tsit lali tsawm wa mara ai. Nye a majaw Hkawn Nu a prat mung, ndai tsingdu ni zawn bai tsawm lali wa lu sai ngu ngai myit dum kabu nga nngai. Nye a myutsaw myit hpe shadan shaleng ai lam hta, shadik shatup lawm ai sarama Seng Pan hpe mung tut myit dum let, chyeju dum nga nngai. "Oh...! sinhpraw ai sarama hpe Madu Yesu gaw, shaman chyeju jaw htang ya nga u-ga law" Shata mali, na jang Hkawn Nu atsawm amai shadang sha langai shaprat lu sai lam kabu gara shiga na lu ai. Nye myit hta nachying kabu la nga ai hte shannu lahkawng hpe shingran hte myit dum sumru yu dat nngai. Oh...! Hkawn Nu myit mi kaji nga ai kun? Ngai hpe kade sha kamhpa let, myit dum garen nga ai kun? Myit n zim la ai hte ahkang hpyi la nna nta de gan yu wa nngai. Nta masha ni yawng kabu gara hkap tau la mi ai. Hkawn Nu yannu hpe yupgawk e mu lu ai. Abawng alang re ai machyangai hpe mu lu ai majaw, nye myit hta n chye tsun ai ana amyu mi hkamsha kau nngai. "Um ...! shinggyim masha langai mi mungkan ga ntsa bai jat wa sai. Shi hpe shingteng amying jaw ra ai, kaning ngu wa shamying na i?" Myutsaw myit n rawng ai myu shadang langai a majaw, ma ndai mungkan ga de du sa wa sai nrai ni? Myu a matu akyu n rawng ai si mat wa sai katsa zawn mung, n rai u-ga. Ma ndai gaw ngai zawn, sarama Seng Pan zawn "Myutsaw" myit hte hpringtsup nga u ga. Shi hpe shingteng amying "Myu Tsaw" ngu shamying na re. Hpang shana Ma hkalum amying jaw jahtawng htu sha kyu hpyi hpawng galaw ga ai. ""Myu Tsaw" ngu shamying sai. Nta masha yawng manisum myiman hte kabu gara shajang ma ai. Hkawn Nu yannu hpe mung, grai gawn lajang nga ma ai. Hkawn Nu, Ni Ba hte Nu Wa nta masha yawng a myiman nsam ni gaw tsawra myit hte hpringtsup nga mali ai.
Ngai mung, shanhte yawng a ntsa e myit dik myit pyaw la nga nngai. Kyu hpyi hpawng ngut sai hte manam yawng bra masai. Shana hkying 9:00 PM jan rai sai. Annuwa ni a yupgawk e, Tsawra matsan dum ai myit hte Hkawn Nu a lahpyen na Ma hpe pawn la nna, shabyi ni apup ya let, kanu a kahtan ntsa abya nga ai kara ni hpe masawp ya nngai. Ma chyangai gaw ngwipyaw simsa ai hte yup pyaw nga ai. Hkawn Nu mung, yupku ntsa, tsawra kamhpa la ai myiman nsam hte ngai hpe mada nga let, kade n na yang, a-ngwi sha yup pyaw mat wa nu ai. Yup pyaw nga ai shi a myiman nsam gaw mara kata ai Ma kaji langai a myiman zawn, santsawm la nga lu ai. Ngai mung, Tsawra matsan dum ai shaman chyeju gaw, ndai annuwa ni a nta dinghku hta tut grin nga u ga law ngu , kyu hpyi ai hte yup-ra shang wa ni ai rai. Jet ai Tsawra myit gaw, anhte Wunpawng myusha ni shada hta, tut e hpringtsup nga u-ga law.
Tsawra Let,
Shawnghtawk Tsin Pan
