MASHA CHYAZAI HTE NGA NHPRANG

MASHA CHYAZAI HTE NGA NHPRANG

BUM SHANGHKAWNG

Moi shawng de nammuk dara ka-ang shara mi kaw zunlawng kaba langai mi nga ai da. Dai zunlawng kaw gaw, masha chyazai amyu ni nga ma ai. Dai amyu ni hta woi awn pareng ai Ningbaw langai mung nga ai da. Shanhte ni gaw, nga hkwi sha ai bungli hte kanbau ma ai da, shante gaw, zunlawng kaw nga ai re majaw, ngwi pyaw simsa ai hte nga lu ma ai da. Raitim, shanhte hta tsang ra ai lam langai mi gaw nga nga malu ai. Dai gaw, lanam ta hta nammuk dara hka tung wa ai ten hta shan sha ai nga ni gaw, shanhte nga ai zunlawng nisa de lung wa nna, masha pe kawa sat sha sha re ai krit hpa hyen rai nag ai. Dai majaw, shanhte a Ningbaw wa gaw, ndai hyen hpe gara hku gasat manga kau lu na lam hpe sumru nna myitru nga ai. Zunlawng masha ni mung, ndai ram nga pyaw ai shara langai. mi, masha shan sha chye ai nga amyu ni a majaw, lup kawng zawn hkun hkraw mat wa sai da.

Dai zawn byin nga ai aten hta, Ningbaw wa a shangun ma kaw na marai, langai wa gaw, shi a Ningbaw wa hpe grai n ngoi la let: "Anhte yawng a asak. madu rai nga ai, Ningbaw wa e, anhte amyu ni masha shan sha ai nga ni a hpyen kaw na lawt lu na matu, tang shawn mayu ai" ngu wu ai da, shaloi, Ningbaw wa gaw, "She tsun yu u, kaja ai lam hpe tsun tang madun ai hpe galoi mung ala nga ai re" ngu sai da, shangun ma wa bai tang ai gaw "Anhte a asak madu Ningbaw wa e, ndai nga hpyen kaw na lawt lu na matu, zunlawng kaw shanu nga ai ni yawng hpe shaga nna, mung shawa zuphpawng galaw nhtawm, kadai mung kadai tinang nang myit lu ai lam ni hpe tsun hpaw bawngban nna, hpaji daw machye machyang shalaw galaw sa wa yang, nmai na kun?" ngu tang sai da. Ningbaw wa gaw, shi a shangun ma wa e mi tsun ai raitim, kaja ai lam re majaw, madat hkap hta la nna, shawa zuphpawng galaw dat nu ai da. Dai zuphpawng de zunlawng masha ni ahkum ara rai du sa nna, nga hpyen kaw na lawt lu na matu hpaji hkum sumhpa tang madun masai da. Dai zawn tang madun ai hta, zunlawng masha shada e pyi masha nau nsawn ai wa gaw, nye a mahkrum madup hku nga yang, ndai shan sha ai nga ni a wa gaw, grai galu ai.

Lai wa sai shaning hta ngai mu lu ai hku nga yang, hka kau kaw langu hpun langai yawng taw ai hpe nga langai kawa nna, langu tawng kaw nga wa dau nna si taw ai hpe mu ai. Dai majaw, ngai tang madun mayu ai gaw, anhte nga hpyen kaw na lawt lu na matu, nammuk dara hka tung wa jang, dai langu hpun jahpun da, langu hpun daw ni hpe mung htu jun da di nna, shan sha nga ni dai langa hpun hpe masha shadu kawa jung dau taw ai shaloi zunlawng masha ni yawng ninghtu, ningri, ningwa ni hte kahtam, galun, achye sat kau yang, anhte nga hpyen kaw na lawt lu na ngu myit lu ai" ngu tang dan wu ai. Ningbaw wa hte zunlawng masha ni gaw, dai la wa tang madun ai hpe yawng myit sumru yu nna, ndai gaw, mai byin ai lam re nga yawng myit hkrum hkamla let, Ningbaw wa woi awn ai hku hkansa galaw masai da.

Kaja wa sha lanam ta du nna, nammuk dara hka tung wa ai shaloi, shan sha nga ni gaw, zunlawng masha ni hpe rim sha na nga lung wa ma yang, langu hpun hta masha buhpun jahpun da ai hpe masha shadu nna, kawa dat ai nga yang, dai langu hpun kaw dau mat ma ai da. Dai langu hpun kaw dau taw nga ai nga ni hpe mi kaw nna shajin da ai zunlawng masha ni e yawng lu sat shamyit kau lu masai majaw, zunlawng masha ni gaw, nga hpyen kaw na prat dingsa tsang nra ai sha, ngoi pyaw simsa ai hte nga lu masai sa da law. Ndai maumwi hpe yu ai shaloi, Ningbaw ningla ngu ai ni gaw, mung masha a ningsen hpe madat ra ai. Mung masha ngu ai ni gaw, galoi mung myit hkrum ra ai. Myit hkrum kahkyin gumdin nna galaw sa wa yang hpa baw hpyen hpe mung dang lu ai, ngu ai lachyum sakse rai nga ai law.