MAISAU KAWK

MAISAU KAWK

(Byin masa sumrai gadun)

Hpan Ja

Shaning nnan shang wa mahka hta, nta shagu dun ye maza hte re mu galaw ai hkrai re ai hte maren, Ningwawt ni a nta mung ye lajang ra nga manu ai. Nta masha gaw law tim, dun ye lajang na masha gaw kaji sek sek re Ningwawt AWng jan Sumlut Nan sha rai nga ai. Laban kru ya jahpawt manap e, Sumlut Nan gaw miwa makawk si kaw udi shadu baw bang, lasi shadung hte bihtamyin B, bihtamyin C, langu si, lagat jahku, nbu si, hpunlum lum na nga ai shadu bang di, jak kaw "grut" she ngu rin la nna, kagu la a gasha Gam Shawng hpe: "Gam Shawng, daini anrat gaw nta ndai jasan jaseng kau na tai nga ga ai, shaning nnan shang wa sai, agam sha ningwa di rain du wa nga ai, shi du wa jang gaw bain mai seng sai, gai gai, ndai manap shat law law sha la jang n-gun grai ja sai, law law lu la u." Nga tsun let, hkum hkrang abawng alang rai nna, myiman pa pa bat bat re Ningwawt Gam Shawng hpe lu sha aman grai rawng ai manap shat gawm kaba mi ru jaw nu ai. Gam Shawng garat a ta na manap shat ta lahkawng hte hkap la nna, lingling re myi hte gawm mahka ntsa hku garat hpe mada nga let, agrut ngu lu tim n ma jang: "Rat, ngain dang lu sai, kan hkintit mat sai." Ngu jahkring kau dat nu ai. "La she nga ai wa, dai mate sha mung n lu lu ai gaw, gai gai, dai yu, ngai mung maren sha lu ai re le, n mai ngam ai yaw, nang lu sha ndai n-gup myi ngam kau yang, gumpraw hkoi shi jan lahpawt kau ai hku rai sai." SumLut Nan amying hku tsun share let, shi mung gawm kaba mi lu kau dat nu ai. Shaloi Gam Shawng myi di shim di ngam ai manap shat jahku hpe lu ma kau nna, kan jen jen rai nsa kaba shaw let tsap mat sai. "Hpun palawng ningsa galai hpun la su, ninghpu grai mawng na rai nga ai. Anrat nta seng ma, dun ye ngut jang, Fahpa sha-it de hka sa shin na re yaw."

Gam Shawng gaw Garat hpe gawm kaba ya kau let, shi a yup gawk de bu hpun galai mat wa nu ai. Garat gawm gashin ngut ai hte, Gam Shawng bu hpun ningsa galai la nna shi makau e ta lahkawng hte shabyi ahpun nna sa gari ashun tsap nga jang, garat jan gaw Gam Shawng a ta laseng gaang kaw chyat chyat rai chya nga ai nu nu re ta shan kaw pyi ke bang wa ai bu hpun hte, lahtin hta tsawmra jan ai kyep htep hpe mu jang: "Hihi, Gam Shawng nang gaw nau kaba lawan nna, bu hpun mung chyat ma sai rai nga ndai, ya shaning nnan hta na wa di bu hpun nnan bai mari ya na ra ai, sa sa, mu galaw jang n gashung sai, maza seng kau saga." Nga, balasatik tingsan sumpum mi magra lang rai nta ntsa htap de lung wa masai. Gam Shawng lakang kaw garat hpe shachyat lai kau da nna, pak she nga lakang baw kaw wa tsap nga let: "Rat, nu tung a gawk de shawng seng i? Wa di kaw shawng seng i?" "Ningnu tung a gawk de shawng seng ga, dai de gaw loi singtsi na re." garat shing nga jang, Gam Shawng ganu tung a yup gawk de chyinghka htu hpaw bang wa nna, ta kaning di jahkrat na re n chye rai, lagaw lagram tawn, nshang madi tawn rai garat hpe bai yu dat nu ai. "Ndai lahkum hkan man mara nga ai bu hpun ni gahtap la nna sumpu de bang da ga, dai dai tsi kawk re ni hpe saboi hkalawk de hta bang kau ya u." Nga matsun let, shi mung lahkum hkan yupku hkan taw ai bu hpun ni hpe hta gahtap la nna sumpu kaba de hkyawm di bang kau ngut manu ai. Gam Shawng kawa di a yup gawk de shang wa yang, lai lam lapran maisau laika kawk gaman gawng nga jang: "Aga!" nga galang mi hpu dat nu ai.

Shi garat hpe bai gayin yu let: "Rat, wa di a yup gawk kaw maza nau law la al law, tsap shara pyl n nga mat sai, ma hkra htawm kabai kau ya ga i." Gam Shawng kawa di a yup gawk ting hpring ai hkinghku ni hpe rai dingsa shadu nna, numji chyap chyap re shingnoi singga ni hte ka-raw ka-ra ni hpe hta shachyaw bang wa nu ai. Garat gaw gayin gayaw pyi n lu hkra chyat ai gawk na yupku hkan, lahkum hkan taw ai laika re naw hta mazing nga yang, Gam Shawng gaw shi hta shachyaw tawn ai ka-raw ka- ra ni hpe nda hku htu galau tawn nna, tingsan langai kaw htumpa de nna baw bang wa nu ai. "Cha e, Gam Shawng nang mana wa nbu wa nni, shingnoi singga ka-tawng ka-ra dai ni gaw ningsa tim n mai kabai kau ai, dai gaw ningwa di a sindun rai ni she re gaw e, kabai kau sayang anrat gaw ma sai. Waw waw saboi hkan na shi laika ni hta bang su, shi laika gaw shaning galai jang nra mai sai." Ngu jang, Gam Shawng shingnoi htumpa tingsan kaw daw mi chyawp tawn ai pyi n shaw la ai, saboi hkan ninghpu ninghpaw hte gayau gaya rai bum taw nga ai maisau ni, shi laika ni ma hkra, tingsan kaw hta hkrai hta anyin bang nga nu ai. Yupku lagaw nhpang kaw maisau kawk mahka ye ye re langai taw nga ai, dai hpe Gam Shawng myi gai yu ju ai zawn, garawt sit la nna galang ta ntsa e lung tsap hkra di gabye anyin la nna, buri kaba kaw hta anyin bang kau nhtawm, "Rat, maisau hta ma sai." Nga tsun let garat hpe yu tsap nga nu ai.

Garat gaw chyinghka shingjut shingnaw hkan shanat ai rapding nhtu, nri, ri nawng, hpaumaw n-gang, kinla n-gang, kinlum n-gang, gumhpraw n-gang, nri nhtu, nshi amyu myu ni hpe, Gam Shawng seng kau sai saboi de hta bum tawn, Gam Shawng e baw malu tawn ai shingnoi singga, ka-tawng ka-ra, n-gawt kinhtang ni hpe shara mi hta shachyaw shadun tawn di, dun htu kau ya na sawn nga nu ai. "Rat, maisau hta bang ma sai law." Gam Shawng grai awng dum ai ku nshang madi kau kra garat hpe galang bai tsun dan nu ai. "E e e, mai sa, nang grai she lawan nga ndai, ya nang le hka shin gawk na dun gatsut hpa-jet hte dun htu dingye kaw hka madit la nna la lung wa rit, na wa di a yup gawk grai na nna n htu yu sai rai nga ai, adun hkan maza gyi ku pyi kap mat sai, shi nta garai ndu wa yang yup gawk asan awan seng lajang kau ya ga." Ngu matsun dat jang, Gam Shawng kagat mat wa ai shaloi na kyep htep kaba gaw, shi bai kagat jang, nhku ting hpuntang she gasham hkra "pak" she nga ngoi mat wa sai. "Gam Shawng, na kyep htep dai gaw galai kau su, na lagaw hte nteng nna, ganang nhten baila taw na law, ningnu yan ningwa hte gaw tsan ai hte, lawan galai kau u yaw!" Ngu hkan marawn dat nu ai.

"Chye sai law!" Gam Shawng hpa-jet hte dun htu tsupni kaw ntsin hpya hpya madit la nna ndang nla rai hpai lung wa jang, garat gaw maza pung kaw ntsin shup bang kau nna, chyinghka e gan shanat tawn nhtawm, chyinghkyi hkai kaw gahtap gala noi sumhpyau tawn ai gumhpraw nhpye hte Jansi htungpyau, Rawang nhpye, Maru nhpye, Lashi nhpye, Nung nhpye, Shinggyin nhpye, sumpu kaba shinggan hkan nshu nshang gawng tawn ai danghkyem shingnat, basi ri gawng, lahpaw, ndan, yu tawk, shanhpyi ninggang, ari ninggang, sauyi palawng, kawa lap gupban, hkingkawp gupban, shawun di- bu, di pawng, magri laugaw di, myihtoi lahkum, jan n-gawt, shagan n-gawt, n-gawt kaji kaba, ka-ku, dinghkru, tsamal, ari dingsup, ari pali sumpu, shakum hku shanat tawn ai dumhpau sanat, rapding nhtu, zahkun, nbung sanat, yamdawng sanat, nri, ri nawng re gawksing gawksawng rai ni hpe atsawm sha shayu ahpu gatsut shatsai kau nna, dun htu ngut ai hpang she, yup ra nba bai galai kau da ya rai, maza tingsan lahkawng dun lang nna, hkum ting ninghpu hte hput rai, shat dap chyinghka lam shingdu na chyinghkyi gasha kaw shanghkawng noi tawn ai kawa laswi pali tsing shabam la hkra di, maza tingsan dai yan hpe mahka kuk kuk shajup kau nna, hpri chyinghka kaba makau e sa garawt shadun tawn rai, kagu a hpun nba ni hpe bu hpun gashin jak kaw bang nna hkrut tawn nhtawm, dawdap de nnan sha naw seng bang wa yang: "Maisau laika ningsa lahkawn ai law! Hpri daw hpri tang lahkawn ai law! Byiya palin lahkawn ai law!" Nga nna marawn ai nsen hpe grai na hkra hkra garawt shayaw nna, Ningwawt ni a nta ndaw hku jahtau lai wa ai masha nga sai .

"Rat, arai lahkawn ai ni sa nga ai, ndai maisau ni dut ya kau ga i?" Gam Shawng dingye hpe gahpa kaw hta hpai kau nna, garat hpe tsun let shinggan de kagat pru wa nu ai. Garat mung hkan kagat pru wa yang, n-gup ting na wa gaw hpun shatsam zawn san hkra mut ai Miwa num langai gaw, leng masum lagaw leng hta, la gasha langai hpe gaw lagaw leng ntsa e shadun tawn, langai hpe gaw ba tawn rai lai wa ai, Ma Nan hpe mu jang dawn rai jahkring nna: "Maisau dut na kun?" Nga san u ai. "Re law, kyin mi gade de ya na rai?" "Kyin mi gyaw manga re." "Reng shate sha gaw, dun ye manu pyi n pru nga ai le." "Kaning chye di na, ngai mung hpa n myat ai wa re, ma bau ra ai majaw she..." Nga let, buhpun palawng mung agawt agang re sha jahpun tawn ai, lagaw leng ntsa e dung ai ma hpe pawn shayu dat jang, Ma Nan gaw matsan yu dum nna miwa makawk si lahkawng bai wa hta jaw kau hkra di nna she, maisau tingsan lahkawng hpe langai hte langai shen dat yang, gumhpraw hkoi shi lahkawng lu dut ai, shi gaw Gam Shawng hpe gumhpraw ladawn ya nna: "Maw, Gam Shawng, gumhpraw ndai atsawm gahkyin tawn u yaw, ya jawng hpaw jang maisau pawngtin mari ai hkan jat lang di ai baw re, majoi n mai jai lang kau ai Iu." Ngu jang, Gam Shawng grai gabu let la nna: "Chyeju kaba sai." Nga tsun let, shi a lakang pawt makau na yup gawk de kagat bang wa nna, bunghkum gata kaw wa galap bang kau da rai, garat kaw bungli bai hkan galaw nang nga nu ai. Shat gawk kaw Ningwawt Tawng jan Lahpai Nang Seng gaw shat shadu si mai gangau ai sau hte chye nga kyin rawng nga nu ai.

"Moi, ndai gu hte nan a zauhkai lahtin loi nyin wa sai ni gaw hta kabai kau sai yaw?" Ma Nan zauhkai gran sa ashap let gamoi hpe san nga u ai. "Hta kabai kau u, raitim ninggu a gaw shi hpe naw nsan yu yang, shi a rai gaw hpu ai hkrai re nga nna nia bu ai rai nu ai law." "Manu hpu tim je mat jang gaw hkai ai baw n rai sai gaw e, mala la re gaw hta kabai kau sai law, galoi prat kaw nna hkai ai pyi n mu yu sai, gran maza, nshu nshang she rai nga ai." Ganam jan zauhkai sumpum mi hta gale tawn nna zum hte zum gale galau hta yu nna, n tsawm sai ni hpe gaw tingsan de baw bang bang di jang, Gam Shawng mung shi a zauhkai chyabyak ni hkan hta matsut bang nga nu ai. "Ma Nan yan rat, shat lawan naw sha kau saga, naw hkring dat mu, manang ni ngai hpe sha la nga masai da." Nang Seng sau hte chye ngu gangau la ai lu sha ni hpe saboi kaba kaw hkan tawn nna shaga dat nu ai. Shi hpe manang ni la ai ngu ai gaw, ahpre da chyai na matu saw shaga tawn sai hku re. "Sa sa, Gam Shawng, ta shin kau su, shat sha ngut jang bai galaw shakre na re." "Chye sai law!" Gam Shawng kyep htep hte "pak" nga hka shin gawk de ta shin mat wa nu ai. "Si mai mung sau hte gangau ai hkrai hkrai i! Ngai ra sha ai hku mung galaw yu mu le!" Ningwawt Tawng chyinghka lam kaw lup re hte, shat dap de na sangau manam hkrup nna, nsen nau n pyaw ai hku hpu dat nu ai. "Nang galoi mi wa na nit, ngai chye ai n re ai gaw, chyalu lu sha jang rai sai, nau hkum sharu!"

Madu jan grau pawt ai hku hkap htan dat nna, Ningwawt Tawng mung: "Madu a nta de she wa yang, naw tsun dan ra na hku i?" Ngu hta dat let, ntsa htap de lai lung wa mat nu ai. "Ma Nan! E Ma Nan!" "Agu, nhpa re?" "Ndai ngai yup ai gawk de San seng galaw ai gaw kadai re?" Ningwawt Tawng hkalap kaw grai pawt nna chyan san dat nu ai. "AWh, Gam Shawng anrat seng ai re law agu, kaning rai wa sata?" Ningwawt Tawng gaw nhku hkan asan sha seng lajang kau ya, hpun nba panyep ni galai kau ya, shi a nhku pyi lau nshang sai hkinghku ni hpe zeng zeng sha di galaw hkrep tawn ya ai gabu let, saboi asan re kaw dung bang wa nna, yupku lagaw e shadun da ai maisau kawk na arai shaw yu na ngu gum mada yu dat yang mye n mu mat nna, shara mi kaw mazing tawn ya na sai ngu, saboi npu, yupku gata hkan shara magup tam yu yang, shi shani shana nhku shang wa shagu wa mada yu yu re maisau kawk dai n mu mat jang she, galang ta laji hte rawng nga ai ja, masin mung langai mi e dip shadut dat ya ai zawn htu machyi si wa nu ai. "Ya ndai yupku lagaw nhpang kaw ngai maisau kawk mi shadun tawn ai gara kaw hta tawn kau ya masa ta?" "AWh, hka agu, dai saboi hkan shi laika hkrai hkrai rai nna, Gam Shawng hpe she hta gahkyin shangun ai re wa, mahkoi ashi laika re ni kaw magawn shalawm kau sai kun law!"

Ganam jan masin galang ta gahpra sai. Mi sha Gam Shawng aman rai hta anyin bang sai re wa, ngai mung kaning re gaw ra na nra na sha mung n majan lawm ai, ya chyau ma sai, ngu myit dat ai hte, baw pyi wung nga hkra kaba mat nu ai. "Ya maza rai dai ni gaw rang?" Kagu loi makan makan nga let san ai majaw, Gam Shawng hpe dun lang rai, shanrat lahkawng ntsa htap de lung wa ai shaloi, Ma Nan san ai: "Nang ningwa di a gawk na maisau kawk hta bang shalawm kau sai nrai?" "Maisau grai ntsawm sai ni she re mi, ningnan pyi n lawm ai mi." Gam Shawng kawa di hpe hkrit wa sai, shi hpe mahkoi rim anut sai nhten ngu myit dat nna, lahkap she kya mat wa ai majaw, garat a palawng matu kaw noi tik tik rai mat sai. "Hkum hkrit gaw e, ngai hta shangun ai she re." "Wa di gayat jang kaning di na rai?" shanrat gawk chyinghka lam kaw du yang, Ningwawt Tawng a myiman gaw sin sin rai, myi mung grau kaba ai sha nrai, bawng ai she mu mat sai myi sha hte, Gam Shawng shanrat hpe yu shati tawn nna, yupku npu de ta ladawn let: "Ngai yupku lagaw makau e shadun tawn ai maisau kawk hpai bang kau dat sai i?" "Rat da nga yang, maisau ningsa ni hpa ndi sai, seng kau ga nga ai." Gam Shawng ga tsun ngut ai hte lawngta kawa nna hkyum hkyum rai tsap mat sai.

"Ma sai, teng teng sha ma sai, ya ngai gade ahkyak ai rai bang tawn ai she rai yang me, san laman gaw nrai yu ai mi, hka ya ganang hkan tam la sana rai sata? Kaning re ni hpe dut ya kau dat sa Ma Nan?" Ningwawt Tawng ganam jan hpe mada tawn nna bai san dat nu ai. "Agu, eh, ma lahkawng woi nna rai lahkawn mari hkawm ai, wa gaw ahkye nsan ai Gwichyu Miwa num jan hpe dut ya kau dat sai law." Ganam jan madu hkrai pyi abaw yang achying ngu ahtwi dauyin la na zawn ngu hkra pawt mayu let, kaning di sana ngu naw mau ung ang nga yang, kagu bai tsun ai gaw: "Dai Miwa num jan hpe naw hkan tam yu su." "Agu, Miwa num jan ganang nga ai mung n chye ai wa, kaning di san hkawm na rai wa sata? Mangshi gat nde de kaba ai shara kaw wa i." Ma Nan kraw gata e dai hku myit tim, n-gup hta tsun shapraw lu sai nrai. Ma Nan naw mau tsap nga yang kagu gaw: "Maisau re lahkawn la ai shara hkan, maza sa sharu ai shara hkan hkan tam yu su le, nan nan n mai shamat kau ai, n mu tam la nlawt re!" Nga nna badin pawk makau nna yu shati tawn ai myi hpe, ganam jan yu hkrit mat sai. "Gam Shawng nang gaw, ngai hpe n san yu ai wa htawm baw bang kau ai, n re ai she rai sai, ma maw gwi lahpyaw ngu ai baw she rai sai, daini na wa di a maisau kawk dai n mu tam sayang, anrat gaw si nan si ging sai yaw Gam shawng!" Ma Nan garat Gam Shawng a ta laseng kaw manat tawn nna, yat sha gahte tsun kau da nna, shi a dat htu mawdaw buk gawt lang rai, myit gaw wamwam damdam nga let, ganau Ma Htat wa sa yaw ai Mangham Sam gahtawng de yawng mat wa let gyenan gayat dat nu al. "Ahtat, nrai sai, nrai sai, ngai agu a dun ye lajang ya ai ngu jang, shi a maisau kawk chyabyak kaw rai gaja bang tawn ai re n chye nna, Gam Shawng sanga hkalung rai jang gaw she gabye anyin kau hkra di tingsan kaw baw bang kau nna, ngai mana rai jang Gwichyu Miwa num jan hpe pawpaw pepe hte bai hta dut ya kau dat, ya agu gaw htaw nta kaw wu taw nga ta sai.

Nang mare shingnawm hkan ganang maza lahkawn tawn ai shara nchye nni?" "Yi! Ashawng, ya nanrat chyau hkrup sha manu ai ga rai nga ai, agu hpe masha ni sa hpai jaw ai ja gumhpraw lungseng mi she bang tawn ai mung n chye, masha ni mu sayang, nang hpe ndai re nga nna gaw nhkap nhtang ya ai gaw e!" Ma Htat mung majawng majat nga jahkrit dat nna, Ma Nan grau nga n pyaw si wa nu ai majaw, maisau re lahkawn ai shara lawan hkan woi tam ni ngu aput dat jang, ganau jan mung mawdaw buk jawn nna sa wa rai, Mangshi jak hpaji jawng kaw hkrum hkat ga nga nna ningdat hkat masai. Shannau hkrum re hte, Ma Htat gaw gana jan a shawng de mawdaw buk hkrau jahkring tawn nna, "Ashawng nang nang gaw mana bu ai she rai sai, du magam ni a nta hkan gaw nhpa mung sadi zahka hte galaw ai baw she rai yang wa me, gumhpraw kawk nhten hta bang shalawm kau dat sin dai rai nga ai." "Sa-wa Ma Htat nang yaw, ngai pyi hkrit si nga yang, nang gaw sagoi goi chyai ai zawn she nnawn yi." "Ashawng nang nau gajawng mat nna ngawk mat sai rai nga ndai, gumhpraw nrai yang gaw shade ahkyak ai gaw nhpa rai na ta? Nang gu hpe nsan yu ai ngu?" "San nga ai gaw, agu a myiman hpe pyi nwam yu nga yang wa, ya gaw hpa re ni ngu san na ahkyak nrai sai, mu tam nmu tam la na she ahkyak rai sai." "Shaloi gaw htaw lupba kawng lam de she sa tam yu saga, maza gaw mare shingnawm de lahka sa nat kau kau rai re ma ai." Ma Htat mawdaw buk baw gayin nna, Mangshi Fu-an yen lupba kawng lam de jinghkyen mat wa jang, gana shawng mung mawdaw buk wan hkut she rawt hkra hkan te nang mat wa nu ai. Shannau hkrum hkat nna mawdaw buk hte bri ngu, Mangshi sara jawng shingdu hku na noikrat yi de sa ai mawdaw lam hku rai mat wa yang, noikrat maling lai re kaw maza sa nat sharu ai shara mi gaw sa mu ma ai, dai maza nat shara kaw maza nat wan htum wa nna, wanhkut loi lun lun rai tim, wan chyi ai n mu sai, nrut nra, noikrat rai, balasatik ni ju jahkat ai bat gaw ladi pyi grai shalut hkra manam nga ai.

Maza sumpum mi hkru hkat dung mat jang, Ma Nan a myiman pyi sin mat wa sai. "Ashawng, e, hpa pyi n nga sayang wa, wa mat saga law, ngai wa yaw ra nngai." "Na awa gaw dun mi sha n jaw yang n si wa a dawng!" Ma Nan ganau hpe hta dat nu ai. "Nang hkrai naw hkan tam magang su law, ngai wa naw yaw kau da nna bai hkan tam lawm na yaw, wa mung gumhpraw tawng she rai yang me, hihi..." Ma Htat a myiman hpe yu yang, gachyi mi pyi myit law lawm ai zawn nrai ai hpe grai yu pawt nna, mawdaw buk hpe pyi ahtawng marawng kau na zawn ngu hkra pawt mayu tim, ganau jan wa yaw kau da nna bai hkan tam lawm na nga ai ga kaw sha awai la rai, hpang lam de nhtang mat wa nna, Senchi lam kaw bra masai. Ma Nan shi hkrai masin gaw htukhtak she htukhtak, shi a sinda hpe gum yu dat yang palawng pyi awawng rai shamu ai zawn re mu dat ai shaloi, shi a myit hta: Mawk, daini gaw moi laning mi ngai ma shangai ai shaloi lawt ai baw myit chyat ana bai awk sai ga rai nga ai ngu myit dum ai hte, hkum ting salat lagyi hprwi nga hkra gabram pru wa nu ai.

Ningshung si riri nga let, shi Lenghaw de tsi wa tsi ai shaloi, kagu shi hpe sa woi la ai lam hta kagu hpe hpyi shawn ai ga bai dum dat nu ai: Agu, na sanat gadun ngai hpe shap jaw rit, sanat pala si langai yawm mat jang, nang bum ga hkan u gap kau sai ngu jang kadai mara n jaw na re, ngai hkrai gap si ai she re, nang hpe ma mara mung n shagun ai, ndai made tsi tim n mai hkraw ai gaw, nanhte hpe myit shapu, jamjau tam jaw ai she rai sai, ngai n kam pra shakre mat ni ai, ama gaw nanhte bau kam jang bau, n kam bau jang Ma Htat hpe ya kau mu, ngu nna si lam daw dan ai shaloi, kagu gaw si tim nta kaw she wa si na re ngu asawng mat wa ai shani kaw nna shi a masin chyu gahprap dukdak, chyat chyu chyat machyi ai masin mai mat wa ai re, ya daini lama agu a arai gaja dai shamat kau sayang, ngai ana dai bai chye awk chyalu rai sai, ngai gaw si nan si ging sai ga re, ngu myit matut mat wa ai shaloi, shi namtsi wa tsi ai ni a nta shingjut hkan shadun tawn ai kumshu yi hkan lang ai tsing sat tsi hte shingtai sat tsi ndum ni hpe, shani tup tup lagu yu nna shalai ai shingran wa, tsi pawng ni shi a myiman hku pala gap jahkrat dat ai zawn, langai hpang langai rai, gamya she gamya dan taw nga sai. Yau sai, si ging nna si jang gaw si sai ga re. Ma Nan shi hkrai tsun shi hkrai yau rai, mawdaw buk pyi ntsawm ntsa re lam hkan ahtu she ahtu gatawt let Hungsin lam hku hkawm mat wa yang, Hawtung lam kaw hkrang nna, lungja nyep ai lam hku maidang pyi matin mat na zawn ngu hkra gawt shapyen yu wa ai shaloi, hpri praw nta anyem sha re kaw, shakum pawt hku maisau sumpu ni apyet gahtap tawn ai mu dat nu ai. Ma Nan mawdaw buk "Krik!" nga hkra jahkring dat nu ai. Ma Nan mawdaw buk kawn yu nna, chyinghka lam kaw malut tauba kaw myiman daw kaba mi ting lup kau hkra malut marawp lu let jan kra dung nga ai, hkum ngau gaw tek tek hkak hkak re la langai hpe: "Ta kaw, daihpawt ma lahkawng woi ai maisau lahkawn mari hkawm ai Gwichyu num langai, nanhte hpe maisau nsa dut ya a ni?" ngu tintin mama san let, dai yang grupyin di gan mada dat nu ai.

Dai shara hkan byiya palin, ntsin palin, sau palin, lu hpa palin, di mala jarung chyahten chyabyak ni, hpri daw hpri tang ni, sumla hkrung jak, hka lu jak, dat shat di re ni majaw hte majaw, gawng hte gawng di ma tawn ai, dai chyinghka lam kaw dung nga ai wa hpe bai yu dat tim, maza shadu kau na zawn rai hkra, ladi di rung pyi tauba mahka kaw ganoi chyalup mat hkra di tawn nna, hkaipyek mun zawn chyang ai lawngdu hpe hpungkum kaw du hkra gang shalun tawn rai, lama shi marawp dat ai tauba na salik wan chyi ai nmu yang, shi hpe chyahkrung shadu na zawn pyi nrai mat ai hpe yu mau nga yang, Miwa la dai gaw tauba kaw chyalup nga ai myiman sharawt la nna: "Sa dut ya ai le." Sichawn nsen grai la-pai ai Miwa ga hku htan dat nu ai. "Maisau dai ni gaw rang? Ya gara kaw tawn da nu?" Ma Nan shi hpang de bai sit tsap hkra rai galaw san ai shaloi, Sichawn la dai Ma Nan a shakya rai ja lungseng ni hpe azi yu nhtawm, hpri shakum kaw tauba shanat kau da rai, Ma Nan kaw sit hkrat wa nna, "Nang gumhpraw makai hpe maisau shabawn shadu nna dut shalawm kau dat sai mahkoi re?" Ngu tsun nna, masai masai rai mani sum di dat nu ai. Ma Nan laji rawng nga ai ja, dai kaw lahkam mi sha bai sit hkrat wa yu rit, nye mawdaw buk hte adawt marawng kau na law! Ngu kraw gata lagu matsa let, mawdaw buk baw kaw galaw magra shangang la hkra: "Ta kaw, nang hpe maisau sa dut ya ai jan ganang yup ai kun? Nang lama chye yang chyeju hte naw tsun dan rit, nye agu a rai gaja hta shalawm kau dat ya nna, ya agu gaw nta kaw pawt rawng nga ta sai." Ngu hkrap bat she mawng wa hkra aput dat jang, Sichawn la dai sumbu na matsing buk gachyi pa ai shaw la nhtawm, gyenan tsun dat dat nu ai.

Ma Nan gyenan gayat dat yang hkrang sai, Gwichyu num jan htan sai majaw, gara kaw nga ai, ngai sa tam na ngu sai, Gwichyu num jan gaw Sakhkung mungdaw jak hpaji sharin jawng shinggan na htugyi nta mi kaw re ngu jang, Ma Nan Sichawn la hpe chyeju dum ga grai tsun kau nna, mawdaw buk sharawt la rai rawt tam mat wa na ngu yang, mawdaw buk gaw wa ni kawsi nna nyut ai zawn, lahkawng lang mi nyut nyut nga hkring mat sai. Mang chyagrawp ndai dai mung, ahkyak kaw she hpanhkyung di bai rai sai. Ma Nan zawsi shaw la kau nna kagu hpe gyenan gayat dat nu ai Hkring nrai yang kagu a mawdaw shi a man kaw du rau sai. Sichawn la wa Ningwawt Tawng a Hawnda mawdaw hpe hkap yu yu, galu kaba shingkang shingwang re hkum hpe bai mada yu rai mani sai sai di yu tsap nga nu ai. Shi mani mayu ai gaw, ya yang na du ni masha ni sa makai jaw ai mayun gumhpraw hpe, lang gaw hkrit, asuya gumhpraw dum hkan sa bang ngu yang gaw, masha ni chye kau na tsang rai, nta hkan na maza mala kawk hkan sha makoi tawn re, nta masha ni n chye nna maisau ningsa shadu rai masawm dut kau ya ang sai ngu tak nga nu ai. Shi Ningwawt Tawng a myiman hpe mada yu yang, myiman pa pa bat bat rai, yu dat yang du hkrang nan rai nna, du kaba galaw nna, asuya gumpraw gade map la, mung masha ni a gumpraw gade masawm sha nna, tawn shara she n nga hkra lu su sai rai nga ai ngu, n-gup jut mi de hkyeng di yu asang kau dat nu ai.

"Du wa, gumhpraw makai gade daram kaba ai shalawm kau dat sa?" "Gumhpraw hta manu grau dan ai rai gaja re law, n mu tam la n lawt re." Ningwawt Tawng mawdaw hkalap kaw myiman shadawng tawn nna, krit lahkrit di tsun let, ladi galang mi sharat dat nu ai. Sichawn la gaw Ningwawt Tawng ladi sharat ai hpe, shi hpe sharim ai shadu nna, grai hkrit wa nu ai majaw, kyi kyi sha re hkum hpe hpang de loi htingnut dat nu ai. "Du wa e, maisau dai ni daihpawt ngai Gwichyu num langai kaw mari la nna, mi yat maisau ningsa hkan lahkawn mari hkawm ai ni hpe she htawt dut ya kau sai, dai ni gaw le Mangshi Htang rung lam de maisau rung ni galaw tawn ai Maisau gahkyin rung langai hpaw tawn ma ai, dai shara kaw shawng sa garawt tawn nna, kaning re maisau hpe gara de mahtang dut ya na garan la nna sa sa ya ya rai ma ai da, Mangshi Maisau rung de she sa bang yang, ya gaw she n rin mani kau sadawng. Shing nrai Hkunmyin de mi dun mat wa masa, n lu tam la n lawt ngu?" Sichawn la wa shi myit ai, anhte gaw bungli n lu, ja gumhpraw taw nna rai ningsa sha hta lahkawn dut sha hkawm, nanhte du galaw ai ni gaw, ja gumhpraw hpe majoi sha kabai tawn nna, nta masha hpe hta kabai kau shangun na du hkra hkra rawng ngu, myi da hku lagu yu dat nu ai. Ma Nan shan gu mawdaw gawt nna Gwichyu num jan a nga shara tam lung wa yang, jawng de madi shang wa ai mawdaw lam htum nna, hkra maga numsun lam mi hku nga ai. Ma Nan gyenan bai gayat dat jang, Gwichyu num jan numsun lam makau na grai wum tsawm ai Wu ring hpun npu na ntai nmai re, maisau sadek run la nna shakum kum da ai, ntsa de gaw hpri hpraw galup re nta chyabyak ndaw kaw, ma langai gaw dun, langai gaw ba rai, shan gu hpe hkap nga la ai. Ma Nan salat hte li rai, Gwichyu num hpe mu dat ai shaloi na myit gaw, hka yawng ai ni a hka kau na kashun pawt mu magra ai hpa, shi a ta kaw ma-ja manat tawn hkra: "Daihpawt manap dun ye nhku seng ai shaloi, agu a rai gaja makoi bang tawn ai maisau kawk hta shalawm kau sai, ngai dut ya ai buri gaw ngai lasi pali hte ngang ngang shajup tawn ai re, tam tim loi na re, nang nshamawt kau ai sha sa dut ai n re ni?" "Cha e, ya kaning di sana rai, ngai nang kaw mari la ai maisau tingsan dai lahkawng ma-hkra hpyan nna, ngai a tingsan tsit tsit re mali kaw baw bang nna she bai sa dut kau sayang me, ya galaw ga mi she garawt mat wa masa." Gwichyu num ma galaw pawn la hkra hkap tsun dan nu ai.

"Ngai nau jan e, nang tingsan kaga kaw bang kau ai gaw nang sha matsing na re, ya njang an gu hte maisau lahkawn rung de naw sa hkan tam ya lawm mani, dai na ma yan hpe mung woi lang u, nang mawdaw de lawan shang wa marit." Ningwawt Tawng tin shapun ngu saw dat nu ai. Gwichyu num jan mi yat shi la wa ai maisau ni hta garan lata bang ai shaloi, gumpraw makai rawng ai mi gaw n mu, rai tim lungseng myi zawn re ni she rai yang gaw shi nsadi jang nmu na re ngu, ya yu yang si mani ahpu ahpa di she lata bang sana wa, lama lungseng myi zawn re rawng taw, ngai pri hte prai ngu ningdang kau yang, kadai mara shagun na nrai nga ai ngu myit shut dum let: "Ya ngai daini mung maisau naw lahkawn hkawm ra ai wa mi rang, ngai gaw..." "Hkum myit pu sa, daini na matu n-ga hkra ngai jaw na, dai ningsha yan hpe mawdaw de lawan woi shang wa rit." Ngu jang she, Gwichyu num jan myit la ngu wa nu ai, gasha yan hpe mawdaw gata de dun bang wa sai. "Lani mi gade dang dang lu tam ndai rai?" Ningwawt Tawng mawdaw kaw grai n manu ai gayin let san u ai. "Gade lu tam na law e, paga gaja jang gaw hkoi tsa lam, n gaja jang gaw shi lam sha wa re." Gwichyu num shing nga jang, Ningwawt Tawng sumbu na gumhpraw lahkawng tsa shaw la nna ladawn let, "Ndai gaw ya nang hpe hkatum shatum kau ai gumhpraw re." Ngu nna ladawn jang, grai n la hkraw nga nu ai. Shi myit ai: Rai gaja rai nna, lama mu tam jang ngai hpe gumhpraw law wa n kam jaw nna rai ang sai ngu n kam la ai rai nga nu ai. Ma Nan kagu a ta na gumhpraw la nna, Gwichyu num jan hpang de gayin wa nna, shi a ta kaw nan anyin bang ya nhtawm, "Nang shau la ai hkum ngu le, arai shamat kau jang nang hpe mara n jaw ai pyi hpuwang rai nga yang me, agu rai nna she nang hpe matsan dum nna lahkawng tsa tsa jaw ai, daini tup mung n rai na re, she la da u." Ngu nna, shanaw jaw ai daram hku di dat jang she, Gwichyu num dai grai ningdang masu nna ret di labu sumbu de la gun kau nu ai.

"Ganau, ya gara kaw shawng sa yu na re?" Ningwawt Tawng myit mada gawm ai ayawm nga let, Gwichyu num hpe bai san dat nu ai. "Ta kaw e, le Mangshi Htang rung lam de shawng sa yu ga, dai de maisau rung hte ni ai, shanhte Hkunmyin de n mai shalai ai maisau gaw, dai Mangshi Maisau galaw rung kaw sa dut bang bang rai ma ai da, dai kaw n nga jang she kaga de bai tam tim mai ai, shanhte hpe shawng sa san yu na she di saga, dai re maisau galaw rung kaw du jang grai lawan nna rin kau kau rai ma ai, ya gaw mahkoi rin mani kau sai nhten." Bai ngu dat nu ai. Shaloi Ningwawt Tawng laji rawng nga ai lata, Htang rung lam de mawdaw gawt shapyen ai, shi a shawng lam kaw hkawm ai mawdaw ma hkra lai kau da da rai shachyang nna, Miwa gasha yannau achyi nga nna hkrap ai pyi aye nla nga yang, shawng lam de mawdaw ayan akan rai hkring nga la jang, Ningwawt Tawng mawdaw jahkring tawn nna, Jinghpaw ga hku: "Ja e, awoi tin yang hpun lakung ntin ngu ai baw bai rai sai." Nga nna anyam nga nu ai. Ma Nan gaw ma hkrap ai nji nga yang, mawdaw bai jahkring dat jang, shinggan de gan pru wa nna lam makau na seng gasha mi kaw muk htang re sa mari la rai, ma dai yannau hpe hkrap shangap shangun nu ai. Seng madu hpawmi num gaw Ma Nan gumhpraw shaw nna gatrai saboi ntsa e mara tawn ai gyenan hpe yu mangoi nga yang, malap kau da nu ai. Ma Nan mawdaw kaw lup re hte, mawdaw shamu mat wa jang, gyenan ret di hta la nna, seng gata de la bang kau nu ai. Ma Nan ganau jan hpe shi kagu hte Mangshi Htang rung de tam mat wa ai lam naw tsun dan na ngu, nhpye de gyenan masawp dat yang mye rai mat sai. "Agu, ngai gyenan shamat kau sai law, ya ya sha mawdaw jahkring ai kaw, ngai ma ndai yan nau hkrap nna rai sa mari jaw ai ngu jang, seng saboi kaw shaw mara tawn ai ndum hta gun kau sai." Ngu tsun let, kagu mawdaw nhtang dat jang lawan lawan gan yu na matu, mawdaw chyinghka na kaw pyi manat tawn nu ai.

"Ma Nan e, anan hta akan nan nga ai gaw, ya kaning di sana, loi hkring sha nwa san yu sayang me." "Agu, she naw gan nhtang tam la ga, gyenan n lu yang yak ai." "Atsawm sadi na gaw nnga, nau tin yang gataw ngu ai baw she rai sai." Ningwawt Tawng masin gaw brawng brawng nga tim, gyenan wa malap kau da yang nwa tam la gaw n mai sai ngu, mawdaw bai gawt nhtang nu ai. "Hpa rai bai nhtang mat wa ai re?" Gwichyu num agajawng nga san dat nu ai. "Ya ya sha ningsha yan nau hkrap nna muk sa mari jaw ai ngu yang, gyenan malap kau da nga ai law!" Man Nan pawt pawt ngu htan dat nu ai. "Ma ndai yan mung galoi pyi n hkrap ma ai mi, mawdaw nhten na sam ma ai, manap shat gaw jaw sha sai re, shat kawsi ai madaw rai kun." Nga nna naw tsun nga ai laman, mawdaw seng ndaw kaw bai jahkring tawn rau sai. Ma Nan hkre hkre pru wa nna: "Lauban, mi yat ngai muk mari nna gyenan ndai kaw mara kau da sai, nang hta tawn ya sai nrai yi?" "Nhpa gyenan? Ngai hpa n mu ai le, nang muk mari ai shaloi gumhpraw shaw ai gumhpraw yip chyau nang shaw la nna gumhpraw shaw ya, ngai nang hpe gumhpraw hkin ya re hpang, nang nhpye de bai bang kau sindai, gyenan gaw n mu ai law." Seng madu chyip hte chyap nga hkap ningdang nga ai, raitim shi a myiman nsam gaw bya mat sai. "Nre law, ngai ndai kaw adum sha mara tawn ai re, gumhpraw yip gan shaw ai shaloi gyenan shawng shaw nna mara dat ai hta gun malap kau ai she re, nang hta tawn ya jang myihtan ja sha gaw jaw na le." Man Nan ga gade pyaw ai hku wa mi tsun tim, seng madu gaw ngai hpa n mu ai nga tsun let, Sam num ni rai sa mari ai de bai chyauhkre mat wa nu ai.

"Ndang si na nang gaw yaw, nang sha nla yang kadai wa la na•.." "Yau sai yau sai, ngai bai mari ya na, nang shi nan nan hta la ai sakse lu ai gaw nrai, san tim alaga she rai sai." Kagu shing nga nga tim, ganam jan grai naw angun let, mawdaw de shang mat wa nu ai. Ningwawt Tawng mawdaw galang bai gawt shapyen mat wa yang, Mangshi Htang rung lai rai Hpati kaw du ai hte, Gwichyu num gaw bum pawlaw gasha mi nga ai de ta ladawn nna, "Ta kaw, wawra bum gasha nga ai de gawt hkrat wa u, shanhte rai hkap lata gahkyin ai shara re!" Nga nna tsun dat nu ai. Zaibru nyep ai, mawdaw lahkawng yan hkat yang pyi arut hkra hkat na zawn re hku rai mat wa masai, bum lagaw kaw hpri shadaw hte nta ayan akan re ai shachyaw tawn nga ma ai, ndaw ya mung grai pa nna shara tawn ai kaw, atsu htingraw zawn grai grai galu ai mawdaw jahkring tawn nga ma ai. Mawdaw langai hta biya palin sadek hta shalun nga ma ai, bai langai hta gaw run gahtap gyit tawn ai maisau shabawn hta shalun nga ma ai, langai mi hta gaw lit baw ngut nna, ntsa de muga lung dagap ai la marai mali mawdaw ntsa kaw sumri hte wawng rai gumbat shangang taw nga ma ai. Dai shara hta bungli galaw ai masha ni gaw galoi mung shanhte nga ai de ndai zawn re mawdaw kaji n sa yu, sa tim chye ai ni a sha mu yu nna, kadai nhpa rai hkawm ai rai kun ngu, loi ntsen ai zawn re myi sha hte, hkap yu nga ma yang, Ningwawt Tawng mawdaw kawn pru wa sai. Shi a kang shingwang re hkum ngau hpe hkap yu nna pyi, lama mi rai ang sai ngu, loi hpum hpum dut dut re Miwa la langai shi hpang de hkawm hkrat wa nna, "Du wa, kadai hpe tam ai re?" "Ndai kaw na lit hkam masha kadai re?" Ningwawt Tawng a myit law la ai myiman hpe mada nga ai Miwa la gaw, ahkrit hkrit: "Ngai re law, nhpa mu ra a ta?" Miwa la nhtang san dat ai shaloi, Ningwawt Tawng hkra ta yungdawn kaw chyahkyi mai noi tawn ai mawdaw zawsi ningwut let: "Lauban wa e, daihpawt nta na ma ni ngai a maisau kawk langai hta bang shalawm kau dat ya nga ma ai, dai kaw ngai arai gaja bang tawn ai re, n mu la n mai re, naw tam yu ga." ngu dat nu ai.

"AWh, ya kaning di sana rai, maisau kawk ni gaw ya ma hkra baw bang kau nna, waw mawdaw pyi muga gyit shakap kau ngut wa manu ai." Miwa la wa Ningwawt Tawng a hkra ta na yungsha hta chyawp tawn ai lungseng ta chyawp myi she lat hkra tsit ai hpe mu dat nna, myit hta, masha ndai gaw du galaw ai rai nga ai, galoi nhten masha ni sa lagu jaw ai lungseng myi makoi bang tawn ai maisau kawk she hta bang kau ya jaw nga ma ai, ngu myit let, asuya du ndai ni gaw mung masha ni a salu salat krai makyuk sha nna, madu ba nna lu la ai rai nre ai majaw, maisau kawk hkan sha bang tawn rai shalawm kau ai rai nga nu ai. Madu jan ni hpe wa jaw na pyi nnga, shinggan num ni hpe jaw na matu makoi da nhten re rai nga ai ngu myit lu ai shaloi, Ningwawt Tawng hpe n-gup jut pai maga de loi hkyeng di lagu mani dat nna: "Du wa e, mawdaw shade law ai kaw, rai kaji gajaw re sha gaw kaning di dang ashap la na re ni e?" "Lauban wa e, kaning nchye di sai, dai mu ga gyit ai ni hpe naw hkring shangun u, daihpawt ngai sa dut ya ai maisau tingsan gaw tsit ai hkrai re, tingsan mali sha re, tam n yak na re." Gwichyu num shing ngu tsun u ai. "Manang ni, dai mu ga naw gun kau dat nna, maisau tingsan dai ni naw shayu dat mu, ndai du wa rai gaja tam la ra ai da." Maza lauban wa gahtan kaw ta hte jan shingga tawn nna tsun dat jang, mawdaw ntsa na ni gaw grai ba ai hku nshang madi nna tsap nga let: "Eh, tun shi hkun nga ai rai wa bai shayu kau nga ai gaw, sai hten wa sai nhten?" Sak loi ram ai la gasha langai mi grai n kam ai hku tsun dat nu ai. "Hkum garu, lawan hta kabai shayu ya mu!" Maza lauban wa loi makan dat jang she, ntsa na ni adu ari nna naw tsap nga yang, lasi grawm grawm re la langai mi hpri nta chyinghka lam kaw gum nna gale hkrat wa nhtawm, gahtan hku abya yu wa ai loi gyi gyi re kara hpe hkra ta lamyin grai galu ai yungkyi hte na lakawng ntsa kaw lahkat mahkai tsat kau nna: "Mak tek mi nrai yang gaw, ya ngai daina de Hkunmyin du na ngu ai mawdaw me, hpa ngu shayu na re da i?" Nga, maza lauban wa hte nbung npre san sa pawt tsap nga nu ai.

"Dareba e, nang hpe grai tawngban ai, ngai maisau kawk langai mi hta bang shalawm kau dat ya nna, hkan tam ai re, nang hpe grai tawngban ai, chyeju hte naw shayu kau ga, mu tam la ai hte anhte nlang bai hta baw bang na re. Nang daining ting tam nna htaning ting mung tam na she re, gumhpraw hpe n ngu ai sha, akyu tam ai she ngu saga." Ningwawt tawng shing nga jang she, dareba wa shi hpe mada yu yu rai nna, kraw gata hta, rai mi she rai sai, jaw sha ai baw she rai na sai ngu myit let, shi a mawdaw ntsa e tsap nga ai ni hpe, "Shayu mu! Du kaba kaning re ja lungseng matep bang tawn ai mi she rai nga! Mu tam jang yawng hpe kumhpa jaw chyalu re!" Ngu hpareng dat nu ai. Ningwawt Tawng mung mawdaw ntsa de sau kan hte leng rai lung wa hkyem jang, maza lauban wa e hkan gang jahkring la nna: "Myit su wa nang nan gaw hkum hkan lung wa sa, shanhte jahkrat dat jang nang hkap lata la na hku di u." Ngu tsun jang she hkring mat nu ai. Mawdaw ntsa de nna maisau buri kabai jahkrat ai ni gaw, n-gun ja malu e, la shabrang ni hkrai re nga yang, masin gaw lun lun ngu let, aga de ninghpu pyi mawng mawng rai hkra hta kabai ndeng dat dat rai nga ma ai. Ma Nan gaw manang ni kabai hkra na ntsang hkra, tingsan langai hkrat langai hkap hta yu, ninghpu mawng nna ladi shalut ai hte, myi n mai hpaw ai hte rai tim, pai ta hte n-gup ladi magum kau nna, langai hte langai hkap gang gale yu yang, tingsan tsit nrai taw nga sai. Mashi mung di na zawn nga hkra machyi wa rai, myi pyi n mai hpaw hkra gahte wa ai salat hpe lawng ta hte gatsut kau nna, Gwichyu num jan hpang de mada yu yang, ma gaw chyi she nga tim aman rai gale galau di hkap hta yu taw nga jang, Ma Nan na jin wa nna: "Ashawng, na ma chyu naw shachyu kau u law, ma hkrap nna nye masin pyi ma n nga pyaw mat sai, ngai naw yu magang n-ga." Ngu tsun dat jang she, Gwichyu num maisau tingsan kaba langai hpe nda hpan di gang gale tawn nna, shingma na ma shayu la rai, chyu shachyu bang wa nu ai. "Cha e, dai kaw ninghpu shade mawng nga yang me rang?" "Nra law, shi gaw nye chyu she chyu ai, ninghpu chyu ai n re.

Gwichyu num goi ningga sha nga jang, Ma Nan mani sai rai let yu dat nna, shi a tingsan bai hta gale yu taw nga nu ai. Ningwawt Tawng gaw Miwa num a tingsan tsit galoi wa hkrat yu wa wa ngu nshang madi kau nna la dingda taw nga nu ai. "Agu, arai ahkyak hpe gaw sumpu hkan bang da na gaw nga re me, lama n mu la sayang ngai gaw si sai ga rai nga ai." Ganam jan ya du hkra kagu a maisau kawk hta hpa bang ai re n chye nga nu ai. "Ganang mi tawn tim, madu a nta, madu a gawk kaw she tawn ai gaw, maren sha rai nga ai le, ngai gade shi ning tawn sai rai she re, hka, ya tingsan pyi jahkrat ma wa tim n mu ai gaw, gara hku rai sai pyi nchye sai." Nga, nshang gan malan la let, sumbu na maisau shaw la nna salat gatsut tsap nga nu ai. Nshung ta rai tim, Mangshi ga na shani gaw jan gahten la ai re. Ma Nan gaw lama n mu tam la sayang, agu ngai hpe prat shanat nju taw nga na sai ngu myit dat magang hkrit magang, salat gaw myi pyi nmai hpaw wa hkra htaw she htaw pru wa, lai sai ten na shi masha ni a nta na hkai mai tsi ni hta lagu lu nna si na ngu gade lagu sawn kau ai ni hpe bai dum dat ai shaloi, ngai lama dai shaloi myit da-ting nna si kau da ai rai yang, ya daini ndai zawn kyin dut kyin tang re mu nbyin sana ngu, myit numshe bai shang wa nu ai. Myit masai ai Miwa la ni gaw rai gaja bang shalawm kau ai nga jang, mu la loi ai rai yang gaw gan lagu gun kau na myit let, nji n-gu hkan amya hpyan hkawm taw nga ma ai. Miwa la lahkawng masum mi salik jawm lu masu let, shatan bang wa masai.

Myiman loi yaw yaw re wa tsun ai: Ya na asuya du ni gaw, mayun gumpraw krai la sha, mung masha ni a sai hkrai chyup, bai, nanhte she yu mu, waw ra wa mung kan pyi ndang sai, shanhte hta shalawm kau ai gaw gumhpraw tingsan nan nan re yaw, nkam yang yu nga ga, mu tam jang shi kaning she di na nu ai kun? Bai nhka mun magyi magyi aran ara rai tu ai dut dut re wa hkan tsun ai gaw: Hehe, nanhte nchye madat kun? Shanhte shaga ai gaw Jinghpaw ga rai nga ai, Jinghpaw ni gaw lungseng grai sharawng ma ai, masha ni lungseng wa hpai kumhpa re nhten hta bang kau nna chyum nga ma ai n mu i? Nga nna, salik wan ladi hku lun lun di shamawng dat nu ai. Lasi gret gret re la galu langai bai rai jang, nten kaw salik noi tawn nna: Gumhpraw rai jang gaw kadai mu tam yang kadai hkai sha gaw madu sha kau ga, anhpu ni yawng a gambum lawm na hku yaw, lama shanhte shawng mu tim, hkap hpyi la na hku di ga nga nna tsun ai shaloi, salik zinghkat dai alang rai taw nga ai, tsun ngut jang she, salik kaw wan shachyi la nna, chyu chyu mu ai daram marawp lu bang wa nu ai. Shanhte masum majaw nna gahte hkat ai mu jang, tsan tsan kaw shi hkrai rai tsap nga ai la langai gaw, sa-wa wawra ni ngai tsan kau nna shanhte hkrai akyu tam sha hkyem sam nga ma ai, ngai shawng mu yang la gawm si na yaw ngu lagu myit la nna, tingsan ni langai hte langai gang gale nna, tingsan tsit hkrai ashap nga nu ai. "Ashawng, nang daihpawt ngai dut ya ai maisau tingsan dai nhpya yu ndai ngu?" Ma Nan Gwichyu num jan hpe bai ntsen si wa nu ai. Shi a myit hta mung kagu maisau kawk kaw bang ai "rai gaja" gaw ja lungseng nrai jang gumhpraw rai na bai shadu wa sai, shi san yu tim mai ai rai yang, n-gwi san ai, mu tam jang she nchye na ngu sharang let tam tik tik rai nga u ai.

Gwichyu num ma chyu shachyu la nna bai ba kau nhtawm, maisau tingsan kabai shayu tawn ai de man hkrat wa nna, langai hte langai gang hkrai hkan gang gale yu bang wa sai. Kadai mung rai gaja lawan mu tam na matu ga pyi nshaga hkra shakut nga ma ai. Tingsa ajan pyi sinna maga de yau rai mat wa ai ten, Gwichyu num jan mau mau ngu mawdaw ntsa de asoi taw nga yang, shi amatsing sha re tingsan langai hpang langai hkrat yu wa jang: "E! Mu sai law! Tingsan waw ra ni rai nga ai!" Nga nna marawn dat nu ai, Ningwawt Tawng yan gu ahtu si ntsang Gwichyu num jan kaw htim hkrat wa nna, marai mi tingsan langai gra gra sa gang tawn manu ai. Mawdaw de tingsan kabai shayu ai ni mung galang ta aga de gumhtawn yu wa nna, tingsan gata na "rai gaja" hkan ashap nang wa masai. "Nanhte hkum hkan ashap, ngai she tam na, ta gayau jang n mai ai. Ma Nan nang tingsan dai ni garai hkum hpaw, naw manat shingdang tawn u, sanga dai ni gaw lama mi she masem nga ma ai re." Ningwawt Tawng tingsan langai ganam jan hpang de htu sit kau dat let tsun u ai. "She masem nga le, nang she rai gaja re ngu tawn nna me, masha ni rai gaja dai a majaw sha gade ba tim shakut nga ma ai n mwi." Ma Nan tingsan langai kaw gaw dung, ta lahkawng maga tingsan mahka langai ngai kaw gra gra di magra tawn rai, kagu rai gaja tam ai yu taw nga nu ai. Kaga masha ni yawng mung galoi she rai gaja ashap shapraw dat nhten nga, myi grip grip na pyi n-gwi ai azi taw nga masai.

Ningwawt Tawng tingsan hpe ga shakrin de garawt sit nna, mahka gyit ai balasatik sumri yan kau nna, gata de baw bang tawn ai maisau laika ni hpe, yat yat sha, lam hte lam la shapraw nna shara mi agawng tawn, maisau tingsan mi tup galap kau tim rai gaja nmu tam nna, tingsan she ahpu yu hkra di tim hpa nhkrat yu wa ai. "Hka hka Ma Nan, dai tingsan mi bai hpaw yu ga." Ningwawt Tawng gahtan hku na salat gatsut kau nna tingsan langai bai hpaw bang wa nu ai. "Du wa, tingsan dai ni galang ta hpaw sharu tawn nna tam ga le, nang hkrai sha lawan n mu tam ai gaw!" Lasi grawm re wa tsun dat nu ai. "N mai law, nanhte n chye tam ai, ngai she." "Nhpa re nang tsun dan jang gaw anhte chye tam lawm sai, ya nang tam ai hku she rai yang, ningsin sin tim mu la na n tai nga ai le." Dut dut re wa mung lawngta she malu kau hkra tam lawm na hkyem nga nu ai. "Eh e, nanhte hkum shamawt, nanhte tingsan hpai shayu nna grai ba na sai, naw gan sa la mu." Ningwawt Tawng tingsan langai bai hpyan dat ai shaloi, Miwa la ni yawng a baw gaw tingsan de hkrai hkyawm rai jawm yu azi nga masai. Ningwawt Tawng gaw matu hku pyi ma hkye mat sai, ta ka maisau buk langai mi shaw shapraw dat nna: "Ah! Mu sai! Mu sai, ndai rai nga ai, goi law, ngai daini tup kan she machyi mat hkra la kau ai re law! Ya nkau mi naw ra nga ai. Ma Nan, dai tingsan langai bai hpyan dat ga." Ningwawt Tawng gaw grai ra tsawm ai wa tsawmra mi kra hkra mani dat nu ai.

Shaloi mi gaw ja gumhpraw hte lungseng shadu nna grai hkan yu lawm ai Miwa la ni gum nga ai baw galang ta sharawt dat nhtawm, lasi ren ren re wa shawng: "Myitsu wa rang, daini ting anhte hpe rai gaja re nga nna tam si shangun ai gaw, na laika dai ni sha rai i?" ngu san dat nu ai. "Cha e, re le, nanhte gaw nhpa shadu myit dai rai?" Ningwawt Tawng mani sai di bai nhtang san dat sai. "Anhte gaw ja lungseng rai sam ai ngu, mu tam jang anhte hpe myihtan ja pyi jaw nhten ngu nna she hkan tam lawm yang me." Nhka mun aran ara re wa bai hkan tsun nu ai. "Agu, sanga ndai ni daini tup grai kyet nga ma ai ngu yang, gumhpraw rai na shadu ai she re hka i?" Ma Nan Jinghpaw ga hku tsun dat nu ai. Ya grau gabu ai gaw Ma Nan she rai nga ai. Daini tup shi a baw kaw gamyet taw nga ai lungdin ya she hkrat mat nna asan awan ngu mat nu ai.

"Shabrang ni e, laika ndai gaw ngai 1974 ning hta Yinkyang ginwang Shadan krung na myihtoi kaba Maji Kumhtoi Gam kaw wa san ka la ai Jinghpaw labau hte ga malai, ga jahtuk ni re, laika ndai lama shamat kau sayang, ngai gaw Jinghpaw myu ni a labau shamat ai mara gun nna, prat tup nga n pyaw, si ai shani du tim myi nlu myi di na wa rai nga ai law." Nga nna, laika dai ni hpe ma hkalung ku ai zawn di ku let hta jinghtum shatup la nna, shi a sinda kaw she gahtep tawn hkra re mu jang she, shawng e shi hpe ningsin gumhpraw, mayun ja la sha shadu ai ni a myiman asan pra re kaw nna, shagrau hkungga ai nsam bai dan pru wa manu ai. Shaloi galu kyang kyang re dareba wa Ningwawt Tawng a makau de galaw sit tsap nna: "Myitsu wa nang Sakhkung mungdaw hkaw shabra dap na du n re ni? Sumla shiga hkan mu yu ga ai le?" "Hehe, re re. dareba e, daini nang Hkunmyin du na ten mung sharen kau ya, ndai manang la ni hpe mung grai shaba kau ai, jahpu….." "Du kaba e, hpa mung hkum tsun sa, nang zawn tinang labau hpe shade sharawng ai masha hpe, anhte mahtang she jaw ra nga ai, ndai manang ni hpe hkum tsang, ngai nau ni hkrai rai ma ai." Dareba wa gaw shinggan loi nhkring pru ai rai nna, hpaji loi chye ai majaw nhtang de shakawn dat jang, dai mawdaw lit baw ai la ni mung "hpa njaw ra ai." Nga nna hkan tsun jat dat ma ai rai.