DAGAM DALA GA NMAI TSUN AI LAM

DAGAM DALA GA NMAI TSUN AI LAM

MAUMWI HKAI KA AI: BAWMLI TOI

Moi shawng de gahtawng langai mi hta, gaida jan shannu mi nga ma ai da, dai gaida jan shannu gaw hkarang yi galaw sha ai shaloi, yi mam nloi hte hkainu da mam nhti da mana maka hkai tawn nna, nloi mam myin jawng ai hte hkainu mung kung jawng ai majaw, bungli grai kyin nga yang, kasha Ma Gam gaw kanu hpe nu daini Sailaw gat de ngai hkausing hkausoi sa mari sha na yaw ngu nna tsun jang, kanu gaw e Ma Gam e daini annu mam dan ra ai hte hkainu daw ra ai hte, nau kyin la ai, waw manang ni hpe mari shangun na re ngu nna tsun jang, kasha Ma Gam gaw nrai law ngai nan she sa mari sha mayu da we ai, nga nna bai tsun taw nga rai na, kanu gaw nmai sa ai, daini grai kyin ai law, Ma Gam nang nye ga nkam madat nga ndai lu e nga nna kanu nhkraw ya jang, kasha Ma Gam gaw masin na pawt na, kanu hpe shi a la hkrang shaw dan jang, kanu gaw lamu e aga e (kasha wa 14 ning du sai da)nye a kasha ndai shangai chyinghkai chyinghka lam hku pru wa nna ngai kanu hpe shi a la hkrang shaw dan ni ai law, lamu e aga e mayu kau u law, nga nna lagaw hte aja ja hkindit nna matsa nga yang, htingbu dingla wa la jin nna gat de sa mat wa sai.

Shingrai Ma Gam Sailaw gat de shanang sa wa mat jang, htingbu dingla wa gaw Ma Gam hpe hkan yu ai shaloi, Ma Gam a baw na kara gaw lamu de marawng jawng nga u ai, dingla wa gaw, Ma Gam e na a baw na kara gaw lamu de ma marawng jawng mat nit dai lu e, Ma Gam e daini numla dam ai zawn rai nga ndai lu, maw ndai hkausoi lau sha la nna nta de lau wa nu ngu nhtawm, shi gaw mari ra ai arai ni mari nna hpanghkrat sai da, ma dai nta wa yang, gade nde hkinggau gayep ai lam gake kaw wa du ai hte lagaw asat nmai htawt mat nna wa tsap nan taw nga yang, gat sa manang ni bai du wa jang, ma nang amyi she wa sai mi, ya mung dai kaw sha naw a nga nga yi ngu tsun jang, Ma Gam gaw ndai nye a lagaw asat nmai htawt ai chyat mat da ni ai law, ngu nna tsun let jahtau hkrap wa jang, manang ni shi a lagaw hpe sa gang shaw ya na matu shi hte nmai ni ai mana maka gahtet la ai majaw, shanhte yawng gaw shi hpe yu nga yang aga gaw shi hpe mayu mat wa nna baw sha kra nga ta sai da, shingrai shanhte wa mat nna nta e kanu hpe wa tsun dan jang, kanu gaw jahpawt na lata jan du hkra naw pawt nga la ai, dai majaw, wa tsun dan timung masin mung n gahpra rai, hpang jahpawt she kanu shi sa du ai shaloi abaw gachyi mi naw kra nga lu ai kasha wa hpe sa mu nu ai, kanu sa mu ai hte rau aga gaw kasha wa hpe chyip magap la kau nu ai da.

Dai hpang kanu gaw ngai sha Ma Gam grai kyet la ai re wa nga nna yi de sa yu jang gaw kasha Ma Gam a shingran bai mu na, goi ye ngai sha Ma Gam e nu masin pawt ai majaw, nye a myit hpe ndang dip ai re nga yang, ngai tsaw ra la ai ngai sha shingtai hpe matsa dagam sat kau chye ai ahkum e daini ndai zawn rai, annu a magam bungli chyat taw nga sai le, ngai sha e ya gaw nu myit malai lu tim hpang hkrat mat sai le nga jahtau hkrap let, ma e ndai annu galaw tawn ai naimam ni, kumgyin hkainu magup sumhpa ni myin jawng nga ai le, ngai sha e ngai ningnu yawn ai law, hkyen nngai law, kinding aga e gaprang ga u law, ngai sha e pru wa rit law, an nu galaw tawn ai lusha ni kadai nsha nga ai law nga nna, ten ninghtoi na wa magang hkrap mayu magang rai, shi a hkum hpe pyi ganoi noi dingsa sat wa na daram rai wa ai majaw, shannu a htingbu dingla wa shi hpe grai shadum jahprang let daru kau u ai da, htinghu wa gaw moi ngai gaw gade wa pawt tim nchye matsa nngai, nang gaw num she nga ai wa shade de matsa dagam chye ai gaw mau de ai ngu nna daru jang, shi gaw ya kaw nna gaw n matsa sana ni ai myit malai iu sangai law nga nna htingbu dingla wa hpe myit malai lu ga tsun u ai. Rai tim shi a myit malai hpang hkrat mat nu ai rai, shi gade myit malai lu tim shi a kasha wa bai nhtang hkrung wa na nrai mat sai.