Shachyen ya ai ga: Wunpawngsha ni a n-gup hte hkai hkrat wa ai labau galu langai mi nga nga ai. Dai labau gaw Mali Nmai Walawng de na ni Nang Byaq ngu nna tsun ai, Sinpraw maga de na ni gaw, Hkanghtan Nang Byaq nga tsun nna, Lhao'vo", Lachid ni gaw Mo Byaw nga nna tsun ma ai. Shanhte yawng tsun ai gaw ndai masuq muqnu Nang Byaq wa a lam sha rai nga ai. Kaga bawsang ni hta mung, dai maumwi gaw rawng nga na re. Shi gaw grai masuq ai wa rai nna, daini du hkra n jaw ai ga tsun ai wa hpe Nang Byaq wa nga nna shamying chye ma ai. Laika ka ai wa n dep n hkap lu ai Nang Byaq wa a masuq gamung law law nga na re. Dai hpe chye ai ni n nga mat sai majaw, daini kaning di bai n lu la sai lam rai nga ai. Hpa majaw masuq maumwi hpe Wunpawngsha ni yawng, kyem hkrat wa ai kun?, myit yu shara rai nga ai. Ndai maumwi a lachyum hpe hkrak n lu tsun sai. Raitim, myit yu mai ai lam gaw nga nga ai. Dai lam gaw Nang Byaq wa masuq ai hpe yawng chye ninglen raitim, masuq shagu kam mat mat re ai lam nga ai hpe mu lu ai. Gashadawn : Ndai prat hta ka-ni lu sha ai masha gaw, hpang jahtum gara hku byin wa ai hpe chye nga ninglen, lu sha ai akyang, tsaq lu ai ni tsaq ya byin jang jahtum e kaning rai wa ai hpe chye ninglen lu ai, Mungh masa ganing rai yang mayam tai na yawng chye ai raitim, nkau mi mayam tai na maga de tsap shakut ai nga nga ai. Ndai zawn re lam gaw Nang Byaq wa a prat hta masuq hkam ai masha ni nga lai wa ai zawn, daini mung nawq nga nga na re hpe jiwoi jiwa ni sadi na hpundung jung da ya sai, rai nga mali ai.
1. Kawa shabawn hte Salang langai mi hpe masu ai lam
Lani mi hta Salang langai mi gaw kawa shabawn grai li ai hpe hpai wa nga ai. Nang Byaq wa hpe jahkring la hkra rai, "Hkau Nang Byaq wa nang masuq ai nga n rai ni?", ngu san wu ai. Nang Byaq wa mung, "Rai nngai" ngu htan wu ai. Shaloi gasan san ai wa gaw, "Nang masuq ai ngai kalang mi mung, n hkrum yu shi ai. Ngai hpe mung, masuq yu rit", ngu wu ai. Shaloi Nang Byaq wa gaw, shi a kawah shabawn hpe gah kaw shatsap da nna nhpye de lata manawq yu nhtawm, "Masuq ndum n lawm sa sai. Ngai na nta ani sha re, nawq wa la na. Ndai kawa shabawn naw jum da ya rit", ngu ai. Dai hpang, Nang Byaq wa gaw kawah shabawn hpe gasan san ai wa hpe jum da shangun nna nta de masuq ndum la na matu, wa mat sai. Raitim, jan du wa ai ten du hkra, Nang Byaq wa bai n pru wa sai rai nna, gasan san ai wa gaw dai kawa shabawn hpe hpai nna Nang Byaq wa a nta du hkra, htim sa wa nga ai. Nang Byaq wa gaw shi a nta kaw, hkainu kapaw sha let angwi abwi sha nga nga ai hpe sa mu jang, grai pawt let shi hpe sa ahkre nga ai. Nang Byaq wa gaw mani let, nang lajin ai hte maren ngai nang hpe masuq ai ngu nna tsun wu ai. Dai shaloi, gasan san ai wa gaw Nang Byaq wa a kawah shabawn hpe shani tup jum ba ai hte shana de sa hpai sa ai hta kaga hpa amyat n lu la nga ai.
2. Tsa yam gun ai, hpawmi langai hpe masu ai lam
Bai kalang mi gaw Hpawmi langai mi shi a yi kaw mam ting ga saw na rai nna, ga daw na matu tsa yam gun nna yi sa wa ai. Yi sa lam kaw Nang Byaq wa hte hkrum ai. Hpawmi jan mung, hkrum ai hte rau, "Tsa Nang Byaq wa nang grai masuq chye ai nga ma ai. Ngai hpe mung, kalang sha pyi masuq yu rit le", ngu wu ai. Nang Byaq wa mung, "Masuq na matu gaw hpa n yak nga ai. Raitim, daini gaw n mai masuq ai", ngu wu ai. Hpawmi jan mung, "Daini hpa majaw n mai masuq ai", ngu wu ai. "Hkri nang garai n chye sam ai. Daihpawt kaw nna Jan hte Shata kawa hkat taw nga ai, n mu yu ai i?" ngu dat wu ai. Hpawmi jan mung, Jan hte Shata kawa hkat ai n mu yu ai rai nna lamu de akajawng sha dawng mada dat ai nga yang, dai shani na ga daw na tsa yam gah de malawq diq hkrat gaq ayai mat ai. Shaloi, Hpawmi jan gaw n dang tsun hkra pawt bu nga ai hpe Nang Byaq wa mu ai shaloi, mani let ngai masuq ai she re, ngu dat nna shi sa wa na lam de matut sa wa sai.
3. Ma kasha langai hpe masu ai lam
Kalang mi na ma kasha langai mi mung, Nang Byaq wa kaw sa du nna, "Wa Di nang grai chye masuq ai nga, ngai hte mung masuq chyai ga", ngu sa tsun wu ai. Nang Byaq wa mung, "Mai laq nga ai, Wa Di na yupgawk bunghkum npuq kaw makoi da ai Masuq ndum nawq wa lah suq" ngu dat jang, ma kasha dai mung n nga ai masuq ndum hpe wa tam nga ai. Dai shaloi, Nang Byaq wa gaw shi a gawk chyinghka hpe shinggan hku, ahkang shangang kau da nna hkawm mat wa ai gaw shanaq jan du jang she, nta de bai wa ai. Ma dai gaw shani tup gawk kaw hkrap rawng nga sai. Du wa ai hte, Wa Di masuq ai she re ngu wa tsun nu ai.
4. Sharaw hpe masuq ai lam
Lani mi na nhtoi hta Nang Byaq wa gaw gatnangtang hku mahka kaw dung mau taw nga ai. Dai shaloi, sharaw langai mi Nang Byaq kaw lanyan sa wa ai. Nang Byaq wa mung, sharaw lanyan sa wa ai mu tim, hkrit kajawng ai lam hpa n nga ai sha, lama mi hpe myit aru yu nga ai zawn, dung nga ai. Sharaw gaw dai hpe mu ai shaloi, "Nang kadai rai nni?" ngu san ai. "Ngai Hkanghtan Nang Byaq rai nngai" ngu bai htan ai. "Yaq dai kaw hpa galaw nga nni?" ngu bai san ai shaloi, "Moi nye kawoi dwi shadu kau da ai nchyang tsaq paq ngam sin nga nngai" ngu bai tsun sai. Sharaw mung, tsaq paq nga jang, na sharawng ai majaw hpyen mayu ai myit mung n rawng ai sha, Nang Byaq wa a makau de sit dung hkra rai nna, "Ngai hte rau, shawq shah sagaq" nga ai. Nang Byaq gaw, "Rai n mai shawq shah shi ai; tsaq paq n tai shi ai" ngu sai. Raitim, sharaw gaw shawq shah sagaq nga akroi anoi lajin bang wa sai. "Tsaq rai n tai ai shawq shah jang, ngai kaw mara lu wa na re, shing-rai nang hkrai rai yang shawq shah u, marawn kaga kaw du jang, ngai jahtau puk dat na nngai, shaloi nang shawq shah u" ngu tsun da wu ai. Sharaw mung, shi hkrai agrung shah sana ngu kabu let, dung la nga sai. Nang Byaq wa mung, kaga marawn langai du ai hte puk dat u ai shaloi, tsaq paq ngu htaq shah yu yang gaw nchyang tsaq paq n re she, kagyin hkanangtang (gat na tang) she, rai taw nga ai. Hkanangtang ni e, chyawm gawa nna, masin grai pawt ai hte sharaw gaw Nang Byaq hpe shah nan shah kau sana nga grai pawt let, hkan shachyut wu ai. Sharaw hkan dep ai shaloi gaw, lama mi hpe bai sin dung nga laq ai. Sharaw nachying pawt let du ai hpe Nang Byaq mu jang, "Nau hkum shara, ndai grai ahkyak ai moi nye jiwoi ni dung laiwa ai ri lahkum re" ngu lapu hkawan taw ai hpe layung madi madun sai. Dung yu na ngu jang, n mai dung ai ngu tsun tim sharaw gaw akroi anoi bai lajin taw sai. Shaloi gaw mi na hte maren, wora hkran du jang dung u ngu kaga bum marawn de bai rai mat wa sai. Dai kaw na bai jahtau puk dat jang, sharaw gaw ri hte galaw da ai lahkum rai sai ngu grai kabu let, dung dat yang lapu achyeq hkrum nna, grai bai pawt let Nang Byaq wa hpe bai shachyut nang sai. Shachyut ai hte maren, Nang Byaq wa hte bai hkrum sai. Dai yang na lang gaw lagat gatkung noi taw ai kata kaw dung taw ai. Hpa baw re ta? nga san jang, ndum bausa re nga tsun jang, sharaw gaw n dum yang dum hkra, bai aput taw sai. Dai majaw, shawng na lamang hte maren, kaga marawn na puk dat jang, dum na hku bai rai sai. Puk marawn dat ai hte lahtum dat ai shaloi, lagat tsip ayai wa nna, jawm kawa ai katut nu ai.
Kaga lani mi na nhtoi hta sharaw gaw, nta galup na shangu shabawn hpe gun lahkah nga ai lam Nang Byaq wa chye kau nna, shangu shabawn kata e sa rawng makoi nga sai. Sharaw gaw shangu shabawn shawoi na hta grau li taw ai majaw nta e maq-jah wa kabai shayuq na hkyen jang, "Ngai rawng nga nngai law! atsawm shayuq na di u" ngu tsun sai. Hpang shani gaw, Nang Byaq bai shangu gun ang sai. Dai shaloi, sharaw mung shangu shabawn kaw bai makoi rawng nga sai. Dai hpe Nang Byaq wa chye jang, sharaw a shangu shabawn nga ai de nri jinghkyen shingteq sa wa nga ai. Hpang jahtum na lang gaw, shangu shabawn hkren di shana ngu hkyen jang, sharaw gaw, "Ngai rawng nga nngai law" ngu bai pru wa ai da.
Lani mi gaw sharaw Baw machyi nna Nang Byaq wa kaw shabaq sa wawt wu ai. Shaloi, Nang Byaq wa tsun ai gaw, "Hkau e na a baw machyiq gaw yu maya sha n re, grak di moi kau ra ai" ngu sai. Shaloi gara hku moi na hpe bai wawt shangun jang, masum jum waq hpe atsawm sha ju hkren kau nna, nbang de na ninggam de sa galau kau u" ngu sai. Gajawa sharaw mung, Nang Byaq wa tsun ai hte maren, galaw sai. Dai waq hkrawng hpe Nang Byaq wa htaq lah nna ju sha kau nu ai. Bai, lani mi hta gaw Nang Byaq wa mahtang baw bai machyiq nna sharaw hpe shabaq wawt shangun sai. Shaloi, sharaw gaw mani ngai galaw ai hku galaw kau u ngu tsun dat sai. Dai hku nga jang, mani na hte maren waq shan galau hkrat wa na re ngu sharaw gaw sa hkap la dingda nga sai. Nang Byaq wa gaw dai lam chye chyalu re majaw, waq hkrawng n re sha, nlung tawng langai hpe grai kahtet hkra, ju nna galau kau dat sai. Sharaw gaw dai wan ju da ai nlung hpe hkap kachyau ai nga yang, hkum ting wan hkat hkanghkang mat sai.
5. Yi nat ai lam
Hkanghtan Nang Byaq gaw yawng hpe masuq nna, mare masha ni mung n dang hkam wa sai majaw, yiq nat sa ai shaloi, kaga ni gaw shingnawm makau lam nat nna, Nang Byaq wa a yiq gaw ka-ang kaw re majaw "Naq yiq hpe nang nan, nat u" ngu yi makau de na ni nat dat ai hte rau, shi mung nat na hku rai sai. Yiq garai n nat lu yang, shi gaw shi a yiq kaw nhkun langai mi nga ai hpe matsing da nga ai. Dai nhkun hpe magap na nlung pa mung, nga nga ai. Nhkun de hkru sa wa na namlap chyahkraw ni hpe mung jaujau seng kau nu ai. Shing-rai, yiq ting wan hkru lai matwa ai shaloi, nhkun kata kaw rawng mat ai majaw Nang Byaq wa gaw n hkru lawm mat nga ai. Yiq hkru ai htaq, Nang Byaq wa mung, hkru na sai ngu nna shi a yiq de sa jawm tam yu ma yang, chyahkrung she gat hprawng matwa ai hpe mu ma ai. Dai majaw, Nang Byaq wa hpe gaw wan hte sat tim n lu ai rai nna, hkrit mahtang hkrit wa ma ai majaw Nang Byaq wa, hpa tsun, hpa hkraw rai wa masai.
6. Yi galai ai lam
Nang Bya wa shi a yi gaw mam nau n kaja nga ai. Dai majaw shi a manang wa hpe yi galai na lam hpaji daw hpang wa sai. Shi a hpaji daw ai lam gaw, "Manang wa na a yi mam nau n kaja ai nye yi gaw grai tsit tsawm ai majaw galai ga, n mai i? ngu san ai." Mam kaja ai yi hte n kaja ai galai ga she nga yang gaw, she mai law" ngu manang wa mung hkraw ya sai. Shing-rai shan lahkawng yi de sa mat wa masai. Shawng ningnan manang wa a yi hpe hpun ninghkri de lung nna, ntsa kawn yu ai shaloi, yi shakrin hpe sha mu nga ai. Dai hpang bai yu wa nhtawm, Nang Bya wa a yi hpe bai jawm yu masai. Nang Bya wa a yi hpe gaw ga lam hku yu ai rai nna, grau tsit lali tsawm ai hpe mu ai shaloi, yi galai na matu myit hkrum kau dat nu ai.
7. Sharaw yan Nang Bya nga lagu ai lam
Lana de mi lauban ni gaw Nga gawt nna lam maw hku wa ma ai. Ningsin sin wa ai ten hta mare de n du ai sha lam kaw yup ra mat ma ai. Shaloi lauban ni gaw marang htu wa yang, marang n kayun na matu langa lap hte yi hkyap gap ma ai. Dai shaloi lauban langai tsun ai gaw, "Kaga hpa hkrit n ra sai, kayun na hpe sha tsang ai." nga ai. Dai kayun ngu ai ga hpe sharaw hte Nang Bya lahkawng yan hkrit nga ai. Shan shadu ai gaw nga ni hpe pyi hta sha lu ai. Lamama hpe kayun nga ai rai na shadu ma ai. Sharaw hte Nang Bya gaw nga lagu na matu nga hpawng kaw makoi nga ma ai rai nna nsin sin wa ai hte rau Nang Bya wa gaw duq grau kaba ai nga hpe lagu dun mat wa na hku nga duq ni hpe hkan masawp taw nga yang, nga duq langai mi sa masawp ai shaloi shamu mung n shamu ai majaw lauban ni tsun hkrit nga ai kayun rai ang sai ngu shadu kau nga lu ai. Sharaw mung, sharaw duq nan masawp gwi ai gaw kayun nan rai ang sai ngu shadu kau nga ai. Jahpawt myi rai n mu yang, Nang Bya wa gaw sharaw hpe gyit dun nna lam lamaw hku tung tung wa mat sai. Sharaw wa mung shi hpe dun mat wa ai gaw kayun nan rai ang sai ngu kam kau nga ai. Dai hta kaga Nang Bya wa a nhtu gaw ningga hta grau galu shaw nga ai majaw nhtu hpe grai hkrit taw nga sai. Nang Bya wa mung shi dun wa ai gaw sharaw n re sha kayun re hku shadu ai majaw lamai hpun kaw gyit kau da nna, hpun ndung de hprawng lung mat nu ai. Myi mu wa ai hte manam ni lai wa ai shaloi sharaw hte Nang Bya wa gaw kayun ngu ai nga ai hpe jawm hkrit taw ai mu ma ai. Manam ni mung kayun nga ai da nga nna, hprawng, sharaw mung kayun nga ai da ngu rawt lak dat yang shi hpe dun da ai lamai pawt daini du hkra magaw mat ai da.
8. Nang Bya wa myi li li masu ai lam
Lang mi na aten Nang Bya wa nau masu ai majaw, shi hpe kaq kaba hta bang nna, hpun ntsa e gyit noi kau ma ai. Dai kaw nga gawt ai lauban kaba wa myi li li ai rai nna, myi gaw ahkyeng rai hpun pawt kaw wa du saq nga ai. Shaloi, Nang Bya wa kaq hta rawng nna noi taw ai hpe mu jang hpa majaw dai hku noi taw ai hpe san wu ai. Nang Bya wa mung myi li li ai majaw nbung shalawt ai re ngu tsun sai. Lauban wa gaw Nang Bya hpe yu nna, na myi gaw hpa n byin nga ai ngu tsun dat wu ai. Shaloi Nang Bya wa gaw, "Nbung shalawt nna, shamai la ai re" ngu bai tsun wu ai. Shaloi hpaga la wa mung shi a myi li grai sawng ai majaw nbung katsi shalawt nna mai ai lam tsun jang, shi mung grai mai mayu wa nga ai. Dai majaw shi hpe mung hpun kaw noi shangun na tsun sai. Nang Bya gaw shi a myi mai wa sai raitim loi naw ra ai, atsawm mai jang she nang hpe lu noi na re ngu bai tsun ai. Shaloi hpaga lauban wa gaw myi machyi n dang hkam sai majaw shi hpe lawan noi na tsun ai. Nang Bya wa bai tsun ai gaw, nau nan myi makret yang gaw, ngai hpe naw shayu la rit ngu tsun sai. Shaloi hpaga lauban wa gaw shi hpe hpun ntsa kaw na kaq hte shayu la nu ai. Dai kaq hta nan hpaga la wa hpe gyit noi da sai. Kaga hpaga hpung ni yawng hpe mung kaq langai hpra hta gyit noi nna, nga wunawng hpe gaw Nang Bya wa shanhte a mare de gawt mat wa sai. Mare kaw du ai shaloi, mare masha ni yawng nga shade law ai wa kanang na lu la ai ngu san jang, hka sai sai nna lu mai ai ngu masu sai. Shaloi mare masha ni gaw, nye madu wa hpe mung hka sai woi sai rit ngu lajin shajang ma ai. Nang Bya wa bai tsun ai gaw, hka sai sai mayu ai ni yawng sumri ni lajang da mu, hpang jahpawt rai jang rau sha nga sa gawt na matu tsun sai. Dai majaw mare masha ni gaw nga lu na sai ngu kabu gara Nang Bya wa hpang de hkannang wa masai. Shana de rai jang nanhte a nta masha ni gaw ningsin sin jang she du wa na re majaw shanhte wa sha na matu, nbaw shat hte Udi tsa ni hpe hku wawt chyinghka e dam tawn na hpe tsun sai. Dai hku matsun ngut jang, shinggan maga de hkangkawp ntsa e chyahkan hpe gyit da mu ngu matsun sai. Shing-rai lama wa shinggan maga de shara ai lamama nga jang nta masha ni yawng hprawng yen da mu ngu bai tsun sai.
Mare masha ni gaw Nang Bya wa matsun ai hte maren galaw masai. Hka sai sai ai de hkan nang ai ni hpe gaw hka la-ing ntsa na lung hkrung kaba kaw nga gyit na matu jin jin la nga shangun nhtawm, Nang Bya wa shi nan gaw lunghkrung a maga mi de sa wa nna, ngai hka de gumhtawn ai na jang, yawng ni hka la-ing de, nga hpraw ra ai wa gaw hka la-ing hpraw ai de, nga chyang ra ai wa gaw, hka la-ing chyang ai de gumhtawn mu ngu matsun ngut jang masha n mu ai shara kaw na hka la-ing de, nlung kabai bang dat u ai. Shaloi Nang Bya wa matsun ai hte maren yawng ni hka la-ing de gumhtawn bang ma ai. Hpang jahtum ma langai mi gaw n gumhtawn ai sha nlung ntsa kaw kayin hkawm nga ai. Dai wa hpe mung naq wa nga gyit yak taw nga ai lawan sa karum la su ngu la-ing de ganawng bang kau ai. Nta na ni gaw hpaga ga sa ai ni du wa na la nga yang, hkinkawp ntsa na chyahkan e hkinkawp hpe shangoi dat jang, nta masha ni yawng hprawng yen kau da sai. Shaloi dam tawn da ai nbaw shat, U di, shanhkraw ni, malum tsa ni shi ra ai hte la mat wa nna shi nta kaw wa lu pyaw nga nuq ai. Hpang jahtum gaw nta ma ni gara bai rai wa ai kun? manaq de gaw du wa sai kaw na bai mat mat ai ngu sa san jang gaw, nanhte a nta masha ni hka la-ing na nga wuloi ni n chye sai nna, hka lup si ma yawng si maq sai ngu ai da.
9. Bau Lagut Nang Bya
Maumwi yawng gaw masu ai maumwi hkrai rai nga ai. Raitim Nang Bya gaw masu sha kung ai n rai lagu mung kung ai. Lani mi na nhtoi hta la langai gaw, Nang Bya wa kaw sa nna, "Nang Bya wa nang masu ai lam mying gumhkawng nga ai, raitim lagu ai shiga nna ai. Lagu gaw n chye ndai i" ngu san ai. Shaloi Nang Bya gaw "Lagu ai hte masu ai gaw maren sha re" ngu bai tsun sai. "Raitim Nang ngai hpe gaw masu lu na n re, dai majaw ngai hpe gaw lagu ya rit" ngu tsun nu ai. Nang Bya wa bai tsun ai gaw, "Ngai lagu na daram re arai hpa lu nta?" ngu bai san nu ai. Dai masha wa mung "Ngai kaw shihkam bau la hpe daina gara aten hta raitim sa lagu la na" ngu tsun jang, myit hkrum nna, nta de wa nhtawm, shihkam bau la hpe gaw jut kaw makoi da, madu jan hpe gaw lagut du jang wan wut dat na matu, kawa dum lawng dawq ya sai. Shi a nhtu kaq hpe mung chyinghkyi kaw noi tawn da ai. Kasha num sha 2 nga ai yan hpe mung daina lagut du na re majaw n yup ai sha ja nga na matu htet da sai. Dai hku htet da ngut jang shannu wa ni yawng n yup ai sha lagut la nga ma ai. Shannu ni lagut la nga yang nhtoi gaw htoi mat wa sai. Nhtoi htoi wa sai majaw lagut ndu sai ngu myit la nhtawm tinang a yupra tingnang yup pyaw mat wa masai. Nang Bya wa gaw shana tup shi hkrai sha bainam langai mi sat sha nna, bainam baw gaw daw da ai. Sumpyi mung langai mi lat da nga ai. Myi mu wa sai ten nta masha ni yup aq mat wa ai shaloi bainam kan hpe gaw numsha yan yup ai lapran kaw sa tawn da sai. Nta madu wa a nhtu kaq la kau nna, bainam baw hpe galai noi da ya ai. Nta madu gumgai wan wut ai kawa dumlawng la kau nna, shi la sa ai sumpyi hpe tawn da ya sai. Dai hpang jut kaw na shihkam bau lagu la nna, shinggan du ai hte bau lagu la sai yaw ngu marawn nna bau dum let shi nta de wa mat sai. Bau madu wa mung "Lagut law" ngu marawn dat jang gumgai jan mung wan wut kawa dum lawng galai kau ai n dum nna, sumpyi sha rawt dum taw nga sai. Nta madu wa mung shi a nhtu n-ga malai bainam baw hpye nna nta jut shagu hkan share hkawm nga ai. Num sha yan gaw bai nam kan hpe na a ma re, nye a ma n re nga shanaw hkat garu nga masai.
10. Nang Bya wa a hpang jahtum nhtoi
Nang Bya wa gaw masha ni a man e shi gaw si tim mung sumpyi sha gaw nawq lu dum ai ngu nna, hkan tsun hkawm ai da. Lani mi gaw shi si wa na re shaloi, nta masha ni hpe shi a moi mang jang ai shaloi, lagaw mung hkalai kai da na n-gup de sumpyi shawn bang nna lata yan hpe gaw sumpyi kaw sumpyi dum ai zawn jum da shangun sai da. Sumpyi kaw lagat ma rim bang da shangun sai. Gaja wa shi si ai shani gaw shi htet da ai hte maren nta masha ni gaw mang hpe jang da sai. Jang da ngut jang shara shagu lasu su ma yang masha yawng ni gaw si ai hpang sumpyi dum ai na mayu nna shara shagu na ni du zup sai gaja wa shi a mang hpe yu yang mung, sumpyi dum taw ai zawn rai nga ai. Sumpyi kata na gat nyeng ngoi wa ai hpe sumpyi dum ai shadu nna, mang bru poi sa ai ni yawng mau sai rai nna, sumpyi na la ai ni yawng gaw Nang Bya wa mangbru poi gaw si ai hpang mung naw gumhkawng ai da nga ma ai.
Pungga Ja Li
