MASHA SALUM HTE GWI SALUM
HKAI AI: BAWMLI TOI
Amoi ginding aga nnan chying, Shinggyim masha nan ring wa yang, num yan la wa mi nga, dinghku wa mi jawm de masai da. Shanla yan gaw dinghku shang, amyit mang nna, shani shana nhkring nsa galaw chyichya hkat ma ai da. Shaloi Hpanwa ningsang chyewa ningchyang gaw anyan shaw hpaji mi gadaw la na, tsawm htum shayi hkrang galai nna, galaw yan la a chyahpung e me zak rai sai da. Tsawm htum shayi gaw galaw la wa hpe shawng sa gunglau bang wa nu ai da: AWh, ga law la e, nang na madu jan hte nga yang gali galaw chyu nga nna nchyi nmu nga ai, shi hpe sat kau nna, ngai hte she nga mat saga wa mi ngu nu ai da. Shaloi galaw ala gaw madu jan hpe sat kau na hkyem yu yang, ata wa nlu jahkrat sai da.
Hpanwa ningsang chyewa ningchyang gaw sawm htum shadang bai tai nna, ga-law num hpe mi bai sa gunglau bang wa nu ai da: Ga-law num e, nan la shani shana gali galaw rai nga yang npyaw la ai, na madu wa hpe sat kau nna, ngai hte nga mat ga ngu yang, galaw num gaw Hpan wa ningsang chye wa ningchyang e masum mali ya sa asawng shadut jang, nga tim gali galaw nga nna npyaw la ai, sat kau nna shadang brang tsawm hte nan nga mat ai baw rai sam sai ngu nna, masawn nri hte madu wa a salum kaw nan shawk di jinghkyen bun dat nna, sat kau nu ai da. Shi madu wa hpe sat kau nna shadang brang tsawm hte ngwi pyaw dinggaw lu tai na sai ngu la nga yang, shadang brang tsawm hpe nmu, shi kaw wa mi pru mat sai da. Shaloi galaw num gaw hkrap chyu hkrap shangwi let masin gaw nsi, ganing gaw nchye di rai, galaw ala a salum e jung nga ai nri masawn shaw la nna, jinghkyen dat yang, ang sha-a ndaw e hpum nga ai gwi la wa hpe mung jinghkyen sat kau dat nu ai da.
Galaw num gaw shadang brang tsawm hpe nju, myit malai gaw lu rai, hkrap mahkut taw nga yang, Hpanwa ningsang chye wa ningchyang shingkang shingwang hte galaw num kaw sa wa nna, galaw num hpe tsun ai: Nanla hpe sa shalik ai gaw ngai she re, ya nang galaw ala hpe naw ra, gwi la wa hpe naw jahkrung la mayu nni ngu san jang, naw ra na, naw jahkrung la na ngu tsun jang, Hpan wa ningsang chyewa ningchyang ga-law ala a salum yu yu yang, ayai mat nna, gwi la wa a salum bai yu dat yang, gwi la wa hpe gaw salum kaw nhkra ya ai majaw, gwi salum shaw la nna, nsa gawut matut let galaw la hpe galai bang dat ya, gwi hpe gaw aga hkumpa tik gumdin la nna nsa gawut shakap nna bang dat ya jang, bai hkrung wa kajang masai da. Hpanwa ningsang chyewa ningchyang gaw, ya kaw nna gali galaw hkum rai manu, dum dum didi dinghku sha de masu ngu matsun kau da nu ai da. Dai shani kaw nna mateng daini du hkra, la kaja ni hpe gaw magrau grang gwi la nga, ntai nmai re la ni hpe gaw gwi hte pyi nteng ai nga ai. Bai gwi salum gaw aga hte galaw la ai rai nna, gwi sat yang aga de n jahkrat, gwi htim wa jang ga tawng hte hta share yang, gwi hkrit chye nga ai mi rai da law.
