Nu a n-gup nnawq matu hta hkumpup majawq hpai wa nna, shakum kata ntsa hkan arut achya shakap kau rai nga ai. Nu hpa galaw nga ai kun? Nu bai pyen pru mat wa ai hpang, kade nna yang Nu a n-gup nnawq matu e hkumpup majawq hpai wa nna shakum kata ntsa hkan arut achya shakap kap rai nga ai gaw lang hte lang rai nga ai. Lana de mi na nsin sin wa yang, marang si gamang bun ai na dat ai majaw annau ni masum baw sharawt nna n-gup mahka let yu dat yang, chyinghka lam e Nu singkaw ahpu nga ai hpe mu lu ai. Oh... shinggan de marang htu nga ai. Nu a hkum ting mung nyaq nyaq shiq shiq rai nga ai. Nu hkum ting na marang hka hpe ahpu kau nna annau ni a lapran shang hpum nna Nu a singkaw hte annau hpe ahpum da nga ai. Ndai zawn Nu a nnawq matu na lusha hpe ala sha, shana ten nu a sing kaw npu e chyip... chyip... chyip... nga, ngoi shaga abrawp chyai rai ai ten ni gaw nye prat hta pyaw dik ten ladaw ni rai nga ai.
Lani mi na nhtoi hta Nu lusha tam hkawm mat wa ai hpang, ngai shinggan de chyan mada yu yang grai wum kaba tsawm ai hpun kaba a lakying kaba ni a lapran e ngangkang tsawmhtap ai wutdek wa-hpang nta hpe Nu gaw shachyaw da ai hpe mu lu ai. Annau ni masum hta ngai gaw kaba dik rai nga ai. Annau ni singkaw kung wa ai hpang Nu annau ni hpe pyen sharin ya ai, lusha tam sha ladat sharin ya ai hte hpyen hpe koiyen chye ra ai lam, yakhkak jamjau lam ni, hkam jan lu ra ai lam ni Nu annau ni hpe sharin ya ai gaw daihpawt hte nga yang masum hpawt rai sai.
Lani mi na nhtoi hta Nu lusha tam mat wa ai hpang annau ni hkrai nga nga yang, U shabrang langai mi annau ni a wutdek htingnu hte kade n tsan ai shara hpun lakung langai kaw dung nna nye kanau shayisha hpe yu nna, mani shaga makrai let sumtsaw ga tsun nga ai hpe mu lu ai. Ndai U shabrang wa nye kanau shayisha hpe sumtsaw ga tsun ai masum ya na ai hpang, nye kanau shayisha mung manisum rai shinggan e sa dung mada let, shada da myi zun hku lagyim yu hkat nga ma ai hpe ngai kaning wa she rai wa na kun? ngu myit nga yang, ah kajawng sha nye kanau shayisha, dai U shabrang wa kaw hkan pyen nang mat wa nu ai. Gwi dik ai, nden ja dik ai atsam rawng dik ngu sha, nye kraw kata hkan sumru dat lu ni ai. Kaja wa nga yang shi mung singkaw kung sai asak aprat ram sai rai nga ai. Dai majaw prat manang tam mat wa ai hpe mara ngu n mai sawn nga ai. Ndai zawn byin wa na matu she Nu annau ni hpe hpaji hkumsumhpa sharin ya nga ai n rai i?
Wu... wu... wu... di... di... di... nga ngoi ai nsen hpe na dat ai majaw shinggan de mada yu dat yang, nbung hte marang hte rai nbung laru kaba wa nga ai hpe mu lu ai. Nu kanang de du hkawm nga ai kun? Nu kaning rai yakhkak lam ni hkrumsha nga ai kun? Nu hpabaw hpyen wa hkrum katut sai kun? ngu nye myit kraw kata nchyi nmu nga hkam nga li ai. Magumjan shang mat wa ai hpe yu mada let shinggan de yu jahproi nga yang, grai tsan ai kaw nbung laru marang ni a lapran e “ndi nda n-yawt nhkyeng rai U langai pyen shakut hkawm nga ai hpe mu lu ai. “Nu mi rai kun? Nu hpa n byin wu ga. Nu ngwipyaw ai hte du wa lu u ga ngu myit nga yang, Oh... Nu... Nu... du wa ra ai. Nu laru marang ni a lapran atsam htum hkra pyen shakut hkawm sa ai raitim annau a matu lusha hpe n tat kau hkra hpai wa ya ai hpe mu yang, Nu a shawang tsawra myit ni kade sha kaba la nga a hka!... ngu nye kraw kata sumru nga yang, nye a myitum kata na myiprwisi ni gahteq hkrat wa ai. Nu ngai hpe yu nna Nu sha hpabaw byin ai rai nga san ai. Ngai mung Nu hpe matsan dum ai ngu yang, Nu kasha e Nu du wa sai shumhkrap sa nga tsun let, marang ntsin ahpu jahkrat kau nna annau hpe lusha gam garan jaw let annau hpe singkaw hte ahpum da ai. Nsin mung grau sin wa nga sai.
Lani mi na ten hta annau ni a wutdek nta nga ai hpun kaba hta U ram wunawng mi sa du chyai ai hpe mu ai, nye kanau la sha hpungdim wa mung dai U ni hte mani shaga rai let grai tsan ai shara de pyen nang mat wa sai. Dai shani kaw nna annau ni a wutdek waq-hpang kata e annu lahkawng sha rai mat sai. Kanau yan gaw shan a prat hpe gawgap la lu manu ai. Ngai kahpu kaba dik wa hpa majaw hkrit tsang nga ai kun? ngu kanau yan a lam hpe sumru let nye hkum ngai gayaq gayaq... nga hkamsha nga yang, Nu ngai hpe tsun ai Nu kasha e nnau yan pyi shan a lagaw shan tsap rai nga lu mat wa masai, yaq nang chyusha ra sai. Nu n si shi yang, Nu kasha prat manang hte hkrak, kashu kasha hte re ai hpe Nu mu mayu ai. Moi na hpaji ninghkring ni tsun da ai ga malai nga ai “Lai sai ten na lam ni hpe sumru yu nna myit kaji hkum rai’’ “du na shawnglam hpe myit nna mung, hkum myit dawq’’ nga Nu shadum jahprang ai gaw lang hte lang rai nga ai. Ndai zawn lang hte lang Nu ngai hpe tinang lagaw tinang tsap gwi ra ai hpa hpa mi byin hkrum hkra tim, yakhkak lam, tsin-yam lam ni a lapran hta, kaji dik ai mahtai hpe tam la, myit shapraw la chye ra ai nga shadum jahprang ai mung lang hte lang rai nga ai. Raitim nye kraw kata hta gaw lai sai ten shut shai lai mat wa sai lam a majaw mung, myit mada da ai lam ni hpe kade shakut yu tim n mai byin hkraw ai nye prat a majaw mung, prat manang tam na matu n myit gwi ai lam rai nga ai. Ndai zawn rai nga nga ai ten tsawm tsawm re ai U shayi mahkawn ni ngai hpe yu nna mani shaga jahpoi asawng ai hte makau grupyin e kam ai mi ngu tsun ahpyak shapye ai mung law law lang rai nga ai.
Lani mi na ten hta Nu manap jau kaw nna tsan ai shara de pyen pru mat wa ai. Shana maga de Nu wa na hpe myit mada ala let, Nu wa na lam de yu mada nga yang magumjan gaw Sinna bum ni a lapran e taleng shang mat wa sai. Nye a myit ni mung karen ai myit ni hte nsin chyip nga hkamsha ni ai. Nu hpa wa byin hkrum sha sai kun? Nu ngai kasha hpe galoi mung n tawn kau da ga ai re wa daini gaw Nu n du wa ai. Nu hpa mung n ra u ga ngu myit sumru hkamsha nga yang, yuptung pyi lai nhtoi mahka pyi rai mat wa sai. Hpang shani Nu du wa na hpe myit mada ala let, ngai hkrai sha garen hkawm nga yang annu ni a wutdet htingnu nga ai hpun kaba a grai myit-su sumnung shingdi sari rawng ai U mahkawn langai dung nga ai hpe mu dat ai, ngai shi hpe mada yu dat yang, shi mung ngai hpe manisum rai bai yu nga nu ai, ngai shi hpe “nang grai tsawm ai ngu yang agu nang mung grai tsawm ai” nga, shi ngai hpe bai tsun ai, ngai mung shi dung ai lakung de sa gahtep dung yang shi hpa n nga ai. Dai majaw shi a makau htep rai dung let “anlahkawng rau nga mat saga i’’ ngu yang, shi ngai hpe tsun ai “Agu prat ngu ai gaw hkrit hpa n re, gawgap la hpa she re Agu nang gaw gwi ai kun?’’ nga tsun ai. Ngai mung “yaq kaw nna gaw, n hkrit tsang sai” ngu yang, shi manisum rai ai. Nu mung myit pyaw na sai...
Latau Seng Awng
