HPYENLA DINGSA

HPYENLA DINGSA

Maji Nan

Ningshaw Awng gaw gaji kaw nna abawng alang re shadang sha re, raitim dum nta hta yak hkak ai majaw, Miwa laika jawng n lung yu u ai, asak jahku ning du wa ai hte rau, ma manang ni hte nga rem brang tai nna kaba wa ai rai u ai. Raiyang, shi asak shi kru sanit ning du wa ai ten hta mare ting na tsawm htum shadang byin tai wa sai hte maren, mare na ni yawng gaw: "Ningshaw Awng hpe Kaifangkyin hpyan shang shangun ga." Nga tsun garu shajang nga ma ai. Kaja wa sha Ningshaw Awng sak shi matsat ning shang wa ai shaning Miwa mungchying sha Kaifangkyin hpyan la la mat wa u yang, Kaifangkyin hpyan la mali ning la ai htawm, maigan mung de majan sa shang na matu awng mat wa nna, majan sa shang ai masum ning a htawm na ginhtawng ta hta nta buga de bai du wa ra ai. Ningshaw Awng gaw buga hte hka ai sanit ning jan rai mat wa sai majaw, bai nhtang wa yang manam manam, n man n man nga da u ai hte rau, nachying pyaw dum ai lam mung nga wa sai.

Kaning law nga yang, Ningshaw Awng buga bai nhtang wa ai ten gaw ginhtawng ta hta rai nga ai majaw, tingsa ajan ninglum ten, mali shata wang kawan, utu chyangngau ngoi garu, gatsi bungli ahpawt pru, htoi tsawm la ai byin pu pu, marit ningtsing shingni lu, Pantsun panlawng pu shaya, mani dung shaga chyai ten rai nga ai, daini hkungran poi de sa, pawtni dingshawn poi shang sa wa, numshang jau ai de mung du, nat galaw ai de mung pru, dinghku kyuhpyi de mung shaga, ama hka pru pru ai de mung sa, nampan daw poi de mung du, ram rawt hpawng de mung garu... Dai zawn Ningshaw Awng dai ginhtawng laman hta lani mi mung n yet ai hkan shamu shamawt lawm u ai hte maren, buga grupyin mare hkan na ji nban yawng gaw, shi hpe hkap shakram ai krai hkrai, grau nna gaw marawt tsawm shayi ni shinggan myisha shachyai ai hkrai, sailen nten madun ai krai, brangla manang ni mung: "Mahkawn matut ya de." Nga ai hkrai rai nga ai, shing rai, Ningshaw Awng gaw dai ginhtawng ta hpe nachying pyaw len nwai dum u ai hte maren, shaning tup ginhtawng ta rai taw gaw ngu ai myit rawng u ai. Raitim, yinam ta du wa, hkauhting hkauna magam shang ten du sai majaw, Ningshaw Awng grai myit htum wa u ai. Kaning law nga yang, shi gaw sanit ning jan zauhkai n raw yu sai re majaw, nadap de shang grai n-gwi da u ai.

Shing rai, Ningshaw Awng marang zauhkai galu mari hkai la rai, jau jau yup, jau jau rawt rai yinam hkum mi shakut lai wa nu ai hte maren, mare masha ni yawng yawng shi hpe shakawn ai hkrai rai masai. Yinam hkum mi lai, mangai nmut ten bai du ra ai. Ningshaw Awng gaw mam shu magam shakut ngut ai hte rau, shani shagu mare grupyin hkan, madum yinwang hkan nhpang ba sha sa, nlung nnan sha poi sa, shana shagu ngu na daram manang la ni hte u sat sha, uri ugam gyam sha, tsa jawm lu garu chyai rai nna nachying pyaw dum nga u ai. Lana mi hta manang la ni hte tsa jawm lu nga yang, mare na shi a gatsa ni ang ai Samwi La gaw rubye bye let Ningshaw Awng hpe gahpa kaw ahpum tawn nna: "E...hkri Awng e, ya hte tup mau nga nngai le, nang Miwa mung hpyanla she la sa ai mi, nang pru wa ai shani, soi nhpye, gumhpraw n-ga hte htep re gaw hpa lachyum rai? Nang mari la ai i? Ngai hpe kumhpa kau rit le, n mai i?" "E, tsa Doi e, kanang mai na, ngai Miwa mung hpyanla la tim, majan sa shang ai gaw maigan mung na Jinghpaw buga hta she re gaw, ngai majan gasat magrau grang ai majaw, dai buga na Jinghpaw myu ni ngai hpe shagrau jaw ai kumhpa she re gaw e. Dai majaw, ngai prat dingsa mazing tawn na rai nga ai." "AWh, chye sai, chye na sai, hkri Ningshaw Awng nang ngu yang, anhte buga hta pyaw dik htum ai gaw hpa baw poi rai?" Ningshaw Awng tsa htinggap mi grut di dagrawng bang la nna: "E, tsa Doi Samwi La e, anhte buga hta pyaw dik ai poi gaw nat galaw sha ai rai sai, sha yang mu dik ai mung nat shan kinyaw tawk re law."

Samwi La gading gadang, myirim rim rai, Ningshaw Awng a hkra maga ana kaw jum tawn nna: "E, ngaihkri Awng e, atsawm chye madat la u, nat shan hpe mu dum jang gaw myu tsaw myit majing rai sai, buga na du kaba mai galaw sai, dai majaw nang ya kaw nna gade mung hkum hkawm sa, chye na sai i?" "Mai ai, ngai mung dai hku yaw shada nga ai law." Ningshaw Awng Samwi La shi a na manat tawn ya ai ta la kau ya let wawm nga ai. "Nang sanit ning jan ting nat shan hte hpa ni n mu sha mat, buga pyaw lam n mu hkam sha kau, tsawm shayi ni hpe mung masha ni ma hkra hkungran la kau masai, hka, tsawm shayi dai ni hpe nang galang mi lu shaga yu ai i? Um, ya ngam nga ta ai shayi num ni gaw du tit du bawng hkrai she rai mat sai gaw e, nang hpyen shang wam hkawm mat ai majaw rai nga ai le." Samwi La achyang re htawnglawng labu hpe lahput kaw du hkra gang malu shalun la rai, Ningshaw Awng dung ai daphkun de nyep hkyi di kabat bang nna, ta hpe hpunjum kaw gatsut let wanmang de wan pyi shu nga hkra manyen bai mahtaw bang dat nhtawm dung gazut bang wa sai. Ningshaw Awng manang la ni hte tsa lu jahta nga yang, kawa gaw pai ta hta laika sumpum mi lang rai sa wa ra ai, kasha Ningshaw Awng hpe: "Maw maw, ndai mana de nhtawn rung mu madu wa sa jaw da ai re, nang ya jang hpaw yu u, nta pyi n chye pru wa hkra hkra re gaw?" Nga sa shara nga u ai.

Kawa nhtang mat wa ai htawm, Ningshaw Awng laika hpaw hti nna mau dung nga yang, manang la ni gaw shi hpe jawm yu nna zim rai nga ma ai. Samwi La gaw Ningshaw Awng a lahput kaw sa gang ashun nna: "E, ala mau yang ninggung lu sha ai da, hpa baw shiga wa re ta?" Nga laika sa chyan galap yu bang wa nu ai. "Um, Hkwimyin Yinnan amyu jawng kaba de jawng wa lung nga shaga nga ma ai law, tsa Doi e." Samwi La laika pyi rai n lu galap hti yang, Ningshaw Awng e shing ngu tsun dat jang, myiman pyi ahkying ahkang, n-gup she nhkyeng hkra rai: "He...he... ngaihkri Awng e, ma dingla sayang wa jawng lung la nna hpa di na? Asuya magam shang ai ngu ai gaw mayam bungli she re gaw e, ndai daram pyaw ai buga hpe tawn kau da lu ai i? Mu dik ai kinyaw tawk u shan hte shum dik ai shan hpa hpe nsha sana kun? Nang atsawm myit yu." Samwi La grai nga tara hkaw ai zawn tsun nga jang, makau grupyin hkan dung ai manang ni mung garu gara nga: "E, atsawm myit yu law, asuya magam gun hpai yang gaw madu a myit n lu shadang ai, dingla lawan ai, lu sha koi gam lam law ai." Nkau bai tsun ai gaw: "E, nang nat shan, ahpa sha ai re gaw, nta kaw nat jaw shakut nna mayat maya gumja gumhpra rai nga nga na yaw shada nu, sanit ning jan ting kawam sindai, naw n ram i?" Nga ai mung nga. Ningshaw Awng baw mahkyit let rawt tsap nna tsun ai: "E, hkawp hkau ni e, nanhte tsun ai jaw ai, nanhte tsun ai hku galaw na re, naw bra saga hkau ni e." Nga tsun kau da nna pru mat wa hkyem jang, Samwi La mung rawt tsap dat let: "Hkau ni e, hpawtni ngai ngau hpai aga saw na law, yawng naw sa garum la mi law." Nga tsun ai majaw, manang ni gaw: "Mai ai, mai ai." Nga wawm let garu hte chyi, sat htawt shut let gading gadang rai bra mat wa masai.

Ningshaw Awng nta du wa ai hpang, dawdap lahkum kaw myi gaw rim rim rai wa yupnga dung nga nu ai. Kawa gaw chyinghka lam makau kaw kumshu sep sha dung nga nna: "Ma rang, nang hpe ajawng sa lung nga ai de yi sa hkyem da nu ai rai?" Ngu san dat ai na dat jang: "Ngai sak kaba mat sai, n sa lung sai, nta ga nde pyaw nga yang mi." Ngu myidi tawn let htan nu ai. "Asuya ni nang hpe kam sham nna she shaga nga yang, hpa rai n sa na rai?" Ningshaw Awng a kanu gaw hkainu sharun let: "Nta ga nau pyaw nna, sadi hpyan ai, sari sadang hten ai bungli hte achya mat na hpe wa tsang ya da de ai law, ngaisha e." Nga bai tsun ai majaw, Ningshaw Awng gaw myi pyi ja ja le le rai la hkra mani nsen hte: "He...he... nu yan wa e, dai lam hpa n tsang ra ai, ngai gaw pati shang sai masha re. ." Nga jang, kanu gaw wanmang de hkainu wapawng kabai bang bang rai let: "E, dai hku nga jang, ngai grai myit pyaw sai, raitim, mayun pati de gaw n mai shang ai re lu." Ngu bai galaw matsun nga jang: "Ngai yup sai, hpawtni tsa Doi Samwi La nta ni ngau hpai ga saw ma ai." Ngu tsun kau da nna yup mat wa sai. Hpang shani, ngau hpai ga sa shani shat sha ngut nna hkring sa nga yang, nhtawn rung mu madu wa gaw hkra maga gahpa kaw shan hpyi nhpye chyang hpe ren ren di hpye kau rai sa wa ra ai hte rau: "E, Ningshaw Awng e kabu hpa shiga law, nang hpe Yinnan mawdaw hkang sharin jawng de jawng wa lung nga nga ma ai law, nang lawan shajin yu, hpawtni din lung wa na hku re." Nga bai wa htawn shana sai.

Ningshaw Awng rawt tsap nna hpa tsun na re mung n chye, mau mau nga: "E...e... mu madu." "Hpa, e e nga nna shamu gaw n shamu, lawan shajin na di u, ngai ya ningnu yan ningwa hte naw wa hkrum ra nga ai." Nga tsun kau da ai htawm, nhtang mat wa ai hte rau, Samwi La shawng Ningshaw Awng hpang de sit hkrat wa nna: "Ngaihkri wa e, gara hku myit da nu ta? Mawdaw hkang ai ngu ai gaw sa-wa sa-dan hte arau nga ai bungli re yaw, nang mawdaw hkang sayang gaw wa hkang jahten kau na lu, n rai sa nga jang gaw, Sinwa krung na jahtung myitai tu e woi la kau na lu, shing n rai ahka kaba hkrum na kun? E, n chye hpa re. Dai hta n-ga, masha ngu ai gaw galang sha pra ai hkrai re, buga na pyaw dik ai ten hpe hkum shalai kau, n rai i? " Nga jang, makau yang dung nga ai manang la ni mung garu gara nga: "Samwi La tsun ai teng ai, Nga tsun, nkau gaw: "Gade hkum hkawm sa law, hkinjawng hpaji sharin la nna nta ga e pyaw nga saga law." Nga tsun ai majaw, Ningshaw Awng baw mahkyit ari let: "Nanhte hkau ni kadai tsun ai mung jaw ai hkrai re law." Ngu htan nu ai, ngau pai ga sa ai ni shana de jan du wa sai hte maren, jahtum na lang sharem yan, n gawng yan jawm hpai kau da nna kadai mung kadai a nta de wa masai.

Ningshaw Awng nta du wa yang, wa shat mawt nga ai kanu shi hpe: "Awng e, daini nhtawn rung mu madu nang hpe shiga sa jaw da sai nga ai gaw, gara hku myit da nu ni?" Nga hkap san u ai. "Nu, mawdaw gawt ai ngu ai gaw sa-wa hte rau nga hpa re, dai majaw ngai n kam sa ai, ngai nan nu yan wa hte rau sha nga nga na." Nga tsun ai shaloi, nam kawa pali numhtan kaba mi hpai rai shachyang maga de nna shang wa ra ai kawa gaw: "E, Ma Awng e, nang tsun ai hku rai yang gaw mungkan ga ntsa hta, mawdaw ngu ai gaw n nga sai re mu e." Ngu jahpoi dat jang: "Wa, ngai buga na manaw manang ni hte n hka lu ai, nta ga pyaw la dik nga sai." Ngu ningdang ninghkap dat nu ai. Ningshaw Awng a kanu gaw kasha hpe yu nna: "Ma Awng rang, kaning re hpe pyaw dik ai nga ma ta? Mawdaw gawt ai gaw akyu ara kaba galaw ai bungli re le." Ngu shadum jang, "Gara hku mi rai rai, buga na ngwi pyaw lam hpe marit kap mat ni ai." Ngu ningdang kau nu ai. Nhtawn mu madu gaw, shiga sa jaw ai masum ya din ai jahpawt na shat sha ten e, Ningshaw Awng a nta bai sa du sai. "E, hkau Awng e, rawt na aten du sai le, shamu shamawt rai na mung n sawn i?" Nga sa shadut dat jang, Ningshaw Awng shat wan tawn kau nna: "E, nhtawn du wa e, hpa tsun na raitim, shat naw jawm sha la ga le." Nga dung shara madun let shat hka-wan la ya u ai. "Ngai sha sai, nang lawan shajin yu, ngai nang hpe ginwang rung du hkra wa sa da na." Nga nhtawn du wa gaw dawdap kaw dung bang wa sai. "Hkau du wa e, ngai gaw nau tsan ai de n kam sa ai law." Ningshaw Awng shat hka-wan lang tawn nna tsun u ai.

"E, dai zawn gaw hkum nga le, nanhte hpyanla dingsa ni hpe sha hkyem sa ya ai bungli she re gaw e, nang mawdaw hkang jawng de n kam sa jang gaw, kumshu htang rung de sa tim mai ai, grai ba ai bungli mung n re, nanhte hpyenla ni gaw makawp maga bungli sha re, hka, ya na ta jahku ya shani ngai woi sa wa na, yi mai ? Yi kam? Manga ya sha ra sai. Nang tsun yu u, gade madaw sa na?" "Du wa e, ngai naw myit yu na re." Nhtawn mu madu aga mi naw tsun mayu ai zawn rai nga yang, Samwi La gaw Ningshaw Awng a nta chyahpung na lunghkrung kaw tsap nna: "E, hkri Awng, we...htaw...mare baw nta ni nat galaw sha shaga ma ai law, wa ju sha na ma ai da, lawan lung wa yu na da yaw." Nga sa marawn dat sai. Ningshaw Awng shaloi jang rawt ngoi rai kabu sumsai myiman hte kinla n-gang shayu hpye la rai, nhtawn du wa hpe pyi n shaga da ai pru mat wa sai. Mare baw nta du yang, ndaw yang hku wanhkut hte lun, wa hte nyek, u mung kyawk, garu hte chyi nga nga mala ai majaw, kabu gara masin htukhtak let u wa hkinjawng ai shara kaw chyingjawm dung wa nu ai. Brangla manang ni mung Ningshaw Awng hpe mu mada dat ai hte rau, shi a makau grup rai sa dung bang wa masai.

Raiyang, Samwi La gaw Ningshaw Awng a gahpa kaw sa gumhpuk ya nhtawm: "Hkri Awng, ngai na nta chyahpung kaw grai na hkra sa lagu madat nga sai, nhtawn rung na mu madu nang hpe mawdaw n kam gawt jang gaw, kumshu htang rung de sa tim mai ai nga ai nre i?" "Re, raitim ngai n kam sa ai gaw e," "E rai sai, la kaja rai sai, kumshu htang rung de sa yang gaw, nang hpe chyinghka lam sin gwi la tai shangun na sha re, dai hta n-ga, nang htang rung kaw nga sayang gaw, htang hte mazum chyalu re, dai majaw jit dwi ana lawt la chyalu re, n rai i? E, daidai, dai u wa hkinjawng atsawm yu sharin la u, na shatwan gaw dai rai nga ai le, nang gaw hkringhtawng lu ai, amoi ningji dwi mung hkinjawng kaba re." Nga tsun jang, manang ni mung hka hta marang jat nga: "E, teng ai, Samwi La tsun ai ga kaja re." Nga hai garu nga ai majaw, Ningshaw Awng mung myit ungang nga yang, ginwang daw laknak sumraw dap du wa bai du bang wa ra ai hte rau, Ningshaw Awng hpe laika shakram zawn re mi ya nna:

"Awng wa e, nang a kam hpuwang kaja wa rai sai law, nanhte maigan de majan sa shang lawm yu sai ni hpe galang bai hpyenla nnan zawn, labu palawng panyep nba, zauhkai, gupchyawp nnan sing htuk ya na hku re, zuphpawng ngut jang, nanhte hpe shawa makawp dap de magam shang shangun na hku re, nang shajin tawn u, hpawtde anhte mawdaw hte wa tau la na yaw." Nga tsun kau da nna ginwang daw laknak sumraw dap du wa nhtang mat wa ai hte, Samwi La gaw myidi kau nna n-ga rang rai hkra: "Ha...ha..ha.... Hi..hi.hi... Vi, ngai grai na kabu ya sai le, daidai, labu palawng panyep nba ni wa la nna, agatsi sha wa nga mat u, shawa makawp magam dap de nang sa na i? Dai gaw hkrit hpa amu re." Nga mana zai bai htu dat nu ai. Manang ni mung Ningshaw Awng kaw gumbawm hkrat wa nna: "E, re law, dai nang shang yu ai majan hta pyi grau maja ra ai re lu, pyada ni hpe masha ni lagu sat kau wa ai re lu." Nga, Ningshaw Awng hpe hpyenla galaw na lam mung kadai n myit lawm ya ai hta n-ga, madi shadaw ai ga tsun ai masha mung n nga, htunghking hkinjawng lam hkaja na hta myit lawm ya ai krai rai nga sai. Kaja wa sha Ningshaw Awng gaw, labu palawng panyep nba sha wa htuk la nna, shawa makawp dap de mung n sa ai, buga na hkinjawng hpaji hpe she maju jung nga sai hte maren, makau grupyin buga hkan na nat galaw sha ai shara hkan shi jahproi hkawm nga sai. Galang mi hta, Ningshaw Awng sanit matsat ya nta n pru wa mat nna, kanu yan kawa gaw mare hkan mu lamu hpe hkan san hkawm ai shaloi, hka nhtung hpai ai ma la kasha langai hte hkrum sai, gumgai jan gaw sit sa wa nna: "AWh, Tang Nau i, Tang Nau e, Ningji ba Ningshaw Awng hpe n mu nni?" Ngu hkap san jang, Tang Nau gaw hka nhung shayu shadun tawn nhtawm: "Ashe law, ma ni ngai Manawn gahtawng de moishawng kaw sa yang e, Ugaw ni a nta nat shadung sha ai kaw nga nga ta sai." Ngu tsun dan u ai.

Ningshaw Awng a kanu yan kawa gaw nta nhtang wa nhtawm, ndaw yang e wa jawm dung nga nna, kasha a lam jawm bawngban bang wa masai. Ningshaw Awng a kawa singga pali mali let: "E, ningnu e, ma ndai asuya ni shaga ai de gaw n kam sa, mare krai hkrai rawng, anum alawan la ya ra sai, shi hpe dang lu ai num mi she tam yu ra sai law." Nga pali ningmu ahpu jahkrat kau let tsun u ai. Ningshaw Awng a kanu gaw u ni hpe hkainu gat jaw let: "E, shing nga jang gaw, le le Maihka gahtawng na Mahtat Nyem Ra hpe la ya ga, Nyem Ra dai kyet mung kyet, nten mung ja ai, Ningshaw Awng hpe hkang sha lu na re." "AWh, kaja wa, mai ai, mai ai, Nyem Ra dai hpe mare ni yawng yawng shakawn ma ai, kawa mung grai ganawn pyaw ai, shawng de ngai hte Sengmaw ga e masum ning ganawn yu sai." "Shaloi rai jang gaw, ahkru ta hta hkungran poi shabyin kau lu yang gaw grau kaja ai." "E, dai gaw num kasha hkraw jang she tsun ai baw re gaw e, kanu yan kawa chyawm gaw hkraw na re, nang masha dat nna ga shawng naw sa manaw shangun yu su." Kanu yan kawa gamung dup nga yang, kasha wa shan sumrawn hte shan si mai matep matap ni lang nna du wa ra ai hte rau: "Aga, ma nang e, nde nlaw ya wa nta n chye pru wa hkra hkra re gaw, ndai kaw naw wa dung yu, amu kaba mi naw bawng yu ga." Ngu kanu e shaga dat sai.

Ningshaw Awng shatdap de wa shan shang noi kau da nna: "Hpa baw amu kaba wa re ta?" Nga kanu yan kawa a makau kaw wa dung nga nu ai. Kawa gaw kaidawk na ntsin "Grak grak grak, grak grak grak!" nga gadawng lu la nhtawm: "Awng e, nang asak mung ram sai, dinghku de sha ten rai sai, ningnu hte an bawng hkut tawn sai, le ra Maihka gahtawng na Mahtat Nyem Ra hpe la ga ngu nga ga ai." Ngu hkap tsun kajawng dat jang, Ningshaw Awng gaw du gayin ta lagra dingsi let: "E, nu yan wa e, ngai num garai n kam la ai, ngai ya htunghking jawjau hpaji sharin la nga nngai, hkinjawng dumsa tai ai ni gaw, num jaujau la jang hpuk wa ai, bai nna ngai htunghking jawjau hpaji chye jang , nan nu yan wa tsa chyaru shan ntaw n ma lu sha na rai nga ai, num la na lam rai hkum kajai yu mu." Ngu ningdang nga u ai. "Ningshaw Awng e, dai zawn nga ai baw wa re ni ye? Nang asuya ni shaga ai de gaw n kam sa, hkinjawng galaw nna sut su ngwi pyaw wa na ngu nu ni? Num lawan la ra sai, ahkru ta hta la na re" Kanu gaw kasha a ga na kajawng nna, nsen pyi ja ja nga hkra jen gama jaw dat nu ai. Ahkru ta n dum shami gan du wa ai majaw, Ningshaw Awng a kanu yan kawa gaw kasha hpe shagwi nna num hkungran ya manu ai. Num la ai htawm raitim, Ningshaw Awng nta na bungli atsawm n galaw yu nga ai, gahtawng nhtawn shagu hkinjawng jawng sha kyin hkawm ai gaw ding yang rai nga nu ai. Ningshaw Awng hkum sumhpa shan nau sha hkawm u ai majaw, watung wase machyi mat u ai sha n rai, wakam waji pawt hte waman pawt hkan mung hpye mat hkra rai wa sai.

Lahpawt mi hta Ningshaw Awng gaw wa watung machyi nna dawdap wanmang kaw mayen hkyen dung nga yang, lahkap gaw lahkam lahkawng daram dang sha galu ai kaw, labu htawnglawng bai gyit noi tawn ai majaw, yu yang ga gasang sha ni daram sha galu ai gatsa doi Samwi La du shang wa ra ai hte rau: "E, ngaihkri wa e, sa law, daini nye nta kaw bai wa ju sha ga law." Nga sa saw nga jang, Ningshaw Awng jan shatgawk de nna pru wa ra ai hte: "E, wa doi e, dai ninghkri wa, shan nau sha nna rai ang ai, wa watung machyi nna yup pyi n mai, madai dai ai gaw numgaw pyi ashun wa na daram ram madai nu ai, shat mung n mai sha ai lahkawng masum ya rai sai." Nga hkap tsun dan jang, Samwi La gaw myiman she hten hkra: "He, hkri Awng wa e, la kaja she nga ai wa, watung sha machyi yang dai daram ram nyin hkra hkra wa i ye? Atsi mung n chye tam sha i? Sa sa, ngai kaw wa yu ga, ngai atsi lu da we ai." Ngu jahpoi let saw nga sai. Ningshaw Awng gatsa doi Samwi La a hpang kaw du sha nhkyang kau rai hkan nang mat wa sai. Samwi La a nta ndaw yang e, manang ni gaw garu hte chyi nga u wa sat kyin nga ma ai, Samwi La gaw Ningshaw Awng hpe nhku de woi shang wa nhtawm: "Hkri Awng e, nang nau hkum manya, ndai gaw tsirung kaba hkan pyi n mu tam ai baw tsi kaba re, maw maw!" Ngu rai matep mi ladawn nga u ai, nhku gata asin amun nga ai majaw, Ningshaw Awng hkawawt de la sa yu nna: "E, ndai gaw ka-ni hpraw ngu ai baw wa nre ni ye? Anhte hpyendap hkan gaw ndai baw lu ai ni hpe htawng jahkrat ai gaw e." Nga tsun ajawp nga jang, Samwi La grai n ji ai hte: "Nang nau hkum manya nga sa, ndai kaw hpyendap rai nga ni ye?" "Yi! Tsa doi e, ngai n lu gwi ai law."

"Kaning rai nna n lu gwi na rai i? Ndai lahkawng lang mi marawp bang dat lu jang, na watung machyi ai gaw galang ta mahti kabai kau ai hpa sawp mai mat lu ai, n kam yang chyam yu u, nang lama tsirung de sa yang, gumhpraw hkying lam naw ma na rai nga ndai." Nga tsun nu ai. Ningshaw Awng palawng kaba raw kau hkra, gatsa doi a yupku lagaw nhpang na sadek kaw dung bang wa nna: "Hka hka rang, chyam yu gaw rang." Ngu nu ai. "E rai sa, la kaja ngu ai gaw dai hku re, hka hka, ngai sharin de, ningdi u..." Ningshaw Awng mali nanga lang marawp la nna: "E, tsa doi e, baw sin wa re ra ai le... "Um, hpa n tsang ra ai, ya chyahkring mi rai jang watung machyi ai zim mat nna, shan mung mai sha, chyaru mung mai lu na ra ai. Ya nang wawra jan mai tsawm ai nbang ntawt kaw galeng hkring sa nga u yaw, daini nang hpa mung hkum galaw sa, loi hkring ngai mai tep hte tsa ni hkumhkum tsuptsup la wa jaw na yaw." Ngu tsun kau da nna, Samwi La gaw panyep nba, bunghkum ni jahkum hpai rai, Ningshaw Awng hpe ntawt kaw sa sa da rai, shi madu gaw ndaw de rai mat wa sai. Shana de jan du wa mahka e Ningshaw Awng yupgawk hte di nga yup pyaw nga yang, Samwi La ni a nta na gwi la du ka wa, Ningshaw Awng a lata, ana, ladi, myiman, nten hkan mata ya jang she, dum pru wa nna rawt mahkam dung nga yang, Samwi La tsa hpalin hte mai tep majaw lang rai: "E, hkri Awng , atsa law, ashan law, gara hku re ta? Yi naw machyi ai rai?" Nga shang wa ra ai.

Ningshaw Awng gala nba lawai dung nga nna, hkra ta hte myi kanun let: "Tsa doi e, nang tsun ai teng ai, atsi kaja nan re, n machyi mat sai, dai rai daini ngai grai yup pyaw la sai. E, tsa doi ngai naw hkawm sana nhten law." Ngu palawng kaba ni hta hpun la rai rawt shamu hkyem nga sai. "Hkawm na raitim, ndai chyaru le, mai tep le." Ngu jang, Ningshaw Awng maitep hpyan sha la, tsa lu la rai nta wa nu ai. Ningshaw Awng nta du wa yang, ningrim kaba rai mat sai majaw, kanu yan kawa hte madu jan hkan gu hkan moi ni dawdap wanmang kaw alum ala rai wan kra dung nga mala ai. Ningshaw Awng mung wanmang de dung bang wa nhtawm, Samwi La shagun dat ai mai tep hte hpa dagaw shaw la nna: "Maw maw, ndai sha yu mu, um, he, daini tsa doi atsi kaja hkap jaw dat nna wa watung mung n machyi mat sai, daini tup sa yup la se ai." Ningshaw Awng kabu gara azet atsang rai yup gawk de wa yup mat sai. Raiyang, jahpawt hpungtsin ganan wa ai ten hta Ningshaw Awng madai nsen hte: "Aka law, umhum, umhum, n dang sharang wa re sai law." Nga rawt madai nga jang, madu jan gaw wan rawt shachyi nna: "E ning tsa doi a atsi gaw chyahkring mi machyi gan sazim ai baw sha rai sam nga ai gaw e." "Umhum, umhum, n chye sai , chyahkring mi zim tim zim rai sai lu, ya nhtoi san jang, tsa doi kaw naw bai sa wa na re, umhum... " Nhtoi san ai hte rau, Ningshaw Awng gaw Samwi La a nta du ra ai hte rau: "Umhum, umhum, aka law, tsa doi e, dai nang makoi tawn ai tsi n nga sai i ye?" Ngu wa san dat ai shaloi, Samwi La gaw palawng mung n hpun, dangpai lawai tawn rai chyinghka hpaw dat nna: "E, rang ya, um, ningni doi hpe naw san yu gaw, yi naw nga ai kun?" Nga tsun ai shaloi, Samwi La jan gaw yup gawk de nna angwi sha pru wa nhtawm: "Maw maw! Hkri Awng e, ndai hte sha nga mat sai, ndai ngai lap 200 jaw nna atsi di na ngu la tawn ai wa re." Nga tsun let sa ladawn ya u ai.

Ningshaw Awng shabyi magum tawn, hkumbai hte pya rai: "Yi, ni doi e, lawan la dat yu law, gumhpraw gaw ngai lu nga ai mu e, aka law, umhum..." Nga umhum nga jang, Samwi La gaw atsang arang rai: "Hka hka, ngai nat ya de." Ngu tsun let wan numhprat shaw bang wa nu ai. Ningshaw Awng manga kru lang marawp la nna, dawdap chyinghka lam e dung shanat nga nhtawm: "Um, ya chyawm gaw loi mi zim wa re sai, E, tsa doi e, atsi ndai baw gaw grai kaja ai haw gaw rai nga ai wa, hka, ya ni doi mung n lu sai nga, grai tam yak ai baw wa rai sam ai i?" Ngu san dat nu ai. "Ngai ningtsa doi sha nga nga yang hpa myit n tsang ra ai, gumhpraw sha lu jang tam la na loi dik gaw e." "Maw maw, tsa doi, ndai lap 200 mi yet na matu, ndai 200 gaw nang bai sa tam jat wa rit yaw." Ngu gumhpraw shaw ya jang, Samwi La ningdang masu let: "E hkri Awng e, kadai n re shada wa, dai re gaw ngai ningtsa wa mung gumhpraw bai n chye tam rai nna gaw e, gumhpraw lu jang ngai grau kaja ai baw tam wa na yaw." Nga gumhpraw hkap la nu ai. "Tsa doi e, arai ndai baw machyi gaw sazim lu sa, raiyang, ayin shakap la na hpe mung nachying tsang nga nngai law." "Hehe, hkri Awng e, nang dai daram hkum manya, mungkan ting lu ai hkrai re, gumhpraw sha lu jang mi gaw, kanang mung lu mari la ai." "Re law, re law, tsa doi atsi lu la jang ngai kaw la sa wa rit yaw, ngai naw hkawm sana ni ai."

Ningshaw Awng nta du wa ai loi mi hkring rai jang, gatsa doi Samwi La hkan du nang ra ai hte rau: "E, hkri Awng, maw law, nang hkrai sha marawp yang gaw shata chyen mi marawp na daram rai sai." Nga nhku de shang wa ra ai. "E, grai lawan nga ai le." "She lawan gaw e, ngai ningtsa wa sha chye tam ai, kaga ni n byin ai, e, dai dai lawan bai marawp jat la u, htingra htu ga sa wa saga. Ningshaw Awng jan shatdap kawn dawdap de sa wa nhtawm: "Nantsa a atsi gaw chyahkring mi machyi gan sazim ai baw sha rai sam nga ai, tsirung de madaw sa yu yang mai nhten gaw e. " Nga tsun jang, Ningshaw Awng a kawa mung, nhtung e hpalap lu dung nga nna: "Nanhte a atsi dai e, ayin kap wa ai baw mahkoi wa re ni ye?" Nga shadum ga ga dat nu ai. Myi rim rim rai wan kra dung nga ai kanu mung "Tsirung kaba mung makau kaw sha rai nga ai le." Nga jang, Samwi La gaw, gade nde mada yu nna myi shup rai: "Shawng e, tsirung de sa yang gaw gumhpraw hkying lam shaw ra ai, ndai baw tsi gaw mali manga lang marawp jang sawp sawp mai lu ai. " "Nu, tsa doi tsun ai teng ai."

Ningshaw Awng kanu hpe yu nna tsun u ai. Wa watung machyi ai nhkan kawn, Ningshaw Awng ka-ni hpraw hte machyi sazim ai aten na mat wa ai kaw hkan nna, ayin kap mat ai majaw, shana shagu gatsa doi Samwi La kaw lung nga mat, Samwi La n nga jang, mare hkan tam mari sha hkawm rai, nta pru wa ai hte madu jan hte ga wa kashai hkat, kanu yan kawa hpe masu rai nga nga yang, hkum gawng shingyan mung lani hte lani lasi agrawp mat, myiman mung woi kinyu zawn rai mat, maidang mung shaw mat, nhung bung wa jang poi nang mat wa na zawn rai, agrawp taw yang "Sawk sak!" nga na zawn rai mat, hpyendap kawn nnan pru wa yang na shingkang shingwang re hkum gawng gaw ka-ni hpraw e marawp jahkyet kau ya nu ai hta n-ga, shi hpyendap de nna gun wa ai gumhpraw mung byek mi pyi n ngam hkra mari marawp nat shama kau sai. Lana mi hta, Ningshaw Awng gari kawa rai Samwi La kaw du sa wa ai hte rau: "Tsa doi e, atsi dai baw gachyi mi pyi n lu sai i ye?" Ngu chyinghka lam kaw jum shanat let wa galawp san dat nu ai. "Hkri Awng e, nang ama sha n re gaw, gumhpraw la dat yu le, ngai sa tam ya de.' " "Tsa doi e, gumhpraw byek mi mung n lu sai law." "Gumhpraw n lu jang gaw, dai nang hpyendap de nna la wa ai soi nhpye, gumhpraw n-ga, hpyanla hpun palawng, zauhkai, panyep nba, shamang ba nhpye, hka pyek re ni hte mai galai lu ai gaw e, nang nwam galai, gaya dum jang gaw ngai kaw hpai sa wa rit, ngai tam galai ya de." Samwi La e shing ngu tsun dat jang, Ningshaw Awng gaw sa htawm sa lawt, nyepsan hte pya rai: "E E, mai ai, mai ai, ngai ya jang wa la na, matsan naw dum la rit law tsa doi e,. ." Nga nta de bai gari htuhta mat wa sai.

Ningshaw Awng ndai zawn shi a hpyenla rung rai ma hkra hpe ka-ni hpraw galai lu kau nu ai, dai lam hpe madu jan chye kau ai majaw, nachying pawt ai hte: "Aga, Ningshaw Awng e, nang gade ya naw pra na ngu yaw shada nga nta? Dai nang a hpyenla rung rai ni gara de rai wa sa ta? Ngai daini kawn nang hte hka sana, sa, ya jang rung de sa wa saga, dai hkungran lakmat la lang u, nang nau hpyau sai." Nga pawt shateng bang wa jang, Ningshaw Awng gaw: "Ja i, mungkan e ngai n kam pra sai law." Nga shatgawk chyinghka lam shingjut na singga jinghpa raw la nna, shachyang sun yi baw na sabyin hpun lakung loi nyem ai kaw singga jinghpa hpyau, adu e kyit di, lahkawng lang noi goi wat ai hte rau, madu jan Nyem Ra gaw dawdap shakum shannga rung chyinghkyi hkai kaw noi nga ai Ningshaw Awng a kinla n-ga sha" Hkret!" shaw lang rai, labu shalun kau rai gahkan hkrat wa yang, madu wa noi goi wat nga ai singga jinghpa kaw "Hprut!" di sa gahtam di dat u yang, madu wa "Buk!" nga gaulum yi nhkap hku chyai galeng mat wa let: "Aka law, aka law! Ngai garai n kam si ai law! Daini kawn ka-ni ngu ai n lu sana law." Nga gaulum yi htumpa na masa hpun du e hkum ting ga hkye hte wa hkyi hpun hkrai hkrai rai sa shanat dung nga u ai. Madu jan gaw pai ta hta nhtu lang tawn, hkra ta hte madu wa hpe gang sharawt nna: "Rawt u! Lawan rawt u! Grai si mayu ai n rai, ningnu yan ningwa a shawng e si mayu yang, gu yan moi hpe naw wa san yu u!" Ngu nhku de gang dun achya bang wa nu ai.

"Ma Awng e, masha ngu ai si ten du jang me, n sa noi si tim chye si ai." Washat dap kaw wa chyinghkrang mawt dung nga ai kanu, ganam jan e ganawng shang wa ai kasha hpe hkap daru u ai. Hpungtsin ganan wa ai ten yang, Ningshaw Awng shinggan pru masu let, agatsi sha Samwi La kaw bai lanyan shang wa nna: "Ta doi, e tsa doi, chyinghka lawan hpaw yu law." Nga nsa nhkawn n hkawn nga ai nsen hte sa jahtau nga u ai. Samwi La chyinghka pyi atsawm garai n lu hpaw dat yang, Ningshaw Awng gaw chyinghka ganawng je shang wa nna, dawdap nhtung e wa dung nga nhtawm: "Aka law, tsa doi e, watung bai garu wa re ra ai law, atsi gachyi mi bai naw tam dat yu law." "E, Arai nang e, n re mi she rai re nga ndai, masha ni ngai hpe rai dut shadu na law." "Tsa doi e, masha ni tsun yang nang ka-ni dut sha ai masum mali ning rai sai nga ma ai, raitim nang hpe kadai mung hpa n nga lu ai, nang gaw nyan zai rawng ai gaw e." "Um, nang a watung dai gaw atsi gade lu marawp bang tim n mai hkraw ai gaw, maw maw! Ndai yu, gachyi sha ngam sai, lu marawp mung n ram sai, waw, daidai, watung machyi ai kaw anyin bang tawn u, chyahkring mi rai jang, sawp mai na ra ai. "Tsa doi e, nang hpa rai jaujau ntsun dan ai rai i? Hka, kaning di bang na rai?" "Hkahka, ngai bang ya de, ngai Samwi La kaw nna n lai sai, ngaihkri wa e, nang gaw ngai hpe naw nna nga ra sai."

Samwi La e ka-ni hpraw bang ya ai manit shi daram lai ai hte Ningshaw Awng kabu gara ga hte: "E, lamu e, aga e, rai sai law, zim sai law, tsa doi e, nang a chyeju rai sai yaw, ngai naw wa sana." Ngu tsun let ta hte shabyi gade nde ahpuk yu rai rawt mat wa sai. Ningshaw Awng gaw watung n machyi mat ai majaw, nachying kabu nga u ai. Raitim, awa kaw ka-ni hpraw shadung bang ai nhtoi shi hkun ya dang du ai htawm, waji wakam waman gaya gayau nga wa ra ai hte rau, ashat sha yang awa langai pya, shan hkraw sha yang masum pya, ba pa sha yang mung ba pa kaw kap nang mat wa, gahti dat yang mung langai mi gahtan pru mat wa rai, shata lahkawng du ai hte n-gup nyawp lahkyawk bang mat nna masha ni pyi yu shut na daram rai mat sai. Lana mi hta, nta ting hkumhkum rara rai dawdap e wan jawm kra dung nga yang, madu jan Nyem Ra gaw: "Hpawtni manau poi rai sai law, manau sa let dai nang a wa sa mari bang na hku tsi sara ni hpe sa madun yu ga, wa ntu jang woi lup dingla a nhka zawn she rai nga ai, kaning di pra shakre na myit nga nni?" Ngu madu wa hpe azi tawn nna tsun ai shaloi, Ningshaw Awng a kawa gaw nhtung de shingdu yawn rai: "Um, awa run mat ai gaw, dingla wugut gu sai ga rai nga ai le." Nga shapye dat nga yang she, kanu mung wan nawn let: "Kaning rai nga na mung madu a myit sha re, awa run mat ai mung madu sharun kau ai rai, n chye lawm ya sai."

Bai nga jat sai. Ningshaw Awng agatsi nga palawng sinda yen tawn, dagup dagup rai nyepsan hkyen dung nga ai ngu yang, akajawng rawt ngoi rai: "Mungkan e ngai n kam pra sai law, gumhtawn si mat sana law." Nga makan let shachyang maga de gahkan mat wa ai hte, madu jan mung galang ta rawt ngoi rai hkan gang u ai. Raiyang, palawng sha hkan gang raw la lu nna, palawng hpe dawdap kaw kabai kau da nhtawm, hkan kagat nang u ai re gaw, madu wa shachyang punra matu kawn gumhtawn mat wa ai sha hkan mu dat nu ai. "Buk!" nga ai hte rau: "Ahte law! Ahte law! Ngai garai n kam si ai law, lawan sa shaw la mit law, lawan mu, lawan mu law, ahte law... " Nga wa la tsamat maling kaw jahtau rawng nga u ai. Ningshaw Awng tsamat maling kaw palawng mung nhpun ai jahtau gumlet rawng nga jang, kanu yan kawa gaw punra kawn datmi nan ya, madu jan gaw ninggren galu hte tsamat dip gamyet kau kau rai madu wa hpe dun sharawt dat yang, madu wa gaw lagaw mung gayaw mat re majaw, grai rawt tsap yak mat nu ai. Hpang e, tsawm mari mara rai nhku de htenren shang wa lu ai hte Ningshaw Awng gaw shan a gawk chyinghka lam e dung shanat nga nna: "Um hum hum, aka law, ahte law, gabram hpam gaprep ai law." Nga gadau nga jang, kawa gaw Ningshaw Awng a shingma hkan, myiman hkan datmi hte nan ya yu rai: "E, ahkum ting rawn ma sai rai nga ai, waw waw, ajum chya ya mu." Nga nu ai. Kanu mung htep htep sa yu ai htawm: "Um, ajum hte chyamang si gayau la nna chya yang grau mai loi ai, ngainam e, lawan u, lawan chya ya u." Ngu ganam hpe shadut dat nu ai.

Madu jan Nyem Ra gaw hka-wan kaba kaw jum hte chyamang si gayau lang rai: "Awng wa e, ndai panyep nyep tawn ai kaw shagum hku wa galeng yu u." Ningshaw Awng shagum hku galeng bang wa ai hte, madu jan gaw gayau tawn ai jum hte chyamang si alaw alam chya arut dat ya nu ai. Shaloi Ningshaw Awng gale galau gumkan let: "Aka law, ahte law, gaprep ai law, si wa re nga ai law, daina kawn ka-ni ngu ai hte hka sana law, E, e, um humhum.... " Nga jahtau gumlet nga ai Ningshaw Awng gaw ninghtoi htoi hkra madai rawng nga u yang, madu jan palawng nan lang rai: "E, Awng wa, mawmaw, ndai hpun u." Ngu sa ladawn u ai. "E...e... Um humhum....palawng hpun jang grau gaprep wa nhten law." "Nang ka-ni n lu sana nga ndai lang hte lahkawng lang tsun sindai, ka-ni sharang rung de mahtang sa na mahkoi re?" "n sa ra sai, ngai hkrai nta kaw sharang kau na." Ningshaw Awng kaja sha wa shata masum daram mare de pyi n pru hkawm hkra nta kaw shinggyim rawng ai ma kanu zawn sharang shakut rawng nga ai majaw, ka-ni sharang kabai kau rai magam bungli shakut nga nu ai. Dai re gaw, ya daini mateng, mare masha yawng yawng Ningshaw Awng hpe: "Wahkyu wa. "Wahkyu kak wa." " ngu nna shaga nga ma ai.

Dai majaw, Ningshaw Awng kadai hte hkrum shaga tim, n-gup aja awa n wam mahka, myiman prapra n wam madun, manaw manang ni hte mani dung shaga chyai yang mung, n-gup hkrai magum, sumtsan jinghku ni hte hkrum yang mung, gabyin gabyu rai let, ta n-ga mi hte n-gup magum, n-ga mi hte shakram, gat sa gat wa hpawng shingra hkan mung loi mi koi koi, lagyim lagyim rai nna she nga hkawm nga nu ai, tsirung de wa sa galaw bang la na ngu sa san yu tim, waji sawng mat ai majaw, bang yak ai ngu rai, shi hkrai myit n-gut tim kaning gaw n chye di rai taw nga sai. Lani mi hta, Ningshaw Awng madu hkum lakmat galai ra ai da nga nna ginwang daw pyada dap de du sa u yang, mara jep gawk de chye ai masha mi shaga ai zawn nga na dat nna, shakum ahku gachyi sha law ai kaw sa lagu yu u yang, la langai baw gaw akrin rai, myiman gaw kahkum si dabyan zawn rai, hpum hpum dut dut rai nna Myen dangpai gawtgawt di bu tawn, lata lahkawng yep di laehtik shachya tawn, marung gunggung rai dung nga ai hpe mu dat nu ai. Kadai re gaw hkrak bai n yu shapraw lu, shaga nsen gaw bai chye na zawn nga ai majaw, shakum kaw ana htep rai lagyim madat nga u ai. "Na shaga mying hpa baw nga?" "Samwi La." "Sak gade ning rai sa? "Manga shi langai." "Nang ka-ni dut sha ai gade ning du sa?" "Ndai lang sha naw re." Ningshaw Awng shakum pyi lahtum waw kau mayu hkra pawt mayu nga ai, mai byin ai rai yang, jep gawk de htim shang wa nna Samwi Lan hpe: "Nang wa i? Ka-ni ndai lang sha dut sha yu? Masha ni tsun yang masum mali ning du sai da." Ngu shang san shati tawn mayu nga sai.

"Ningsha kanu tsun yang, nang shi hpe ka-ni hpraw joi mi makoi tawn shangun ai da." "N teng ai, nanhte shi hpe galoi sa rim la myit ta?" "Dai lam hkum san, nang a mara hpe atsawm myit yu u." "Aga sa-wa ndai yan la hpe laban bat mi dang n mu sai ngu yang, ndai kaw she nga nga ma hka, waw, madat sha mu!" Nga Ningshaw Awng gaw shi hkrai anyam let madu hkum lakmat galaw gawk de datbung dem mat wa sai. Shata masum lai ai hpang, lahpawt mi Ningshaw Awng ndaw ye nga yang, ginwang daw pyada dap ni gaw soi nhpye, gumhpraw n-ga, hpyenla hpun nba, panyep shabawn re hpai nna sa wa mara ai. "E, Awng wa e, ndai gaw Samwi La a nta kaw sawk shapraw ai re, raitim, nang a re nga ai majaw, nang hpe bai sa ap ya nga ga ai, maw maw!" Nga pyada ni sa tsun masai. Ningshaw Awng pyada du wa hpe shakram tawn nna: "Chyeju kaba sai law, daini kawn ngai myit malai sai." "E, la kaja ngu ai gaw dai hku rai ra ai." Nga pyada du wa tsun kau da nna, Ningshaw Awng a gahpa kaw aja wa gumhpuk kau da nhtawm rai mat wa masai, Ningshaw Awng gaw shi a hpyenla bu hpun palawng, share shagan shagrau kumhpa gumhpraw n-ga nhpye ni hpe yu nna ndaw kaw sumru tsap nga nu ai.