GALA LA WA A SHINGTAWN PAN
MARU GAWNG
Moi munghpawm myen mung wara bum kaw inglik hpyen gala hpyendap langai nga ai. Dai bum gaw miwa mung jarit jan mai hte lawu lahta rau yep rai nga ai. Bum pungding kaw dai ten hta shangu, kasen kinla, tsamat grai tu ai hta n-ga, hpunnu hpungam maling mala gata hkan htingra, chyinghtawng, lahkyang, panlawng, panse ting roi, makawk naroi pu ni pu ai sha nrai, du dumsi, chyahkyi, ningji buk gaboi, pangpang, n-grau grau chyang garu, wadu watsa, shan nga, sharaw rawngba dusat dumyeng hkum ai ginra rai nga ai, grupyin mada dat yang alen nga marit maroi grai lu na zawn nga ai shara re nga tsun ma ai. Inglik hpyen gala hpyendap dai kaw jinghpaw la hte gala la yan gaw rau yup rau sha, shada ndi nhka, myit grai kap hkat ai hpyenla ganawn manang rai ma ai. Rai yang, shan a makam masham n bung ai majaw, lawu de tsun hkai ai zawn re mabyin ni pru wa sai.
Gala la wa gaw shan yup ai nta shingdu kaw shingtawn pan tsawmra mi chye hkai tawn da nu ai. Shingtawn pan tsit lali wa ai kawn, gala hpyenla wa jahpawt manap jaujau rawt nhtawm, ta lahkawng hpe gayep kau rai, lahkum kaw atsawm sha dung let, shingtawn pan hpe sa naw tarung nga nga rai u ai. Jinghpaw la wa rai jang, shingtawn pan tsit lali tsawm wa magang, shingtawn pan maihtu htu sha mayu magang rai nga nu ai. Shingrai, jinghpaw la wa gaw manang gala la wa a makam masham rai nga ai shingtawn pan hpe di sha mayu ai mayen she maup na daram rai nga sai, sa di sha ngu yang, manang wa myit npyaw na hpe tsang ai hta n-ga, shan a hkuhkau ganawn mazum makyit mahkai lam hten run mat na hpe mung myit ru taw nga nu ai. Myit jin nna, jinghpaw la wa nyan hpaji langai myit shapraw nu ai, shi mung manang gala la wa zawn makam masham langai kam na hku dawdan da nu ai, kraw hta ngai shi a makam masham hpe sa di sha kau ya jang, shi mung ngai a makam masham kaw ri yu nna, myit shadik la u ga ngu, shan a nta shingdu gala la wa a shingtawn pan tu ai makau kaw, jinghpaw la wa gaw alen la nna apa sha ai hku magwi tsamat bawng htawt hkai tawn da nhtawm, jahpawt jaujau rawt nna: "tsamat matlung galu sumkrung, htawk di yang masa, gra di yang hprawng gama..." ngu sa hkaw naw masu nga nga rai u ai.
Jinghpaw la wa shingtawn pan lu di sha na matu, hpaji naw daw nga ai lani mi hta, kanu kawa hpunau ni hpyendap de shi hpe sa kawan nga nna du hkrat wa mara ai. Hpyendap kaw shat woi sha ai shaloi, shapre shamyaw, nga chyu hte htawbat, muk re ni woi sha ai hpe, bumga nna sa ai jinghpaw ni gaw n sha man ai majaw, n mu dum nga ma ai. Simai n mu rai myit htum nga yang, nta shingdu kaw shingtawn pan tu tsawm nga ai mu dat nhtawm, gala la wa a makam masham rai nga ai hpe n chye ai majaw, nawhpu hte atsai awai di htu gayau sha kau ya masai. Hpang jahpawt gala la wa shawoi na zawn, jaujau rawt nna nta shingdu de sa wa yang, shingtawn pan lap n lap mat hkinlang hkrai rai hkrin nga la ai sa mu gajawng ai majaw, jinghpaw la wa hpe: "nang hpa rai ngai hpe n tsun dan ai rai? Hpa rai ngai a makam masham hpe sha kau ai?" nga pawt bang wa nu ai. Jinghpaw la wa gaw shi pyi kaning rai yang she manang wa a shingtawn pan lu di htu sha na kun ngu hpaji naw daw kyin taw nga yang, nta masha ni e shawng gala la wa a makam masham di htu sha kau ya nna, manang wa hpe shanhte n chye ai majaw byin ai lam re ngu grai tawngban kau nu ai. Raitim, gala la wa gaw jinghpaw ndai ni dingsa sa bumga kawn dingtaw taw sa wa nna, ngai a makam masham sa roi ya ai ngu myit n-gut taw nga nu ai. Kraw hta ngai mung shanhte a makam masham hpe roi ya na we ai ngu, madu jan hpe jinghpaw la wa hkai tawn ai magwi tsamat kaw jit sa ji bun shangun nu ai.
Gala num jan gaw yup rawt ai hte madu wa tsun ai hku tsamat hpun si na hku, tsawmra tsan ai kawn buhkrawng shalun la rai, tsamat hpun kaw jit ji bun nga yang, hka nam maga de nna bungli bung ahpyi wa ai hte, gala num jan a dangbau kaw tsamat lap gahtet dat ya ai majaw, gala num jan jit gat she gat rai hprawng gagat wa nhtawm, madu wa hpe wa tsun dan jang, madu wa gaw: "aga, rai dai gaw shade wa ru ai gaw, ya ngai nam sa jang, maidang di gatsut kau ya na we ai." ngu, hpang jahpawt jaujau rawt nhtawm, nta shingdu de sa wa let tsamat nhpang makau kaw nam sa ngut ai hte tsamat lap di gatsut ai nga yang, maidang ting hpawm gaprep gaya machyi mat nhtawm, maidang mahkrit jahpye kau nu ai. Dai hpang kaw nna, gala wa gaw: "nanhte jinghpaw ni a makam masham grai matse ru ai! " ngu tsun dan jang, jinghpaw la wa mung: "re, anhte jinghpaw ni a makam masham hpe n mai roi ai." ngu galaw jahkrit dat nu ai. Tsamat gaba la ai kawn gala la wa gaw jinghpaw la wa hpe grai hkungga shagrau mat let, majan rawt shagu, tsamat nhpang kaw shawng sa naw la la rai u ai, matse ai makam masham e makawp maga lanu lahku gunhpai na hpe myit kam nga u ai.
