Moi shawng de, gahtawng langai mi hta, dinghku la wa gaw marai grai n rawng nna, madu jan gaw marai hpring tsup ai shanla nga ma ai. Dinghku gata bungli gaji kaba ra mara ma hkra ngu na madu jan she woi awn ningshawng u ai da. Shingrai lani mi hta, kasha ni hpe nta kaw tawn da nna, shanla gaw yi hkyen sa ma ai. Shana de nta wa ten hta madu jan gaw yi shingnawm de ju hpun chyahkraw woi hta nga yang, hkaraw maga de na kasha hkai ai tsap kanu langai htim sa wa ai da. Dai tsap hpe mu ai hte madu wa gaw shi num jan hpe kabai da nna, lam she n hkrup hkra nta lam de hprawng dingding mat wa sai. Madu jan chyau gaw ma-ja htim sa wa ai tsap kanu hpe shi hpun hta ai nhtu hte gahtam sat kau nna nta de gun wa u ai.
Nsin sin wa ai shaloi she nta du wa nna, nsen shanyem ai hte "E... Ningwa e, chyinghka hpaw u law." ngu yang madu wa gaw kasha ni hpe "Dai nanhte a kanu n re, nanhte a kanu gaw tsap gawa sat kau sai majaw, nanhte a kanu a numla wa jahkrit ai she rai na re." ngu tsun jang, madu jan gaw: " Kawa e, htingbu ni chye kau yang gaya gahpa she re, chyinghka lawan she hpaw ya marit, nang hkrit la ai tsap kanu hpe ngai gahtam sat gun wa ni ai, ndai tsap hpe mung htingbu ni san jang, nang gahtam sat ai re ngu u." ngu tsun jang she chyinghka hkap hpaw la u ai da. Dai hpang gade nna yang. shanhte nga ai ginwang na sut du langai gaw masha langai shangun dat nna, shi a ginra hta sharaw grai ju nna, shi a dusat yamnga ni hpe shani shingtung e pyi sa garawt sha kau ya ya re majaw, dai sharaw hpe gyam sat kau ya na matu, lama na lu gyam sat kau ai rai jang, kumhpaw kumhpa lawlaw jaw na re lam sa tsun u ai.
Dai shani kaw nna dai hkrit la ai la wa gaw shat she n sha hkra bai myit ru nga sanu ai da. Raitim madu jan gaw: "Dingla wa e, dai myit ru ai baw n re, anhte a matu ahkaw ahkang kaba she rai nga ai hpa myit hkum ru u, atsawm sumru la yang mahtai n pru ai hpa n nga ai, ngu bai n-gun jaw u ai. Dai majaw madu jan gaw tsahte wa a gasa hpe nhtawi ladaw hka dat ya u ai da. Ten nhtoi hka dat ai shani du ai hte, madu jan gaw madu wa hte rau, wa kasha langai mung gun rai, dai sharaw nga ai hkaraw de shang wa nna, madu wa hpe gaw hpun ntsa de lung shangun u ai. shi gaw dai gun sa ai wa kasha hte sharaw hpe hkam da nu ai. Wa kasha nyek ngawi ai nsen na ai hte, sharaw gaw kawsi nga ai hte krak wa kasha hpe htim gamu ai nga yang. mahkam hta chya rap rai nu ai.
Shaloi num jan gaw: "E... Ningwa e, hpun nisa na lawan yu wa rit, tsahte wa hpe wa san su, sharaw hpe chyahkrung la wa ra na i? Shing nrai chyasi la wa ra na i? Ngu wa san yu su." ngu shangun dat yang, tsahte wa gaw: " E. e. dai daram ju nna n shop ai sharaw hpe chyasi she la wa rit." ngu dat u ai. Shing rai sharaw dai hpe sat nna wa ap ai hte maren, kumhpaw kumbpa hte sutgan yamnga lawlaw hkam la lu manu ai da. Dai hpang shaning tsawmra mi na ai hpang gaw shanhte nga shanu ai mung de kaga mung na ni lamu ga sa maden wa ma ai da. Moi prat de gaw ningbaw ningla lata ai hta, nam nga matse labye tsap sharaw hkanghkyi zawn re hpe sat lu ai masha hpe share jaubu shatai ma ai. Dai majaw, dai shara na hkawhkam wa mung tsap hte sharaw hpan lahkawng hpe gyam sat lu ai dai la wa she share jaubu shatai na matu sa shaga masai. Dai shani kawn, dai la wa gaw shat she n sha hkra bai myit ru taw nga sai.
Dai lam hpe chye ya nga ai madu jan gaw: "Dingla wa e, -gun marai rawng na matu shat rawt sha u, dai myit ru taw nga n mai ai, share jaubu ngu ai ni gaw ta lahpum malu nna, yawng a shawng kaw tsap nna, shakrip ga! Anut ga! Htim saga! Ngu nna jahtau u. Dai hpang nang n gwi jang, nam samum kaw lagyim nga ta u, lama majan sum mat jang mung agatsi sha nta de wa mat u, dang jang mung shanhte hte rau hkawhkam wang de wa u." ngu hpaji jaw shadut dat sai. Gaja wa dai la wa mung madu jan tsun ai hte maren galaw nu ai da, shi shawng "Rot saga law! Htim saga law!" ngu marawn jahtau da nna, hpyen ni nga ai maga kagat mat wa nna. lagat hpun langai a ntsa de lung lagyim taw nga nu ai.
Shi a hpang hkan nang ai shawa masha ni gaw anhte a share jaubu wa shawng de rai sai ngu n-gun kaba hte htim gasat masai da. Teng sha wa dai shani na majan hta. tawt lai ai hpyen yawng hpe gasat shamyit kau lu nna, bai nhtang wa let dai lagat hpun shingnip e wa kring sa let shanhte a jaubu wa a lam tsun jahta nga ma ai. Dai shaloi she yup malap taw nga ai kaw na hprang nna, gajawng gaja gashawt di hkrat yu wa ai, shi a dap shawa ni a ntsa kaw hkrat bun nna bai yup malap mat ai raitim, shi a share manang ni gaw: "Oh, anhte a share jaubu wa gaw lamu ntsa hku she chye pyen du wa nga ai, naw yup la u ga." ngu, hpai jau hta jawm hpai let hkawhkam wang du ai shalawi she dum marawng wa nu ai da. Hkawhkam wa gaw nang share jaubu wa woi awn nna, tawt lai ai hpyen ni hpe gasat manga dang kau lu ai majaw, shagrau shaa ai hku nna mungdaw chyen mi hpe up sha na mung du aya hpe shagrau ai hkam la nu ai da.
Ngolala Bum
