CHYINGHKAI NU YAN WA
Shawnghtawk Tsing Pan
Wa a shingteng mying gaw Manam Maran Naw, wa gaw jahkrai ma, nu gaw suthti kasha, wa gaw shingkra, nu gaw mahkawn hkawn sek, sak pyi 14 ning ting gang ma ai. Nu gaw hpang kanu raitim, ba Brang Tawng hpe grai tsawra ai. Bum ga e naw nga yang, Ba jawng prawng grai hprawng ai majaw, nu mung shani tup tup Bahte rau jawng sa lung lawm u ai. Nu gaw Ba hpe annau ni hta pyi loi shawn rai lakawn ai majaw, Ba a kanu kaga re ai pyi annau ni grai kaba sayang she, moi shawng ni tsun dan nna chye ga ai. Wa gaw nu hpe ram ram ku sam ai, nu hpe ga ja shaga ain na ga di. Nu a hpraw nsam gaw shan hpraw nna, yu yang tut nawng asan awan rai, sanap hka n chya tim tsawm ai, hkum gawng shingyan ni n galu n- gadun, nu nu bawk bawk re ai. Annau ni nu hpe prat ting lawngta gadun, lawnghkai hpun ai n mu yu ai, grai sumnung sumdi sari yu rawng dum la ga ai, nu gaw majoi n mani seng breng ai, grai chye shatep ai, shakawn mahkawn hkawn yang, gara hti hkum rai tim laika n yu ai mahkawn ai.
Nu gaw rida maka lata sama mung grai tsawm ai sha n ga, za htu mung grai byin ai, annau ni nu htu ai za palawng, baw chyawp ni tut lu lang ga ai, dai majaw mung wa nu hpe grau tsawra sam ai. Lana de mi ngai jawng na wa yang, nu yan wa annau ni kadai n nga ai shaloi lagu ga-law hkat sam ma ai, ngai lakang baw sha naw du yang nu hkrap let tsun ai nsen na ai. Ngai ntsa de n lung wa ai sha, madat maram yu yang, nu hpe kanu kawa ni nta na dusat yamnga sutgan sali wunli alaw alam garan ya na masa nga ai. Dai hpe wa gaw annau ni hpe hpyen dap de woi mat wa ai shaloi, mayu ni hpe ap da na malai, bai mari la ga nga nna, dut sha kau da na masa nga ai, dai hte seng nna, nu gaw wa hpe myit dum shagu alun ang nu ai, wa gaw mara kaba lu ai tara hkam wa zawn, atsin zim rai nga ai, ngai lawu tsang jawng pyi ngut wa sai rai nna, tsawmra chye myit sumru ai re majaw, nu hpe mung gawng machyi ai, wa hpe mung grai matsan dum ai. Dai shana de ngai Nam-ya hka hkinggau e myit kaji let sa hkrap dung mat ni ai.
Wa gaw jaugawng kaba re, hpyendap na pru wa yang, ma ni a hpaji lam hpe numshawng dat nna n myit yu nna, shi myit lawm ai jaugawng sha gawng mayu nna, tsit lagyi ai bumlang hkaraw nhkap hka shi hka goi sung ai, jahpawt jan pru wa ai hte rau, n-grau grau chyang, la gang, woi ni ngoi shaga wau garu ai, san tsawm ai Nam-ya hka lwi ai, hkauna pa dam ai, rem lu rem sha tim mai ai, gahtawng ting mung makam masham bung ai hte kam ram ai tung, wa di, makyin jinghku ni mung nga ma ai nga nha, Shawnghtawk nam gahtawng de woi wa ai re nga, nu annau ni hpe tsun dan ai. Kaja wa annau ni naw kaji yang, nam shan grai lu sha ga ai, shan chyahkraw n taw n tsang ginhtawng yinam lu ai, chyahkyi hpyi, shannga hpyi chyahkraw ni daw dap hpring ai. Dai shanhpyi ni a ntsa e yup yang lum dik ai. Wa shan gap sa na rai jang nu hpe lagu gahte da da rai sam ai, galoi mung lu sha galaw dat ya ai. Wa gaw hkrit n chye ai, galoi mung shi hkrai nam hkawm ai, jan pru wa ai hte, Nam-ya hka wawra hkran de sanat nsen kadun kadun nga ai galang mi ngoi jang, nu gaw "Ningwa shat mai bai lu re sai." nga ai.
Nam-ya hka ndai hkran e annau ni sa yu dengren tsap nga yang, wa gaw chyahkyi hpe lagaw gyit kau ya rai, sumru hte jinghpa hpa nhtawm, amanu sha ba wa wa re ai. Wa gaw annau ni a share ninghkring kaba re. Wa gaw nga hkwi mung grai byin ai, ginhtawng jawng dat ten e, annau ni hkum ai ten hta, nta ting nam de wa yu jahtuk da ai shara kaw, nga jawm hkwi nna, ginseng seng sha rawt woi chye ai. Shani nu ni shadu ai shat shatmai hte wa galaw ai nga gapung nga gakang ni hte hkru hkru kang kang jawm sha ngut jang, wa gaw yawng hpe jawm hpum shadun da nna, mungga gadun dawk bang ai, kyu hpyi shaman ya ai, nu hpe chyeju dum ga tsun ai, annau ni hpe yu tai mahkawn hkawn shangun yang gashun gashe mahkawn shingjawng ga ai. Nu yan wa a myiman gaw annau ni hpe yu nna, shagawng shana na shata jan zawn tai mat wa ma ai. Nye a prat hta, kaji yang na ndai lamang ni hpe galoi mung malap n lu ai, ya du teng adum marit shingran nga nngai.
Ba Brang Tawng chyawm gaw, jau jau shanglawt lawt mat wa ai re majaw, galoi mung n lawm ai. Wa gaw galoi mung ta gaman n nga ai, manam hte shaga ti pyi pali shit let she shaga chye ai, shi a makau e marai langai lahkawng nga yang, lachyum rawng ai hpaji lama ma tsun hkai dan chye nga ai. Shana shagu hkying matsat hta, wa nta masha yawng n lawm n mai yup kyu hpyi hpawng woi galaw ai, annau ni laika hti ngut jang, wan dap makau e pali shit dung nga ai, wa a makau grup rai jawm dung nna, wa a madat pyaw la ai nam up hpe sharawng shara jawm madat ga ai, wa a nam up gaw, Inglik majan prat, Japan majan prat, Lahpai Naw Seng a majan prat hte shi a jaugawng mahkrum madup kaba ni re, wa tsun ai hta, wa shi gaw jaugawng kaja re nga ai, jaugawng kaja ngu ai gaw, nam dusat umat ni hpe galoi mung n gap sat ai nga ai. Dai majaw, annau ni lam shagu hta magrau grang let teng man hkum tsup sadi dung kangka ai mahkrum madup ni hpe nachying arawng la ga ai.
Ngai naw kaji yang, annau ni a wa daram byin ai kadai n nga na sai ngu hkra, nu yan wa hpe tsawra ai, hkrit hkungga ai, annau ni kam hpa ai hte wa a kasha tai lu ai hpe myit dik myit pyaw dum la nngai rai. Wa wai mat wa ai hpang, wa hpe marit let ga shagawp langai mi hpe lawu na hte maren shagawp da yu ni ai, jawm hti n gun la ga. Wa hpyenla dingsa, myu hpe maga; Daru magam rawng, majoi n- shakawng; Hpung lam mung woi awn, mare bungli mung galaw; Htunghking galu kaba lam, num hpyi gasa shi tai kam; Dinghku lit n hprai, yi sun galaw ai; mung tam; Ashu ashan gyam, ja gumhpraw Shingnoi htingga galaw, gaman n nga taw; Lata amu n tat, gashu kasha mayat. hpe shakung; Nu hpe sadi dung, annau ni Asak bau ai wa, amam hte bung nga; Nu gaw shata jan, wa gaw htoi san jan; Nu shata jan shang mat, wa a shingkang mat; Garen gari tai, nu wa aten wai; Prat nnan gata, annau ni chyu sha; Wa a hkringhtawng galai la, nu a gahpa galai da; Myu hpe makawp maga ai, annau ni nan ninghkring tai na saga ai.
