Shatkan kawsi magang, bawnu grau sumru magang, mumu maimai lusha ni a bat sama grau marawp hkrup lu magang rai nga ai. Dai zawn sha, “Ta Hket” sumru nga nu ai ai. Azuya a kasha, “Ta Hket.” Ta Hket grau kawsi nga nu ai. Shi lusha n mu sha ai lahkawng ya rai sai. Mi shawng e nta langai mi a wang kata na ‘Maihpang si’ lahkawng lagu di sha ai hta lai, hpa mung n mu sha shi nga nu ai. Dai hpang, langai bai di na ngu yang, nta madu jan mu nna matsa dat ai majaw, hprawng mat wa nga nu ai.
Dai num jan lam de pru nna marawn jahtau ai nsen ‘Ta Hket’ gat de du hkra, na kaw na n pru hkraw nga nu ai. Kaja wa nga yang, Ta Hket marawn matsa ai hkrup sha ai majaw sha, gat dut num ni a ka na namsi ni n shaw sha hkrup ai rai nga ai. Ya gaw shi gat kaw du taw nga sai. Shatkan mung, ahkyu nga ngoi nga ai. Gat kata e shi hte chye hkat ai ni nga na kun? Sumru let gahkrang hkawm nga nu ai. Gumhpraw pye mi hkoi na masha mu yang gaw, ngu myit nga nu ai. Gumhpraw she lawm yang gaw myit n kaji dik ai seng madu pyi ‘mani sum rai’ hkaptau na re ai hpe chye nga nu ai. Dai zawn, sumru let gahkrang hkawm nga yang, grai n kam hkrum ai masha langai hte man hkrum katut dat nu ai. Gawla Uk lauban “Da Ba Sah” galu kaba re ai wa rai nga ai.
Ta Hket gumhpraw hkoi lang ai lawlaw hta na “Da Ba Sah” gaw n hkru dik. Ta Hket gumhpraw hkoi la nna tsun da ai hte maren n jaw ai majaw, “Da Ba Sah” gaw tsun jaw, ngu jaw, matsut jaw dik wa rai nga ai. Da Ba Sah gaw Ta hket hpe mu dat ai hte rau, “ha… ha… ha… Ta Hket wa i! ngai tam nga ai salang wa she, rai nga ai. Lai wa sai shata hta “ja denggah (1), de a shawng e gumhpraw denggah (2) hkoi mat wa, ai wa daini chyawm gaw lu la na rai sa. Gara hku ta? Manang wa gara hku law.” Ta Hket grai gaya ai majaw, myiman hkyeng nga nu ai. Hpa mung n chye tsun mat wa ai. Grau nna gaw kawsi dik rai nga ai ten ‘ga tsun chye dik ai Da Ba Sah the, ga shaga na atsam gachyi mi pyi n rawng nga nu ai. “Sorry law, grai hpyi nem ai law.
Gumhpraw pyek mi mung n lu ai” nga, nyam nyam nga tsun nga nu ai. “Ha n lu yang gaw, lu hkra galaw u le.” Da Ba Sah gaw matsan dum ga mi n ga. “Ja denggah (1), gumhpraw denggah (2) sha gaw kaning di tam tim lu mai ai, tam nna lu jang hkoi la ai ni bai wa.” “Tinang a kawa a jinghku mung rai, tinang ra ai ten hta akyu lu ai hpe mung myitdum rai ra ai gaw” nga tsun nga nu ai. Ta Hket bai tsun ai gaw “gammaka gaw ngai hpe kachyi mi pyi n garum ai mi! ngai ganing di chye na na rai?” ngu tsun dat yang, Da Ba Sah gaw, “ha… gammaka hpe gaw mara hkumshagun le, tinang a ra sharawng ai hpe wa n seng n ang ai hpe mara shagun nga yang gaw, galoi mi she gam kaja wa na mi? n kaja ai hkrai hkan nang nga na sha re nga tsun let, gaigai seng de shang dung ga. Ngai nang hpe maumwi langai hkai dan na” ngu tsun let, seng kata de woi shang wa nga nu ai. Ta Hket mung kade gaya ai raitim seng de grai shang mayu ai majaw myit hta kabu, kabu nga let, hkan shang nang mat wa ai. Da Ba Sah seng jut shara mi de woi mat wa ai. Sagu panep langai hpra hte dung ma ai.
Seng madu kau sako mani sum rai du sa wa ai. Da Ba Sah chye ai hte maren n agam hkra shanghkrum lat, he.. hkangse la ngai na matu bainam magyi langai, shan lawlaw, sau hte namsi namsaw, namlaw namlap, muk tawng kaba yawng hkum hkra jahkrat ya rit. Kawsi sai, hkru hkra sha na. Oh… nang nye jinghku wa na matu mung hkum malap, shi na matu gatsi ai hka dibu kaba langai la sa wa ya u. Duhkra ladaw grai sa-up nga ai. Ta Hket grai myit daw mat nu ai. Da Ba Sah bainam magyi sha nga ai hpe hka lu nna dung yu nga ra ai mabyin. Raitim, Ta Hket hpa mung n tsun, tsun na lam mung n nga. Da Ba Sah gaw Kachyi mi pyi n shayawm, seng kata nga ai ni yawng hpe mani let, ta sharawt nna shakram nga nu ai. Du Ba Sah hte n chye ai n nga ai daram mung rai nga ai. Dai hpang, Ta Hket hpe yu nna ga bai tsun hpang ai. “Ul hpa maga de na rai wa ai la langai tsun ai. Ul hpa kaw na sahti langai a nta hta laklai ai nlung hpan myu mi hpe ahpa sha di ret nna, hkawawt chyinghka kaw shakap da ai. Marang htu yang, nhku kata de marang n shang na matu re da. Dai lungpa gaw shinggan de mung asan sha mu lu ai. Raitim nsam gaw ahtoi re ai rai nga ai majaw, hkawawt chyinghka kaw nna mu lu ai nsam mung myu mi rai shai ai. Ta Hket, nang gara hku mu ai. Masha langai a myi hte yu ai hta hpan mi hku sha n re ai kaga hku mung mu lu mai ai ngu nang myit lu ai i?” ngu san yang, “mai byin ai” nga Ta Hket htai ai. Ta Hket a myit hta Da Ba Sah a ga hta, shi a shawng kaw tawn da ai bainam magyi hpe grau yu nga nu ai. “Re… Ta Hket hpa majaw, nga yang, ngai nan mungkan ga hpe jaw ai hku n yu ai sha, nsam hpan hkum ai hku mu ai. Ya ngai tsun na maumwi gaw ‘jaw’ ai hku bai mu la ai nye a mahkrum madup re.” Da Ba Sah maumwi hkai na da law, nga makau grup-yin na ni shada da tsun hkat nga ma ai. Shanhte a sagu panep ni lasa wa nna Da Ba Sah a shawng kaw Waqdi chyen hkrang hku sa dung ma ai. Yawng a ka-ang e gaw Ta hket.
Makau grup-yin na ni a ju gakang da ai bainam magyi gawa makret sha ai nsen ni Ta Hket a na hta tup rai nga sai. Manam pyaw ai lusha ni mung, Ta Hket a makau e tup rai nga ai. Ta Hket chyu sha, hpa lusha mung n lu. Da Ba Sah mung, shi sha ai muk hkyep sha pyi, “sha u” ngu mung, n tsun. “Ya ngai tsun na maumwi gaw” nga tsun let, Da Ba Sah bainam magyi bai makret sha dat ai. “Nye prat shawng daw, Gawla Uk lauban byin wa ai lam re, ngai moi kalang mi hta Siriya mungdan e mayam tai yu ai, dai lam nanhte na yu ai i?” nga san yang, shanhte yawng maumau rai nna n na yu ai ngu ma ai. Ngai naw kaji ai ten, Da Ba Sah bainam magyi kalang bai hta makret dat ai. “Nye Wa a bungli hpe sharin la ai. Gumra daw galaw ai bungli, Wa a bungli galaw let ngai dinghku de ai. Bungli kungkyang ai lam n nga ai majaw, gumhpraw nau n lu ai. Nye madujan hte ramdaw lusha lu ai daram sha re. Raitim, kaja ai hkrai ra ai tinang a shang gumhpraw hte n dep ai hpe hkrai mari ai. Dai ten hta ngai zawn re ai ni hpe gumhpuk shamyawk ai ni hte hkrum ai.
Ya n jaw lu tim, n ra ai, la mat wa u. Hpang e jaw u nga nna hkoi ya shagu la ai. Kaja wa nga yang, tinang a shang gumhpraw hta jan nna jai ai lam gaw matsan tsi gayau lu ai hte bung ai lam n myit dum ai. Buhpun palawng tsawm tsawm re ai ni la. Nye madujan a matu mung mari, yawng hkoi ai hkrai, nnan daw gaw rai taw nga ai. Raitim, hpang e hka n dang waq sai. Hka hkrai waq nga yang, sha na n lu wa sai. Dai majaw, koi hkawm ai raitim mu ai kaw mi hpyi tik tik rai bang wa ai majaw, ngai mung myit htum wa sai. Dai kaw nna manghkang grau kaba wa ai. Dai majaw nye madujan mung kawa a nta de hprawng mat sai. Ngai mung kaga kahtawng de hprawng nna Gawla Uk hte hpaga ga sha ai masha langai kaw bungli galaw ai. Jaw ai mi sha rai, gumhpraw mung n lu re ai majaw, myit ru nga yang grau ai de ngai du mat wa ai. Laknak n lawm ai hpaga la ni a Gawla Uk ni hpe gashun, le kaw gashun myaq sha, htaw kaw gashun myaq sha re ai de du mat wa ai. Nye wa she chye yang baw pyi n shadap gwi hkra, gaya na rai nga ai. Raitim, ngai gaw mungkan ga hpe nsam hpan amyu myu hku mu mada ai pat hte bung nga sai hpe n dum ai.
Nye a prat kade daram htenza nga sai hpe n chye na ai. Damya mya ai shaloi, nambat langai lang tsawmra lu la ai. Gumhpraw ni, lairi sumpan ni. Dai lu mya la ai rai ni hpe “Jiniya” muklum de htaw sa nna dut ai. Lu ai gumhpraw garan la, jai ayai sha, gumhpraw maq jang bai mya hkawm, kalang mi na gaw hpaga la ni hpe shabrai hte garum ai, mare masha ni hte hkrum nna dai ni e rim la ai hkrum ai. Ngai hpe gaw Siriya mungdu langai gumhpraw dengga (2) hte mari la mat wa ai. Kaga mayam ni hpe zawn sha, labu dingsa langai kabai ya ai. Baw krin kau ya ai. Raitim, ngai nau n chye hkrit shi ai, Lani mi gaw lawt na re. Mahkrum madup rai u ga. Hpang e tsun chyai na matu, rai u ga ngu sha myit ai. Nye madu gaw ngai hpe shi a madujan ni marai mali hpang de woi sa wa nna,” “ndai kaw ngai mayam langai mari wa ai.
Nanhte ra yang, ndai wa hpe dawn kau nna jaw da na,” “ngu tsun ai shaloi she, ngai grai hkrit gahpra mat ai. Dai masha ni gaw, grai zing-ri zing-rat byin dik ai ni rai ma ai. Ngai grai hkrit gahpra tim n hkrit ai zawn rai nga nna dai num mali hta matsan dum chye na zawn re ai mi lawm na kun? ngu yu nga ai. “Se Ra” ngu ai num kaba jan gaw yawng hta kachyi mi sak grau kaba ai. Shi ngai hpe yu ai nsam gaw hpa hkamsha lam mung, n mu lu ai. Dai hpang, No. (2) jan hpe bai yu ai. Tsawmra mi tsawm ai, raitim grai raidum ai nsam hpe sha mu lu ai. Gwi langai, nyau langai daram pyi ahkyak n la ai hku rai lu ai. Kaji dik lahkawng gaw woi zawn hkyik… hkyik… hkyik… nga mani nga ma ai. Shanhte ngai hpe dawdan na matu, langai hte langai shada lit jaw kanawng hkat ma ai. Hpang jawhtum, Se Ra grai n kam ai zawn re ai nsam hte “dawn kau sai gaw, anhte kaw grai nga ai. Gawla Uk gawn lajang chye ai langai mi ra ai, nga ai ni mung langai mi pyi lang n mai ai.
Daini ngai Nu hkum n pyaw ai majaw nta naw wa na ngu ai. Gara myam mung kam n mai ai majaw, myitru ai. Shi hpe chyawm san yu u.” “Nang Gawla Uk atsawm chye gawn hkang ai i?” ngu nye madu ngai hpe san ai. Ngai grai kabu mat ai hpe magap da nna, htai ai. Mai sa, Gawla Uk hpe hputdi di shangun lu ai. Kunrai shalun shayu mung chye ai. Daw ni hpe mung gram chye ai, sumtsan hkawm yang Gawla Uk n ba hkra mung chye dun woi ai ngu yang,” “ndai wa hkrak ai Se Ra ga mung asan sha nga chye tsun ai. Gawla Uk hkang na matu ra yang la da u. nga dawdan dat ai. Dai Zawn sha Se Ra a lata de du mat wa ai. Dai shani kanu hkum n pyaw ai majaw, wa gawan ai de ngai Gawla Uk dun nna hkan sa ai. Lam kaw ngai nye lam hkum hkum tsup tsup tsun dan ai. Shangai ai kaw nna mayam n re ai nye wa gaw Babelon kaw gumra daw Gawla Uk daw galaw sha ai Siri sadang hte hkrak re ai gat seng madu re ai, ngu tsun dan ai. Shi ngai tsun ai ga ni hpe madat la nna shi bai tsun dat ai gaw, ngai hpe grai hkra machyi shangun ai. Myityu na lam myit masa hte seng ai lam ni lawm ai.” “Nang hta ra rawng ai lam ni a majaw she, ndai prat de du mat wa ai n rai i? Dai wa mi, na hkum nang mayam n re asan sha re ai re ngu kaning di tsun lu na?” da. “Masha langai a myit kraw kata grit nem ai mayam myit sha rawng nga ai rai yang gaw asan sha re ai madu kaw na shangai sa wa ai mi rai rai, mayam e shangai ai mi rai rai lani mi na ten hta grit nem ai mayam prat de du mat wa na sha re.
Asan sha re ai madu myit rawng ai rai yang kaning re ai gammaka, ruyak tsin-yam ni hkrum sha tim, shi a mare, shi a mungdan, shi a shara hta sari rawng ai masha yawng e hkungga ai madang du hkra shakut ma na rai nga ai” da. Dai zawn rai laning mi jan mayam prat hta nga ai. Raitim, mayam ni hte she nga ai. Shanhte a myit jasat hte gaw kagaga re. Lani mi Se Ra ngai hpe san ai. Shana maga de bungli rau ai ten mayam ni pyaw pyaw rai nga ma ai. “Nang gaw hpa majaw, ginsum e nang hkrai sha, dung nga ai i?” nga san ai. Ngai mung, nang tsun ai ga ni hpe sumru yu nga ai re. Lama na ngai mayam myit rawng ai rai yang, mayam ni hte rau nga na rai nga ai. Mayam myit n myit ai majaw, kaga san rai nga ai re ngu yang, “ngai mung asan sha re ai jan re” nga ngai hpe gahte tsun ai. “Nye Nu Wa ni grai lusu ai, ngai hpe sutgan law law jaw lu ai. Ndai la wa gaw ngai hpe tsawra nna la ai n re. Sutgan marin nna la ai. Num ngu ai gaw madu wa a tsawra myit shingnyip npu e nga hkamsha mayu ai hkrai re. Ya ngai shi a tsawra myit n lu la ai. Kashu kasha mung n lu ai. Nang zawn sha ngai mung dinghkrai sha re.
Raitim mung ngai lama wa la she rai yang, si yang si na, nang zawn rai grit nem dik ai hku sha gaw n nga ai,” nga tsun ai. Ya nang ngai hpe mu mada ai lam, mayam sat lawat hte bung ai i? Du magam madu myit masa hte bung ai i? ngu bai nhtang san dat yang, shi gasan hte sha bai htai ai. “Babelon kaw kap ai hkah ni hpe dingyang waq ngut hkra, waq mayu ai myit rawng ai i?” da. Ngai mung, waq mayu ai. Raitim, waq mung n waq lu ai mi ngu tsun yang. “Jawq waq mayu ai nga nang tsun ai. Raitim, bungli hpe tangdu hkra n kam shakut ai. Dai majaw, ten ladaw ni sha na mat wa ai, n jawq waq lu ai nga yang gaw nang hta du magam myit rawng ai ngu hkum mai tsun u ga le. Mayam myit sha rem da ai ngu tsun ra na rai nga ai. Nang hta tinang hkum tinang manu shadan ai gasadi hpe hkungga ai myit n rawng ai. Tinang hkum tinang manu shadan ai du magam myit rawng ai ni gaw gasadi grin ai jaw ra ai hpe jaw chye ai ni rai ma ai” nga tsun ai. “Ngai Siriya kaw mayam yam nga ai mi kaning di hkah waq lu na ma? ngu tsun yang, “Dai hku nga nga yang gaw, Siriya kaw sha mayam yam nna prat jahtum ai baw sha rai nga ai.
Nang gaw masha shabyak she rai nga ai,” nga tsun ai. Ngai masha shabyak n re ngu tsun yang, “dai nga yang shabyak n re ai lam sakse madun u le” da. Gara hku madun ra na ma? ngu bai san yang. “Nanhte a Babelon Hkawhkam wa shi a hpyen hpe gasat yang, gara hku gasat ai? Lu mai lu n-gun atsam mahkra hte n re ai i? Ya raitim nang jawq ra ai hkah ni gaw, na a hpyen ni hkrai re. Dai hpyen ni shachyut ai majaw Babelon kaw na hprawng pru wa ai n rai i? Jawq ra ai hkah hpe n jawq n waq dingsa, hpyen gaw grau kaba wa na sha re. La jet ai du magam myit rawng ai rai yang, hkah ni hpe jawq waq lu, gasat dang lu na sha re. Dai zawn rai lu ai rai yang, tinang a mare buga hta sari sadang hpring ai hte nga lu na sha re. Ya nang gaw hkah hpe jawq waq gwi ai, tinang hpyen hpe gasat gwi ai myit n rawng ai majaw, gau ngwi ngwi grit nem mat wa ai. Hpang jahtum, Siriya de hprawng pru nna mayam sa tai nga ai n rai i?” da. Shi dai zawn nga tsun dat ai kaw nna nye kraw kata du magam myit grau grau kaba wa ai. Raitim, shi hpe n tsun dan kau lu ai. Dai hpang masum ya daram hta Siriya mayam num ngai hpe sha, sa shaga ai.
Se Ra hte hkrum ai shaloi, “nye Nu hkum grai n pyaw ai, nta kaw nga ai Gawla Uk ni hta na kaja dik ai lahkawng lata la nna hkaq majawq kaba hte lusha lawlaw htaw lang u, sumtsan galu hkawm ra ai. Shatgawk kaw ngai na shangun ma numjan lajang ya na ra ai” nga ngai hpe matsun ai. Gawla Uk hta, rai ni bawn ai shaloi malu masha ni dai daram law ai wa i? ngu ngai myit ai. Se Ra a kanu nga ai shara gaw nau n tsan ai, lani sat sha re. Hkawmsa wa ai shaloi, Se Ra jawn ai Gawla Uk hpe ngai dun ai. Hpang na Gawla Uk hta gaw Se Ra a n chyang numjan jawn ai. Se Ra a Kanu a nta du yang, jan shang wa sai. Se Ra shi a mayam numjan hpe bungli shangun da nna anlahkawng hkrai re ai shaloi she, ngai hpe tsun ai. “Da Ba Sah nang hta mayam myit rawng ai i? Du magam myit rawng ai i?” da. Ngai du magam myit rawng ai ngu asan sha tsun dat yang. “Dai rai yang nang sakse madun na ahkang lu sai. Ya ten hta na madu hte shi a ma ni tsa lu nang jawng nga na daram rai sai. Ndai Gawla Uk lahkawng la nna hprawng sanu. Ndai sumbu hta na madu a hpun palawng man (1) mi lawm ai, dai hpun la nna nsam galai kau u.
Kadai chye yu na n re. Nye madu wa hpe ngai nye Nu hpe gawn lajang nga yang, nang Gawla Uk lahkawng lagu la nna hprawng mat wa ai re ngu tsun kau na” nga ngai hpe tsun ai. Ngai shi hpe nang gaw kaja wa hkawhkam num myit jasat rawng ai myu shayi re. Nang sha myit pyaw na rai yang ngai na a matu atsam htum hkra shakut ya mayu ai ngu tsun kau hkrup ai. Raitim, shi bai tsun ai, “madu wa hpe kabai kau da nna hprawng ai num kaga shara chyasam ni a lapran raitim myit pyaw lam lu na n re. Na a lam nang hkawm sa wa su. Ngai akyu hpyi dat ya na. Nang hkawmsa wa na hkrunlam gaw grai tsan ai. Lusha n nga ai, hka n nga ai, zaibrujang re” da. Ngai mung n lanyan nga ai sha, shi hpe chyeju dum ga tsun kau da nna ningsin hte rau, hkawm pru mat wa ai.” “Hkrunlam gaw ngai kachyi mi pyi n chye na ai hkrunlam re. Babelon gara maga de re ai hpe tak yu nna bum ni nga ai maga de sa wa ai.
Zaibrujang hkrunlam ntsa Gawla Uk langai hpe gaw jawn, langai hpe gaw sumri hte dun rai, dai shara shana tup, hpang shani, shani tup hkawm ai. Madu a sutgan lagu nna hprawng ai mayam hpe bai mu yang, kade daram adup zing-ri ai lam chye da ai majaw, myit hta gaw hkrit gahpra nga ai. Dai shani a hpang shani, shana maga de du wa yang, zaibrujang panglai lai nna bum lagaw de du wa ai raitim, nlung bum lunghkyep lungrawk ni hkrai re ai majaw, Gawla Uk mung lagaw machyi mat sai, lahkru ni gaye rai ai. Raitim, shakut nna hkawm ma ai. Lam kaw e masha mung n hkrum ai, hpa dusat mung n mu ai. Hpa wa mi mu na, hpa mung nga n mai ai shara rai nga ai. Hkawmsa ai ni asak hkrung nna laidi lu ai gaw pyi nga ai kun? Raitim, ngai gaw lani hte lani matut hkawm sa dingyang re. Gau-ngwi ngwi lusha mung ma mat, lu hka mung ma mat. Jahku ya ngu na shanaq ngai Gawla Uk ntsa kaw na ga de yu ai. Dai shaloi, ngai n-gun grai yawm nga sai. Nye kraw kata Gawla Uk ntsa bai lu lung sana kun? ngu myit ai. Masha n nga ai shara hta ngai hkrai sha, si ra sana kun? Myit ai. Raitim, kade n naq yang ga ntsa e yup pyaw mat wa ai. Hpang jahpawt nhtoi san ai hpang she, dum ai. Ngai rawt dung nna makau grupyin de mada yu ai.
Manap ten re ai majaw, nbung katsi bung ahpawt nga ma ai. Gawla Uk mung kade n tsan ai kaw mau nga ma ai. Yu dat yang, zaibrujang hte lungrawk hta lai kaga hpa shingnyip hpun mung n nga ai. Hka mung n nga ai hte shing-ran katsi la dik ai shara re. Nye kraw kata ndai shara hta, nye prat htum sana kun? ngu myit nga yang, nye bawnu kata asan nga hkamsha ai. Nten hkraw gaq machyi ai, shinglet machyi ai, shatkan kaw si ai ni asan sha nga hkamsha ai. Yawng mai mat ai zawn nga ai. Dai ten hta gasan langai nye kraw kata shang wa ai. :Da Ba Sah nang mayam myit rawng ai wa re i? ngu ai gasan mayam myit rawng ai wa rai yang dai shara e myitdaw, asum hkam mat na sha re. Zaibrujang hkrunlam e galau si ai ngu ai gaw madu kaw na hprawng ai mayam ni a htung rai nga ai. Lama na du magam myit rawng ai rai yang gaw, Babelon de du hkra wa. Tinang hpe kam nna hkoi ya ai hka hpe shakut nna jaw wa na.
Tinang hpe kaja wa tsawra ai ningrum ningtau jan hte bai lu nga hkra shakut, ngwipyaw ai dinghku hpe bai gaw de, Nu wa ni myit pyaw hkra rai, nga na ngu ngai myit dat ai. Hkah ni gaw na a hpyen re, dai ni hpe jawq, waq gasat kau, nga ai Se Ra tsun ai ga hpe myit dum wa ai. Jaw ai ngu ngai hkam la ai. Dai ten hta, ngai hpa majaw la n jet ai rai ta? Nye ning-rum ningtau jan kawa a nta wa mat ai shaloi, hpa majaw n hkan woi la ai rai ta? ngu ngai sumru ai. Dai ten hta, ngai lama mi myitdum ai. Moi kaw nna mungkan ga hpe nsam hpan hkum ai hku, n jaw n ang ai hku mu mada ai kaw na pat da ai hpe run kabai kau ai zawn nga asan nga hkamsha wa ai. Ngai myit malai lu ai. Ngai ndai shara hta n si ai. Babelon du hkra wa na. Hka madu ni hpe hkan jahkrum na. Nye a lam ni tsun dan na. Nye a ningrum ningtau jan hte apyaw sha nga lu hkra, bai shakut na. Jawq ra ai hkah ni gaw nye a hpyen raitim, hkah madu ni gaw nye a jinghku ni re. Ngai hpe bai kam hkra shakut ra ai ngu, ngai rawt ai. Hkum gaw gading gadang nga ai. Raitim, myit shaja la nna rawt ai. Gawla Uk yan hpe ngai shaga dat yang nye a nsen krawp krawp nga ai raitim, ma ni na hta grau n-gun rawng ai nsen re hpe shan chye na ai. Myi rim tawn ai kaw na ja rai, ngai hpe mada yu ma ai. Shakut nna rawt ma ai. Bai galau mat ma ai raitim, shakut nna bai rawt ma ai. Lagaw mali ntsa e tsap lu hkra shakut ma ai.
Grai atsam rawng ai yan rai ma ai. Gawla Uk yan rawt lu ai hte Babelon gara maga de ang ai ngu ai hpe tak yu nna hkawm sa wa ai. Hpang daw hta, hkaq mu ai. Tsingdu ni Namsi namsaw ni nga ai shara de du mat wa ai. Du magam myit ngu ai hpe chye na hkap la ai kaw nna yak hkak lam ni gaw hkrit hpa n re. Hparan jasan kau ra ai manghkang she re ngu ngai mu mada wa ai. Jawq ra ai hkah manghkang hpe gara hku jasan kau na ngu ladat tam ai shakut nna hparan ai. Mayam myit rawng ai rai yang gaw, ngai mi gaw hpaji n chye ai, laika n chye ai. Arang n lu ai masha zawn rai n-gun n ja ai nga nna ahpa atang sha rai, prat jahtum si mat na sha re. Ngai dai hku n galaw ai. Babelon de du hkra tak yu nna hkawm mu ai ni hpe san rai lam tam ai hpang jahtum nta de du wa lu ai. Dai majw Ta Hket gara hku law. Ya na a kan kata hpa n rawng ai ten bawnu kaw asan n nga ai i? Tinang hkum tinang manu shadan mayu ai myit n rawng shi ai i? Mungkan ga hpe nsam hpan hkum hkra hte naw yu chyai nga na i? Jawq ra ai hkah kade law yang law jawq waq na, Babelon kaw sari rawng ai masha langai tai lu hkra, shakut na ngu ai myit n rawng shi ai i?” Ta Hket a myitum kata na myi prwisi ni kahte hkrat wa ai. Rawt hputdi dung nna “nang ngai hpe hpaji jaw la ai, grai chyeju dum ai ngai du magam myit hte shakut na ngu myit ai nga tsun ai.” Maumwi madat nga ai ni hta na marai langai mi gaw shi chye mayu ai hpe san dat ai. “Babelon kaw du ai hpang na prat bai gawgap la ai lam naw tsun dan yu rit.” “Byin hkra galaw na ngu dawdan da ai hpang gaw, ladat ngu ai gaw mu chyalu sha re” nga Da Ba Sah htai ai. “Byin hkra shakut na ngu dawdan ngut ai hpang No. (1) hkah madu ni hpe langai hpang langai sa hkrum shaga ai, hpyi nem ai.
Nanhte a hkah ni hpe shakut nna tam waq na loili naq wa yang mung naw hkam sharang ya rit, ngu tsun yang law malawng gaw kabu ma ai. Nkau mi gaw matsa ai ni mung nga ma ai. Daini hta na langai mi gaw ngai hpe tangdu hkra garum ai. Dai wa gaw gumhpraw hkoi shap sha ai “Mar Tun” nga ai wa re. Nye a lam shi san nna ngai Siriya kaw Gawla Uk rem hkang ai lam tsun dan yang, Gawla Uk hpaga galaw ai “Niba Tuh” hpang de ngai hpe sa sa ai. Dai dingla wa gaw, hkawhkam wa a matu Gawla Uk tsawm ai law law mari bang ya na ahkang jaw da hkrum ai wa re. Kaja ngai hkah ni hpe pyek mi pyi n ngam hkra jawq waq kau lu ai. Babelon e baw shadap nna ngai nga lu wa ai. Masha law law e kamhpa ai masha ngai tai lu wa ai.” Ga Tsun htum ai hpang Da Ba Sah lusha de bai gayin yu ai. “He… “Kauk Sakaw grai nabai ai she rai nga,” nga shatgawk e dung nga ai Kauk Sakaw hpe shaga dat ai. “Na sihtu ni yawng katsi mat ma sai. Agahtet sha re ai la sa wa rit. Ndai kaw Ta Hket a matu mung, lajang dat u. Kachyi kajaw sha hkumdi, law law lajang sa wa rit. Nye a manang wa a kasha rai nga ai. Shi mung kawsi sai. Ngai hte rau sha na re. Lawan la sa wa rit. Babelon mungdan na Gawla Uk hpaga la wa a maumwi gaw htum mat sai. Tengman ai machye machyang hpe atsawm sha mu mada chye la ai hpang du magam myit jasat sakhkrung lam de shi bai du mat wa ai. Dai machye machyang gaw moi prat kaw nna myit nyan hpaji chye ai ni chyusha mu mada chye na ai lam rai nga ai. Dai machye machyang e lam madun ai majaw, kyindut yakhkak lam ni hpe laidi lu ai. Du na shawnglam shinggyim prat law law hpe machye machyang a hpung shingkang hte, prat hpe gawgap sa wa lu ai. Dai machye machyang gaw Awngdang hkra shakut na ngu dawdan ai. Tinang nan ladat tam shakut ai. Tam ai wa galoi mung ladat mu ai ngu ai lam rai nga ai.
“The richest man in Babylon” by George S. Clason (Arabian Maumwi)
Latau Seng Awng (Jeyang IDPs Camp)
