LAW HKUM JA DIM

LAW HKUM JA DIM

Yawngba Tang

Moi Law hkum du ni gaw hkarang yi hkyen tawn nna, wan gaw atsawm n ga ai she nre dawng, Yi yinwang nat ai shani, Dan du ni a mada(lup ba) bum de wan sharaw hkru tat dat ma ai, mada hkru ai shaloi she Dan du kasha langai mi gan gahprup gadawng si mat sai. Shing rai nna Dan du ni gaw: "Nanhte Law hkum du ni, yi nat nna anhte a mada bum hkru hkra ai majaw, anhte a ma langai mi gahprup gadawng si mat wa ai shaloi, 'ahte ahte' nga nna si wa ai, nanhte mada nat ya nna re." Ngu tsun ga-law hkat wa yang, Law hkum du jan gaw shut na sai, ra na sai nga nna, mare salang myitsu ni, mung salang, azaw hkringmang ni hpe woi rai, anga mung dun rai sa tawngban ngu nhtawm, numjang kaw ayawn ningtsang tsang nna sa yawn hkrap nga ai shaloi, Dan du wa gaw: "Ya mung dai kaw naw hkrap rau i, nye dai kaw shadawn jit na man ai zawn di (gahtam jahkye) dat na." Nga pawt wa sai da. Du jan woi ai azaw hkringmang, mare salang ni gaw du jan hpe: " Du jan e hkum hkrap sa, sa sa wa mat saga, Dan du wa shing wa mi nga wa ai gaw, htaw htaw nbawng shat lit ni mung hta gun wa kau saga." Ngu tsun nna shanhte dun sa ai anga mung dun, shat lit mung hta gun rai nhtang wa mat masai. Nta du wa ai shaloi Law hkum du jan gaw madu wa hpe ning wa ngu u ai: " E daini kaw nna gaw nang a madu jan n rai na sangai, gai nu jan n rai sangai, Dan du ni a sa-nu sa-wa mang she rai mat sangai." wa ngu nu ai.

Dai ten hta Law hkum Ja Dim gaw ma naw re ai, bai nna Law hkum du jan mung Dan du ni e dai zawn hkap ngu dat ai majaw kasha kaga n shaprat mat nu ai. Law hkum du wa mung myit yawn myit daw nna num kaga bai la rai nga mat nu ai. Shing rai nga nga yang Law hkum Ja Dim lani hte lani gaba wa, lani hte lani myit grau su wa, hprang wa sai. Shi hpa majaw gahpu kanau nlu ai lam gaw Dan du ni nau ja, bum du ni nau ja gumshem ai majaw re lam ni mung dum hprang chye wa nu ai. Dan du ni dai zawn nja n-yak ai rai yang annau ni ja nawng ja gam ja rawng ja bang gade pra na. Adu ni yak, adu ni mung masha ni hpe nau dip sha re ai lam dum hprang myit chye wa sai. Shing rai adu ni hpe shakrip kau ra ai, adu ngu ai n mai nga ai ngu ai myit nna, Adan ga, Danlawng ga, Adan dinghput ga nat wa masai da. Shing rai ndai anhte Shadan ga de gahpu kanau ni kaw gumlau hpyen sa saw hkawm wa sai, shara magup gumlau sa saw hkawm, shi du ai hkan, du ngu ai hpe sat ra sai, mung masha ni hpe nau dip sha ai, nkawn tinghkyi di ga, mam hpai mam tang shadang kadai hkum jaw masa nga nna hkan hkaw tsun shabra kau da ai majaw, shi lai mat wa ai shara ni hta adu ni hpe sat, nkawn tinghkyi di wa, mam hpai mang tang shadang kadai n jaw ai gumlau chyalu shang wa sai.

Nhkum du ni nga ai kaw mung sa du kau da, bai Kumsi du ni kaw sa shang ai shaloi, Kumsi du ni gaw Law hkum Ja Dim a gamoi Dim num wa ai nta re, Kumsi htingnu sa shang ai shaloi: "Moi Dim dung ai lahkum kaw ngai mung dung, moi Dim sha ai shat kinhtang ngai sha." nga nna sa zingri shagyeng nga, du re nga yang hkrit ai majaw gamoi Dim a hkachyi, gali lakan, lahkawn hpun palawng sa shagyeng la rai, lahkawng ning daram sa nga shagyeng la nna bai hkawm sai. Nambang htingnu kaw bai wa shang ai shaloi, gayung ni hpe: "Ngai hpu ngai yung ni e, le ra Kumsi du ni hpe num ya manu, ma langai mi jaw mu." Ngu wa tsun da u ai da. Kumsi du ni mung Law hkum Ja Dim a ga madat nna Nambang du kasha wa hpyi ma ai, dai shani e shi hpu bau mi hpyi u ai, shi abau hpyi ai ga mung: "Na ru sha ai baw mi jaw marit." Ngu wa tsun ai da, ga dai hpe n chye madat ai Nhkum du ni gaw na ru sha ai gaw atsap she re ngu, atsap wa rim dun ya ai shaloi, Law hkum Ja Dim gaw: "Jinghpaw mana gaw Nhkum, u mana gaw ugum, bau lahkawng she hpyi yang." Ngu matsa u ai. Bai nna shanhte mung "Jinghpaw mana gaw Shadan, yu mana gaw magan." Nga htang di bai ngu galaw hkat ma ai da, shing rai, Lunghpum, Nambang, Wura hku mung dai zawn hkan ngu hkawm ai majaw, gumlau shang wa nna, ga-law nga shangun nu ai. Kahkut ga wa shang yang mung adu sat mu ngu wa matsun da u ai, adu la ni ga dai nna ra ai majaw: "Uhku goi yang gaw ahkan sa ai" bai hkan ngu rai, shara magup gumlau chyalu hkrai byin wa sai. Kahkut ga kaw nna gaw Shadan krung Mai mai, Hpuntai krung de bai shang wa nu ai.

Amoi gaw shara ndai ni hkan shani nhtoi hku hkawm ai shara ni rai nga ai. Htingra kawng na Shadan du Zau Doi gaw mayam grai law woi nga tawn u ai, shing rai, Law hkum Ja Dim sa mu nna: "Zau Doi e, mayam nau hkum shalaw, mayam ngu ai nchye woi yang gaw yak ai lu, yi de sa yang, daini gaw sa na nngai ngu tsun dat nna dai shani gaw nsa, hpawtni gaw nsa na ngai ngu ai shani gaw sa rai, ga nmadat ai ni hpe gaw lahpaw hte pawk pawk di sa gap, sa gamai ai baw re." Ngu sa tsun da u ai. Gaja sha Htingra du Zau Doi gaw Law hkum Ja Dim a ga dai jaw nga ai ngu myit la nna, sa na nga ai shani gaw nsa, nsa na ngu ai shani gaw sa rai, mayam sumpum mi gaw du wa nsa na re nga nna, yi wa hta sa yup nga ma yang, adu wa sa wa nna lahpaw hte sa gap, sa gamai di di rai u ai. Shing rai mayam ni gaw du wa e nau zingri satsang ai majaw, ndang hkam sha wa nna, lani mi hta e Zau Doi hpe mayam Hkasha, Yawng Lai, Doi Hka ni e gahtam sat la nna Hpuntai zup kaw sa garawt bang nhtawm, nlung hte dip kau da ma ai. Law hkum Ja Dim gaw Zau Doi wa hpe wa shut sa jashang kau da nhtawm, Shadan krung na Damang Yaw wa Kawng Nawng ni hpe du ngu ai ni hpe gaw sat mu, shakrip mu, anhte mung masha ni hpe nau dip sha ai, nkawn tinghkyi di mu, nkawn hkum jaw sa, yu nga magyi hkum ya, mam hpai mam tang shadang hkum jaw, nlap nailap shadang hkum ya sa, aji aga hkum sa sa ngu aga tsun, wa shut jashang kau da nna shi gaw Law hkum ga de bai wa mat sai da.

Law hkum Ja Dim a ga dai madat nna Shadan krung ga gumlau chyalu byin wa sai, Htingra du ni hpe nat rai Shadan krung na shara nkau na du ni hpe nat wa masai, hpang e Kumhtoi Chyabawk ni a prat hta wa htingram masai. Dai shaloi kaw nna Shadan krung hta adu ni akawn magyi n lahkawn sha mat sai, gumrawng gumtsa tara masa byin mat wa sai. Gumchying gumsa tara hpe dawm kau mat wa sai. Maumwi labau ndai gaw byin mat wa yu ai lam hpe hkai da ai re, ngai laika ka ai wa gaw Kumhtoi Gam hkai da ai hpe shi a kasha ni tip hkwi kaw rim mahkawng da ai hpe 2000 ning hta tip hkwi na htawk ka jahkrat lajang la ai re, njaw ai lam shut shai ai lam ni nga yang sharai la ga ngu nna tawngban dat nngai law.