NGA HPAGA GA AI MAUMWI

NGA HPAGA GA AI MAUMWI

KA LAJANG AI: BAWK TAWNG

Moi mang makoi mayan yang, jahpu nga dumsu ya ai shaloi, dumsa ni gaw jahpu nga bram ai maumwi naw hkai dumsa lawm nga ai. Maumwi dai gaw:amoi lahkwi la ngu ai hte ladang masha ngu ai hpaga la yan marau jumdwi hpaga ga nna, gahtau aja tam ma ai da, shan gaw marau jumdwi gun nna suntsan lam hkawm mat wa yang, ba mat nhtawm hkring sa la na myit ma ai, shinmgrai shan a hpaga rai hpe shawng makoi kau da na myit dum masai, grup yin mada hkawm yu wa yang, walu la-ing langai mi mu nna, hpaga rai hpe walu la-ing kaw makoi da sai da. Mare de wa hkring sa la nna hpang jahpawt nhtang pru wa yang, shan a marau jumdwi hpaga rai n mu tam mat sai. shingrai, hpaga la yan gaw mau let walu la-ing makau hkan hkawm gayin nga yang, nga shu dung langai mi gatsat hkem nga ai mu dat nna, shu dai hpe shan a hpaga rai sha kau ya la kau ya sai ngu shadu bang wa masai.

Shingrai salang shaga manghkang dai tsun bang wa ai shaloi, hpaga la yan gaw shan a marau jumdwi sha kau ya ai nba shu dung hpe she ra ga ai nga nna, nba shu dung dai rim gun nna bai matut hkawm mat wa masai. Lahkwi la hte ladang masha yan gaw gahtawng langai kaw bai du pru wa yang, dada dung nga ai shayi yan hpe bai mu nna: "wawra ga-ang shayi yan e, an hpe mating man naw jaw lu, sinwa hka machyan naw jaw chyu myit! "ngu hka hpyi lu ma yang, dada dung nga ai shayi yan gaw, nhku de wa du lu mu, an da da kyin nga ga ai bai nga ai majaw, lahkwi la hte ladang masha yan gaw: "e shayi yan c, an a hpaga rai nba shu dung hpe ganang da na rai, nanhte a n-grau tang u ra mahkoi sha kau ya wa?" ngu san yang, shayi yan gaw: "adwi dalang kaw dun mu wawra ri dun dahkawng kaw shalun mu, n-grau tang ura mi nba shu dung nchye sha ai. " nga nna hpaga la yan gaw, shan a hpaga rai shu hpe dalang kaw dun kau da nna nhku de hka du lu mat wa masai. nta madu ni a ura gaw dalang kaw dun tawn ai shu hpe mu dat ai hte du shawn shawn rai sa wa nna sa achye sha kau ya sai, shayi yan gaw da maka ka kyin ai nga yang, ura shu hta sha kau ai lam n mu kau dat sai. Hpaga la yan niku de nna pru wa ai htawm, shan a hpaga rai n nga nga la ai majaw, "dai yu le, mi kaw nna u ra mahkoi sha kau ya wa ngu sai?" ngu da da shayi yan hpe "nanhte a u ra an a nha shu dung sha kau ya sai, hpaga aja la kau ya sai. " ngu tsun shara bang wa sai, shaloi shayi yan gaw shan a hpaga rai jahpu wa na ngu yang, kaga gahtau gumhpraw hpa mung nra ga ai, an a nba shu dung sha kau ya ai n-grau tang u ra hpe ra na nga nna, shayi yan mung hpaga la yan a shu sha kau ya ai u ra dai hpe hpai mat wa shangun sai.

Lahkwi la hte ladang masha yan gaw u ra hpai nna bai hkawm mat wa yang, gahtawng langai kaw bai hkawm du sai. shingrai nta langai mi a chyahpung hku lai wa hkrup ai shaloi, shachya maga de nna hkrap nyi hkrap naw nga ai a yawn nsen na dat nna san dat yang, wari nang dingla jan shata gu in ugut gu mat sai nga, nta masha ni gaw hpaga la yan hpe "sumtsan hkawm ai atsa yan e, ya jan mung du mat sai gaw, daina ndai kaw wari nang dingla a amoi naw sin, amang naw rin garum. "nga nna saw masai da. shaloi, lahkwi la hte ladang masha yan gaw:"e hkring chyawm mai na re, raitim, nanhte a wari nang dingla an a hpaga rai n-grau tang u ra hpe mahkoi sha kau la kau ya wa?" ngu san jang, nta madu ni gaw:"wari nang dingla nsoi htum, nsa ngum mat sai, ganing rai nan a hpaga rai sha chye na rai. Htan ai majaw, hpaga la yan gaw dai nta kaw bai manam nga ta masai. Shana yup tung e mang sin ai masha ni yup mat ai hpang, hpaga la yan gaw, shan hpai hkawm ai u ra hpe rawt sat sha kau nna, u mun hpe dawdap kaw sharawn tawn ai wari nang dingla a n-gup kaw matsut anyin shabawng marawng bang kau da ya nna, u mun nkau hpe gaw nhku ting bai gat ayai da masai. Hpang jahpawt yawng mayawng rawt garu mau jawng nga jang, hpaga la yan mung grai mau gajawng masu ai hta n-ga pawt mayu ai nsam hte "dai yu le, mana ayan nhkring sai ngu yang, nanhte she wari nang dingla an a paga rai nchye sha ai nga nna, ya gaw an a n-grau tang u ra ganang rai wa sa! "ngu rawt shara hta bang wa sai, shaloi nta madu ni gaw, shan a u ra jahpu wa na matu, hpaga aja hpa ra mata ngu san yang, lahkwi la hte ladang masha yan gaw an a gahtau aja sha kau ya ai wari nang dingla a moi mang she ra ga ai nga nna, nta madu ni mung ganing nchye di mat ai majaw, jahtum e mang hpai mat wa shangun sai.

Hpaga la yan gaw wari nang dingla a moi mang hpai nna hkawm mat wa yang, grai lusu nga mai ai htangmu mare ngu ai bai wa du, htawngmai mare ngu ai kaw bai wa pru masai da. shaloi lahkwi la hte ladang masha yan gaw jan du wa sai majaw, dai gahtawng kaw manam na myit nna, wari nang dingla hpe gahtawng wadang shinggan na lam kaw sharawn tawn nna, mang ntsa kaw kasen lap hpwi di tawn da, kinla lap lwi di magap kau da nna shan gaw: "htawngmu htawng —mai mare ni e, daina gaw gumra mailak shangang, walawng hkindang shakang mu lu! An wawra mare wadang shinggan kaw chyinghkai wari nang dingla hpe shayup da sai lu. "ngu nna marawn jahtau shana hkawm kau da nna, manam shara tam mat wa masai. Rai yang, shana yupmu yupma e lahkwi la hte ladang masha yan gaw anyan bai shaw hpaji bai rawt daw bang wa masai da. Shingrai shan gaw nta shagu na gumra mailak hkan ginrawn, walawng hkindang hpaw ginrawn hkawm masai da. Shaloi htawngmu htawngmai mare na laring gumra hte dumsu dungsang anga ni gaw yuptung e mare ting prang jawng nga sai, matut nna nga gumra dumsu ni gaw washat tam sha let wadang shinggan de bai hkawm du wa masai, shingrai, wari nang dingla hpe magap tawn ai kasen lap ni sha, kinla lap ni sa maya wa ai nga yang, nga lahkru ni mung wari nang dingla a moimang hpe hkra wa sai da.

Hpang jahpawt lahkwi la hte ladang masha yan rawt yu yang, wari nang dingla hpe nga gumra ni e atsai awai sha gabye achya shamawng kau ya nga la nna, htawngmu htawngmai mare ni hpe "yu mu law, mana gaw nanhte a dumsu dungsang anga laring gumra ni e an a chyinghkai wari nang dingla hpe sha kau ya sai. la kau ya sai, mana de kaw nna, nanhte hpe gumra mailak shangang, waloi wadang shakang ngu sai! "ngu bai hka jawat bang wa masai. shaloi, htawngmu mare ni mung bung lat hka galaw na hku tsun bang wa ma yang, hpaga la yan hpa baw gahtau aja mung nra ga ai, wari nang dingla hpe hkra ai sha kau ai, la kau ya ai manyem loi lang nga she ra, dumsu dungsang a gan she ra ga ai nga nna, htawngmu mare ni gaw shanhte a nga wa-lawng hpaw nna, hpaga la yan hpe gau mat wa shangun sai da. Lahkwi la hte ladang masha yan gaw hpaga awng sai majaw, nga wahpung gau nna nta wa lam kaw hkawm nga yang, hpun hkawng kaba langai mi su nga in lam dung lahta de nna, lam gaang kaw pat rai nda hkrawn nga sai, shingrai hkawm ding yang rai nga ai waloi ni gaw nyawt htingnut mawng gabrawng jawng wa nna, hpaga la yan mung naw mau tsap nga yang, hpun hkawng dai gaw dinghta aga shaga wa sai da.

Hpun hkawng dai gaw wari nang dingla shalaw nna shaga ai hpe hpaga la yan chye na sai, hpun hkawng dai wari nang dingla hpe makoi mayan na lam tsun nna, lahkwi la hte ladang masha yan gaw: "e, jahpu sharut na waloi gaw gawt nga ai, ganing di makoi na rai?" ngu san jang, hpun hkawng dai gaw: "shi hkam baula mahku wa madat nna gabung lahkwi dum nna manawt dingsawt shanum;dup tawng hpe gaw kukdwi mahku madat nna wa dum;sibaw hpe gaw waloi baw yu nna shajaw;ningnaw lata hpe gaw warung yu in galaw da; hkaprep wunla hpe mung anum a wara lap yu in galaw nga;maisau mailaw nampu nampan wa jahkum nna kinsa lap galang ai yu in shajaw;numjang hpe gaw waloi lagaw yu in galaw;karoi hpe gaw wujawm e yu in galaw;wahpang mu in nam wa jung nga sai;lup hka hpe gaw waloi lahkru yu nna htu. . . . . . "nga matsun ga tsun dan ngut ai hte lam dung lawu de hpraw nga gumshut mat wa sai. Lahkwi la hte ladang masha yan gaw wari nang dingla a moi mang hpe jahpu nga lang nna makoi mayan poi galaw ya ai kaw nna, maten daini du hkra mang makoi yang hkan shatup hkrat wa ai htunghking lamang ni gaw, wari nang dingla a matsun ga malai hpe hkan nna galaw hkrat wa ai hkrang rai nga ai da.