GATSHANG MA HPYA AI MAUMWI
Maru Gawng
Moi, Nshawn Wangze shu bum na Miwa htinggaw mi gaw, Shanlung hka hkaraw kawng nhkrem hku ka- ni yi galaw ma ai. Lani mi hta, dai Miwa htinggaw yanla gaw, sak masum ning jan re ma hpe yi wa kaw shayup kau tawn da nna, shanla gaw hkainu hkai tawn ai sa shawt magang mat wa ma yang, shani ting shan a ntsa hku kapun yan ai zawn zawn pyen yan nga ai rai mu ma nga tim, tsing shawt kyin ai majaw, hpa zawn n shadu nga ai. Yi wa hte mung loi mi tsan gang ai re nga yang, ma hkrap ai mung n na, shan yi shawt ngut nhtawm, nhtang wa yang, yi wa nhku ting gatshang hpring gadu nga la sai. Shing rai, nhku gata de kaning di n lu shang ai majaw, tsawm ra tsan ai shara kawn gadu pyen lai nga ai lagat ni hpe tsap mada dat ai shaloi, gatshang ni kasha a shan zen hpai rai hka nam de yan she yan nga ai mu dat nna, "Lamu e, aga e, Karai e, Kasang e, daini ngaisha ma lat hpe hpa rai lagat e hpya hpai mat wa a ta?" Nga marawn jahtau hkrap nga masai.
Dai yanla gaw Shanlung krung bum tsaw Maulai hkyet ngu ai kaw hkrap myiprwi hte marawn let sinpraw de mada yu, sinna de mada yu, dingdung dingda jawm mada yu rai dauyin nga yang, lagat dai ni gaw Nshawn pa htumpa de dingyang sumri dun ai zawn pyen she pyen yan mat wa, kasha a shan hpai lahka nna yu yu lung lung rai kyin bu nga ma ai hpe mu masai. Shing rai, shan yawn hkrap let nta wa nna, hpang shani gahtawng masha, lawu lahta hpunau ni yawng hpe saw ginrawn la nhtawm, gumra lawze shi jan hte malu masha yawng htaw lang rai, lagat yan ai hpe yu nna, Nshawn htumpa de masum ya dingyang hkan mat wa yang, Loi je bum npu Sam gahtawng Nawngbung ngu ai kaw sa du yup ma ai. Hpang jahpawt bai rawt mada yu yang, pyen lai ai lagat nau naw mat sai, matut nna shanhte Nawngbung gahtawng a sinna maga de pyen lai lai re hpe sha yu let hkan hkrai hkan yu wa yang, gahtawng shingnawm langai hta Miwa lauban Chi wa a gumra wahpung wa kringsa nga ai ni hte hkrum shaga ma ai. Dai gumra wahpung wa hkring sa ai shingdu maga de bum tsaw langai nga ai. Shanhte gaw Miwa dai ni hpe nanhte ndai shara hkan hkawm ai shaloi, ndai ginra hta kaning re, kaning nga shiga nna lu mani? Ngu san jang, lauban Chi wa gaw: "Anhte shara ndai hta gumra daw shayu, shat shadu sha rai sa hkringsa ai shaning na na rai wa sai, galang lang anhte wan wut jang gatshang langai lahkawng pyen pru pru re hta n-ga, ndai anhte hkringsa ai bum tsaw de shana nbung n bung ai ten hta, bau dum ai zawn nga wu gadu wa wa re, lagat mahkoi rai kun." Nga hkap tsun dan sai.
Shing rai, shanhte dai bum de tam lung wa yu yang, lagat lamu she nip hkra pyen gamawng nga ai hpe wa mu masai. Yu yu yang lagat dai gaw mungkan hta kaba dik htum ai zawn rai nga ai, ganang hkan masha gade rim hpai hpya sha kau sai mung n chye, ndai lang gaw nli htum hkra she nat shamyit kau ga ngu myit nga ma ai. Rai yang, majoi na hku wan shanan hte sha gaw kaning di n nat sat lu rai nna, myitsu dingla ni hpe hpaji ladat shaw garum na matu san sagawn na myit bang wa masai. Ang shaa rai, Lawhkwi ngu ai mare kaw na hkumhkrang galu kaba, kara ahpraw rai, nhka mun pyi lahkam lahkawng dang galu ai Maru Dumbawng dingla lam lai ai hte hkrum shaga ma nna, tsa chyaru, hpa-lap ni ru jaw hkungga rai: "Aji e, anhte yu bak tsinyam hkrum sha nga ga ai, ndai bum kaw na lagat gatshang, ma kasha langai hpya sha kau ya nga ai law, lagat ndai gaw manu mana kaba nga ai, nang jidwi hte hkrum ai kam kaba rai sai, nang gaw myitsu sak kaba ai hta n-ga, lam hkawm ai mung galu, mahkrum madup mung law ai, anhte hpe hpaji ladat naw shaw garum rit ngu hpyi shawn mayu nga ga ai." Ngu tsun dan sai.
Dai hpang dingla wa gaw, hkawchyang bunghkaw kaba hpe raw tawn kau rai baw masawp yu, nhka mun mayut yu rai nna, shi nhpye kaw hkumba gun ai chyaba lap shaw makyit yu rai ai hta lai nna, nhtu hpe shaman nna jinghkyen yu, wan numhtaw mung jinghkyen yu rai nga ai majaw, Miwa ni gaw yu mau taw nga masai. Jahtum e dingla dai shanhte hpe: "Nhtoi yu ra ai, dai bum na jahtung hpe wa langai, u langai ya mu, bai sa-wa hpe gwi la masum htau ya, dai wa hte u hpe atsawm sha sat shadu la nna nawng jaw ra ai, gwi hpe gaw sat nna dai bum na lagat nhkun hte gade ntsan ai shara hta noi ya mu, sanit ya sanit na rai jang, wan shanan kaba mali shi, masha mung mali shi rai htim nat mu, nanhte ngai tsun ai hku sha n galaw yang lagat nhkun htawra kaning di n lu hpya ai." Ngu tsun dan sai.
Miwa dai ni gaw dingla dai matsun ai hku galaw manu ai hte maren, sanit ya sanit na du jang, dai bum na lagat ni gaw gwi mang hpya sha nna maling de si yat ma sai da. Naw ngam ai ni mung tsa nang ai zawn ndi nda rai pyen shajang nga ma ai, sanit ya shana wan shanan mali shi hte aloi sha lagat dai ni hpe lu nat sat kau ai hpang, gatshang nhkun jawm htu yu yang, lagat nhkun dai gaw nga wala lahkawng masum daram hpum ram kaba nna, lagat kasha gaw gumra lawze jahku kaw lu htaw wa ma ai da. Mateng ya du, Zi, Maru ni gaw dai shara hpe Gau daw, Gai daw ngu gumra gawt ai ni hkringsa ai shara ngu shamying da nga ai.
