NBUNG BRANG
GALE AI: ROI BU
Gaida jan shannu gaw dinghku yakhkak ai majaw, galoi mung shat kawsi nna nga ma ai da. N-gu gaw hpu ja gumhpraw gaw n lu rai, grai tam sha laja let nga ma ai. Lani mi gaw shannu lu da ai n-gu kachyi mi hpe shadu sha kau ga ngu, kanu kasha hpe: " ma e, n-gu kachyi sha rai tim shadu sha kau saga, n-gu wa la su." ngu shangun dat nu ai da. Kasha mung shat gaw kawsi ai hte re majaw, nhku de n-gu wa la nna pru wa ai, kanu kaw pyi rain lu du yang me, nbung kaba gut ahpawt wa nna, n-gu kau mi nbung kaw ahpawt nang mat wa sai. Shadang sha dai poi ayai mat ai n-gu naw hkan magawn la na hkyem nga yang, nbung bung yin kaba bai bung wa ai majaw, shi hpai tawn ai n-gu ganoi ma hkra lamu de poi lawm mat wa sai. N-gu nau shau ma sai majaw, kasha gaw kanu hpe " nu e, n-gu nte sha gaw nang hkrai shadu sha kau nu law, annu lahkawng sha jang nu nang kawsi na hpe tsang ai, ngai gaw nbung madu kaw sa nna n-gu naw hkan hpyi la na." ngu tsun kau da nna, nta kawn pru hkawm mat wa nu ai. Nta hte tsan magang shat kawsi magang raitim sharang nna, hkawm hkrai hkawm mat wa yang, nbung brang a nta kaw le rai sai. Nbung brang shadang sha hpe mu dat jang, nang nhpa rai sa nta? Ngai nhpa garum ra ai lam nga a ni ngu san atik dat jang, shadang sha gaw annu shat hpa n sha nna, n-gu sa hpyi hkrat wa nngai law ngu nu ai.
Nbung brang gaw: "taw na n-gu poi mat ai mung n chye, gara shara kaw re mung n chye re majaw, ngai mung n lu la ya sai, raitim ngai nang hpe n-gu n rai tim lama mi gaw jaw dat na, nang hpa myit nkat ra ai, ngai nang hpe myawkle sumpan jaw dat na nngai yaw." ngu tsun let, myawkle sumpan shaw ya nna bai tsun ai: "nang myawkle sumpan ndai gun nna, ganang du hkawm mai wa tim, kawsi wa jang myawkle sumpan shapyan nyep tawn nna, ngai kawsi sai law ngu jang, dai myawkle sumpan ntsa hta lu hpa sha hpa, nam si ntsin kawn hkawt, myu hkum hkra pru wa na ra ai." "nang sha hkru jang hkum hta kabai kau, ngai sha hkru sai, grai chyeju kaba sai ngu sha tsun dat jang, myawkle sumpan ntsa na sha hpa ni shi hkrai mat mat wa na re." ngu nna bai matsun dat jang she, shadang sha dai nbung brang hpe grai chyeju kaba sai yaw ngu shakram kau da nna wa mat nu ai. Lam tsawmra mi hkawm mat wa jang, shadang sha bai kawsi wa nna, myawkle sumpan shaw la rai, ga e hpyan nyep tawn nhtawm, nbung brang matsun dat ai ga hku matan dat jang, malu masha hkum hkra pru wa ra ai. Shadang brang hkru hkru kat kat sha la ngut nna, chyeju kaba sai ngu ai ga pyi rai n lu tsun yang, lam hkawm ba ai hte, shat sha jahkru kau ai hte re majaw, lam makau na yi hku sumpum hta yup malap taw nga nu ai.
Dai shadang sha yi hku sumpum kaw yup malap taw nga ai ten, shi hpe lagu yu nga ai lagut wa gaw shi lang nga ai sumpan chyagang hte myawkle sumpan galai la kau ya nu ai. Yup hprang wa yang, myawkle sumpan hta hpa mung n nga mat sai hpe mu nna, um, ngai shat kawsi ai zawn bai nga sai, galang naw sha la nna she bai hkawm sana re ngu myit let, myawkle sumpan hpe shawng na hte maren nyep da nna, nbung brang sharin ai hku bai tsun matan dat nu ai. Rai tim ndai lang gaw hpa mung npru wa mat nu ai. Dai majaw shadang sha gaw nbung brang hang de bai nhtang sa wa nna, " nbung brang e, nang jaw dat ai myawkle sumpan gaw, galang sha lu sha na matu she re hka, nang hpe bai jaw kau da na re." ngu tsun jang, nbung brang gaw: "aga, grai na npyaw sai law, hka ya nang hpe jaw dat na myawkle sumpan kaga mung n lu sai, raitim nang hpa myit hkum gaji, ngai lama mi bai jaw dat na nngai." "ndai gaw gumhpraw sumbu kasha re, gumhpraw sumbu hpe nang hpai da nna, nang lu sha mari sha na shat seng kaw du jang, ngai hpe gumhpraw jaw rit ngu tsun let, gumhpraw sumbu hpe yat yat ashun dat u, shaloi nang ra ai daram pru wa na re yaw." ngu nu ai.
Shadang brang mung nbung brang hpe grai chyeju dum sai ngu shakram kau da nna, bai wa mat nu ai. Tsawmra mi tsan ai kaw du wa jang shat bai kawsi wa ai majaw, shat seng kaw sa dung nna, lu sha seng madu ni hpe shat si mai myu langai lahkawng htet da ngut ai hpang, gumhpraw sumbu hpe ya ngai gumhpraw ra sai ngu tsun nna, gumhpraw sumbu hpe yat yat sha ashun dat ai hte, lu sha seng kaw hkrat ra ai daram pru wa sai. Dai hpang shadang sha gaw lu sha seng kaw nna hkrun lam bai matut hkawm mat wa yang, shana shi wa hkring sa ai yi hku sumpum kaw bai du wa nu ai, jan mung du mat wa rai nna, daina gaw ndai kaw hkring sa la na re ngu myit let, shawng lang shi yup malap kau ai yi hku sumpum kaw sha bai yup malap taw nga yang, shawng e shadang sha a myawkle sumpan galai la kau ya ai wa mung dai shana yi hku sumpum dai kaw sha bai wa hkring sa ang nu ai.
Dai la gaw shawng na shadang sha a myawkle sumpan galai la ai hpang kawn gaw, ayat sha shadang sha a hpang kaw hkan lagyim yu nna hkawm nang nga nu ai. Dai shana mung shadang sha gaw hkawm pu ai hte re majaw baw jahkrat galeng dat ai kaw nna gaw yup pyaw dik rai, yup malap mat jang, shawng na myawkle sumpan galai la kau ai lagut wa, shi a gumhpraw sumbu dingsa hte gumhpraw sumbu bai lagu galai la kau ya nu ai. Dai lagut la galai da ya ai gumhpraw sumbu hte shadang sha a gumhpraw sumbu grai bung hkat al, nsam mung n shai ai, dai re gade ashun tim gumhpraw npru wa sal. Dai majaw shadang sha nbung brang hpang de bai nhtang sa wa nu ai. Nbung brang kaw bai nhtang sa wa nna, nhtang hku nbung brang hpe mara bai shagun ai zawn nga jang, nbung brang, maw maw, nang ngai hpe jaw dat ai gumhpraw sumbu gaw galang sha shapraw ya lu ai majaw, nang she bai la kau nu yaw, nang gaw ngai hpe masu ai lahkawng lang rai sai yaw ngu nna, ya kau nu al. Aga, shadang sha e nang hpe gaw grai matsan na dum sai law, raitim ndai lang hpang jahtum hku nna naw garum dat na yaw. Ndai lang gaw masha ni n mai lagu ai daw hkrawng she jaw dat sana re. Ndai daw hkrawng nang hpe lama mi hku nna sha gaw akyu jaw na re, atsawm sha nang a manang langai hku nna lang wa su, ngu matsun nna, shadang sha hpe bai jaw dat nu ai. Shadang sha mung grai chyeju kaba sai yaw ngu tsun tim shi a myit hta gaw ndai zawn re hpun tawng gaw ngai hpe hpa baw akyu wa jaw lu na kun? Ngai mung nchye lang ai wa ngu myit kata e tsun let la lang nu ai.
Raitim nbung brang tsawra myit hte bai jaw dat ai re majaw, hpa mi rai rai naw la lang wa yu na re ngu myit dawdan nna bai nhtang mat wa nu ai. Ndai lang gaw hpa sha hpa mung n mu, sha na hku nrai sai majaw, shadang sha hkrun lam hta grai kawsi let hkawm wa yang, shawoi shi wa hkring sa sa re yi hku sumpum kaw sha bai wa yup taw nga yang, shat nau kawsi ai majaw nlu yup malap hkraw nu ai. Dai majaw waw de gale le de gale rai gadau dagap rai galeng nga yang she, shawng lahkawng lang tup shi na myawkle sumpan hte gumhpraw sumbu galai la kau ya ai lagut la bai du sa wa ra ai. Dai lang gaw lagut la wa mung ndai lang na shadang sha hpe nbung brang jaw dat ai hpun tawng gaw hpa baw di ai baw rai kun ngu mau let, ngai sha pyi naw sa masawp yu na re ngu lagyim sa wa yang she, shadang sha mung shana tup nlu yup malap ai hte hkrak sha lagut mi re, nat mi re nchye, achyang na na re masha langai shi hpang de sa wa ai hpe mu dat nna, grai hkrit ai hte: "ngai hpe naw hkye la marit law!" ngu nna marawn dat ai hte, nbung brang jaw dat ai hpun tawng daw hkrawng dai gaw lagut hpe "puk puk pak pak" nga ngoi hkra hkan shachyut adup taw nga sai majaw, lagut mung n dang yan mat, n dang hkam mat sai re majaw, lagut wa mahtang she shadang sha hpang de hprawng bang wa nna, ndai na daw hkrawng hpe she naw hkring mat shangun u law, ngain lu htang mat sai law, n dang hkam sha mat ni ai law, yahte hkan na myawkle sumpan hte gumhpraw sumbu ngai galai la kau ya ai re majaw, ya ngai yu bak lu sai.
Ya ngai nang hpe bai nhtang ya sana law! Ngu nna tawngban hpyi nyem jang, daw hkrawng dai gaw lagut hpe n byen hkra ti mung lagut a makau kaw naw gaboi gayin taw nga nu ai. Shadang sha hpe shi lagu la ai myawkle sumpan hte gumhpraw sumbu hpe shaw ya kau ai hpang she, lagut hpe pyi daw hkrawng e naw htu ganawng gumpye kau dat nu ai. Lagut la wa gahkan rawt nna hprawng dumbri mat wa nu ai. Lagut la wa hprawng mat wa ai hpang she, shadang sha gaw nbung brang jaw ai myawkle sumpan hte gumhpraw sumbu, hpang jahtum bai jaw ai daw hkrawng re kumhpa masum hpe hpai nna, kanu hpang de du wa nu ai.
