SHAKUM

Matsan shatawng jahpan kaw lawm sai hpawmyi gaida Ji Mai gaw, gasha Gam Shawng yan Naw Ring laning mi na jan sha gahpu Bekyin amyu dakkasu jawng sanpoi awng, ganau gaw Shanghai tatut hpaji jawng sanpoi awng rai, ma lahkawng hpe jawng lung la lu hkra htu na matu, nta kaw na kumshu yi mu shi hte sha lu htu na n tai rai, hkauna pawng kau nna, dai shaning na jawng shang jahpu hte dai shata na shat sha jahpu sha jaw dat rai, shi mung Kawngtung ga de nchyang chyang sha mat wa hkyen nga u ai. Hkawm na shawng e sha, shannu ni hpe matsan shatawng dinghku jahpan kaw bang sai, ma yannau a jawng shang gumhpraw mung loili bang ya masai, raitim, Ji Mai a myit hta, asuya ni gaw lani mi jaw lu tim laning mi n lu jaw ai, ngaisha yan hpe ngai nan bau na ngu myit dawdan la nna, shannu ni hkawm na shawng shana e, mare salang wa hpe aga sa gyau hkrat wa nu ai. Wutdek nta htap masum re kaw, wang grai kaba ai, wang shakum pawt hku chyaba lap, kumba lap, lagoi hpaw ni hkai dingren tawn ai lapran hkan lapu shinglet pan tsat hkai tawn rai, yinam tawng wa nna, lapu shinglet pan ni htoi hkye re pan lap kaw ateng apang sha rai manga bra bra re nampan pu wa sai.

Shatkan hkumpung mi rai ai, hkumhkrang galu kaba de lapran le re mare salang wa-ngan Gam Bung gaw, hkum ahpa in leplep, myiman shan nau n kap rai, matsan yu dum na zawn re Ji Mai shang wa ai hte, nhku de lawan n woi shang wa ai, Ji Mai a lasi ai majaw apyet ai sinda hte sit hpraw ai myiman hpe pyi yu dinghkren kau na daram, marin hpa sai ai myisai hte yu jung nga let: "Hkri Ji, ganing ngu sa wa nta?" "Tsa ba e, ma yan jawng lung mat wa na re majaw, ngai mung myu ga de nchyang naw chyang sha mat wa sana, yahte zuphpawng hpaw yang matsan shatawng dinghku ni hpe asuya ni nta galaw ya na re nga ai, annu ni hpe gaw wang shakum kum ya na re nga sai wa, ngai n dang la sai, lama galaw wa nna gumhpraw jat ra ai nga jang ngai lu bang na gaw n re, nhpa mung asuya hpe kam, nanhte mare salang ni hpe she kam sai law, gara hku galaw na ma tsa ba nang chye ai hku lajang da ya mani." ngu dat jang, Gam Bung a myitum ji Mai a sinda kaw nna sit la kau nu ai.

"Galoi hkawm na rai? Ya ju ya hkye nga ai wa i?" Gam Bung a balen lawm ai zawn re myisha hte yu dat ai hte, Ji Mai pyi shabyi kangkang ngu gum mat nu ai. "Ma yannau hpe bau ra nna gaw e, naw kam da sai ga re yaw tsa ba." "Hkum tsang gaw e, ngai chye lajang da ya ai, htaw nhku de wa dung ga le." "Tsa ba, n dung sai, annu ni hpawtni rawt na saga ai, lit naw wa shajin ra ai." Ji Mai yin rai pru mat wa ai hte, Gam Bung a kraw gata hta: Nshang kaw kyet di pawn la nna... Ngu shi a mayu ai myit shingran lam hta myit jung nga nu ai. Shannu ni bram rai bra mat wa ai shani kaw nna, shada da n hkrum ai mali ning tup rai masai. Mali ning hpring nna jawng pru sai Gam Shawng gaw Miwa mung mungchying sha shanglawt hpyenla la nna Dibyet mungdaw kaba hta nga ai, Naw Ring gaw nampu nampan mawn shatsawm tatut hpaji sharin ai re, shi mawn shatsawm ai nampan nka, nampan shanghkawng, nampan bu ni kaga alak mi tsawm, grau nna sara ni shagrau ai gaw, shi myit shapraw nna galaw ai nampan shingnawi nampan singga du hkra chye mawn ai majaw, jawng naw lung kawn, jawng dat shagu nta n wa ai sha, nampan dut seng hkan bungli hkan tam galaw ai rai, jawng gumhpraw loi loi tam nna, ganu hpe lit tau ya ai wa re majaw, shi jawng pru ai hte, Shanghai myu nampan seng kaba langai kaw na ni e lata la kau manu ai.

Ji Mai ma yan a matu shat gumpraw n tam ra sai majaw, nta buga de manang ni matsan shatawng dinghku rai nna wang shakum pyi kum tawn ya sai nga tsun dan rai, grai chyeju dum ai kabu myit hte, shaning nnan du na shawng e nta du wa nu ai. Shannu ni a nta gaw mare shingnawm de re, nnan shang wa ai lam makau hkan na matsan shatawng htinggaw ni a nta grai grai tsawm nna galaw tawn, ndaw ya hkan gumhpan kum shatsawm tawn ai hku nampan hkai shatut tawn, mare lam hku kawa shalim hte kahkum tum maka ka ai gumhpan kum tawn, shalim makau hku u jawban pan hkye ai, htoi ai, maw ai, ashin ai, majaw ai amyu myu grai hkai tawn nga ai, ginhtawng htawng wa sai majaw, nampan lap ni hkraw hkye wa gajang sai. Ji Mai a myit hta, ngai nta n nga tim mare salang ni maren sha shatsawm da ya na sai ngu, ta dun sadek kaw shingma gun htingba mara htaw rai, hkrawt she nga shi nta lam de hkawm wa ai kaw, shinggan hkan hkawm ang ai ni hte shakram shaga la, mare masha ni shi hpe myu ga jan n lam hkra nna grau hpraw tsawm mat sai ngu jang, shi myi shi sadek htu ai ta hpe yu yu tim, mare masha ni a hta nga jang hpraw nan hpraw jan nga ai.

Shi nta de lai wa ai lam na lagat hpun kaba makau e, ga bum mi bum tawn rai, shi a nta lam pat taw nga ai, gadai nta naw galaw na hkyen kun ngu ta dun sadek hta hpai shalai la nna hkawm wa nu ai. Ga bum lai re kaw nna, lam tup lagat lap ningsa ningnan gahtap gala run bum nga ai, lagat lap ntsa hkan lagat si gatsing ai, hkraw ai, hkye ai htoi ai chyang ai hkrat taw nga ai, hpun ndung de shingkri u ni grai gasu nga ai. Ji Mai a myit hta ngai nta n nga rai, lam gadai n ye ai rai sai, loihkring asan sha ye la na ngu, nta ndaw de lai shang wa nu ai. Nta ndaw ya wang kum galaw hkyen ai shaning she madu wa shi hkrai sengke galau nna n lu hkye la mat sai. Shi naw nga ai ten hkumhkrang grai hkamja ai rai nna, asuya kaw tsi mawan ama hkam gumhpraw n bang tawn ai majaw, ma yannu ni hpe nhpa sha pyi n ngam tawn da ya ai, wang shakum hte chyinghka kaba galaw la na gumhpraw du hkra shi hpe makawi mayang ai kaw bang kau sai.

Madu wa rain si ai shaloi, nnangnawn nawn ai majaw, htugyi nta nawn sharu kau ya nna, asuya ni gumhpraw loi garum ai kaw, shan lu ai hte, asuya kaw bai hkoi jat la rai htap lahkawng e daw re wutdek nta galaw la sai, ma yannau naw gaji ai nga, shakum gaw lamu tsit nsam chya tawn ai, ya masha nga bat n bat mat nna, garen gari rai dung nga ai, dam de lalam shi jan du ai nta ndaw wang de lai shang wa nu ai. Ahku hku ai wuttawng atai hte sha kum ai, lalam mi janjan tsaw ai shakum gaw, Ji Mai hte maren yu tim nkrem la na zawn, ahpa sha kum tawn ya sai, nta ndaw hku aga loi mi wa sharut bang nna n shara ai, lawu maga de aga garai n bang nna, hka hkawng nten kaw den sharawt ai shakum pawt hku, yasai hkyehkye putput rai lim nga ai, ga bum lawu n gam hkan gumlau tsing; wubawng ru, chyingdaw, gaya tsing, jan pani re, ahkri ahkra rai tu hkram lim taw nga ai.

Ja e, le lam kaw bum tawn ai ga bum lama ndai kaw wa garawt bang dat yang gaw hpring na wa, Ji Mai ta htu sadek hpe ntawt e wa shadun kau rai, ndaw e sharut tawn ai ga bum ntsa e sa tsap nna myit u ai. Shi gahpa e gaye hpye tawn ai nhpye na zawsi shaw la rai, ninghkan loi hkye kap mat sai zaw hku kaw shawn dat nu ai, masum mali lang manai gayin jang she lu hpaw ai, nhku gata de htummut bat manam nga ai, madu wa naw nga yang galoi mung dung dung re tingnyang de yu dat nna, ladi nchyan hkrihkri ngu, nhku nhtung maga de sadek wa shadun tawn rai, dat sumri gang dat yang wan chyi sai. Datwan chyi jang myit la ngu nu ai, mali ning ting tawn kau da ai nta, ya dat sumri naw mai, wan naw chyi rai, myit mu let, nta ntsa htap de lung wa nhtawm, madu wa wa tsap nna, lagat si sa di sha ai umyin sumhpa ni hpe yaw chyai chyai re shara de mada dat ai shaloi, madu wa tsap ai shingran prapra mu dat nu ai. Shannu ni a nta man na wang shakum gaw htingbu ni a sun gumhpan daram pyi ntsaw nga ai hpe mu mada u ai. "Sa-wa nang yaw, annu ni hpe si htawng kau da ai, ya ngai hkrai sha ningsha yan hpe bau maka dat sai, myit pyaw nu yaw!" ngu nsen she pru hkra anyam dat nna, myiprui si gatsut let sinpraw hkran maga de tsantsan yu dat yang, Tahkaw hka gaw kawa maling e kum kau nna n mu, Mauhkawng bum de ugum jan mai shingte ai sha mu nu ai, shingrai lawu htap de bai yu wa mat nu ai.

Garawt sadek hpaw nna, mare salang Gam Bung hpe kumhpa na ngu ai panglai nga chyahkraw shabawn mi shaw la rai, dawdap na saboi ntsa e hkra di tawn yu, bai hta lang yu, kraw hta ya ten jan rai n du ai, tsa ba nhpa bungli mi she kyin nga, nta nhku hkan dun ye ngut jang she sa jaw na re ngu, zawsi hte gata ntsa nta gawk ma hkra hpaw tawn rai, dun ye jasan bang wa nu ai. Dun ye ngut nna bai gatsut kau re hpang she, nhpye sadek ni hpe gawk de hta bang da rai, sumpu e gahtap bang da ai sumpan kye kaw kashun magyi maka hpring hkra ka ai Jinghpaw buhpun galai la, nga chyahkraw numhtan hta lang rai, Gam Bung ni nta de sa wa nu ai. Shi shaga shang wa ai shaloi, nta madu jan Hkawn Lum gaw, nau hpum nna busing pyi kan ntsa ganawi n hkap ai zawn di makyit bu tawn, achyun anun rai hkawm pru wa let: "Goi i! Ji Mai e, nde nlaw ning nta she n pru wa hkra wa, anhte gaw nang hpe num htawt wa mat pyi shadu saga ai. Masha ni pyi nchyang bungli galaw tim, gawnyen hkan sha gaw nta wa wa rai ma ai le."

Hkawn Lum gaw mying hte shabung nna shi hpun tawn ai mutmut re Jinghpaw hking gaw tsawm de n rai sai, shat dabyen gyit tawn ai zawn, ke chyum ke bawng rai mat nu ai. "Nyi ba e, ma lahkawng" hpe jawng lung hu nna, hpyi pyi malu mat ai zawn she ngu mat ni ai, maw, ndai gaw sumtsan kumhpa re, ngai nga ai shara hte panglai n tsan nna, nga grai law ai, sha yu u yaw." ngu jaw dat nu ai. "Ma bau kyin ai jan, gumhpraw shama rai, anhte gaw hpa n lu garum, nannu ni kaw nna mung hpa n nga jang gaw, mare masha ni myit n rawng ai hkrai she tai mat sai gaw e. Chyeju kaba sa law, daina ndai kaw shat sha na re, sasa, shat dap de wa dung ga, ngai shat naw shadu jahkut dat na." nta pai maga de shang lawang di galaw da ai shat gawk de shang wa masai. "Nyi ba, ngai gaw sihtu she kut ai, sihtu htu na nhpa nga a ta? Ngai htu na." "Dung nga u, ngai htu jaw na, sumtsan lam hkawm pu ba na sindai." "Yi i, nyi ba e, majoi tsun ai pyi n re, ngai shat n shadu ai mali ning jan sai, ngai gaw ma yan a matu shat gumhpraw tam nna, yup ai ten lai, kaga ten gaw shani shana bungli galaw ai, jak rung ni ganing re shadu jaw yang ganing re sha, kan sha hkru jang rai sai ngu, mu n mu hte hpa n seng, mali ning ting Tungkawn ga wa nga tim, gat pyi n lam yu ai, yahte wa na rai yang sha sa hkawm chyai nngai."

Ji Mai shat saboi makau na lahkum galu garawt sit la nna dung let jahta dan u ai. "Na matsan dum ai law, shade de yak ai wa, ningtsa ni gaw mare salang re, garum hpyi rai na mung n chye i?" Hkawn Lum zau ntsa na hpunhtau kaba kaw dat lagyi sumpu na wa shan joi mi daram re shaw mara tawn, atawng alawng di tawk nga u ai. Shan jahta nga yang, Gam Bung shat dap de shaga nsen na rai, gayau shang wa nu ai. "Aga, hkri Ji rang, grai tsawm mat sai rai nga ai le." "Tsa ba, na gaya nngai ai. Nyi ba she tsawm ai gaw e." "Grai tsawm mut nga ai, saupung zawn rai hkra hpum tsawm nga ai." "Anla wa mi gaw yawyaw hte gawgaw rai nga ai, wa la wa gaw uhka chyang ai sha mu ai re, hihi." Hkawn Lum Ji Mai a man e rai nna, madu wa tsun ai aga hpe n kam madat dik ai raitim asang kau ya nu ai. Num tsawm mu ai la ni a myi ningja hpe gadai magap ya lu ai nrai, shi a madu jan hpe bai mada dat ai shaloi, Ji Mai a siksik sengseng re hkum ngau hpe yu nna, Ji Mai rai mat wa ai shani na zawn, nshang e kyet di la lu taw ngu ai bai myit dat nu ai.

Madu jan hpe ahpum dat yang lagat hpun lung ai zawn nga hkra ba ai hpe myit du shagu, ndai zawn seksek re num hpe atsang awang di hta pawn htawlang chyai na ngu marit wa rai, Ji Mai hpe myi rim di yu dat u ai. "Tsa ba, mare na ni daining gaw nhpa hkai sha nga ma ta?" "Makrat hkai nga ai, nang mu tam galaw mat wa ai shaning kaw nna makrat hkai sai re, yahte makrat di masha hte malut lap gat masha grai tam ma ai." "Ta ba, annu ni a hkauna boi ten tup sai ngu, nta wa ai re, htaning kaw nna ngai mung masha ni nhpa hkai yang nhpa hkan hkai na, ma yan mung shan a matu kan bau bungli lu mat sai majaw, gade n kyin sai." "Rai re sai, na kabu sai. Chye galaw jang nta nga nna galaw tim gumhpraw gaw shang ai, dai re, shinggan hkan na zawn, shata shagu gumhpraw n mu la ai ngu ai sha re, raitim ya nang ma yannau hpe lu bau shapraw kau jang gaw, grai hkyem sa sana hku rai nga ai, ya ten hta gaw gyinshau hkai na matu ahkra garai n du ai, nang hkai mayu jang hkai na di u." Gam Bung mung lahkum langai garawt la nna, Ji Mai a makau e dung bang wa nu ai. "Tsa ba, annu ni hpe nta wang shakum kum ya ai grai chyeju kaba sai, dai re wa, ndaw lawu hku aga n jahpring nna, ndaw ya achyen brang naw lahkyawn taw nga ai." "Ninghtawn rung ni masha tam nna she galaw ma ai."

Gam Bung salik shaw lu let, wanhkut lapran hku Ji Mai hpe yu dat yang, shi a hka numri lap zawn re myikaw mun gaw ahpa ahpraw re myiman kaw, sawi shakap tawn ai zawn kap nga ai, nau hpraw nna, myi lawu e prat langai tu, shabyi hkan ateng apang rai tu ai prat sawm gaw, nbaw shat kaw chyingnam namchyang jahkran ai zawn rai nga u ai. Myi loi wak re kaw myigrip mun semsem rai tu nna, sa mahti apun chyai yu na zawn she rai nga ai. Hkawn Lum shat shadu let kalang lang madu wa hpe yu dat shagu, madu wa a myisai Ji Mai maga de sha ayawn nga nna, simai mawt nhtu shapyen bun na zawn pyi ngu wa nu ai. "Ji Mai, ndai shanam naw ahkyen dat u e, shan chyahkraw hte sihtu htu sha ga." "E law nyi ba, mi kawn ngai galaw na ngu yang me." Ji Mai lawan wan rawt ngoi rai, ganyi ba a ta na shanam hte nshi la nna ahkyen dung nga nu ai. Shaloi Gam Bung rawt nna mayu sharai mahka ahkak let pru mat wa sai. Dai shana, Ji Mai gaw Gam Bung yanla ni a nta shat hkru hkru sha la rai, mali ning jan ting n rawng sai htummut bat waiwai nga ai dawdap kaw, jarung dingsa langai hta la nna, shat gawk na hpun sa shaw la rai, wan wut shamu dat nu ai.

Shi nta wa ai shiga na ai manang ni gaw, nhku she nshang hkra sa chyai ma ai, nkau gaw biya la sa wa, nkau gaw shan chyahkraw la sa wa rai shi du wa ai sa hkalum ma nna, Ji Mai gaw shi la wa ai panglai nga chyahkraw hpe wan kaw gakang ju jaw rai, jahta nga masai. "Ji Mai, ndai lapran gade n sa ra jang, ngai hpe makrat naw sa di lawm yaw." Kaw Hpang ngu ai mying hte shabung nna, shi shawng ga saw hpang dat nu ai. "Nang nang gaw, ngai she saw na ngu ai, shi lama lani nini naw sa la mayu kun ngu rai n tsun ai she re." Ja Ba ta e biya palin hpai tawn nna, tsa loi ram wa ai majaw, myirim rim tawn rai tsun u ai. "Kaw Hpang a di ngut jang nang hpe bai di ya na gaw e, hkum tsang u law." Ji Mai mung tsa loi ram wa nna, du li ai sha na mat nu ai. Shi nchyang chyang hkawm yang, tsa n-gup mi pyi n lu yu mat sai majaw, palin mi lu dat jang baw yinyin ngu mat nu ai. "Sa lu, sa lu, manang jan sumtsan sumwa de nna wa ai re, naw wa mat saga, Ji Mai, hpawtde hkying matsat kaw hkauna sa wa yaw, hka aprawk ai re, nang nawikrat zauhkai mi n lu a?" "Hpa ntsang ra ai, ngai chye ai hku tam hkai nna sa wa na." Ji Mai nta du wa ai hte masha ni nchyang bai saw rai, myit la ngu nu ai.

Manang ni bra mat ai hpang, yup ra, nba hpyi sumpan ni shi gun wa ai galai la rai, hpawtni njang makrat di nchyang naw sa chyang na ngu, chyinghka la kau rai yup mat nu ai. Shaning htum wa sai, Ji Mai a gasha yan nta n wa sai nga htet dat rai, gawnyen du wa tim hpa zawn nnawn, mare masha ni gadai nta makrat di kyin yang gadai kaw sa rai, gumhpraw tam hkrai ma nga nu ai, ma yannau jawng lung ngut sai raitim, num naw la ya, dinghku naw shading ya ra ai bai shai dat shagu, myit ali in chyip nga nga rai, makrat di gumhpraw lu la jang, ndaw kaw aga garawt shatup kau nna wang chyinghka kaba galaw bang kau rai, gasha yan hpe myit nshapu ai sha shangut kau lu hkra ngu shakut taw nga nu ai. Ya shi lu ai gumhpraw hte garawt bang kau tim gaw mai ai re, ta e gumhpraw loi sha pyi ntawn da yang n mai ai ngu, makrat di gumhpraw sawn la na la let, hkauna galau jak lu ai ni hpe aga saw nna hkauna galau kau shangun, gyinshau bai hkai ai, shata mali htum wa de gyinshau di dut sha kau ngut nna, hkauna bai galau masit kau rai hkauka gat kau re hte, jan rawt wa, marang mung htu jang gajawng gaja nga kalang ta htu ru wa wa rai ra ai.

Marang htu wa shagu, nbung hte hpyi, amu hte htem, myihprap hte lam re kaw, asin htu lawm rai, Ji Mai a ndaw ya e ga garawt bang na ngu ai lam gaw, kaga bungli nau kyin rai, hpawtni she hpawtni she ngu shata mali manga shalai kau dat nu ai. Lana de mi na ningrim rim wa ten e, lamu nau sin, ntsa de mada dat tim, "lamu dep na lapren masum sha ra sai" nga ai sagoi ga zawn, samui chyang e gaup tawn ai pyi ram sayang, marang si hkoize made de law nna rut she rai htu ru wa ai, ningna n gau hku hkaya n-gup kaw nna dumhpu pru wa ai hpunlum zawn, hkrat gamang ai marang ntsin ntawt ntsa de she lim wa sai. Ji Mai marang ntsin chyung mat nna ye n mai sai dingye chyahtum hte, nhku de ing shang wa ai marang ntsin ye shapraw kau kau rai, madu wa e si kau da nna yawn ai myit masin kaw mung, marang e tsing hkra ai zawn gatsi taw nga ai ten, mu gung nsen shi a nta ntsa e sha re zawn nga hkra ngoi gapaw wa ra ai.

Ningna n gau hku ru yu wa ai hte, lamu de nna htu bun ai marang ntsin gaw, ahku hku ai wuttawng hte kum tawn nna, aga garai nbang da rai, ndaw ya hku mawru wa ai zawn, hka lam masum mali byin wa sai, marang hka shakum hte ga bum lapran hkan tsim wa sai, aga kya, zaibru law rai, ndaw hku na ga bum agru sharu hkra rai, hka n lu lui pru wa nna hka nawng tai wa sai, hka hpring wa jang shakum gyi chyalu rai sai ngu myit dat nna, nshung si prui nga ai ja, hka gara hku hpaw sharu kau na kun ngu myit nchyi nmu nga let, dathtu sengke jawn nna, marang palawng gaw n lu rai, jawng hpun ngu yang nbung ahpawt in n mai jang; nan e marang prang kaw sengke gawt shapyen pru mat wa nu ai. Shi mare gaang hku lai mat wa ai shaloi, Gam Bung nsen htawn jak kaw lili naknak nga ai mahku hte: "Mare masha ni! Mare masha ni! Daina de na marang nau kaba ai, mawru ru wa na maja ga, marang nsim yang garai hkum yup mat! Marang nsim yang garai hkum yup mat!" nga hpuntang pyi mu nsen hte gayau gaya nga hkra shana nga u ai. Hkanam de nna htu jinghkyen ai marang si Ji Mai a shabyi hkan jinghkyen aprup hkra ai she machyi nga ai, hkring® mi nrai yang hkum ting marang e adup madit kau sai, balakaw sumpan dut ai gat seng kaw du nu ai. "

Aga! Marang shade htu ai kaw me, marang palawng sha pyi n hpun i?" seng madu wa gaw hpunlum kaw tsing kau hkrum ai u zawn rai madi nya mat sai Ji Mai hpe hkap gari dat nu ai. "Marang palawng hpun na gaw she chye law, lu ra nga ai mu, dai balakaw sumpan lahkaw mi dut ya ni, grau pa ai baw yaw." "Nde mi ting mari nna hpa dang di na?" "Ndaw ya magap na." "Nang chyau grai shareng chye ai i, ndaw ya pyi n madit i? Ganing re nsam ra na? Marang ndede kaba ai, na madu wa hpe sa mari shangun u le." "Hpraw ai hpraw ai." Ji Mai balasatik tingsan hte makyit gun ai chyenan shaw la nna, wuisin hku gumhpraw jaw kau da rai, balakaw sumpan hpe sengke e gyit mara la rai, hprang nhtang mat wa nu ai. Nta du wa yang, ndaw ya nhkun kaw hka grai ing nga la sai. Ji Mai sengke na balakaw sumpan shayu tawn, dawdap chyinghka hpaw nhtawm, n-ga na nhtu wa shaw la nna, wa lawng kum ai kawa yan sa gahtam run la rai, kawa wuyan hpe wang shakum baw hte ga bum ntsa e ndi nda di htan tawn, balakaw sumpan hpe ntawt kaw nna tsam mari gang shapyan nyep magap tawn nu ai, nyep ngut ai hte marang ntsin ni balakaw sumpan ntsa e kabu gara rai majaw hte majaw rai ing wa sai.

Ji Mai wang shakum hte ga bum lapran wap ai gata de shang nna, marang ntsin majaw ni hpe wang shakum baw hku htu sharu kau kau rai, ndai zawn re manghkang hpe, hpawtni gaw gara hku nga tim mare salang wa hpe naw sa tsun dan na ngu myit du ai hte, Gam Bung a shi hpe masem ai myisha hte, shakum kum ai mu gaw ninghtawn rung ni galaw ai she re nga ai aga bai shai dat sai, marang nau chyung mat, hkum nau pu mat rai, buhpun galai kau nna, basing hte hkum gayawp kau nhtawm, yupku e galeng sawn rai, myit gaw shi hkun shi lam nga let maja taw nga nu ai. Shinggan de marang hpraw she nga naw htu ru taw nga ai. Ahkup achyang® re samui gaw nta ndaw ntsa hkan kam mara rai wam nga ai. Dai ten na Ji Mai gaw shi hkrum sha ai manghkang hpe gasha yan hpang de shana yu na kun ngu myit ai, raitim nbung na samui mawng hpa shamawng kau sai, sumtsan ga de nga ai ma yannau hpe myit n mai shalaw ai, nhpa byin tim ngai hkam la ai baw sha re ngu, ninghtawn rung de sa shana dan na sawn nna, nhtoi htoi ndawt buhpun palawng galai la rai, chyinghka shingjut kaw matsut tawn ai, madu wa hpe hpai kau ai shani htawng ai jawng chyang kaba shachyen lang rai pru mat wa nu ai. Ninghtawn rung hte nta lapran deng masum daram sha gang hkat nna, shi lagaw lam hkawm hkrat wa u ai. Shi ndaw e du ai shaloi, mu htam gawk de la marai masum ladi hku salik wanhkut lunlun rai, shi hpe hkap yu dat ma ai.

"Du kaba ni, nga ai i?" shi jawng jahtim la nna ntawt e shanat tawn let shaga shang wa nu ai. "Marang ndede htu nga yang, nhpa rai sa nta?" hkum ngau ramdaw galu kaba ai ninghtawn rung up Yang Zai Kang hkap san dat u ai. "Du kaba ni e, htaw nanhte kum ya ai ngai a nta wang shakum gaw htawk di yang, dang rai na zawn re kaw, marang ntsin bai ing wa nna, shakum shara masum mali gaprang ga wa sai. Ntsin loi ing law jang teng sha shakum daw mat na sha re, ngai hkrai ganing n chye di rai, nanhte kaw garum hpyi sa wa nngai law." Ji Mai hkrap hte hkri ngu tsun dan u ai. "Ganing rai nna me marang sha htu bun yang shakum she ga wa kra re re ta?" Yang Zai Kang kam hte n kam gayau nna san u ai. "Nanhte n kam jang; ya wa yu ga le, shakum pawt mung ga kya ai sha nrai, masha ni a hkauna hka hkawng ntsa kaw sha mara mat wa ai, dai gaw majoi gawng tawn ai hte maren sha re, wang shakum daw wa na zawn zawn rai nga ai." nga tsun ngut nna, myi jut hku di pru wa ai myiprui hpe, lata ngaw-ngan hte gatsut let, chyinghka kadun shinggan e tsap nga nu ai. "Daidai, wang shakum kum ai wa a mara rai re nga ai, shi hpe lit la shangun ai bungli mi, hkawt sumpya di she galaw re nga ai." ninghtawn du wa shing nga jang, makau e dung ai ninghtawn ningtau du wa gahtan shanyung tawn rai, Ji Mai hpe yu nga u ai. Yang Zai Kang Ji Mai hpe yu dat u ai shaloi, shi a shan nau n kap ai ta laseng hku woimun rawng rawng rai, shi hpe mada ai myisha gaw malala garen gari re rai jang she, num ga shangap ngu myit dat nna: "Maru wa, sasa, ganing nan re kun, naw wa yu ya saga."

Yang Zai Kang rawt tsap nna tsun u ai. Shanhte mawdaw gawt ma al, mawdaw pat na marang lahkut pyi gagat ai zawn rai hkra ahkut tim, marang e Yang Zai Kang a myi hkrai shingga kau ya ya rai nga ai. Mare kaw lai, Ji Mai a nta de gawt hkrat wa ai lam kaw, ga bum pat nga la sai. Shaloi she Yang Zai Kang gaw ganing nga tim ga ndai nsa dun bang ya ai majaw marang ing ai re ngu, mawdaw jahkring kau da nna, jawng shachyen lang rai hkawm shang wa masai. "Nang ningdi gan magap ai mai nga ai le." ninghtawn rung du yan le yu wo yu rai, marang ntsin gara hku shalai na gahkan tam ma ai. "Ndai ntsin majaw law wa nna kalang ta rut rai shakum htu daw na tai nga ai." Maru wa chyan yu nga ai laman, Ji Mai gata de gum shang nna ntsin majaw langai hte langai bai htu sharu kau nu ai. Chyahkring mi na jan e, balakaw sumpan kaw nna gamang wa ai marang si Yang Zai Kang yan Maru wa a zauhkai hte labu matu madi nya mat manu ai. "Grai hkrit hpa she rai nga ai, ndai lapran nang jinghku nta hkan naw sa machyu su, nta ndai kaw hkum yup sa, marang dingyang shanang nna htu jang, manghkang chye pru wa ai." Yang Zai Kang ntawt de wa tsap nna gayin gayaw rai hkra shara magup yu let shadum u ai.

Ji Mai a ndaw ya wang shakum shinggan de hka hkawng nhkap krung rai nga ai, marang kaba wa jang, matut manawi rai sharut gyi ru wa na tai ai. "Du wa, jinghku ni kaw sa machyu nga yang, lani nini gaw mai ai, ten nana gaw mai na n re, ndai wang shakum kum ai wa hpe naw tam la ga, shi gaw laksama re, ganing di galaw na chye chyalu re." Ji Mai gaw du yan a man e asan sha n tsun dan yang, shan wa mat jang bai san san rai n mai ai ngu, nten jaja tsun wa nu ai. "Mai nga ai, dai wa hpe mahtang san yu nna lajang shangun ga, shi a tatut bungli she re." Maru wa shing nga jang, Yang Zai Kang a myiman e ga na n shang ai nsam pram rai sai, raitim nsadi ai ni gaw n mu ya ai. "Hkri nang san yu yaw, ngai shi a chyenan nambat jaw da de." Maru wa mung ntawt de lung tsap nna, sumbu na chyenan shaw hpaw yu let, laksama wa a chyenan tsun dan u ai. Ji Mai nhku saboi na chyenan hta hpaw la nna matsing la rai, du yan hpe nhku de dung ga ngu saw u ai. Nhku hkan grai sanseng nga ai, hpahka saboi na pat gaw jamna pyi mai shatai hkra rai nga ai. "Gashung la ai, ngai wan naw wut dat n ga."

Ji Mai wan jarung na wan numhtaw hta dinghkrum nna wan wut bang wa nu ai. "Hkri, hkum wut sa, an rung de wa sana re, masha ni sa tam ai nga jang tam gawm rai na ma ai." Maru wa hkan ningdip nna, Yang Zai Kang hpe naw wa saga ngu saw dat nu ai. "Shakum kum ai wa hpe lau tam yu u, mu pru jang shuk ai." Yang Zai Kang a kraw hta ramram hkrit nga nu ai. Shi gaw ninghtawn rung up re hta n-ga, bungli ndai ni galaw shakre wa ai shaloi shi nhkan jep yu kau ai majaw, marang htu nna wang shakum gyi ru wa, nta ndaw gyi ru mat wa re shani, shi lit la ra ai hpe shai dat nu ai majaw, gahtap gala nga nta kaw hkum yup sa ngu tsun u ai. Shan tawm re hpang, Ji Mai laksama wa hpe chyenan gayat dat u ai. "Gadai re?" "Laksama wa e, ngai gaw Myithkrum mare na Ji Mai re law, ngai na nta gaw mare shingnawm lagat hpun makau e re, nang kum da ya ai wang shakum gyi wa na tai nna, du ni nang hpe san nga rai, ya marang ndede htu ai, shakum mung shara mali manga ga gaprang mat wa nga ai, lama kalang ta rut rai jang je la n lu sai, ya garai ndaw mat ai shaloi ganing di sharai la na kun ngu, nang hpe shana ai re law."

"Gui hkyi mi nrai yang gaw e, shakum tsun du jang; ngai mahtang masin lunlun ngu wa nngai, ya du hkra wuttawng hte jahkui mari bang ai gumhpraw pyi n ya ai rai ma ai, mali manga ning ting rai sai! Nang gaw ngai e san, ngai gadai hpe bai san na re? Du ni hpe san yaw!" "Nang lama shakum kum ngut nna aga hpring hkra bang da ya ai rai taw, marang nhtung rawng na re, ya nang shing nga jang gaw na shakum sa run la kau u, marang ndai hku dingyang htu nna ngai nta rawng hkrit wa ni ai, du ni mung ngai hpe htingbu ni kaw sa yup su da, masha ni nta lani lana gaw mai yup ai, lamu nhpawng hpawng sa shamyet shanat nga yang, gadai wa ra na re hka? Wuttawng shakum kaw pyilat n chya nna gyi wa loi ai masa sa ai." "Pyilat mung gumhpraw daw nna mari ra ai re le! Bai nna ngai kum ai shakum gaw laning mi sha ama hkam ai!" gumhpraw shawng bang kau ai laksama wa grau un wa ra ai. "Nanhte gaw grai chye ai i? Nang hpe san jang gumhpraw n lu la ai sha tsun, du ni hpe san jang gaw nang galaw ai re nga, ya ngai gaw lamu hpe san na kun? Aga hpe san na kun!" Ji Mai tsun ngut ai hte, myihprap hte lam, mu hte htem nga ngoi ai nsen, laksama wa na chyalu rai sai. Ji Mai hkrit si wa nna, chyenan la kau rai, nhku na shafa kaw wa hkrit gari dung nga nu ai.

Marang matut manawi naw htu ai, majoi shuu shaing maw ai zawn, lamu shakung ga mat ai zawn, ndaw man na wang shakum chyan mada yu yang gaw layit gang ga kau ai zawn re kaw lani hte lani ga gaprang jat wa nna, ahku mahkan she mahkan kaba wa sai. Ji Mai nsin nhtoi ta latup tawn nna, nta laka kaw yuyu lunglung rai, galoi wa marang e shakum htu sharu kau dat nna, ndaw gyi ru ai lata, nta bai hkan hkawn nang wa kun ngu, masin htukhtak let, nchyi nmu nga, lamu lawan hpawng na sha myit mada nga u ai. Dai re, lamu gaw shi hpe shala ai zawn, marang htu ai grau chyit she rai, ndaw pru na pyi jamjau wa sai. Shi hkrai ndai zawn myit pu taw nga yang masin salum pyi gapaw ga wa na daram hkrit si wa nna, ginwang de nga ai ganing hpe chyenan gayat dat nu ai. "We, gadai rai wa sata?" "Ning Ja, ngai Ji Mai re, gaja nga ni?" "Ji Mai kun? Ya gara kaw rai nga ndai rai?" ganing Ja Ba atsang arang ngu san u ai. "Ning, ngai nta kaw re, nang hpe wa jahkrum na ngu ai, ten nrau hkraw nna, lani hte lani nga shalai taw nga nngai." "Nchyang chyang n sa sai i?" "Ma yannau jawng lung ngut nna, n sa sai, ngai hkrai sha na gaw nta ga galaw tim n ma sha na re ngu wa mat ni ai." "Mai re nga ai, nta ga nga tim galaw sha chye jang gaw hpa she ndang sha na re, rai sai, rai sai." "Ning Ja, ngai pyi nang hpe grai hkrit let chyenan gayat ai re law."

"Nhpa tsun na? Ngai sharo gaw nrai, hpa ngu hkrit na rai?" "Ngai pyi yahte tup marang htu nna ndaw ya gyi wa na zawn rai, tsun dan yu ai re." "Mare salang ni hpe lawan shana dan u le, manya manya nga nna me." ganing gajawng gaja nga wa jang she Ji Mai ndai lapran byin ai lam ma hkra shali dan u ai. "Dai ninghtawn du wa a chyenan nambat tsun dan rit, ngai naw tam yu n ga, matsan mayan nga nna mi, ngainam wa she n nga mat yang, hpa zawn nnawn ai she rai re nga ma ai." Ninghtawn rung masha marai masum hpahka tsing lu let, marang e gayawp kau ai htap lahkawng re rung nta na npu gawk hta, wanhkut lunlun rai, marang htu ntsawm ai, mawru ru wa rai yang manghkang kaba pru na re nga jahta nga ai kaw, ninghtawn rung du wa a gyenan ngoi pru wa ra ai. "We, gadai re?" "Ngai gaw htaw Myithkrum mare na Ji Mai a jinghku re, shi ngai hpe marang nau kaba nna ndaw ya gyi wa na tai ai nga tsun dan ai majaw, nanhte hpe chyenan gayat nna garum hpyi ai re ai." "Ma-hpawt sha sa yu sai, ndaw ya kaw balakaw sumpan magap tawn sai, shi hpe nta kaw hkum yup, htingbu ni, jinghku ni kaw naw sa yup na hku mung matsun da sai re." ninghtawn rung du wa a bawnu hta hprim rai myit du ai lam gaw, shi hte shaga ai masha dai hpe she myit nsu shadu wa nu ai, Ji Mai hpe matsan dum ai rai yang; nang nan sa yu gawan na gaw nnga ai mi, chyenan sha gayat nga i ngu myit u ai.

"Du wa e, nanhte gaw mare masha ni a ganu gawa hte bung ai, matsan mayan re ni hpe ga lahkun langai lahkawng hte sa shaga yang; hkrit garen myit shamai ya lu na re, shakum kum ai wa hpe san jang gaw, shakum laning mi sha hkam ai re ngu ai da, gumhpraw gaw n jaw re majaw, shakum kum ai wa mung grai pawt ai da." "Sa yu saga ai, ganing chye di na, shakum mung daining gaw mali ning tup sai, mali ning du tim ndaw jang gaw ngang ai ga rai sai. Bai nna shakum kum ai wa hpe anhte n mu tam sai. Marang htu jang yawng mayawng asuya hpe hkrai tam yang, anhte gadai hpe tam na re ta?" "O, du kaba e, mu galaw ai ngu ai gaw shatang du du galaw ai re, nanhte gaw laning nining sha hkam na hku galaw ai i? Ji Mai zawn matsan htinggaw kaw jahpan lawm ai gaida gaina ni gaw maru mayak hkrum yang ganing di na rai? Dai shakum kum ai wa a chyenan gaw Ji Mai lu ai, shi gayat yu sai da, shi hpe she nhtang de asuya ni gumhpraw n jaw ai nga pawt ai da!" Ja Ba a mahku naknak nga ai la mahku shaga nsen hpe, ninghtawn rung du wa n re ai hku myit lu nu ai. "Nanhte jinghku shada gawnhkang hkat mu le, anhte hpe sha mai kam ai n re.

Gadai mung masin machyi la mu, asuya ni gumhpraw n lu ai, ganing n chye di lawm ai." ninghtawn du wa a myit hta, la ndai gaw Ji Mai hte se sha ai sanga rai nhten ngu, ga pyi n kam shaga shakre mat nu ai. "Du wa e, nanhte asuya ni gumhpraw n lu ai gaw nga, gat baw gat htumpa hkan magui sumla sen masum mali nga ai gaw htawm jaw shadun tawn, dai Ji Mai gaw gaida ai hta n-ga, gasha yan nta n nga ai, ma Gam gaw Dibyet ga de jarit sin hpyenla la ai, Ma Naw gaw Shanghai ga nchyang chyang sha ngà ai, chyahkring chyahkra nta n lu wa ai, shi gaw nanhte hpe she ganu gawa kam hku kam nna tam ai re, shi masin gahprap ana ma lu ai, nanhte myit sha pyi..." "Ngai lamu n lu pat ai, marang gaw shi hkrai she htu ai, nanhte shada yu tsang hkat mu! Anhte grai kyin nga ga ai! Tawn sai!" ninghtawn rung du wa chyenan la kau nu ai. "Du wa, la dai a mying hpa ngu ai, gara kaw na re naw san yu na wa mi." Maru wa maumau rai tsun dat u ai.

"Hpa wa mi chye rai na, num ni hpe yup gaw yup, gumhpraw gaw n kam shaw re la chyangaw rai nga ai mu, chyenan gayat ya na myiman naw rawng, gaya n chye ai hpaze gawng!" du wa n re ai maga hku hkrai shadu nga nu ai. "Hkum nga law, Ji Mai a jinghku ni ginwang daw hkan asuya bungli galaw ai masha law re ai, anhte hpe chyenan gayat gui ai gaw, yu maya masha n rai na re, naw san yu ga." Maru wa shing nga jang; ninghtawn du wa a myiman kalang ta mut mat nu ai. Shi a bawnu hta ninghtawn rung up galaw nna, mare masha ni a yakhkak lam n hkaja ai ngu, ginwang rung de shawk dat yang; shi a ninghtawn rung du lahkum shamat na hkrit nna, lamu de loi mi dawng yu nhtawm, "daina de naw sa wa yu ga" nga tsun let, ntawt e chyenan sa gayat nga nu ai. Marang nau ahpraw nna, shi nhpa tsun ai re Maru wa n na ya sai. Shana de na rung shang ten tup e, Ji Mai ganing Ja Ba hpe sumla hkrung dem shalai dat ya u ai.

Ja Ba gaw wuisin kaw la marai masum muga gan® shara ai mu nna, la dai ni nhpa sa galaw ai re ni ngu san dat jang, Ji Mai tsun dan ai: "Daihpawt nang chyenan gayat ai nga nna sa wa ma ai da, ngai hpe daihpawt chyenan gayat ai gadai la wa re ni nga san ma ai, ngai gaw ginwang asuya hkaw shabra dap na nye ganing re ngu yang, shanhte loi pyi n kam ma ai, grau nna ninghtawn du wa gaw: Ngai hpe chyenan gayat ya ai masha gaw la nsen nannan re, ganing rai num rai na re ta, nang sumtsaw lu sai n re ni nga nna san jang she, Maru wa mung nang na ganing hpe chyenan gayat nna, shi chinwang rung de chyenan gayat ya jaw sai nga bai tsun rai, shada mada yu hkat let, myiman nsam mung kalang ta dap gat bun ai zawn mut mat manu ai re." Ja Ba gaw wuisin na Ji Mai tsun bang ai lam hpaw madat let, mani dung nga nu ai rai.

Hpan Ja