NAMSI LAUBAN WA A SHABYI BYE MAUMWI

NAMSI LAUBAN WA A SHABYI BYE MAUMWI

MA JA

Jinghpaw bumga namsi namsaw nnan hkai sha chye wa ai ten hta, Shadau Helet ngu ai shadang la wa gaw, num la rai kun mayaw htinggaw de ai shani kaw nna, lagawn lamawn re lam n nga ai yisun kauna galaw shaja let, tinang a kun dinghku hpe sutsu nga mai wa hkra ngu shakut taw nga nu ai. Shadau Helet htinggaw yan gaw masha ni hta grau nna laklai hkra lusu lu jat nga mayu ai myit rawng ai majaw, atsam ma- rai ladat shaw rai namsi namsaw hpan kaw na manu lu, sha yang mu la ai lwidwi si hkai na hku myithkrum da sai, shing rai shan gaw tinang a mam hkai ai hkauna pa hpe hpyet kau nna lwidwi si hkai shalat bang wa masai. Hkai shalat ai shani kaw nna shan htinggaw lagawn lamawn n rai ai galaw lajang nga sai. Ndum shami shaning manga kru ning du wa sai hte maren, shan a lwidwi hpun mung lani hte lani kaba tsawm wa ai hta n-ga, pu pu nhtawm lwidwi si si hpang wa sai majaw, kabu pyi n dang yup pyi n lu sha nga ma ai. Shan myit saku da ai lam gaw namsi dut lajang la rai, buhpun palawng tsawmtsawm htaphtap mari buhpun nhtawm, shat lusha mung mumu maimai mari sha rai nga na hku myit da nga ai.

Gaja wa yaw shada da ai hte maren shan a kun dinghku mung namsi laning hte laning lu dut lajang la ai kaw hkan nna, lani hte lani rai nga pyaw wa nga ma ai. Shing rai rau mare gahtawng na masha ni Shadau Helet htinggaw shanhte a myi hpyi gata e laning hte laning rai sutsu nga mai wa ai lam hpe mu nna, nkau gaw hkan sharin la rai lwidwi si hkai hpang wa, nkau gaw n hkai sharin ai hta n-ga, manawn masham let lwidwi si lagu hkrai lagu sha ya satsang ai masha mung law law nga nga ai. Masha sin nga jang lagu lagut n rai u ga ngu shan gaw namsi sun kaw ginsum langai sa gap galaw rawng rai, namsi sun sin yu tim, lwidwi si myin kung wa ai ladaw shagu laiwa laisa masha ni lagu sha ai lam gaw dingyang sha arai nga ai. Yinwang kaw u gawn tim shani shana naw masat ai, rai yang lwidwi sun sin ai Shadau Helet htinggaw yan gaw shani mung sin, shana mung sin rai yu tim, lwidwi hpun na lwidwi si yawm mat wa dingyang rai nga ai, ten na na namsi sun chyu sin nna hkamja lam n nga wa nga ai sha n-ga, shaning shanang na lwidwi si gaw lagu sha kau ya ai she malawng mat mat re majaw, masin she gapaw na daram pawt mayu nga ma ai. Grau ai gaw shan a dinghku lani hte lani sutsu wa tim, namsi lagu sha ai mare masha ni hte chyu ga-law pawt hkat re nga yang, jinghku jingyu lani hte lani tsan mat wa, makyit mahkai ai lam mung gaungwi ngwi yawm wa rai, Shadau Helet grai myit shuk taw nga ai.

Ma kaji ni hpe hkap gayat yat rai yang mung kadai n re ai jinghku ni a gashu gasha bai lawm lawm rai, shabrang wa-ngan ni hpe shan htinggaw krai gamu ahtwi mung n dang, sak kaba sai gumgai dingla ni hpe aja awa pawn hkindit gaw nhtuk rai, shan a lwidwi sun hpe grai sin sha laja yak dum nga masai. Shadau Helet ladat gade shaw yu tim laklai ai masa n lu myit shapraw ai majaw "Kaning nchyum a wan hpunjum magra" nga ai hpa, lani mi na nhtoi hta madu jan hpe ahkyak dik ai ladat langai mi lu myit shapraw se ai ngu tsun dan sai, madu jan grai na kabu let lawan she tsun dan yu rit nga la ndawt madat taw nga sai, shaloi Shadau Helet gaw mayu sha sharai kau hkra rai: "Daining na lwidwi si kung myin wa jang, sun gumhpan gahtam je malawng kau nna lagu sha kam ai hte lagu sha mu ga, bai laiwa laisa masha ni lwidwi si n shang di sha ai ni hpe chyawm nhtang de shabyi galang lang bye ya na hku dawdan sangai." Nga tsun dat ai hte madu jan na pawt mayu ai hta n-ga, mani mayu, na gajawng taw nga nu ai, loi kring ai hpang madu jan gaw: "Ala nang daini awaw waw baw machyi lai nna, aga abrawp wa ai wa nrai nni e? " Nga tsun let madu wa a gahtan sa masawp dat ya rai jang, madu wa gaya pawtpawt let madu jan hpe ganawng marawng kau da nhtawm, nhtu sha ret hta hpai rai lwidwi sun gumhpan sa azat galang shamawng kau bang wa nu ai.

Shadau Helet lwidwi sun gumhpan gahtam malawng kau ma ai hpang kawn, madu jan shi hpe shaga mung n shaga, lwidwi si ni kung ten du wa magang madu jan gaw madu wa hpe nju pawt mayu magang rai, nau yawn pawt nna hka bra mat na pyi grai lagu myit kau nu ai. Lwidwi si man- gai ngai wa ai ten hta, lani mi na laban kru ya nhtoi hta, shawoi lwidwi si lagu sha masa sai mare na ma ni, shada bawng gin- rawn la rai, lwidwi sun de sa wa ma yang, shawoi kum shachyip da ai sun gumhpan asan awan rai, masha mung nsin mat re majaw, grai kabu let lwidwi si shang di la hkyem bang wa ai shaloi, sun madu wa namsi hpun shingdu kaw tsap yu nga ai hpe mu gajawng dat ai hte, galang ta jahtau let lam she nhkrup hkra rawt hprawng gagat mat wa ai hte rau, sun madu wa mung chyahkyi shachyut sat she lang hkra rai, ma dai ni hpe rawt shachyut mat wa sai, shachyut dep ai hte ma dai ni hpe magra gayin la nhtawm shabyi galang lang bye dat ya nu ai, shaloi ma dai ni gaw: "Anhte pyi garai n di sha yang hpa rai anhte hpe bye ai rai?" Nga machyi sharang hkrap let ga htan ai shaloi, sun madu wa pawt ahkre let tsun ai: "Daini kaw nna gaw, ngai a sun kaw lai ai masha ni, kadai wa namsi n di sha yang kadai hpe shabyi bye ya na, dai majaw nanhte mung lawan sa di sha mu, n rai yang shabyi bai bye jat jaw na." Nga ai majaw, ma dai ni myi gaw lele rai shada ngai nang hpe yu, nang ngai hpe yu, sun madu wa hpe bai yu rai kam hte n kam gayau, kam ngu yang masu na shadu, n kam ngu yang mung shabyi bai bye ya na hpe hkrit rai myit ung-ang tsap jawng taw nga yang, sun madu wa lagaw she hkindit hkra: "Ya mung shabyi naw ra nga mani?" Nga jahtau dat jang she, ma dai ni hkrit ai hte hkrap ai hte rai, namsi sun de nhtang shang nhtawm lwidwi si langai ngai hpra di ashun la rai nta de gagat wa mat masai.

Bai yi sa nna wa ai la langai mung, daina de ndai daram pang gara si ai gaw, salang Helet wa a lwidwi si lahkawng masum dang wa gan di sha ya na re ngu lagu myit da let, lwidwi sun hku lai wa yu yang, shawoi hpun kawa ju hte baili baila rai kum da ai gumhpan shadang hpa mung n nga mat ai hta n-ga, masha sin ai mung n mu rai, wa mau la jin nna, la ndai mahkam kaning re hkam da sam ai, n rai yang sun gumhpan pyi azat shamawng kau hkra gaw n rai na re ngu, gade sha mayu tim, hpang gara ai sharang let lai mat wa yang, sun shingnawm kaw hkawm du mat wa ai shaloi, sun madu wa agajawng sha lamdung lahta de htim gahkan pru wa nna, la dai wa hpe shabyi chyan bye dat ya nu ai, shaloi la dai wa myiman she hten hkra rai: "Lasa sa-wa nang gaw manang wa hpa pyi n re ni hpe me atam bye ai gaw, gara masa hku rai nga nta?" Nga pawt ninghkap wa jang, sun madu wa gaw yi sa ai la wa hta pyi grau nsen ja hkra: "Ngai na lwidwi sun hku lai nna hpa rai namsi n di sha a ni? Daini kaw nna, namsi myin kung ai ten hta ngai na lwidwi sun hku lai ai ni namsi n di sha ai ni yawng hpe shabyi galang lang bye na, matsing da mu." Nga jahtau grang wa ai hpe mu jang, yi sa la wa gaw myit hta grai pawt mayu ai raitim, lai wa sai ten hta mung, galang numrang di sha yu sai, ya kaw nna hpang de gaw n lagu ra ai sha mai di sha ai nga ai hpe bai na kabu rai, pawt mayu ai myit hkoi mat rai, kabu sumsai hte namsi mali manga di hpai rai madu hkrai lagu mani let nta wa lam de hkawm mat wa yang, mare shingnawm kaw maren lwidwi sun galaw ai la wa mung ta kaw lwidwi si mali manga hpai rai dung sa nga la ai hpe wa mu nna: "Ya hkau nang gaw gara de sa nna wa a ta? Nang a namsi mung kung myin wa sai rai nga ai le." Ngu tsun jang, dai la wa gaw: "Hpa myin n myin hkum sa gazik yu, daini Shadau Helet wa sun kaw lai wa yang, ngai hpa namsi pyi n lagu sha yu ai wa hpe hkap htim bye ai hkrup sha nna mau nga nngai, ngai mung lwidwi sun lu ai, shi a namsi ngai galoi n lagu sha yu nngai ngu tsun yang, shi a sun kaw lai nna lwidwi si n shang di sha ya ai majaw bye ai re nga tsun u ai, ngai gaw na mani mayu ai hta n-ga she yu matsan dum taw mat ni ai, masha ni shi a namsi nau lagu di sha ya satsang nna, yawn pawt mana bu mat sam sai ngu grai pawt mayu ai masin hpe dip sharang kau nhtawm, wa dung sa sumru nga nngai." Nga jang, yi sa la wa mung shi a hkrum sha ai lam tsun jahta dan rai let mare de du wa yang mung, mare masha nkau Shadau Helet wa a shabyi bye hkrum ai lam hkrai jahta mani chyai rai nga ma ai.

Hpang shani mare masha ni teng ai n teng ai lam hpe dinglik yu na matu, masha nkau hpe sa chyam yu shangun ai shaloi, nhtang wa tsun dan ai shiga gaw: "Mare salang ni e, Shadau Helet wa teng teng dai hku she hkap taw nga ai law, namsi sun lu ai ni mung shi a sun kaw sha lai wa jang gaw namsi nan shang di sha ya ai da." Nga teng ai lam wa tsun jang, dai mare masha ni gaw atsawm sha myit sumru yu rai, lagu lagut rai manang wa a rai lam ntam ai magawn n mai la sha ya nga ai nga mahtai jawm lu la nhtawm, mare salang ni nan Shadau Helet wa kaw sa nna: "Lwidwi si lauban wa e daini kaw nna nang mung laiwa laisa manang ni hpe namsi n di sha ya n mai ngu hkum hkap bye pawt sa, mare masha ni hpe mung anhte mare salang ganu gawa tai ai ni nan tsun sharin shaga na ga ai, daini kaw nna gaw shada hkuhkau ai lam she galaw saga." Nga rai jawm tsun mani chyai rai, tsa lauhku jawm lu chyai rai ga sadi jaw hkat sai da.

Shadau Helet myit htum a jum ju, kaning nchyum a hpunjum magra re ladat a majaw, dai shani kaw nna lwidwi sun madu wa gaw lwidwi sun de shang ai nga dumsu gumra gau sin lajang ai hta lai nna, masha ni namsi lagu sha ai lam mung n nga mat, laiwa laisa mare masha ni mung jum majap nai zawn re kumhpa hte namsi sa hpyi galai sha rai ai hta lai nna, mare masha kau gaw shan htinggaw kaw lwidwi si hkai sharin la nhtawm madu mung hkai dut sha rai, laning hte laning sutsu nga pyaw wa ai majaw, buga masha ni dai gahtawng hpe Lwidwi sun gahtawng ni ngu shingteng amying shamying ya masai. Laika ndai hti ngut ai hpang, jawng kaji lung ai ten hta, ngai mung kumshu lagu sha yu ai lam hpe shingran bai mu nga ni ai. Hpa rai tim, n law ai hpe gaw yawng marit ai hkrai, chyim mayu ai hkrai, kut ai hkrai rai nga ai. Hkum yu nga jang grau yu mayu ai hte maren, hkum lagu sha nga ai rai hpe she grau sha mayu nga ai. Myit ndik ai lam gaw, laika ndai pru na shawng e, laika gata na Shadau Helet lwidwi sun kaw gat ai tsi manam shalaw kau ai majaw, salu salat hte hkai shatut da ai Edisun zawn pyaw ai lwidwi sun hpe kau da nna, gatsan ga de rai mat wa sai.