U KANU HTE WA KANU A MAUMWI

U KANU HTE WA KANU A MAUMWI

BUM SHANGHKAWNG

Moi shawng de, mare langai mi kaw, u ni hte wa ni jaw, bawng nna, nga ma ai da, Lani mi hta mare agyi wa gaw, mare masha ni yawng hpe shaga la nna, zuphpawng woi hpawng ma ai. Dai zuphpawng hta, mare agyi wa hte mare salang ni jawm bawngban ai lam gaw, Dai mare kaw nawku jawng nnga ai majaw, nawku jawng hpe mare masha ni yawng alu lahkawn nna matu bawng dawdan ai lam rai nga ai. Dai shaloi, u kanu gaw, htingbu rai ai wa kanu manang jan hpe tsun wu ai gaw: "Manang jan e ngai gaw, nawku jawng gap alu bang na matu, shani shagu u di langai ngai di nna, dai u di hpe dut lu ai gumhpraw hte nawku jawng gap alu bang na ngu dawdan da sai" ngu wu ai da. Wa kanu bai tsun wa ai gaw: "Ning e, ngai gaw, nye a hkum sat nna, nye a shan hpe dut nhtawm, dai dut lu ai gumhpraw hpe nawku jawng gap alu bang na ngu myit shatawng da sai" ngu wu ai da.

Kaja wa sha, u kanu gaw, u di di dut nna lu ai gumhpraw hpe alu bang nna, Wa kanu gaw, shi a hkum hte asak hpe ap nawng let hkungga sak jaw alu bang sai da. Ndai zawn dai mare masha ni gaw, mare agyi wa woi awn ai hpe, mare salang ni yawng myit hkrum dawdan da sai lam hpe mare masha ni yawng mung tinang nang a myit shadang ai sha madat mara hkan sa ma ai majaw, nawku jawng kaba langai mi hpe gawgap la lu masai da. Ndai maumwi hpe hkaja yu ai shaloi, mungdan langai gawgap sa wa ai lam hta, Ningbaw ningla ni hte buga ginra kanu kawa ni myit hkrum dawdan yaw shada masing jahkrat da sai amu lamang hta, u kanu zawn di di dut nna alu sak jaw ai masha nga ra ai zawn, Wa kanu zawn, tinang a asak hpe hkung- ga jaw ap nawng ai masha mung nga taw ai lam hpe madi madun nga ai rai.