NHKRE MA

BAREN LAMU LUN

Numraw pu wa pu, kaidu si wa si an ai yi-nam gaang na lana de mi, Kasan bum lagaw, Laseng bum abaw na Nhkre mare e, mare baw na Layang Gam jan BumnoiJi, ma shangai machyi nna yup gawk e madai hte hum rawng nga ai ten e, nbung laru awu nga bung dingsa ai kaw, amu mung lamu pyi ga ayai mat na zawn nga kra ngoi gadu, myi pyi n mai hpaw hkra tu gala ai myihprap gaw, Nhkre mare ntsa hkan ashoi rai galam hkawm nga ai kaw, marang mung kalang ta nhtung na ntsin ru jahkawn bun ai zawn, shangu nta ntsa hkan bukbak she shara hkra htu adit bun nga ai, mare baw de amu "Htemhtam!" Ngoi gadu ai hte, bum lagaw kaw nna asin amun re summwi gumdin gaw, ri lahkaw gabai dat ai zawn rai hkawn pru wa nhtawm, ri rit ai zawn gumdin gumhkaw rai manai gaboi let lamu ganghkau de poi lung mat wa ai shaloi, Layang nta ni hkawot punra kaw sa pru tsap let, lamu de hkrawn lung mat wa ai summwi chyang hkan yu let, Layang dingla gaw: "Baren lamu lun sai law! Baren lamu lun sai law!" Nga hkan jahtau mau tsap nga yang, mi yat sha summwi chyang gaboi pru wa ai bum kaw hpun gaba shunshun rai shamu wa ai bai mu dat masai, shaloi Layang Gam gajawng gaja hte: "Htaw she yu yu mu law, baren hku gyi gaput yu wa ra ai law!

Mahkoi hprawng yan ra kun law!" Nga marawn ai ga sim nsim re hte, dai bunghku mahka hku na bum chyen mi bai gyi ginlut yu wa ra ai, dai bum chyen mi gaw Hka chyang hka mayan de hpun kawa namlaw namlap, lunghtawn lungma, hkumpup jahku gayau gaya ashun ashan rai lwi gaput mat wa sai. N-gup mahka let sharut gyi ru mat wa ai yu mau ai Layang jan gaw: "Htaw she yu yu mu law, baren pru wa ai ahku hku nga ai law! Yahte numraw pu grai pu an ai re wa, daina de chyau ma hkra lawm mat wa na sai. Ningwa hpe ma-ni kaw nna kaidu naw wa dan, kahpru galaw dut sha na re ngu yang me, ya ya sha anga nga, daina de chyau me kaidu hpra mung lawm mat wa na sai." Nga tsun nga nu ai, shannu wa ni masum yu nga dangam, bum lagaw kaw na bum chyen mi tawm rai gyi ru mat wa ai hpang, sharut n-gam kaw, kawa nhtung daw dumhpyot tawn ai zawn hku dumpawng rai malawng mat sai, dai bum hku kaw nna lwi gumhtawn pru wa ai hka npun gaw, ntsin nhtung gadawng mat wa ai zawn rai, hka lwi gumhtawn pru wa nna, Layang nta ni a chyahpung maga hku lwi ai hka la kasha kaw nshu nshang lwi abraw mat wa sai, hka kalang ta lwi gumhtawn pru wa ai rai nna, mare ting na wuhkyi wa hkyi, nga hkyi, hpunlaw hpunlap, maza mala ma hkra hkan wo gatpawpt nang mat wa sai. Mu nau ngoi gadu nna, u wa ni npu de kagat bang mat wa, gwi mung wau na pyi n wam, nta madu ni a lagaw makau hkan wa garet tsap mat masai. Baren lamu lun nsen hte sharut gyi ngoi gadu ai nsen sim mat wa ai hpang, Layang nta ni gaw nhku de ma ngak hkrap ai nsen bai na jang she, kanam Layang Gam jan ma shangai dat sai rai nga ai ngu, shannu wa ni nlang nhku de bai htim shang wa masai.

Layang jan gajawng let kalang ta kasha yan a yup gawk de hkre hkre shang wa nna, shi a hpang kaw chyawchyaw hkan nang ai kasha hpe gayin ganawng kau dat let: "Jaugawng ni shinggyim gawk de n shang ma ai!" Nga, shi hkrai sha ngaishu e adwi du sai law, nga shang wa nu ai. Layang dingla shanwa dawdap kaw hpunjum galaw dinghkrum la nna dung nga ma ai, loi hkring re hte, kawa dingla tsun ai, "La kasha rai jang gaw Rum Jawng ngu na re, num kasha rai jang gaw Ja Raw ngu na re, daini byin ai lamyit kumla gaw htawm hpang de nhpa byin wa na lam anhte n chye ai, dai majaw ma mying shamying nna, hpang de na ni maumui hkai ai shaloi na sakse tai lu u ga." Nga tsun kau ai hpang she, myit mi alawm rai hkaw chyang hkawdin matu galaw matsut shangang la nna, wan kra dung nga nu ai. Kasha gaw "Mai na re, Wa." Sha nga nna, yup gawk de na ma chyangai ja maji hkrap ai nsen hpe madat let, la kasha rai ang sai, nsen nde ja ai ngu tak nga nu ai. "Abau gun ai mi rai sai law!" Layang jan gawk de nna tsun dat u ai. Shaloi Layang yanwa gaw shada da mada hkat la ai htawm, "Layang Ja Raw ngu sai ga re." Nga kalang ta tsun shapraw dat ma ai.

Tsawm na ai hpang she, gumgai jan pru wa nna, shakum hkumba makau na kawa kumhtawng hta la rai, htingnat ntsin nhtung na hka ru bang la in ta shin kau nhtawm, dawdap npan dun lagaw nhpang e sa dung let tsun ai: "Ma Gam hkanwa e, dai rapding sumbrung na shan shaw la in lau htu mu, hka pru pru na re, ma jahtawng gaw sanit ya ngu na shani htu sha na re, ma mying gaw Mam Htu ngu gan shamying se ai law." "Ja Raw ngu ga ngu sai." Madu wa tsun dan nu ai. "Rai sa rai sa, grai pyo re sai." Madu jan grai na ra mat nu ai. Sanit ya du ai jahpawt, Layang Gam Hka chyang hkaraw de shan sa hkui u yang, kam mi arawng rai, shannga langai lu gap la nu ai. Shing rai, mare masha ni yawng hpe saw la nna, ma hka pru pru sha ai shaloi, shannga shan hpe alawm apawt rai woi shadu sha rai, hka pru pru sha masai. Hka pru pru sha ai jahpawt, Bumnoi Ji shinggan de ma pawn pru wa ai shaloi, mare masha ni yawng mayawng gaw kara hte myimun she matut hkra rai tu ai Layang Ja Raw hpe gahti galai pawn yu nna, ma ndai gaw gaba jang kara grai law nna, gam grai rawng na re nga jawm tsun hpu nga ma ai.

Mare masha ni shakawn ya magang, Layang Gam grai na gabu let, kasha hpe hta pawn ashun chyai chyai re kaw, kasha gaw masa nna, shani shana kawa e hta pawn na sha la, shana tup tup kawa a lata e pawn shayu shayup na sha masa mat sai. "Ma Ji, kanu she nga ai wa, ma nde de hkrap yang n chye shayu la ai, ngai hpe gaw ndai hku ma sha pawn nna n yup nsha rai nga shangun na hku sawn nni?" Lana mi na yuptung hta, Layang Gam gaw madu jan Bumnoi Ji hpe ma chyu rawt shachyu shangun u ai, ma gaw chyu de n yawng ai sha, kaga de malan nga let, ja maji hkrap taw nga sai. "Maw, nang she bai pawn yu u." Madu jan gaw yupra e nhkrem hku galeng nga nna, hkrap nga ai ma hpe yu let, nhpa hkrap ai kun, gaji dwi hpe ntsin naw ru jahkaw shangun na nhten nga let, ma hpe Layang Gam a sinda e pawn mara dat ya jang, ngap rai n hkrap mat sai. Shaloi Layang Gam hkra ta hte ma hta pawn tawn, pai ta yupku e madi tawn rai yat sha rawt wa nna, ma hpe lahpyen e galaw pawn bang la nna dung nga jang, kasha gaw ya sha grai hkrap yu ai zawn nrai ai sha, lamu shamying hte yup mat wa nu ai. "Ngai n chye shayu la ai nrai, nang she pawn shaman tawn nna mi, ya gaw na ta ndung kaw sha pyo dum sai rai nga ai, ngai naw yup la na. Bumnoi di kalang ta yupra e sawn sha yup mat nu ai. "Ntsin mung n ru jahkaw ra sai, wa a lata marit ai she rai nga ai."

Layang Gam grai rai dum ai hku ma pawn nna, hpawtde woi la-gang langai naw sa gap na ngu sawn let, kasha hpe yat sha galeng dat nu ai. Raitim n mai byin sai, yupku e hkra re hte, ma dai gaw lama mi hte achyaw dat ai zawn nga hkra bai kyek hkrap dat nna, ya sha yup malap mat wa ai madu jan hpe bai gajawng dat nu ai. "Nhpa di nu ta?" Madu jan ngoi rai rawt dung nna san u ai. "Nhpa wa chye di na, shayup dat yu ai, yupku e hkra re hte bai un si wa nga ai n mu nni!" Madu wa ma hpe kalang ta bai hta pawn la jang hkrap ngap rai mat sai. Shaloi madu jan mani sum rai, myit mi amu rai bai yup mat nu ai. Layang Gam shana shagu ma shayu nna yup n mu sha n mu, jahpawt jau jau n lu rawt, jaugawng gawng hkawm na ten pyi n lu mat sai, jahpawt rawt ten she Ja Raw hpe yupku e mai shayup yup rai, ma laning chyen mi sha naw rai yang, Layang Gam a hkum na shan joi masum daram yawm mat kra lasi lamun mat nu ai.

Ginhtawng htawng wa sai, lani mi La-maw nta ni a mam mu ga sa ai shani, Hpawjum Awng yan Lunghpra Naw sengmaw de lungseng sa htu na lam jahta ai na dat nu ai. "Hkau yan, nan sengmaw sa jang ngai mung sa na, nan krai hkum rai mat wa yo." Layang Gam grai na masa let tsun u ai. "Nang mahkoi n mai sa nhten, ningsha Ja Raw na ta ndung kaw sha yup ai nga, nang tawn kau da lu na kun?" Hpawjum Awng mam si kawa baw sha let san u ai. "Ma mi gaw kanu lu, gaji gawoi lu ai she re, ngai n nga jang gaw n hkrap sai, ngai hkrai woi jang ngai hpe grai abai la ai, daining tup ngai shan hkui sha na ten pyi n lu mat sai n mu ma ni?" Layang Gam myit mi ahtum nga tsun u ai. "Ngaini jan hte naw bawng yu u law, loi hkring anhkau e hkalau mat wa ai re nga na. Nan gaw dinghku nnan sha naw de wa ai, shada da lagat jahku zawn magyep naw kap ai, rai n mai hka na re." Lunghpra Naw mani let tsun u ai. "Nan du ai kaw ngai mung du na, teng sha ngai hpe woi sa marit, la masum myit hkrum yang panglai pyi htawk kau lu ai da, anhte masum sa ga." Layang Gam myit grai lawm wa nu ai. Shi a myit hta, kasha hpe lawan wan jahka kau ra sai, grau man jang grau yak na re ngu myit let tsun atet nga nu ai.

HPAKAN SENGMAW

Mare ting a mam mu, mam dan dup ngut ai hte rau, Layang Gam ni Hpakan sengmaw sa na riri rai sai. Lana mi, shi ma pawn let madu jan hpe tsun ai: "Ma Ji, ngai sengmaw sa na, nta sha anga nga yang, nang hte yup na ten pyi n mu sai, ma ndai hpe n mai shaman sai, ngai n nga jang loiya mi rai jang she n mai mat na, ngai hkau Awng yan hkau Bawk hte saw tawn sai, ngai lungseng sa htu la nna, annu wa ni ngwi pyo dinghku de sha na re, nang hpe mung hkum ting ja si she gumbyau hkra shakya shangun na yo. "Ganing mung she rai yu ga, nta kaw nde de matsan ai, di hka wan sha pyi n lu lang ai, she sa yu su gaw e." Bumnoi Ji hkrawn sha htan ya nna, shi madu jan a ladi matu kaw sa pup dat ya nu ai. Dai hpang jahpawt, Layang Gam ma shayup kau nna, madu jan hte myit mi amu in yup la rai, manang la yan hte Hpakan sengmaw de rawt mat wa masai.

Ja Raw kawa a lata kut nna shata lam hkrap ai, gaji yan gawoi mung shana tup tup gahti galai hkan pawn shayu lawm rai tim, sharu chyu sharu nna, nta ting ma hkrap ai majaw n lu yup sha rai, lasi lamun rai mat ma masai, grau nna Bumnoi Ji a kanhpyi gaw marung de kap mat ai she mu mat sai, ma machyi mat hkra hkrap jin ai hpang, tpawpmra na jang kanu a chyu tauba masawp nna chye yup wa sai. Layang Gam sengmaw sa mat wa ai shaning lam du tim, shiga pyi n na mat hkra rai sai. Ndum ndam sha naw nga yang Ja Raw masum ning du nna, kagat hkawm ai tang tang rai sai, dai re, ma kanau n lu ai majaw. Chyu dingyang naw chyu nga ai. Kanu gaw ma chyu jahka ai ngu, chyu si kaw kachyu si pyip chya tawn yang, kasha krap malan let chyu kau, ndi hkama chya nna jahkrit tim, kanu a palawng matu hte arut kau nna bai chyu kau, hpa mi chya tawn yu tim nan chyu dat ai chyu mahtoi kau nna bai chyu noi nga nga rai, ganing di nan n lu jahka rai, rami dai hku naw shachyu tawn nga u ai.

HKA CHYANG RIM

Nhkre mare sinpraw maga gaw Hka chyang hka lwi nna, Matau Tajai hte ni ai, sinna maga de gaw Lamai bum hte Namdu hka shinggrup ai. Dingda maga de Shaujai pa Ka-du pa rai mat sai. Nbang hka kaw wuhkyi wa hkyi ni lwi bang ai rai nna, mare masha ni buhpun palawng pyi gadai n kam hkrut ai hka re, ja lu ai hka gaw mare sinpraw maga na Sinwa hka seng hka rai nga ai. Shaujai Ta- jai ni a shingdu de rai nna, Kasan bum lagaw e re majaw, Nhkre mare ni mare shingdu de nga ang rai, nam na dusat dumyeng matse labye, chyahkyi shannga, wa du wa tsa, tsap gru tsap la, ahkan malat, sharaw rawngba, n-grau grau chyang, kalang langda, woi hkye lagang, hpawlum htu, chyahkyon wunawng hku ru ai shara re, u numji numchyawi, hkru ji hkru wak, ubyit utsa, uri ugan ni mawng gasu ai lam hpe gaw tsun she ndang nga ai. Ma kanau bai tsan rai, Ja Raw chyu hkrai noi, shat gade hkru hkra jaw sai ngu tim, chyu sha n lu chyu la la gaw hkrap gawngleng taw nga nga rai nna, Bumnoi Ji e maidang she mang hkra hkra gahpret ya nna bai shachyu chyu rai, masum ning du hkra, gaba ai ni a ta ndung kaw hkrai chyai nga nu ai.

Lani mi Layang nta ni Hka chyang rim ntsa na hkarang yi kaw mam sa dup ai shani, Bumnoi Ji kasha Ja Raw hpe yihku ntsa e nbat nyep, sumdaw jahpun in shayup tawn nna mam jahkrat nga yang, shi hkrai sha Hka chyang rim nau ngoi gashaw dum mat nu ai. Shi a hkum e htinggrum tawn ai sumdaw gata kawn lamu ntsa de mada dat ai shaloi, sumdaw hku kaw jan lagaw htawng hkra gabrim tpawpm nga ai hpe grai yu ra sharawng nna, kalang ta ngoi rai, sumdaw garawt let kanu hpe shi yup ai shara kaw lawan wa yup u, nga dun wa u ai, kanu gaw kasha chyu bai chyu maw sam sai ngu, yihku ntsa e dung dat, chyu hpaw dat ai shaloi, kanu hpe yihku ntsa e ganawng galau tawn rai, sumdaw jahpun dat u ai. Kanu gaw ngai pyi mam jahkrat kyin si nga yang me ngu rawt mat wa jang, hkrap hkrap ai, jahkraw she je na daram hkrap tim, shi myit ai lam gaba ai ni n lu htai ya ai majaw, sa-wa shalut sam sai ngu, hka ru hkaw ai hte, shat simai gan garan makai soi ai hte raitim n zim hkraw ai, kanu masin lunlun nga ai n lu sharang si wa nna: "Ma yau ma ka nang gaw, nhpa nat e shalaw ai wa rai sani, hkum hkrap ngu yang mi ya du hkra hkra hkrap nga ai gaw, le hpawlum htu e sa ba la kau nu ga!" Ngu gajet dat jang, agajawng sha ngap mat sai.

Raitim ta layung gang garan manai gayup nna naw makan ga-e nga nu ai. "Mawk, achyu chyu u!" Kanu sabai palawng malu la nna, hkum pyi loi jen jen rai hkra ta hte chyusi matep la in kasha a n-gup kaw lup di anyin bawt dat ya nu ai. "Ama dai mi yat sha sumdaw htinggrum gata kawn atpawpm sha pru wa ai she re, nhpa tsun mayu kun re n chye tsun ai rai nhten." Layang dingla kanam yannu hpe yu nna tsun u ai. Gaji dwi shingnga jang, gashu gaw pai ta e naw manat nga ai sumdaw matu ari let bai hkrap kap rai sai. "Agu e, nang san yu u, nhpa tsun mayu kun!" Nam yi kaw ma nau hkrap mat nna masin nshu nshang nga mat sai Bumnoi Ji n ri si wa nu ai. Shaloi mam dup ga sa ai ni yawng gaw ta na laprang jahkring kau rai tak hkrai tak yu ma ai raitim, ma myit ai lam nhpa re n chye ya, law madung gaw nam na jahtung asawn ahpyi lamum ni hpe sha law shadu ai hkrai rai nga ma ai.

Hkring mi nrai yang, Ja Raw gaw Hka chyang hka de na hka rim kawn rawt lung wa ai n-goi la-tum mu dat u ai, n-goi la-tum de ta ladawn nna kalang ta kanu a chyusi maret kau dat ya nu ai. "Aka law, daini na nbya nang gaw nhpa e wa shalaw wa sani? Ya nye chyusi pyi di na daram kawa ya ai!" Nga, maidang kaw gayat dat ya nna bai sha-un tawn nu ai. Gaji dwi maibau hpuntawng kaw kumgyin ru ru ai mu nna gyinwawng sa wawng dat yang, gyinkyi langai mu di la nna gashu hpe apawpng shamai la lu nu ai. Kumgyin lu la rai myit pyo sam ai ngu jang, kanu a lata na laprang bai gashun sai, kanu gaw ma laprang garai n dang ai ngu n shalang ai hpe, kumgyin gabai ndeng kau nhtawm, bai hkrap un taw nga sai. Shaloi gaji dwi laprang kasha lawan bai gan galaw ya nna apawpng jang she, hkrap ngap mat nu ai. Dai shani na mam dup ga sa masha ni gaw Ja Raw hpe masin shade ru ai nga gari mat ma masai.

SINWA HKA SENG

Lahpawt mi Bumnoi Ji singga kaw nhtung manga ting baw gun rai, Sinwa hka de hka ja sa na maw u ai, Ja Raw singga langai dun lang rai kanu a labu matu magra let hkan ganan sai. Kanu gaw ma hpe jasat ngu yang n chyang, ba ngu yang bai n dang rai, hkum hkan nang sa ngu dat ai hte, Ja Raw adun kaw n-ga rang rai myit si myit htum hkrap buklak wa sai. Kanu nhtung singga hpe htingnat kaw yu shadun kau nna, kasha hpe dun sharawt la nhtawm: "Mawk mawk, gun u! Gun u!" Ngu jinghpa ladawn dat nu ai, Ja Raw rawt ngoi rai kanu a lata na jinghpa la nna kara gaw tsip tsip re baw kaw hta mara gun dat sai, nhtung aga de hkrai preng ru mat wa jang, bai hkrap un si wa nu ai. "Ama nang e, gayat shara gaw n nga re, ngai a masin hkum achyaw ya law!" Bumnoi Ji ntsin nhtung kalang bai sharawt baw la rai, kasha hpe hta pawn tawn nna mau tsap nga nu ai. Shaloi gaji dwi: "Ngaishu gaw myit su ai, nang jidwi hpang de wa rit, jidwi kyedawk daw ya na, sa sa, an jidwi kawa sa kran la saga." Gaji dwi dawdap kawn shaga dat nu ai. Shaloi Ja Raw hkrap ga-e let gaji dwi hpang de adik nga kagat mat wa sai.

Dai shaloi she Bumnoi Ji kasha ntsin nhtung gun mayu ai re chye u ai, ma gaba sai rai taw hka ja garum lu na wa ngu myit let, myiprwi si gatsut kau let Sinwa hka de rai mat wa nu ai. Layang dangla gashu hpe hta ba la rai, Sinwa hka lam na maling de, maichyu kawa gak gak re kran daw wa nhtawm, kyedawk langai mi, ntsin nhtung langai mi daw ya nga ai lapran, kanam jan hka ja wa nu ai. Ja Raw pai ta de kyedawk hpai, hkra ta de nhtung mahka kaw dun garawt rai, htingnat de kanu kaw kagat sa wa nna: "Nu, hka ja, hka ja." Nga tsun let, htingnat makau na singga kaw shi a kyedawk hte nhtung kasha baw dat nu ai. "Ma e, nu hka ja wa sai, hpawtde bai sa ja na re yo, ya gaw nu da naw da na." Bumnoi Ji gaw alaw alam re kara njaw galaw jaw la let tsun dat nu ai.

Shaloi njang Ja Raw hkrap kap rai singga dun nna dawdap de gaji dwi kaw kagat wa nu ai. "Agu, ma dai nau sharu la ai, lama mi she hkan sam nga ai law, hkrap krap ai gaw mayu pyi ga na daram ram rai nga ai, le le dumsa Uring wa hpe chyaba lawan she naw wot shangun yu ga." Kanam jan shing nga jang, kagu gashu hpe hkap apawpng ai: "Ngaishu singga gun mayu ai kun?" Ngu dat jang, hkrap ngap rai mat sai. Shaloi gaji dwi Ja Raw hpe hta ba la nna: "Ma la-yawng n chye jang yak ai law ngainam, ma re ngu tim, ma langai ngai myit ai lam gaw law, n-gup gaw n lu tsun shapraw rai un ai mung nga ai." Ngu tsun let, shan jidwi Sinwa hka lam de madang kawa kran mat wa masai. Bumnoi Ji myit hta: Dingla mung mana mana nga nna mi, ma a la-yawng hkan ra ai nga ai gaw, ngai a la-yawng gadai bai hkan ya na rai. Gaji dwi madang kawa ramdaw re laman mi kran hpai rai, shingma na gashu hpe: "An jidwi ni gutgut nhtung daw la, singga wa la rai hka sa ja ga i." Ngu jang, shingma kaw na gashu jan: "E... E... ." Nga grai gabu hkra htan sai. Layang dingla nta du wa ndawt, madang kawa hte ahtawt mate te sha law ai ntsin nhtung manga daw hkrawt tawn nna, garap kaw shingnoi wa na ngu shit tawn ai pali shaw la rai, singga kasha gachyi law ai gan wa la, kawa lasui hte jinghpa gan hkri shakap ya rai, singga kaw nhtung kasha baw bang ya jang she, Ja Raw gabu gara rai gun dat ai re, n chye gun sharawt la nna bai hkrap un si wa nu ai.

Dai ten hta Bumnoi Ji ndaw ya ngaugum gata kaw da da dung nga nu ai, nhku de kasha bai hkrap un si wa jang she, shi hkrai sha kraw gata e: Dai yu le, hkan ai mi hkan ai re ngu yang n kam ai, hkrap nga u ga! Nga gabu olaw si nga nu ai. "Ngainam, ma ndai hka ja mayu ai rai sam nga ai law, kalang naw sa woi ja su!" Layang dingla adun kaw hkrap gawngleng taw nga ai ma hpe n lu apawpng la nna myit htum let, lakang pawt kawn kanam jan hpe sa shaga u ai. "Agu, ngai ma a la-yawng n hkan ya lu ai law, ma ra ai hku sha hkan nga yang gaw, shat hpa sha na re, ngai pyi n rau si nga nngai." Kanam jan da maka ka kyin in, du pyi n sharawt ai htan u ai. Kagu masin na pawt nna, nhku e ja maji nga hkrap nga ai ma wa pawn la rai, da-lang de sa wa masai. Ja Raw kanu da da ai mu jang hkrap ngap rai, kanu hpang de sit hkrat wa nna: "Ngai ma, ngai ma." Nga nga ai kaw, kanu e nhkap shaga la jang, aga e buk rai bai adit dung hkrap maa si wa nu ai. "Ama ndai gaw sa-wa nat jawn ai she rai sam nga ai law agu! Ngai n lu hkam si wa re ni ai, shani shana wa hkrap un lu ai gaw, mare nde law ai kaw, masha ni kasha shi hkun lu ai ni a ma pyi n hkrap ai mi, Ja Raw ndai gaw kaga lai nan jan ai, ganing re hkrapni hkrapnaw tsupnyi sumbaw wa rai kun, kun nhpa hka ji sa ai ma rai kun!" Bumnoi Ji da maka kaw na ka-ni pu maka ka ai aman rai let pawt bu nga ai. Shi a kraw hta ma hpe da-lim shaw la nna, anut dat riri ngu ai hpe, myiman she hkye hkra sharang nga nu ai. Sinwa hka hkaraw de lahpaw sa htat ai gumgai mali manga mi Layang ni a nta ndaw kaw du wa mara ai.

Gawoi dwi gaw kanam jan ma jahkrap tawn rai da da nga ai wa mu nna, masin shin nga ai ja: "Ngainam, ma shade hkrap nga yang wa, nang gaw utu a munglu n na rai! Ngaishu gaw n hkrap law, n hkrap law, law law adwi pawn la." Nga let, numgaw daw kaw lahpaw lit shayu shanat kau ai hpang, ma sa apawpng pawn la u ai. Gashu jan gaw aga kaw aru ru mat sam sai ngu na zawn, pawn sharawt dat yang ting ting hkang hkang n shamu ai malan kyek hkrap taw nga sai. "Nanwoi dwi ni chye ai hku apawpng kumbawk hkat mu, ndai daram ru ai ma ngai n lu woi ni ai!" Bumnoi Ji gamoi hpe mung gajet shamak dat rai, shi a ka-ni pu maka lawan n lu ka shakre na ngu aman rai da dung nga u ai. "Adwi a gashu Araw shaga madat la ai law, myit su ai, ada da na kun?" Gawoi dwi ada da na kun ngu dat jang, gashu kalang ta rawt ngoi rai, gawoi dwi a ta kanu kaw noi nna hkrap ga-e nga nu ai. "Law law, andwi ni da na re, da na re." Gawoi dwi nsa gaba shaw la let, shi a lahpaw singga na chyaba lap grau galu grau pa ai shaw la rai, gashu jan hpe hpuntawng langai kaw na ninghpu gut kau nna shadung tawn rai, chyaba lap hpe asoi soi sha di ashin la nhtawm, gashu jan hpe langa nga dung hpaw mali la nyep tawn ya di, pali lapu daw la nna da-lim shatai rai, lagaw hte da-lang shatai shangun rai, chyaba lap hte da da sharin ya nu ai, dai shaloi Ja Raw myit mi alawm rai da taw nga sai, kanu da raw jang she shi mung tsu wa dum sam nu ai, gawoi dwi hpe da raw kau shangun nu ai.

Nsin ningrim rim wa ai shaloi, Layang nta ni shat dap kaw shat sha nga ma yang, npu de gau bang tawn ai nga dumsu ni nyawt nbaw htaw ru pru wa ai, nta shakum hkan adawt hkra nna, nta she ashun wa hkra rai sai, Layang dingla gaw sharaw bai htim re sai ngu: "Lamu ga madu nang lu yo, n gaja ai bungli hkrai hkum sa galaw ngu sai lu! Dumhpau sanat gatut sha na lu yo!" Ngu marawn let, wanmang na wan numhtaw shaw hpai nna marawn pru wa nu ai. Shaloi Ja Raw mung wan numhtaw kasha hta lang rai gaji dwi kaw hkan marawn nang mat wa sai. "Araw, Araw, ningji dwi kaw hkum hkan abai, mammam lawan wan wa sha u!" Gawoi dwi ja maji hkan shaga nga tim, gashu jan gaji dwi kaw hkan nang let, "Sharaw! Sharaw!" nga jahtau nang nga nu ai.

Ja Raw gaji dwi a shawng de lam rai, lakang kaw wan numhtaw hte mawng rai yu mat wa nu ai. Gaji dwi ganing n chye di, kalang ta shawng de gahkan lai mat wa nna, aga kaw bak re hte gashu hpe gayin mada yu yang, gashu mung goitsat hkyem ai kaw kalang ta gra di woi la nhtawm, gahpa npu e matep lang let, npu de dumsu ni hpe sa yu u yang, dumsu kasha langai a maidang na pu htum adaw mi sharaw e daw sha kau nu ai. Dumsu lagaw lashan nna si wa ai shaloi, Ja Raw ta ladawn let hkrap she hkrap jang, gaji dwi mung hkan hkrap nang rai, nhku de shang wa nhtawm, shanhte nta lawu na Uring ni hpe shaga la rai, dumsu jawm hpya sha kau masai. "Layang Gam ndai gaw dinglajang she wa na nga sam ai kun?" Bumnoi Ji madu wa hpe grai marit ai, masum ning jan ting rai mat wa yang, shiga mung n du, shakram zawn re sha pyi n shagun rai, uhku a masa si la ai hpa la taw nga nu ai. Gamoi jan mung kasha hpe grai tsang let: "Lungseng n lu htu nna she n kyin nga dawng, ginhtawng htawng wa sai re gaw, she n du pru wa na." Ngu kanam jan hpe myit shapyo ya u ai.

MA TAM SHAMAT AI

Mangai mam gun la ra, Ja Raw hpe ba yang lit li, nta tawn da ngu yang sharaw hpe bai hkrit rai, mam gun sa hkyem ai Bumnoi Ji Uring ni a nta de ma manang law ai ngu, ma sa tawn da nu ai. Uring nta ma shannau ni mali nga ma ai, gaba ai jan gaw sak sanit ning du sai, kanau masum hpe woi chye sai, gaba ai ni chyinghka hpe shinggan maga hku gayin shajup gyit kau da ya nna, shinggan n pru shangun ai, nhku gata e sha nga shangun ngun rai malu ai. Ja Raw hpe sa tawn jat ya jang, Uring Hkawn gaw ma mali a gana gaba tai nna, nhku hkan kanau ni hpe woi makoi chyai nu ai. Ja Raw yan Ma Naw bai makoi ai shaloi, dap shi lahkawng du ai nta gaw chyinghka bai la shachyip kau rai, nhku ting asin amun nga ai kaw, Ja Raw gara gawk e makoi rawng mat ai n chye, shaga yang mung n htan rai, n mu tam mat nna, Uring Hkawn yannau ni hkrap she hkrap nga masai. Shi krai sha nambat kru ngu na dap na htauman kaw lachyit paru noi abya tawn ai gata e makoi dung nga u ai, gana ni sa tam la na la dingda nga u ai.

Gahpu gana ni shi hpe tam shamat nna krap shaga nga tim, shi n htan ya ai, sa tam la na ra ai ngu, agatsi sha dung taw nga nu ai. Ja Raw hpe n mu mat ai Uring Hkawn myit htum mat, chyinghka chyingjut e kanau ni hpe woi apom nga nna, kanu hpe shaga marawn taw nga masai. Mam gun ai ni mare gaang hku lai lung wa yang, ma ni jahtau hkrap ai nsen na dat ai hte ma- sin gahpra ma masai. Uring Gam jan mam lit hpe ningna n-gau kaw yu shadun kau da rai, chyinghka shajup ai pali raw kau in htim shang wa nna: "Ngaisha ni e, nhpa rai hkrap ai re?" Ngu wa san dat nu ai. "Nu! Araw mat mat sai!" Uring Hkawn hkrap let kanu hpe hkap tsun dan nu ai. Shi a hpang kaw hkan nang nga ai Bumnoi Ji gaw kasha hpe n mu mat sai nga jang, laji rawng nga ai ja: "Ma Hkawn, Araw ganing rai n mu mat ai rai? Nanhte shinggan de n pru wa yu ai i?" Ma Hkawn a palawng kaw magra tawn let hkrit lahkrit san nu ai. "Annau ni makoi chyai ai re, shi gara kaw sa makoi mat sai kun, tam yang n mu ai, shaga tim n htan ai."

Ma Hkawn hkrit let naw hkrap nga nu ai. "Araw! Araw! Nang gara kaw rai? Nu tam nga ai!" Bumnoi Ji shinggan de nna shang wa ai re majaw, nhku de hpa pyi n mu mada ai kaw, nbang chyinghka ngauhkrau lapran hku nna tsam mari sha matep shang wa ai jan lagaw kaw shaang nna, hkintep hku hkan hkawm let, kasha hpe shaga hkrai shaga nga nu ai. Kasha nhtan magang, masin gaw jahkraw kaw du hkra htu shachyat lung wa ai zawn nga sai. Nga gumra hpe npu e rawng tawn tim sharaw ni hkrai sa kawa sha sha re myit dum nna, nta shakum n ngang ai shara mi she rawng nga ngu, myiprwi si mayut let, nbang dap na wan-up ahpre wut let, kasha hpe shaga ai nji n-gu rai nga nu ai. Uring jan mung ma ndai gaw gara de wa chye sa mat ai rai kun gaw i e, nga masin gahpra let hkan tam shaga hkawm nga nu ai. Mam gun aga sa ai ni yawng, mam lit shayu kau rai nhku de hkan shang wa nhtawm, pali numhtan hte shanan gyit numhtan la nna wan shachyi lang rai, gawk shagu hkan tam kyin nga ma ai.

La ni bai rai jang gaw sharaw hpun lung chye ai ngu, nhtu shaw manat lang rai hkawot chyinghka, sharem numgaw hkan gara yang shara ga-ap ai kun ngu, shara magup hkan yu nga ma ai. Shanhte tsang dik ai lam gaw, dai shawng e sha jaugawng la langai madang sa sin nga yang, sharaw langai madang gata sa hkawm gahkrang taw nga nna, jaugawng wa madang ntsa kawn sanat gap bun dat ai, ahkyak kaw n hkra ai majaw, hprawng mat wa sai. Dai hpang jaugawng wa madang kawn yu nna nta wa ai lam kaw, shi e gap malu dat ai rawngba gaw shawng lam de wa hkap nga rai, shi gale pru wa ai hte du kaw chyit di kawa chyupchyai sat kau ai lam naw tsun garu nga ai ten rai nna, sharaw dai hpe gaw bai n lu gap kau rai, masha yawng a myiman n tpawpm mat ma masai. "Ngainam e, wan lawan wut shagrung dat u, dai garap na pali numhtan shaw la nna wan shanan lawan shajup jat u, gawk shagu naw tam yu ga." Layang gumgai nta hkumpyen gunggung nga ngoi ai she na hkra nbang dap de hkan kagat nang nna tsun u ai. "Moi, ma ndai ganing kana she rai yang gaw ngai mung n pra sana ni ai, kawa Hpakan sengmaw sa na shawng e, ngai e matsun da ai, ma hpe shani shana tinang hte yep yep rai woi hkawm nga ai re, daini mam lawan gun htawk la mayu ai ngu yang..." Bumnoi Ji ga pyi n lu tsun shakre nu ai. "E, ngainam, atpawpm she naw tam yu ga, nta ndai grai chyip ai gaw re." Uring jan shing nga nna tsun tim, shi mung grai myit law let, kawa shanan lang rai dap shagu hkan tam, shaga hkrai shaga, nbang dap kawn npan dap kaw du, dap mi, gawk mi pyi n hprai ai sha, shingjut shingnaw shagu hkan tam yu wa yang, dap kru kaw wa du masai.

Dap kru kaw na shakum madin kaw htauman noi tawn, chyinghkyi sha jung tawn rai nga ai. Bumnoi Ji hkrap let htauman na lachyit paru gang gale dat yang, Ja Raw lachyit nba shingga ai htauman gata kaw yup pyo taw nga ai. Ja Raw ningnan e gaw gana ni gade shaga tim dingsa n htan ya ai, gana ni shi hpe tam la na gade la yu tim, gadai mung dai kaw n sa ahprun dat jang, yupnga wa sai, htauman gata kaw galeng dat ai hte yup pyo mat wa sai. Shaloi she, Bumnoi Ji yanmoi a jahkraw kaw wa matsut rawng nga ai salum gaw, shi a shara kaw bai wa noi nga sai. La ni mung ta na nhtu n-ga kaw bang kau rai, nsa gaba shaw let mau tsap mat masai. "Goi ye, goi law, ma ndai kaw yup nga ai law! Yup mat nna she n htan hkraw nga ai mu!" Bumnoi Ji kasha hpe mu dat ai hte, ta kaw shum tawn marawn dat nu ai. "Nu koi, nu koi." Ja Raw dum wa ai hte, naw makoi chyai na hku tsun u ai. 

WAN SHINGRAM

Shata jan grai mai tpawpm ai shana, Bumnoi Ji kasha hpe dun rai nbang punra de shagan sa yu ma ai. Shi kasha hpe sumsing lamu de na grau tu ai wunbu shagan hpe madun let: "Htaw yu, htaw grau gaba ai shagan gaw ningsin gintawng ngu ai re." Nga tsun ngut ai hte, lamu de nna wura kawa nhtung hta tsut re wan shanan pyen jinghkyen yu wa ra ai. "Nu nu, htaw yu, nhpa re? Nhpa re?" Ja Raw lamu de ta ladawn let san u ai. "Htawra gaw wan shingram rai nga ai law ma e." Bumnoi Ji Kasan bum mayan de jinghkyen mat wa ai wan shingram hkan yu let, kasha hpe tsun dan nu ai. Hkring re hpang, mare gaang de nna shi hkam baula ngoi wa sai, bau dum shangoi dat ai hpang, ndau wa marawn tsun ai: "Wan shingram hkrat sai law! Ginhtawng ta, hkun hkraw ten du sai law, mare masha ni yawng wan sadi ga law! Wan sadi maja ga law!" Dai hpang shana kaw nna, Ja Raw nsin sin wa ai hte kanu hpe nbang de hkrai dun sa nna: "Nu, wan shingram yu, wan shingram yu." Nga, nhku de pyi n shang wa hkraw ai, shanang krai shanang tsap nga nga rai u ai. "Ma, le yu, myihtan tu grai law nga ai." Ngu dat jang, Ja Raw ta ladawn tawn "Ra, ra." bai nga sai. Kanu myit htum let kalang ta gra di hta pawn la nna: "N mai ra ai, jum hkra jang ta hpyehpye." Ngu jahkrit dat nu ai. Kanu jahkrit dat ai hte, kasha mung kanu a sinda kaw kap rai gawp mat sai. Bumnoi Ji hpang jahpawt nbang gawk na mam ru gun rai npan de mam htu sa wa ai shaloi, kasha labu pyi n bu ai bai hkan kagat nang nna: "Nu, ngai ma sa, ngai ma sa!" Nga jang, kanu masin grai pawt let, ahkye are rai dun pru wa nu ai. "Ama nang yo, ndaw ya de sharaw nga ai ngu yang mi, n chye hkrit ai, nde de jau nna nhpa hkan chyauhkre nang ai rai i? Ngai e hkrai hkan abai, nhpa galaw tim yi-ngam n sa hkraw nga ai le! Le ningwa lungseng htu ai de hkan nang mat wa su!" Bumnoi Ji lakang kaw yu wa ai shaloi, kasha hpe hkra ta hte hta lang pawt nga nu ai.

Bumnoi Ji kasha hpe htum lap kaw shatsap tawn nna, htumhku de mam ru bang dat rai, lahtin ganoi du hkra galu ai kara hpe njaw ngang ngang jaw la rai mam htu sana ngu, kasha jan hpe ga e pawn shatsap tawn rai, mam htu bang wa nu ai. "Nu, ngai htu na, ngai htu na!" Ja Raw kanu hpang de ta ladawn nna tsun ai hpe, kanu aye n la ya u ai, mam htu nga dangam rai yoilu lu bang wa nu ai: "Mam htu manang n lu ai, num sha shingtai ngai wa le, lagawn la tim htu ra nga ai yoi, yoi sa lu manang e lu taw gaw, voi sa lu ngai myit dik hkra..." Nga ai yoilu rai pyi n ngut lu yang, kasha jan lama mi e hkra dat ai zawn kyek hkrap pru wa sai. Shaloi sha dumsu gau nna pru wa ai gaji dwi na gajawng ai majaw, htim pru wa ra ai. "Ngainam, nhpa byin sata?" Kagu gajawng gaja nga san dat nu ai. Bumnoi Ji htummun hpe gahpa e shanat tawn, kasha hpe dun tawn rai: "Ngai htumlap kaw shatsap ai pawn shayu kau ai n ra kun, mam hkan htu chyingbat mayu kun rai sam nga ai!" Ngu pawt let tsun dan u ai. "Hka, ngaishu gaw an jidwi ni sha na mam htu mayu ai nrai i? Dwila hummun naw daw ya de ga." Gaji dwi nta htamung hku dang tawn ai hpun bang na hpun dingshan langai shaw la rai, htummun kasha daw shatpawpm ya nhtawm, kanam jan a ta htum makau kaw aga krawk kawan kau di, mam loi mi magra bang ya rai htu shangun jang she, hkrap nga ai ngap rai, myit mi alawm mam htu let, kalang lang kanu hpe rawt mada dat, kanu mam htu shakut nna, "Si, si" nga jang, shi mung ta lahkawng hte htummun jum tawn rai "Shi, shi" nga hkan ngoi nang u ai.

Mam htu gum dat jang, akrin nu nu re maidang shari lahkawng dawng dawng rai, magyi te labawp gaw gaba brau brau rai, lahkap yojan yojan rai dat jang, magyi hte labawp mung hkan ashun nang, kara sadawk matu gaw alap rai, nunu rara sha re lagaw yungnu numhpu kaw gabye chyalup tawn nna mam htu shakut si nga u ai. Kanu mam htu myit nna shingnoi kaw shap bang jang, shi mung aga na shi htu ai mam ninghpu hte gayau gaya di hkan ashap bang, Bumnoi Ji hpa n tsun sai, n-gu gatsap kau na she re ngu, rami ashap bang shangun nu ai. N-gu gatsap na lit gaw gawoi dwi a bungli re. Bumnoi Ji shat gawk de wan wut la rai shat shadu bang wa ai shaloi, ma bai hkan abai nang sai. Ma gaw nampawpng kawk kaw ntsin bang la, n-gu magra bang la rai, shi mung shat shadu na nga kyin bang wa sai. "Ma nang yo, n-gu lahpawt lama di kau na hkyem nga ndai lu!" Ngu pawt let lahkum kaw gang shadun tawn jang, bai hkrap dung nga sai. "Ngainam, ma nhpa ngu chyu jahkrap ai re? Shi gasup mayu ai gasup shangun u le." Gamoi shing nga jang, kanam bai tsun ai: "Rai re nga myit dai nanwoi dwi ni, ma shaman shagan, ma la-yawng sha hkan nna nga mu, ngai lahkam mi htawt na pyi yak wa re nga ai."

Kanam jan gamoi hpe shara shara nga jang, gamoi grai n na ra ai rai tim, ma woi malawng ai gaw kanam jan rai nga ai majaw, aja wa hta dat gaw n wam nga nu ai, "Ndai mate sha law ai ma hpe me, she shaman law." Gumgai jan kanam a ga hpe na pawt mayu nna, n-gu gatsap ai balam abuk ngu gatsap htaplap dat dat rai, shingrun da, shatin da, hkangwi naga da chyahtai de gayau gaya hkawn mat wa hkra, sinpawt lahtet rai gatsap nga nu ai. Bumnoi Ji shat hkut tawn, Ja Raw hpe: "Araw, dwinum yan dwila hpe shat sha sai ngu su." Ngu shangun dat sai. "Dwinum, dwila mammam sha." Ja Raw gaw shi a nampawpng kawk na kanu e shadu jahkut tawn ya ai shat, nngawt bat sha wai wai nga jang, grai gabu let, kalang ta nampawpng kawk hta dat ai ngu yang, ta magra gahtet la nna, kyek hkrap si wa jang, wa shat dap kaw wa shat shalau nga ai gawoi dwi, goi law goi sha nga kalang ta shat dap de htim shang wa nna, udi langai baw chya ya nu ai. Bumnoi Ji nampawpng kawk na shat hpe lawhtawng kaw mala bang nna, ka-ni si nawhpu gachyi mi lahkat bang ya rai sha shangun u ai.

Ja Raw gaw grai mu la ai zawn, aman rai magra sha dung nga sai. Bumnoi di lagum hpaw kaw shat hte ka-ni si nawhpu lawan wan gumjup sha la rai, ndaw de da da mat wa sai. Shi gaw lani mi da n lu da, maka langai sha pyi n lu ka bang yang hkum machyi ai she na wa wa re majaw, da da mu hpe gadai wa du e nhtu mara tawn ya tim galaw ra ai bungli rai nga nu ai. Shi tawm re hte kasha jan mung shat lawhtawng rap, ta hkan kap ai shat hkyep palawng hkan gatsut kau rai, kanu kaw hkan kagat dingding nang mat wa nu ai. "Nbya hkalung nang, htaw ningji yan ningwoi hte shat lawan wa sha jahkru la su!" Bumnoi Ji lakang baw kaw tsap nna nhtang ahkre dat nu ai. Raitim kasha madat ai nrai, kanu a labu matu kaw magra tawn, lakang htik mi yu nu ai. Ntawt e hpum ai gwi chyang gam gaw ma a ka-ni si nawhpu bat wai wai nga ai shat hkyep kap ai lata hte lawngta hkan mata ya nga ai. "Moi, chyaba lap bai ashin ra sindai kun lu, ngai e bai abai hkyem mut nga ai." Bumnoi Ji myiman nhku de yin rai tsun dat nu ai. Shaloi gamoi shat lanap daw mi naw ngam ai galaw makai kau da nhtawm, lahpaw gatsu na chyaba lap sha shaw lang rai hkan nang mat wa nu ai. Teng sha, kanu da-lang kaw da sa dun dat ai hte, Ja Raw bai hkan shachyat dung jang, gawoi dwi hkan nyem apawpng la nna, salat hte chyi, chyaba lap ashin la rai, kanam jan dung ai panyep daw kaw hkan shadun nhtawm, gashu a lagaw kaw hpun dingshan gachyi law ai mi la ban ya in, da sing ya nu ai. Dai jahpawt gaw shanmoi ma la-yawng lu hkan ya sai majaw, ma hkrap nsen garai n na nga masai.

 U LA MAJAN

Jahpawt manap jan loi mi pram rai wa ai hte, Ja Raw gaw ndaw ya hkan hpum ahpra nga ai dumsu ni a hkum ntsa hkan langai kaw bai htawt jawn jawn rai gasup nga nu ai, dumsu ni n ri nna garin jahkrat dat dat rai jang, dabu kaw chyit chyit noi hkawm nga ai shaloi, ura wa shachyang lam de nna ndaw ya e le rai jang, Ja Raw dumsu shingma kawn gumshut yu nhtawm, ura wa hpang de kagat hkrat wa nu ai. Ura ndai gaw Ja Raw ladu hkrum ai shaning kraw ai, shingjat mi kaw na uhkai shi jan ting kraw ai rai yang, naw gaji ai ten e nkau hpe kalang e hta sha, nkau hpe ahkan e dun sha kau rai, ndai chyu sha Ja Raw hkrai pawn hkawm ai majaw, kalang hte ahkan a n-gup kaw nna lawt ai ura shingtai rai nga ai. Ura ndai hpe gaw kanu Ja Raw hpe hta shalen ai shani kawn, ma mung gasup manang shatai nna shani shana manat lang, nhpye kasha hkan baw gun, shi gaba ai ni a shingma kaw ba jang, u hpe gaw shingma e woi matep rai, grai nyi ai, Ja Raw ganing di shala tim hkraw, shana yup jang gaw dap dun e shingnoi singga hte dagup tawn, u goi wa jang shi mung hkan goi nang rai, nhku de prupru shangshang, gwi chyang yan hte mung manang zawn hkau ai.

Ura hkum tpawptpawp raprap rai, u jawban grai hkye tpawpm ai kaw ningma hkrai ashin asha rai tim, shi a nsam gaw grai hkye tpawpm ai, jawban singkung mung pasi zawn hka tpawpm nna, nhkaw matu zawn pai maga de loi ye rai, u du mun gaw soi palawng hpun tawn ai zawn rai, hkum ting na u mun gaw wan lap zawn rai hkye gabrim, ukan hku na mun achyang nana rai, u ningmai gaw dawnggawng zawn rai hkra magaw tpawpm ai, ahkye akang re jawban duwai gaw n-gu latup tup mai bang na zawn rai hkra noi abya, u na gaw atsit in dindin rai, myi tum gaw mut hkye rai, Ja Raw tsun ai ga grai chye madat ai ura rai nga ai. Nhku de kanu shat sha shaga jang, Ja Raw npan de nna ura dingla hpe singkaw maga mi kaw dun nna shang wa nu ai. Ura wa mung hkum nhkyeng mi rai hkan shang wa nga ai. "Ama nang a gasup kam kam wa, ura wa a singkaw pyi nhten gang gashin kau ya na law, dat kau u."

Gawoi dwi jahka dap e lahpaw kaw gashu hpe jaw na shat gumyon let tsun dat u ai. "Adwi, ura mammam." Nga let dap kawp kaw shatsap tawn nu ai. Shaloi u ra wa shat dun e u hkyi pya di dat sai, kanu pawt pawt ngu let: "Nbya nang e, masha ra yang dihkraw baila,ura yang masha jela ai da yo, u hpe mi nhku de chyu dun shang wa ai gaw!" Bumnoi Ji hkarang yi de ahkran sawm sa na sawn nna, gamoi hpe: "Moi, nanwoi dwi nta nga mu law, yi de ahkran sawm sa yang, ma ndai hpe ba de gaw nrai jahkawm de gaw nrai, abai na tai nga ai." Ngu u ai. "Ahkran sawm ai de anmoi lahkawng nsa yang yi-ngam nsa na rai nga ai, duhkra ladaw shachyut ra ai, htaw ninggu hpe tawn da ya ga, shi dumsu dat ai hkan woi hkawm nu ga." Gamoi jan grai sawn tawn chyalu re ai hku tsun u ai. Dawdap kaw pali shit dung nga ai gaji dwi shanmoi tsun ai ga na nna: "Tawn da mu, tawn da mu, ngai woi na, dumsu dat ai hkan woi hkawm na." Ngu hkam la nu ai. Layang dingla pali shabawn mi shit ngut ai hte, dumsu dat na jan she law hkra rai mat, labu hkan mawng kap ai pali lamun ahpu let: "Araw, dwila hpe ntsin kyedawk naw hpai wa ya rit." Nga let, shat dap de yu wa nu ai. "Araw e, loi- hkring an jidwi dumsu sa dat na re, nang dumsu jawn u e.

Chyang gam yan chyang kaw, nan gaw ntawt de sha ai baw she re, ndai kaw hkum sin nga sa, pru wa masu!" Layang dingla gwi yan hpe shachyut jang, gashu jan gwi yan hpe hkan pawn tawn nna n dat hkraw u ai. "Dwila, su jawnjawn, su jawnjawn." Kanu yan gawoi dwi yi sa wa tim, gaji dwi dumsu jawn na re ngu tsun sai majaw, n hkan ganan ai, shat sha hkru ai hte, ura pawn tawn rai la nga nu ai. Layang dingla wulawng shingkrang sa hpaw dat ai hte, dumsu ni gabu gara hte jit hpye ahkyi hpre rai pru wa masai, Ja Raw dumsu sula langai a nrung kaw noi goiwat nang nga u ai, Sinwa hka lam kaw du jang, dumsu sula wa e Ja Raw hpe ari jahkrat kau dat sai. Ja Raw gaw nga punhtau e nan hkra rai di hkrat yu wa nu ai, labu palawng agang mat rai, gaji dwi nta de woi wa nna palawng galai kau ya di bai apawpng ai: "Araw gaw grai myit su ai, jidwi dumsu naw sa gau sa kau da na, nang chyang gam yan chyang kaw ma, ura wa ma rai nta naw sin yo, dwila chyahkring mi rai jang bai wa na." Ngu jang, Ja Raw hkraw sai. Ja Raw labu palawng galai kau rai, ndaw e hkawm nga ai ura hta pawn dat ai hte, maihtawng wahpang maling de nna ugan goi pru wa ra ai, Ja Raw ura yan ugan achye hkat ai yu masa nna gaji dwi kaw nhkan ganan mat ai re. "Gade mung hkum sa lu, wudang shinggan de sa jang na gadoi sha ai ni nga ai, ndai ntawt kaw gwi chyang gam yan chyang kaw hte sha nga lu yo." Gaji dwi gaw gashu hpe kalang bai atpawpm matsun da di ai hpang, ka-ku kaw singgyin sha gun, lahpaw lang rai dumsu dat mat wa sai.

Gaji dwi dumsu dat mat wa sai, ntawt kaw chyang gam yan chyang kaw hpum nga ai, Ja Raw ura dingla hpe pawn nna, ntawt ngaugum matu e nunu bawkbawk re lagaw sha goiwat, du sha shayat tawn rai, ugan goi ai madat nga dangam, ura wa Ja Raw a lahpyen kaw nna hkindit pru wa nhtawm, ndaw ya kaw pyen du ai hte, singkaw hpunghpung nga hkra ahpup la nna goi hkrai goi gintan taw nga sai. Maumui hta hkai ai, maling de na ugan goi jang, nta u gaw: "Na bawnu krau sha kau ya na!" ngu goi gintan tan re da, shaloi ugan gaw nang gade daram byin nna nye bawnu lu krau sha na kun ngu, masin nsi let goi shanang hkrat wa let sa achye hkat hkat rai ma ai da. Ura wa gaw goi yang, ajan ginding dap, shata maiwang hkap na zawn nga hkra pyo ai, raitim, ugan e madat yu yang "Nang a bawnu krau sha kau ya na!" Sha anga nga ai hpe grai na pawt pawt rai u ai. Shan shada da goi krai goi shingjawng, goi jin nna achye hkat kap rai masai.

Ura wa hkum grau gaba tim, ugan hpe n dang, shan lahkawng du mun sha sharawt marawng tawn rai, yuyu lunglung achye hkat jin nna, jan pyi ngai rai mat wa sai. Layang dingla dumsu sa dat kau da nna bai nhtang wa yang, Ja Raw gwi chyang yan hte ntawt e dung nna u achye hkat ai naw yo nga mala ai. Ugan yan ura wa u jawban hkan u sai hkrai hkrai rai nga ai, shani shat sha ten kawn shana de hpun hta ten rai sayang she, kalang ta shingdu yon rai bra mat wa masai. "Araw grai kyet sai, chyang gam yan hte nta nga nna, u achye hkat ai yu ai nrai i?" "Dwila, u achye hkat ai." Ja Raw gaji dwi hpe grai tsun dan mayu ai re, ga n hkum ai majaw, nsa hte hke nga chye tsun ai hte tsun dan u ai.

CHYAHKYAWN NGAM

Ndum ai zawn nga yang, Ja Raw sak ganoi mali ning hpring wa sai. Shing rai, gaba ai ni mu galaw sa mat wa jang, shi hpe hkrai nta tawn da mai kam wa sai. Htingra ta bai du wa nna, jahpawt de Ja Raw ura wa hpe sa rim pawn rai, nta ndaw ya kawng marawn kaw jan sa kra dung nga nga rai jang, wa yannu ni mung shi a makau hku hkrum rai, sinpraw de myiman yon yon rai, hpang lagaw sha latpawpn tawn, shawng lagaw hpe hputdi tawn kau rai, jan kra kra re mu jang, Bumnoi Ji grai yu tpawpm dum tim, kasha jan ra ai hku chyai u ga, shaga shut jang hkrap na ngu, galoi mung n hpu ai sha, myit mi apyo ngu, dinghku bungli galaw kyin nga nu ai. Layang dingla dumsu rem mat wa, kanu yan gawoi yi de mu galaw mat wa re hpang, Ja Raw gaw kanu e lahpaw hte makai tawn da ya ai shat makai hpe, nbang shakum na ngauhkrau kaw sa mara tawn u ai. Kanu shi hpe jan le ra sanyeng hpun ndung kaw du jang she shani shat sha yo nga ai majaw, shi gaw shani tup tup sanyeng hpun ndung kaw jan galoi wa du na, shat sha ten galoi wa rai sana ngu hkrai maja nga nga rai u ai.

Shi shat rai n lu sha yang, ugan bai goi hkrat wa ra ai, shing rai Ja Raw gaw ura wa hpe sha rim pawn rai, npan de bai pru sa wa nna, ura wa hpe ugan la hte achye htawlang hkat shangun, ugan hte ura gasat hkat ai yu ma ai hpang gaw, kawsi na wa sai majaw shat makai hpyan sha kau nu ai. Shani shat sha ngut kau tim. jan n du hkraw, dumsu sa dat ai gaji dwi lawan n wa rai jang, u jawban hkan sai hkrai hpyahpya re ura hpe pawn lang, gwi yan hpe shaga woi rai, Uring ni a nta de sa chyai mat wa sai. Gaji dwi dumsu gau nna, nga sumrawn mi hkui lang rai nta du wa yang, gwi da, u da, ma da, wa da n nga nga la ai majaw, masin lawk nga ai ja, gashu hpe shaga marawn let, npan nbang tam dauyin si wa nu ai. Lahpaw sanat la lang rai pru wa yang, jahpawt shi pru wa ai shaloi, wudang adum sha la da sai, ya hpaw hka hka ai gaw, ma shi hpaw pru mat wa ai rai kun ngu, wudang kaw tawt pru wa nna, gashu hpe shaga hkrai shaga jang she, ura sha pawn kau rai, gwi chyang yan hte nta lam de angat rai hkawm lung wa mara ai, shaloi she Layang dingla nsa hpoi ngu myit pyo mat nna: "Araw, jidwi nang hpe shinggan de hkum sa she ngu sayang me, hpa rai pru wa ai rai?" "Ngai shawng ni kaw sa ai." Ja Raw nyep hkyi machyit la nna ura hpe jaw let, gabu gabu ngu tsun dan u ai.

Shanji dwi nta ndaw kaw sha naw du bang wa yang, wa kanu kasha ni hpe woi nna, nsa ashu nga nta de htim jinghkyen bang wa mara ai. "Maw maw, wa hkawn, nhpa rai kagat te ai rai?" Layang dingla wa yannu ni hpe hkap shaga yang, wa ni npu de kagat bang wa nna, wa tsip kaw hkyawm rai hpum mat masai. Layang dingla wa hkawn wa hkawn ngu shaga hkrai shaga tim, anyut nga sha htan let, abaw pyi aga kaw pyet di wa wup mat jang she, shan jidwi hkan mada yu yang, wa kanu a mayat lam achyen mi ting n kap mat sai. "Araw, dai yu, daini nang hpe wa sin ngu jang htingbu nta de lam mat nna, chyahkyon wa hkawn hpe ganoi sha kawa sha kau sai rai nga ai le." "Dwila, ngai htingbu nta n lam sai. Dwila, ngai ma wa hkawn hte yup sana." Ja Raw wa kanu a sai hkrai hkrai re dangkang hpe yu nna, grai yu matsan dum ai hku, wa tsip de hkan shang wa u ai. "Araw yup mayu jang nhku de she wa yup ga, wa hkawn kaw yup nang jang wa hkali kawa ai." "Ngai yup na, ngai yup na!" Ja Raw shani gaji kanu ni lawan n wa jang, wa hkawn yannu ni hte yup yup re masa nna, ya mung hkan yup nang na hkyem nga nu ai.

NAMDU HKA

Htingra ta Layang dingla yan gu ni yi sawm sa wa na re majaw, ma hpe hkrai nta tawn da na myit n hkawn rai naw myit ru mau ung-ang nga ma ai. "Araw, daini nang hkrai nta nga jang nhpa galaw na rai?" Bumnoi Ji kasha hpe ga wo wo yu u ai. "Ngai chyang gam ma, chyang kaw ma, ura ma rai sun de sa na, nawkyu pu pu ai sa yu na." Nga jang she, kanu kasha hpe ahpum la hkra: "Nu a kasha gaw grai myit su ai, nta kaw sha nga, shinggan de hkum sa lu yo, shinggan de sa jang na gadoi sha ai ni nga ai, ma a na grai tpawpm ai, lama nang shinggan hkan sa jang, masha ni na sa gadoi di sha kau ya jang n tpawpm mat na ra ai. Dai yu, nu shat makai kaw chyitchyit mung ju bang sai, jan sanyeng hpun ndung e du wa jang she sha lu yo." Bumnoi Ji shat makai hpe raphkawp kaw mara tawn ya let tsun u ai. Kanu ni rai mat wa ai hpang, Ja Raw ura hpe rim pawn rai, gwi chyang yan hte shachya lakang hku yu wa nna, sun e wandu pu pu tpawpm ai kaw, gatnen ni nampan shadung sa ahkyen shakap ai yu, lagat ni magyi kaw nampan shadung bubu rai hkra shakap la rai pyen mat wa ai sha hkan yu chyai nga yang, mare shingnawm de ugan bai goi hkrat wa sai. Shaloi shi hte rau hkawm nga ai ura wa mung goi krai goi taw gya nna, sun nhpan hku pyen pru mat wa jang, chyinghkrang hkrang chyang hkan pyen gaboi ai palam la rim yu rai, ura wa ugan hte gasat ai bai wa yu mayu wa rai, nhku de bai wa mat nu ai. Ndaw de pru wa na hkyem ai re, chyinghka shinggan de nna shajup la kau da sai majaw, n lu pru wa rai, nbang de bai sa wa yu yang mung chyinghka tingting hkanghkang, kawa tawng hpe sumri kaw shingla manai dangla kau da sai.

Chyang gam yan chyang kaw chyu sha shi gade rai wa yang, gade hkan nang rai nhku hkan gahkrang nga ai ten, shinggan de Mawda Kaw a kasha ni shi hpe sa shaga dat masai. "Ja Raw, anhte Namdu hka de chyahkan sa hkui na, nang yi kam sa?" Mawda Kaw a kasha Ma Hkawn kanau yan hpe woi nna, ka-ku sha gun rai ndaw ya e sa shaga tsap nga masai. "Sa na! Sa na!" Ja Raw nhku maga de nna she htawlawt hkra htan dat jang, Ma Hkawn chyinghka shajup tawn ai pali raw kau ya rai hpaw woi la nu ai. Ma Hkawn gaw sak sanit ning daram rai sai majaw, kanau ni hpe chye woi hkawm ai hte maren, Ja Raw hpe mung kalang lang woi chyai chyai re nhkan e, chyinghka shajup pali sa raw kau nna, Ja Raw hpe woi lang rai, Namdu hka de chyahkan hkui sa mat wa masai. Namdu hka kaw du yang, Ja Raw gaw manang ni hka kau hkan nlung galau galap, chyahkan galau ai mu ai hte shi mung hka de shang nna nlung hpai galau ai re, nlung gaw n lu galau, hka hpunla e chyau me shi hpe htu shayawng mat wa sai.

Hka hpunla kaw bai pru bai shang rai yawng mat wa ai, nlung labra hku yawng lai wa ai kaw, nlung lungkran e hpun punghkaw langai nda hpan rai wa dang nga ai kaw, singtsi sha wa lu ahpum hkring lu nu ai. Hka marit nna, hkrap let ladi hku, n-gup hku hka prat madawn dat nga ai kaw, Ma Hkawn e sa dun la lu ai htawm, hkrit lahkrit hte nta de lawan wan woi wa kau sai. Shana de gaba ai ni nta du wa ai shaloi, labu palawng madi bam nga rai, ganing re lam san jang, "Nu, ngai chyahkan hkui sa ai." Nga ai sha chye tsun dan nna, Bumnoi Ji masin hte lawk nga, Ma Hkawn yannau ni hpe sa mu san ai shaloi she, hka kaw ganoi yawng mat wa ai ngu hkap tsun dan ma ai majaw, masin pyi abrut di kau ya ai zawn ngu hkra hkrit kau let, nhku kaw sha rawng nga ngu yang, shinggan de chye pru wa ai gaw ngu, lam e taw ai maichyu lasik ret di hta lang, Ja Raw hpe she gayup gumkan wa hkra gayat dat nu ai. "Ma Ji e, ma shate law ai hpe sha me shade de gayat ai, na hkum kawn lu dat ai ma nre ni?" Ndaw e tsap nga ai Mawda Kaw, Bumnoi Ji shi hpe ma gayat shanaw ai ngu myit la nna, sa tsun dat u ai. "Shawng, nye hkum kawn pru wa ai re ngu gayat nga nngai, ganing kana rai yang gaw hpang hkrat mat na sha rai nga ai le, amatsing di u ga ngu gayat nga nngai." "Hkum gayat sa law!" Mawda Kaw Ja Raw hpe ret di hta pawn la kau jang she, Bumnoi Ji shingna gabai kau, ma bai pawn la rai, nta de wa mat masai. Lam lapran e ma hpe grai naw anyam pawt nga nu ai. 

MAITAU RU

Layang Gam galoi she wa wa ngu, la dingda nga dangam, Ja Raw pyi mali ning hpring mat sai. Yinam tawng wa ai lani mi hta, Layang dingla npu na dumsu gau pru wa jang, Ja Raw dumsu nrung kaw noi nna hkan nang pru wa wa rai u ai. Dumsu ni nri nna nga hkyi bum hkan ari jahkrat kau da da rai tim, shi gaw hkrit chye ai nrai, shi lep ai dumsu a nrung kaw bai hkan noi goiwat nang nang rai, gaji dwi gaw masin lawk lawk ngu hkan tsang si si rai: "Araw e, nrai ma ai law, dumsu ni myit n rawng jang ganing di na." Nga hkan daru ru rai u ai. Ama shi kaw hkan nang na hkyem jang, gaji dwi ugan goi ai na dat nna, gashu hpe: "Araw, ugan bai goi hkrat wa re ra ai law, nang nta kaw ura yan achye taw hkat ai yu nna nga yo, dwi la dumsu naw sa dat kau da na, chyahkring sha bai wa ai." Ngu jang, gashu um nga du ngat rai, ura hpe sha rim pawn rai, ntawt kaw bai wa dung nga nu ai. Layang dingla dumsu lawan sa dat kau, pali shit na nam kawa kran hpai rai nta de wa yang, gade hkawm sai ngu tim kawa wa-hpang kaw sha bai gayin pru wa wa rai nu ai, maitau ru she gatut sam sai ngu, kawa yan kaw dung nna shaji maya la rai, palawng matu hku gwi a wa hkali din di kawa achyak la yu rai rawt hkawm mat wa jang she, nta lam de hkawm pru wa lu nu ai.

Dai ten hta jan du nsin sin wa nna, buk galwi hkamhkan u ni pyi shaga garu nga ai. Maitau ru gatut nna nta lawan n du wa ai Layang dingla gaw masin kaw wan e nat galip tawn ya ai zawn nga gahtet machyi let, dumsu pyi galoi n gau ai, kawa yan mung gabai ndeng kau da rai, lam lapran chyang lu ai daram mi kagat, Sinwa hka hkaraw kaw du wa yang, ma tam hkrat wa ai mare masha ni hte tut hkrum rai sai. Ja Raw gaw shana de tup gaji dwi hpe la jin ai majaw, shi hkrai sha gaji dwi dumsu gau mat wa ai Sinwa hka seng lam hku nna, Lagat lungpu lam hku hkan mat wa ai, jan gaw shang mat wa, nsin gaw sin wa, gaji dwi hpe shaga yang n htan rai, Lagat lungpu makau hkan sa mau dauyin hkawm nga ai lapran, chyahkyi shannga ni nrung marawng marang re, shi a makau hku lai sa lai wa rai htaw hkawm ai sa mu nu ai, shi gaji dwi hpe gade shaga yu tim, htan ai mi n nga sai.

Shana de she kanu shi hpe shaga ai na dat nna, aja wa htan dat ai re, nsen n pru hkraw sai, mare masha ni Ja Raw Ja Raw nga shaga she shaga nga ma ai, shi gade htan yu tim nsen n pru hkraw nna, hkrap let gara hku hkawm yang she kanu hte hkrum na kun ngu lam naw yu nga yang, chyang gam yan chyang kaw hprawt rai kagat du sai. Gwi yan shi hpe mu ai hte, ningmai gangat n-gup ladawn tawn, ana hkayawm kau rai "Si si" nga shara magup mata hkrai mata dat ya ai shaloi, "Chyang gam!" ngu shaga dat ai hte she nsen hkawn pru wa lu nna, kanu hpe shaga hkrai shaga let, gwi yan hte nta lam de hkawm wa ai lam kaw, kanu ni hte hkrum rai, Bumnoi Ji kasha hpe mu ai hte, masin machyi masin pawt mayu ai nji n-gu nga wa ai lata, maidang kaw kalang sha pyi naw gahpret dat ya n-ga ngu, ta shawn di sharawt dat ai hte, Kasan bum lagaw de sharaw grut ai nsen bai na dat nu ai, shaloi shi gaw kasha hpe hkum e kap di pawn kau, nta lam de kagat mat wa masai, mare na la ni gaw num ni a hpang kaw tungtung hkan nang, num ni gaw shawng rai, lam she n hkrup hkra htaw mat wa masai. 

ZAIBRAWN NUMDA

Ja Raw hpe tam ai shana de sharaw grut ai na lu ai kawn, Bumnoi Ji kasha hpe hkrai nta n kam nga shangun sai, gaji dwi hte mung n kam tawn da sai, shi ganang sa yang ganang woi hkawm, lu hkawm ai hte hkawm, n lu hkawm jang shingnoi singga kaw hta baw gun di u ai. Bumnoi Ji yannu mare masha ni hte Ga-du gat sa nna wa ai lam kaw, Ja Raw lam gadawng n lu lung mat rai, kanu e shingnoi kaw bang gun wa u ai. Zaibrawn numda kaw du wa ai shaloi, Ja Raw kanu a kara njaw kaw gang tawn: "Nu, htaw yu, htaw yu!" Nga tsun ai majaw, kanu dawn rai tsap nna, nhpa wa re ta e ngu, lamdung lahta maga de mada dat u yang, hpun kaw hkram nga ai ruban ru ntsa kaw puhkram gram nga ai. Shaloi, dumsa gaba Uring dingla matan dat jang, lapu n chye shamu mat ai lapran kaw, rau hkawm ai wa-ngan la ni sa adup sat la manu ai, adaw daw di gatawng daw nhtawm, masha hkum shagu hpra hpra garan la kau masai. Bumnoi di gaw lapu daw gun ra rai, kasha hpe lam hkawm jasat shangun, nta du wa pyi ndawt, lapu daw azat mani la nna, jum bang gayau la rai, langa hpaw hte mayon la nhtawm, dumsu gaba ni hpe jaw kau nu ai. "Araw, nbang de wura kawa wa-hpang gaba kaw punui puhkram gaba nga ai, wa-hpang de hkum sa re lu." "Nu, dumsu lapu chyit chyit sha ai." Ja Raw dumsu kanu ni lapu shan maya sha ai yu nga nna tsun u ai. "Ndai gaw gaba ai ni sat ai she re, ma gaw naw gaji ai, lapu ma hpe kan de chye mayu bang kau wa ai, ya hpang de lapu mu tim hkum gayat, yat yat sha hkawm yen kau da ai baw re."

AHKU HKU TA

"Araw, gwi kumhtawng sa hta la su!" Bumnoi Ji wa shat kaw shat hkyep mu n mu di amya gayau bang rai, Ja Raw la shang wa ai gwi kumhtawng kaw chyagawt bang nna, gwi sa yo shangun u ai. Chyang gam yan chyang kaw wa shat hte gayau ai gwi shat n sha ya ai, ladi hte sha sa manam yu tawn kau kau rai, yu nga ninglen, gwi yan a akan lani hte lani ahpa leplep rai hpa lasi mat wa sai. Bumnoi Ji Ga-du gat de gatraw gatrai gun rai, ahku tam sa wa hkyem nga ai ten, ndaw de ma kyek hkrap ai na dat sai, ndaw de htim pru wa yu yang, mare na Ja Raw kaw sa chyai hkrat wa ai ma langai hpe chyang gam yen e hkap kawa tawn manu ai. "Goi law goi law, ma e, ya gara kaw kawa ya sata? Gwi matse la ai ngu yang, tsan tsan kawn shaga dat na n nga ai mi!" Bumnoi Ji ma hta pawn la rai nhku de woi shang wa nhtawm, sai lwi ai lagaw de yu ya u ai, magyi pawt kaw gwi wa hka lahkawng kap sai, shi gwi mun baw la, shatdi na shat lawan amya la rai ningma kaw achya ya di, hka bai ru hkaw rai, magyi na sai ngap jang she, ma dai hpe ba nna, u chyingjat na udi hkum shi hta hpai rai kanu kawa ni kaw sa tawngban mat wa sai. Yi-nam ta marang gaw shani shana nsim nsa htu abya nga ai, nsi naimam ni rai n myin lu ai lapawp kyek ten hta, ahku hku, shat n lu mat, masha sha na shat pyi n lu, gwi masha bai kawa dat rai, Bumnoi Ji hkrap let kagu hpe: "Agu, gwi sat sha kau ga law, gwi gaw masha sai manam hkrup jang, loi nhkring ai chye kawa ai da, ahka n dang wa na, ngai mung ahku n dang tam sai, daini jang masha saw la nna, ngai n mu ai shaloi sat kau mu." Ngu tsun kau da rai gat sa mat wa nu ai.

Layang dingla yan mung lagaw lata lapyin n rawng mat wa, kanam jan hpe ahku tam lawm na atsam gaw n lu, sengmaw sa ai kasha wa gaw n pru wa rai, kanam jan nhpa tsun yang nhpa madat ya ra sai. Gwi yan pe gade nja let matsan dum tim, kanam jan sat kau nga sai majaw, kagu mare na la wa-ngan marai mali manga hpe shaga la nna gwi sat kau shangun sai. Ja Raw gaw gwi sat kau ya ai nga nna, shani tup hkrap chyu hkrap, gwi ju ai shaloi garai n si ai majaw nyang pru wa jang, Ja Raw hkrap let gwi lagaw sa gang, gaji dwi gaw myiprwi mayut kau, gwi yan hpe masawp let: Nan masha hpe kawa ai majaw, daini ndai zawn byin ai masa re, nannau myit mi apyo rai nna wa manu ngu matsun shabawn kau dat nu ai. Chyang gam yan chyang kaw hpe sat kau ai hpang, Ja Raw machyi mat hkra garen mat sai. Shing rai, Bumnoi Ji mayu nta de u pra kasha langai wa hpyi tawn nu ai. Ura dingla gaw u pra kasha wa tawn dat ya ai shani kawn, Ja Raw sa pawn dat shagu lahpre pru mat wa wa rai, u pra hte ndi nhka rai, ntsa de hkrai lung jawn jawn re hpe mu shagu, Ja Raw gaba ai ni a man e, "U shinglim bai ahpu jat ya sai! U shinglim bai jat ya sai!" Nga nna marawn dat jang, gaba ni ai gaw kaga de yon yon rai du krung pyi n sharawt ai dung mat mat rai ma ai. Shi u shinglim jat ya ai nga nna tsun ai gaw, u pra hpe nnan la wa ai shana de njang, ura wa gabu gara hte u pra kaw wuli lun nna lung jawn dat sai, ma gaw hpa n chye ai majaw, ura hpe maibau hpunhpyi hte hta gabai dat jang, kanu ganing n chye ngu nna: Ura u pra kaw u shinglim ahpu jat ya ai re ngu tsun dan ai matsing la nna, wuli lun shagu u shinglim jat ya nga ai, nga nna hkrai tsun nga nu ai. 

HKUMPYI HKYET NA CHYAHKYAWN

Wa la ginhtawng htawng wa sai, shaning yi-nam hkren marang htu ai majaw, shangu galup ai ten nau na mat n na, nta hkan na shangu gaw gu kau ra ai hkrai rai sai. Shadan nta ni shawng shangu htat aga saw masai. Bumnoi Ji gaw madu wa rai mat wa ai mali manga ning du wa tim, lungseng awng ai shiga n na, nta galoi wa ai nga ai shiga gaw, laning mi hta ginhtawng htawng wa jang, kalang lang gaw du tim shi n pru wa ai majaw, myit daw wa, kagu yan gamoi mung myit pu nna, n-gun lagaw grau kya mat wa, bungli gaba n dang galaw wa masai. Gwi yan hpe sat sha kau, u yan mung shan hkrai chyai mat, dumsu ni kaw gaw jahpawt sha lu jawn chyai mat rai, Ja Raw gasup manang nan n lu mat rai, shi hpe hkrai nta e jan daw mi pyi n wam tawn da sai. Shadan nta ni kaw shangu htat ga sa ai shani, Ja Raw hpe woi sa nu ai. Gadawng hkan gaw jinghpa hte dangkang kaw mahkai nna gun, numda ai kaw gaw hkawm shangun rai woi hkawm, numdu prang hkan, Ja Raw gaw woi kasha zawn, hpun ndung hkan noi goiwat gram hkawm chyai rai, grai pyo dum mat nu ai.

Shana de, tingsa ajan Kasan bum kaw bunghkum nna gayau mat wa ai hte, shangu htat ai num ni jan du sai nga, shangu shabawn shajup gun, madu kasha hpe shaga la rai, ningsin garai nsin yang Hkumpyi hkyet kaw lai lu hkra nga rawt mat wa masai. Dai re, Hkumpyi hkyet kaw garai n lai yang, hti pyi ndang hkra re chyahkyon wunawng ni Hkumpyi hkyet she mut mat hkra hkawm nga mala sai. Shangu htat ai gaw num ni hkrai rai nna, laknak gaw shangu htat ai nshau hte zingret sha rai nga manu ai. "Shaw! Shaw shaw!" Nu num ni myit htum myit si, ganing n chye rai, shangu magun gun ashun let jahtau hkrai jahtau marawn jahkrit nga ma ai. Chyahkyon ni gaw htim na n htim na nga, baw sharawt tawn hkyot hkrai hkyot let, chyahkyon du wa hpang de mada nga ma ai.

Gaba ai ni jahtau marawn ngut ai hpang, Ja Raw gaw grai sam ai masen, grai na pyo ai ma nsen hte: "Chyahkyon, shaw! Shaw! Shaw!" Kasan bum ting hpuntang she gashaw hkra marawn dat jang, chyahkyon ni agajawng sha hkyum hkyum rai Hkumpyi hkyet kawn nam maling de bram rai hprawng mat wa masai. Shaloi shangu gun ai nu num ni Ja Raw hpe shakawn let, shangu lit hte shim rai nta lam de kagat ru mat wa masai. Nta du wa ai hte, Bumnoi Ji kagu yan gamoi hpe Hkumpyi hkyet e byin ai lam wa tsun dan jang, gaji dwi gashu hpe hkap pawn la nna: "Ma ni a baw kaw sagya dung ai da, chyahkyon gaw shanhte hpe n shut jang, masha hpe n chye htim ai." Nga tsun let, gashu wa na shawng e daphkun kaw ju tawn ai naisam le ahpu la nhtawm, gashu jan hpe kawp jang she sha u ngu matsun let, chyinghkyi e noi ai kasha hte shanwa a dumhpau sanat, wantsi nhpye ni hpe yu nna, nhtung de yon rai dung mat nu ai.

SHARAW MANG

Mare baw nhkrem de rai nga ai Layang nta na chyang gam yan chyang kaw hpe sat kau ai hpang kawn, Nhkre mare de malat, ahkan kalang ni uhkrai sa rim sha shatsang, sharaw, chyahkyon nga dumsu ni hpe zingri zingrat, wa du wa tsa rai ni mung nta wa hte gayau gaya nga nna, wa ninggyi shabat hkat rai, mare ting shinggan pru na pyi she n gwi mat masai. Layang ni a npu na dumsu lahkawng masum hpe, sharaw e npu e nan sa kawa sat kau ya, Uring ni a nta na gumra hkyima lahkawng mung sa kawa sat kau ya rai, mare masha ni yawng gaw, Hpakan sengmaw sa mat ai jaugawng gaba Layang Gam, Hpawjum Awng, Lunghpra Naw ni nta nga taw gaw, hkan sharaw shade n dingsa na rai nga ai nga tsun jahta jang, madu jan ni gaw madu wa ni hpe marit ai lam mi, nam na matse labye ni hpe gasat ra ai lam mi rai, dinghku gata hta dumdum htehte alum ala rai nga na hpe marit rit ai gaw, tinang hkrai sha gade lang lagu hkrap la rai, ten nhtoi hti let la gajang nga ma ai.

Sharaw gade daram masha nga n mu ai gaw, Uring nta ni a gumra hkyima lahkawng ting, shawng hpang rai sa kawa sat kau ya ai kawn, Uring wa masin nsi si ai, sharaw hpe mu taw nhtu hte aga hte gayau gaya rai hkra azat mani kau na zawn ngu let, Tahpyin gat de sa nna, sharaw hkam chyinghtep gaba langai sa mari wa nhtawm, Namlai hkyet kaw sa hkam tawn jang, lapa noi rawngba lahkawng hpe shawng hpang di lu hkam sat kau nu ai. Sharaw lu hkam shagu, Uring wa gaw Woi mangan hkyet na lungbyen kaw sharaw mang wa sharawn tawn, mare na du kasha Htu Raw hpe shaga la rai, shi a shalaw labu sharaw hkum kaw sa jahpun tawn nna masawp let, shali hkrai shali hkrap shangun ngun rai, sut mayut la ngut, hkrap ngut ai hpang she sharaw hpya hpya rai ma ai. Ma ni sharaw mang makau hkan gasup nga ma ai, hkrap ngut jang, gaba ai ni pyi rai n jin yang, Ja Raw gaw nhkrit nkang rai da labu gata na sharaw wa galap yu u ai, shaloi gaba ai ni gaw sharaw hpya na she malap kau hkra Ja Raw hpe hkrai shagrau jahta let dung nga ma ai. Rawngba lahkawng ting sat kau sai nga hpawmyi num ni, ya chyawm Lasui hkyet de wahpum si, wa shagreng si, n-gai kawng si grai si ai, dai kaw woi la-gang ni hte namsi sa gashun di sha na matu hpa n tsang ra sai nga, myit pyo mat manu ai.

LUNGPA

Jahpawt manap jau jau, mare na jawngma ni masa da-lang kaw lai mat wa wa re hkan mu ai Ja Raw gaw, kanu hpe shi mung jawng lung mayu ai ngu tsun jang, kanu gaw jawng grai lung yak ai, nang naw gaji ai, ya gaba jang lung na re ngu hkrai masu kau kau di u ai. Ma jawng lung nau tsun jang, yup gawk na shi jawng naw lung yang lang ai lungpa hte gamgu wa shaw la nna, kasha hpe ABCD hti sharin, ka sharin rai, ma ga shangap ngap di u ai. Bumnoi Ji naw gaji yang, htingnai ga jawng lung nga dangam kaw, Layang ni e jawng sa lam kaw na lagu hprawn abrut sha mat wa nna, jahpan kumba shang kau, hkungran jaiwa sha wa kau di la kau ai hpe grai n ra u ai, shing rai shi jawng lung yang lang ai lungpa hte gamgu hpe sumpu e nan bang makoi tawn ai re, kasha jan jawng lung chyu gazik ai majaw, shi zawn ngu lung mayu ai she nrai nga dawng ngu myit htai la let, nja nja sha ngu shaw shapraw nna, kasha jan hpe laika sharin ya u ai.

Laika chye hti wa magang, Ja Raw jawng de n sa n lawt nga hkrap shatsang ai majaw, shi mahkawn prat e da ai ka pawng myi nhpye kaw lungpa sha bang shagun nna, jawng de dat dat nu ai. Jawng sa shangun ai jahpawt nan nan, nta wa lam kaw lungpa noi ai sumri tsam mat sai majaw, lang nga dangam kaw sumri di mat, lungpa aga de pya rai lungdin kaw hkra nna lahkawng hkrawng rai mat sai. Ja Raw ga mat ai lungpa masawm hpai rai nta du wa ra ai, kanu gaw lungpa hpai ai mu dat nna, mahkoi shadaw kau sai kun ngu myit du ai hte hkap yu dat yang, gaja sha shadaw kau ai mu dat ai hte, shatdun e ru tawn ai hpun chye langai hta la nna kasha hpe abung ngu gayat galau tawn nu ai. Dai hpang e, sara ma Wa-shut Kaw gaw ma chyu shachyu let, htang kaw yu nna bai hta shachyaw bang tawn ya nu ai.

Lungpa daw mat tim kanu shi hpe laika sharin ai lam gaw dingyang n shingdang ai, kasha hpa pyi n chye ai ma hpe hkrai gayat yat re lam shut dum nna, shana shat sha ngut ai hpang, wan wut tawn, dap hkun hkan ka shangun, nta hpunpyen hkan ka shangun rai u ai. Dai ten hta jawng gawk langai mi kaw jawngma hpung lahkawng sharin ai, Nhkum Gam gaw ma gaji ni hpe sharin, Wa-shut Kaw gaw jawngma gaba ni hpe sharin rai, Ja Raw gaw nta kaw kanu e sharin yu sai re majaw, jawng kaw laika grau chye ai jawngma rai nna, sara e shani shagu shakawn hkrum hkrum ai, jawng lung kam kam ai, yup na pyi n shai mat hkra rai sai. Ja Raw jahpawt jau jau rawt nna, kanu kaw chyu sha hpyi chyu la rai, jawng de sa sa rai u ai. Dai re, laika kanu sha naw sharin ai, nsen kanu pyi rai n sharin lu yang, sara yan hpe la-hka n lu jaw mat ai majaw, ma ni jawng n lu lung mat sai. Bumnoi Ji dinghku gun ai mahkyit mahkat nga let, da gaw da mayu rai, jau jau rawt nna ndaw kaw da sa da dung nga jang, Ja Raw hkrai hkan abai bai rai nga ai. Shi hkan abai jang, gawoi dwi e shi hpe chyaba lap, wa-hpyet ru, wubawng ru ni hte da da sharin ai, lasut lalap ni chye mat sai.

Lani mi, Bumnoi Ji shi da ai labu langai da ngut nna, kasha hpe ri mahtawng garan ya rai, mahtawng matut shangun, ri matut ma jang, da sing ya nna, kahkum tum maka ka sharin u ai, kasha jan kahkum tum maka n chye ka nna, ya sha shut shut rai jang, Bumnoi Ji shi a da na shingnat shaw la nhtawm kasha jan hpe: "Htui! Ma yau mung, ndan re maka sha pyi n chye hkraw ai mi, da da na chyu gazik ai, hkum da sa!" Nga, shabyi kaw mayen shawng mahtoi bun, shingnat hte agying bai gayat dat di nu ai. Shaloi gawoi dwi gaw: "Ngainam e, da nnan sha naw da sharin ai, chyu pyi rai n ka ai ma hpe, dingsa dingla di gayat ai, ma hpe da da sharin ai gaw ngai she re, gayat mayu jang ngai hpe gayat rit!" Gamoi gaw kanam jan ma gayat jang, shi hpe pawt ai re ngu htai la nna, ma sa nyem la let: "Ngaishu gaw n hkrap law, n hkrap law, dwi sharin na, kahkum tum sha kun, chyahkan lagaw, ka-ni pu, shalip lakang, kawang, singgaw ma hkra sharin na!" Nga tsun let, myiprwi si sha lagu gatsut la la rai, gashu hpe dun la nna, chyahpung maga kaw chyahtai langai shapyan nyep tawn rai, da-lang jung tawn hkra rai, dahpran dit tawn di, da da sharin bang wa masai rai.

 SHINGKYIT

Ja Raw da nnan chye da wa ai hte, gawoi dwi gaw gashu hpe kawa a matu shingkyit langai woi da sharin u ai. Teng sha Ja Raw ntai nmai re shingkyit da ngut ai gade nna yang, Layang Gam sengmaw ga kawn nta du wa ra ai. Shi du wa ai shana, kasha gaw asak manga ning jan rai mat, kara gaw lim lim rai gawoi dwi a shingdu de makoi let kawa hpe lagu yu taw nga nu ai. "Ma e, gai, wa hpang de wa yu rit, wa nang hpe kumhpa jaw na." Layang Gam kasha hpang de ta ladawn nna shaga u ai. Kawa rai ndu wa yang gaw shani shana "Wa wa jang... " nga nna lahka tsun ai, ya mu ai shaloi gaw gaya mat nu ai. "Araw, nang ningwa hpe jaw na nga nna da ai shingkyit wa la ya su le." Gawoi dwi tsun shadum dat jang, Ja Raw shanwoi dwi a yup gawk de kagat dingding shang wa nhtawm, shi da ai shingkyit la pru wa ra ai. Shi gaw pai ta hte myiman shingga tawn rai, hkra ta hte kawa hpe shingkyit ladawn ya nu ai. Kawa gaw ma chyangai e nau hkrap nna tawn kau da ai ma, ya shingkyit pyi chye da wa hkra rai mat sahka ngu, kasha hpe shingkyit hte kalang ta chyit di pawn la nna, gabu myiprwi pru let: "Ngaisha gaw kyet sai!" Ngu shakawn dat nu ai rai.

Hpan Ja, Maran Kaw Shawng