Moi shawng de, la langai mi nam kaw yi hkyen sha nna nga ai, shi a yi gaw Lung hpra bum makau kaw galaw ai yi dinghkrai rai timung, mam grai gaja tsawm ai majaw nachying gabu nga u ai. Mangai ta du sai hte maren, yi na hkai nmai naimam ni myin tsawm wa ra ai, rai timung yi shingnawm kaw manu mana law ai woi wu-nawng gaba hpung mi nga ai majaw, shi a yi na mam chyu sa lagu abrut di sha sha rai nga ai. Dai woi ni gaw masha hpe n chye hkrit aihta n-ga, ladu lai nna ju dik la nga ai, yi baw de shachyut dat jang, kyik e kak e nga yi htumpa de mawng mat wa, yi htumpa de sa shachyut dat jang, yi baw de bai hprawng gayin lung wa, shani shagu yi baw yi mai gade shachyut ningwan hkawm tim mung, yi ting na mam ni sha ma kau wa sai majaw, myit gade machyi tim ganing she n chye di nga ai.
Lani mi hta, jahpawt nhtoi pyi rai n htoi yang, la dai wa gaw bunpun palawng atsai sha raw shakrin kau nhtawm, hkum ting nawhpu chyahkang achya anya shakap la nna, yi shingnawm kaw sa galeng kra nga nna si masu su nga sai, woi ni sa mu gajawng dat nna shi hpe sa lagu manti manam yu, ganpa npu, lagaw lanpan hkan jawm gajuk ya tim, sa-tik tik tawn sharang nga sai, shaloi masha mang shadu nna shi hpe woi ni jawm hpai gumpom mat wa masai. Grai grai sung ai akrung sinwa, nhkap nchyap, lunghpra lungma ren-gam ntsa hku hpai lai nhtawm, jahtum e asin amun mana maka sung ai lungpu gata de hpai gumpom shang wa manu ai. Lungpu gaba dai gaw woi ni a nta htingnu rai nga ai, shi hpe lungpu gata na natra kaw wa hpai gabai sharawn tawn ai shaloi, myi jila di lagu yu dat yang " SI YU J!» datshin kaw na nat num ni, Htang Sin hte Chyuba Gai hpe shadu shamyo sha hkyem ai zawn, dijang gaba kaw hpunlum se se re shadu shaprut tawn rai, masha mang makawi ai shaloi na zawn, gabung dum anut si nga ma ai hpe mu dat sai, gabung dum let ozo zo ai mung rung she nga pyaw nga yang, woi gasha ni gaw kawsi ai hte sha mayu ai hte re majaw, woi ganu ni hpe lawan shadu sha saga ngu gade sa tsun aput tim, woi ganu ni gaw hpunlum loi mi naw prut u ga nga htan masu nna gabung dum kyin si nga ma ai.
La dai wa lungpu kaw na shakum de bai lagu gayin yu dat yang, shakum ting manu dan dik ai ja rungrai, sechyu hkachyi, lankawn, ta chyawp, shawa nang, gumhpraw nhpye n-ga, dinghpau sanat re ja rai ni noi sumbyau tawn ai mu dat nu ai. Shaloi la dai wa aja wa "Sa-wa woi hkye ni e..." ngu rawt jahtau marawn bukbak dat ai hte, woi dai ni gajawng ai lata, numla she dam hkra, lam pyi n hkrup ai hprawng ayai mat ma masai da. La dai wa n chye tsun hkra gabu awlaw let, woi ni noi sumbyau tawn ai ja rungrai ni hpe htawm magawn hpai la nhtawm, wa dut sha nna lauban byin mat sai. La dai wa agajawng sha lu su mat ai hpe htingawu la langai yu manawn si wa nu ai. Shi kaw shani Shagu sa chyai masu nna: "Hkau e, nang hpa hpaga ga una awng ai re ta? Nhpa galaw nna gumhpraw dai daram lu mat ai re ta?" nga sa san atet tet re majaw, ganing rai byin ai lam ni hpe asan sha htingawu la wahpe tsun dan kau nu ai.
Htingawu la wa grai na gabu let shawng na la wa chya ai nawpu chyahkang hta grau hkang ai nawhpu chyayat hkum ting hte achya anya shakap la nna, yi ya gaang na punghkaw gaba kaw sa si gumpa taw masu nga nu ai. Gaja sha, woi wu-nawng dai ni bai yan pruwa ra ai, woi ni shi hpe sa mu dat ai hte, annte a ja rai la kau ya ai ndai wa rai jaw ai ngu nna, woi nkau mi gaw ndai wahte n bung ai nga naw tsun garu nga yang, woi lup dingla wa shi a n-gun tup hte asi asat htawng hkindit dat yu, bye lahtum dat yu, hpai gumpyek chyam yu di tim, la dai wa myidi shim hkam sharang kau ya sai, shaloi woi ni shi hpe si mat sai shadu nna, grau tsaw dik ai arim ntsa na hpun ndung kaw noi ai numru hku hpai gumpom garawt lai wa nu ai, dai ten hta shi lagu yu dat u ai, nau yu hkrit ai majaw "Atsawm di mu lu!" ngu tsun dat ai nga yang, woi ni gajawng ai lata shi hpe ram ram sung ai arim gata de tat jahkrat bang Kau dat nu ai.
Dai majaw Jinghpo ga malai: Hkau pyi rai a lu ngu nhan mai rai ai da. Shingrai, hpawng shingra hta raitim, gadai mung gadai a pungaing gam maka ngu ai nga ai, manang wa a gam hte nang a gam maka gaw galawi rai tim bung nan rainga ai majaw, manang wa lusu wa ai ngu, manawn masham ai myit, aloi ali hte lusu nga mai wa na hpe hkum myit, manang wa pyi rai ai ngu n mai hkan galaw nang ai, n myit madawm ai nhtang de rut rai wa chye ai hpe shadum jahprang ai maumui mausa rai nga mali ai.
Tangbau Sharoi
