HKAIKE A TSINYAM
Shawnghtawk Tsing Pan
Moi shawng de nam maling kaba na hpun kaba langai a hku gata hta, u hkaike yanta hte kasha lahkawng nga ma ai da. Kasha yan singkaw loi kung wa ai yinam ta lana mi e, nbung laru hte marang kaba wa ai majaw, kaga hpun nkau ni hte dai hkaike hkannu ni rawng ai hpun mung daw agrum mat sai. Hpang jahpawt nhtoi htoi jang, u hkaike kanu yan kawa gaw kasha yan hpe hkan tam ai shaloi, gana hpe sha mu tam la nna, hkaike ganau la hpe n mu mat ai kaw nna, kanu yan kawa hte gana gaw, mat mat ai ganau hkaike la hpe aten na na hian tam mat wa masai. Ha-ni mangai ngai ai lani mi na aten hta, hkaike wuhpung kaba hku, ka-ni chyu, ka-ni si di sha rai pyaw shajang chye ma ai shiga Lam hpe na ai majaw, bum shagawng shagu na ka-ni yi hkan shannu wa ni masum garan nna japjap hkan tam hkawm ma ai da. Shaloi, Lani mi na ten hta, ka-ni gatsing hkru nang nna grai pyaw let yup shamui taw nga ai kasha hkaike la hpe sa mu masai. Shing rai shannu wa ni gaw, aten na na mat mat ai kasha hpe kabu gara hte nta de woi wa masai• Dai hkaike kasha gaw ka-ni bribra bran ai hpang, kanu kawa gana ni gade kabu gara rai ma timung, shi gaw kabu ai zawn mung n rai, pyaw ai nsam n mu nha, kanu kawa gana ni gaw shi pyaw wa hkra ladat amyu myu shaw let shakut nga ma ai.
Shanhte a Lusha gaja ni grai nga ai hkainu yi, majap yi, shata pan Yi, mataw tek hpun maling, taran hpun maling ni hkan grai woi sha hkawm ai raitim, shi gaw myit n pyaw dik ai zawn sha, n lu n sha ai mau hkawm nna chyu nga ai da, Shing rai, lani hte lani hkaike kasha gaw lasi lamun rai nna kanu kawa gana ni hte pyi n lu pyen hkawm mat wa sai. Kanu kawa gana ni mung shi hpe yu nna grai myit n pyaw ai majaw, shi a matu myit ya yu masai. "AWh, shi gaw kaji ai shaloi nbung kaba e, ka-ni yi de shapoi tawn kau ai majaw, ka-ni nanghpam lusha hta len mat nna, kaga Lusha ni hpe n chye sha mat ai sha n-ga, dai kaw na shi zawn re ai manang ni hte sha nga pyaw man mat, anhte nta masha ni hte hkrum tim n kabu n pyaw dum mat ai rai sam sai, kaning rai tim, shi hpe she naw san yu ga." Ngu bawng la nhtawm jawm san yu masai.
"Ma e, nu ni hte nga yang shade de wa n pyaw dum mat sani?" "Ma e, wa ni hte kabu gara rai pyawpyaw bai jawm nga ga she ngu yang wa, nta n kam nga ai mahtang rai ni?" "Ashawng a tsawra ganau e, nang mat mat ai ten hta, ashawng ni yawn hkyen myiprui hte nang hpe gade ning du hkra tam kau ai, ya bai hkrum hkat sayang, ashawng ni kabu ai zawn hpa rai n kabu Lu nni? Grai she kabu na shadu ai wa, ka-ni yi na na a manang ni hpe she grau marit nga nni?" Ngu jawm san ma ai shaloi, hkaike la kasha gaw, gawngkya la ai nsen hte yet sha gahte tsun ai: "Im, nye manang ni hte nye sumtsaw hpe grai marit ai. Ka-ni sama mung grai garawp mayu ai, ka-ni naw mung grai chyu mayu ai, ka-ni si mung grai sha mayu ai, ndai kaw nga yang, gachyi mung n pyaw dum ai." Nga sai. Hkaike la kasha shing nga tsun ai kawn, kanu kawa gana ni myit grai n pyaw mat ai raitim, shi myit pyaw wa hkra ngu grai bai sha- kut yu ma ai da. Raitim, Lani hte Lani grau grau she machyi nan wa ai majaw, yu lu na zawn n rai, rawt pyi n lu rawt, kya gumba taw mat ai madang she rai mat wa sai.
Dai majaw, hpang jahtum kanu kawa gana ni gaw, n yu lu mat sai rai nna, she chyam yu ga, gahti ga- Lai rai jawm ba pyen nhtawm, mi shi nga ai ka-ni yi de bai sa sa da nna, hpun ndung e dung yu nga masai da. Dai ka-ni yi kaw kaga u ni hte hkaike ni law law garu gachyi pyen pyaw nga ma ai. Akya rai she gumpye taw nga ai shanhte a kasha hkaike gaw, ka-ni sama hte manang ni a nsen na jang, shamu shamawt rai rawt myam wa ra ai. Hkring mi sha naw rai yang, hkaike kasha gading dadang rai rawt dung nna, myi hpaw, singkaw shapyan rai "Ke, ke, ke, ke..." Nga manang ni hpe gintan bang wa ra ai. Shi a shamu shamawt sat lawat yu maram nga ai kanu kawa gana ni gaw yu mau nna, myi she n grip hkra jawm yu azi nga yang, hkaike kasha a nsen na dat ai kaga hkaike manang ni law law mung shi hpang de pyen sa wa nhtawm, hkaike kasha hpe jawm hpu garu gachyi ai nsen gaw, ka-ni yi ting hpungtang she kashaw nga sai da. Mau hpa! Gade n na yang, hkaike kasha gaw, si ai kawn hkrung prawn wa ai hpa, galang ta shi shawng rawt pyen mat wa sai, shi manang ni mung shi pyen rawt mat wa ai hpang kaw grai pyaw ai sat lawat hte nsen grau shaja garu let pyaw nang mat wa masai.
Kanu kawa gana ni mau mahka let, matut yu nga ma yang sha, hkaike kasha gaw shanhte n na yu ai, gaja pyaw nga ai shi a nsen hpe shapraw rai, manang ni hte kani yi hpe pyen pyau shinggrup la nhtawm, ka-ni yi gaang na grau ring wum tsawm ai ka-ni hpun ntsa hkan pyen kawai let, ka-ni naw hpe marit maroi hte htim chyu bang wa nga sai. Kanu kawa gana ni gaw hkaike kasha hpe yu nna, shada sha mada yu hiat rai, yawn hkyen myiprui pru nga masai da. Jan du wa sai hta n ga, ka-ni pu ní a sama hpe n hkam Lu ai kanu kawa gana ni gaw, hkaike kasha hpe nanghpam malu masha hte tsan gang ai de hkye mawai la mayu ma ai raitim, n mai byin sai hpe mu nna, gade nja tim, gung maling rai nga ai ka-ni yi e tawn kau da ra sai ngu, myit shatawng kau nhtawm, yawn myiprui hpe gatsut kau let grai tsan ai shanhte a dum nta buga ginra de pyen nhtang mat wa masai da.
