Lai wa sai 31 ning tup hta, nam kahtawng langai mi a ningshung ta na grup-yin shingra manap shingni gaw, ningshung saiwan hte ka-up kahprwi da hkrum nga ai majaw kahtawng ting katsi numri hte shada pyi n mu hkat na daram rai nga ai. Nta ndaw e shata masum re ai Ma Chyangai hpe ba, masum ning jan re ai Ma kaba hpe gaw lata e dun rai, htat la ai saiwan ni hpe htinggrang galun waw nhtawm, mungkan pinra de n-gun atsam dat nna kazawt pru wa maw nga ai jan lagaw hpe ala let, jan kra ga ! ngu nga yang she , Ma yannu ni kaw n myit mada ai shiga kahtet langai shang wa ai, shinggan e kade kashung lagyi nga ai rai timung, ma yannu ni a sindai kraw wang amyit masin salum kata de gaw, Japan mungdan na Hirushima hte Nagasaki kaw e , ngarai bawm hkrat bun yang na zawn , n chye tsun hkra hkru kang kahtet mat nga sai.
Dai shani gaw Laban hpang 6 ya rai nga ai hte maren, laika sharin jawng ni pat da nga ai. Jawng sara bungli galaw ai Ma yannu ni mung, kajawng kaja shiga a majaw, shiga wa jaw ai dai mawdaw hte hkan nang mat wa sai. 1980 ning ten hkan anhte a Mungdaw kata, Simsa lam garai n lu ai re nga yang, deng 15 sha tsan ai nam kahtawng hte mare kaba lapran, pru shang na matu, myen hpyendap gate shagu pru pru shang shang myi man madun hkawm, hkawm sa lakmat tam hpyi lajin la hkawm ra re majaw, jahpawt 9:00 kaw na pru wa ai , shana de 2:00 hta she mare kaba dum nta kaw Ma yannu ni du shang wa ma ai. Nta wang kata e masha ni kamawng jawng nga ma ai. Ma yannu ni hpe mu ai hte rau, nta ntsa na gat pru wa ai nta masha ni aja awa hrap garu dat ma ai. Rapdaw e masha ni pru pru shang shang dung ai gaw dung, tsap ai gaw tsap, hkrap ai gaw hkrap rai nga ma ai. Nhtung maga de na yupku langai hta gaw, Ma yannu ni a kawa hpe la ningnan langai zawn, grai tsawm hkra mawm sumli sharawn da nga mala ai. Ramma ni mung, galaw ngut sai marit nampan shanghkawng ni hpe langai hpang langai la shang bang wa nga ma ai. Kawa dingla gaw , tsaw ra la ai kasha shingtai a yup pyaw nga ai zawn sha taw nga ai moimang hpe lahpawt dum dik let yu azi dat, ya sha nam kahtawng na du yu wa ai, Mungdan jut mi a magam gun kashu yannu ni hpe matsan dum la ai myiman hte yu dat rai, myiprwi katsut let n chye n kaw rai bu nga lu ai.
Ma yannu ni masum gaw, ningre ningmu hpe gara hku hkap la na kun? Asak 31 ning sha naw re ai shannu ni a kawa gaw, shakram ga pyi n tsun kau da ai sha, Mungkan ga ntsa na aloi sha jau jau tawt lai mat wa sai, shi a ngam nga ai moimang hpe yu mau let, hkrap mung n chye hkrap, ga n chye shaga ai ma-a ni zawn sha mau tsap nga ma ai. Shana yuptung, mare shingnawm hkan nam rawng rawt malan manang ni hte ra mara lagyim jahkrum hkawm hkawm re ai shi gaw, sinda chyat jahkru nga ninglen, atsi n tsi hkam la ai sha matut manoi katsi shalawt chyalang hkawm ai majaw, jahpawt jau jau yup rawt ai hte shanwa a kan bau bungli shang da ai , gat –seng de sa wa hkyen nga yang akajawng sha nsa sa chyat htum dik ai majaw, n lu sharai la mat ai lam chye lu ai. Dinghku nnan de ai ten kalang mi hta mung, ntsen ai amu hte shi htawng 2 ning rawng ga nu ai re. Masum ya din ai shana na yupmang hta, nsung hku de lup makoi kau sai she ngu ai, shi hpe shinggan na raw sha mu hkrum shaga lu ai. “Taw! kade sa wa nga nta? Nang hkawm kau da jang, annu ni kadai hte nga na rai? Shi htak rai, gayin yu nhtawm, “Yesu hte nga mu” nga ai ga hkaw mi sha tsun nna, shawng lam de tawm tawm rai, hkawm sa mat wa sai.
Dai shani kaw na dai Ma yannu ni gaw, gaja wa daini du hkra, “Htak n chye ai Madu Yesu a tsaw myit” hte rau sha nga lai wa ma sai. 2011 january 26 ya shani gaw 31 ning tup ai shani rai nga sai. Ma yannau a kanu tsun ai, “The day I can never forget - ngai malap n lu ai ninghtoi re” da. Mungkan ga ntsa na kawa jau jau n nga mat wa ai raitim, Sumsing lamu na Wa majing gaw daini du hkra Ma shannu ni hte arau rai nga ai majaw, shani shagu na shannu ni a gawm agabrat nga malu ai. Daini, dai gaida jan gaw, kam ram ai kahkri mung lu sai. Myit su myit gawp hpaji chye ai kanam tsawm mung lu sai, kade n na yang grai grai tsawm ai kashu ni mung langai hpang langai bainam hkyi ru rai, mayat bang wa na sai ngu, shingran tau mu let, myit dik myit pyaw nga ai “Gaida Shingni” gaw, Manap jan a shingni hta lai kaga hpa hte mung shabung mai nga ai n rai.
Shawnghtawk Tsing Pan
