Moi shawng de mungdan up ai hkawhkam langai gaw asak aprat ram tim dinghku n de, num n la hkraw ai kasha langai lu u ai da. Lani mi hta, kanu yan gawa hkawhkam wang e nga ai magam gun amat salang ni hpe shaga hpawng da nna, kasha hpe num la na matu jawm tsun ma ai da. Kanu yan gawa gaw: "Ma e, nang asak aprat mung ram sai, nu yan wa a hkawhkam hkang galai, hkawhkam bai tai na mung nang re, dai majaw nu yan wa yaw da ai mayu hkawhkam shayi sha hpe hkungran la na hkyen ga." Ngu shadut mu ai. Shaloi kasha gaw: "Nu yan wa e, num gaw num hkrai re, nu yan wa tsun ai zawn, hpang e hkawhkam hkringhtawng dagraw na hkawhkam jan tai na num gaw grau nna yaw jahtuk ra ai. Dai majaw dai ngai hpe jaw na hkawhkam shayi hpe hkungran poi garai n shang shi yang, lana mi woi yup yu na, mai na kun?" Ngu ahkang hpyi u ai. Kanu yan gawa hte salang ni grai myit gahtet myit kang ai hte jahkrup la na re ngu hkraw ya manu ai da. Shing rai, la kasha gaw shi hpe hkungran ya hkyen ai hkawhkam shayi sha hte lana mi gawk de woi yup na hkyen nu ai.
Shana yup wa mahka e hkawhkam la kasha gaw: "E, ngainam e, daina de hpa wa sha n htuk sai kun? Kan machyi nga nngai." Ngu tsun tim, hkawhkam shayi gaw hpa nra ai zawn, atsang arang mung n nga ai yup nga u ai da. Yup tung lai re hpang kalang bai, "E, ngainam e, kan grai shadut machyi wa reng sai law." Ngu jasu nna tsun aput yu tim, zim hte zam hpa mung n galaw ya u ai da. Nhtoi htoi wa mahka e gaw "Ngainam jan e, shana tup hpa majaw kan machyi ai kun? Ngu yang, ndai kaw she masawp yu u, ndai nbung udi a majaw she rai a hka! Ngainam e, ndai lam ni hpe gadai hpe hkum tsun dan yaw, an gu anwa ni a hkawhkam sari hpoi na ra ai, la rai nna, nbung di di ai gaw gadai mung n nga yu shi ai." Ngu abyik tsun let, shi magum da ai alum nga ai gumdin hpe masawp shangun u ai da. Jahpawt jaujau hkawhkam shayi rot nna, wang gata pru sa wa yang, wang dun ye ai jan hpe mu nna: "Aning chyahkring mi, gadai pe mung hkum tsun yaw." Ngu tsun let shana na hkawhkam shadang sha a mabyin hpe tsun hai dan nu ai.
Dun ye ai jan mung laklai ai dai mabyin hpe nga n ngut hkra shi htawn tsun dan mayu nna, nampan shatsawm ai jan hpe: "E ning, nang gadai hpe hkum tsun dan lu yaw, mana wa le, anhte a hkawhkam shadang sha wa masha di 2 di da sai da nga yang." Ngu tsun dan u ai. Nampan mawn ai jan mung nga n ngut nna, rai hkrut ai jan hpe: "Ning, nang garai nna shi ai nrai? Hkawhkam shadang sha wa masha di 3 hpum shakraw taw nga ai da, gadai hpe mung hkum tsun re lu yaw." Ngu u ai. Shing rai hkawhkam wang ting hte mare daju ting ngu na hta "Hkawhkam shadang sha ma masum di kaw na hpum shakraw la sai da." nga ai shiga gaw madu hkawhkam htingnu wang na wa a na de du wa sai.
Dai majaw hkawhkam wa gaw gaya ai hte pot ai hte rai nna, hpyen ni hpe wa shaga woi lang rai, sa jep sagawn yu nu ai. "Ya nang num la ga nga yang, n kam la hkraw ai gaw ndai zawn byin ai majaw re ni? Nang hpum shakraw ai ma 3 gaw kanang e da sani?" Ngu san jep jang, kasha gaw: "Wa madu hkawhkam e, ngai hpa masha mung n shakraw nngai, hpa masha di mung n di da nngai, nanhte hkungran ya na nga ai hkawhkam shayi sha a shinglet shim ginhtim nga ai kun? Chye mayu ai majaw, da-sang chyam yu ai re, dai masha di byin mat ai gaw ndai mawau si she re." Ngu tsun let, shawa yawng a man de mawau si hpe shaw taleng dan dat u ai da.
Matut nna shadang sha tsun ai "Hkawhkam jan ngu ai tai wa jang, madu wa a machyi shim ra ai lawlaw hpe mung ginhtim nang ra ai re, dai majaw nu yan wa myit hkrum da ai ndai hkawhkam shayi sha hpe mung ngai garai n la shi na nngai, shi hpe mung ngai hpa n shut shi nngai." Ngu n dang kau nu ai da. Myit yu na lam: Shinglet hpe hkang n dang ai majaw, hkrat sum ai lam lawlaw hkrum nga ga ai.
Ngawla Bum
