BAREN LA HTE DINGHTA SHAYI A MAUMWI
Sawk ka ai: Magwi Lung Awng
Amoi, hpawmi langai bungli sa galaw wa lam e, nau kawsi mat nna namsi hpun nhpang langai kaw wa dung nga ai shaloi, ndai daram kawsi hpang gara ai gaw, htaw ra namsi wa di jaw ai masha mi nga yang, ngai a gasha Ma Kaw yan Ma Lu e langai mi ya kau na ngu tsun sai da. Dai shaloi lapu langai mi namsi hpun ntsa de lung nna namsi di jahkat jaw sai, hpawmi dai namsi hta sha la rai nta wa mat sai. Namsi di jaw ai lapu dai mung shi kaw dingyang hkan nang wa sai da, nta du ai htawm, lapu dai shi a lahput ntsa kaw wa dung mara hkawan nga sai. Shing rai, hpawmi dai: "Daina lapu wa mi ngai kaw ndai zawn rai ai gaw?" Ngu mau taw nga ai ten hta, lapu: "Nang tsun ai ga hte maren namsi di jaw jang Ma Lu hpe mi rai Ma Kaw hpe mi rai jaw na nga ai n re i?" Nga shaga pru wa ra ai.
Hpawmi jan gaw daini ngai nau kawsi ai majaw, namsi di jaw ai ni hpe nannau langai mi hpe ya kau na ngu tsun kau se ai, Ma Kaw nang wa su ngu gasha jan hpe tsun sanu ai. Ma Kaw: "Nu e, ndai zawn re kaw me wa na re nga ai gaw ngai n kaw wa ai." Ngu shawng pawt ningdang kau sai. Ma Lu mahtang: "Nu a kawsi hpang gara hkye ai majaw, ngai wa na." Ngu sai. Dai shaloi lapu gaw masha hkrang raw rai, Ma Lu hpe woi rai nhtang wa mat sai da. Ganu hpe: "Chyinghkrang gat tawn da ai pu pu htum ai kaw gaw an a nta re, dai kaw sa shaga yaw." Ngu gayin htet da sai. Lani mi hta, hpawmi jan gasha htet da ai ga hte maren, chyinghkrang yi pu pu htum ai shingnawm de sa du nna: "Ma Lu htinggaw e, nan tsun da ai hte maren ngai ndai kaw du sangai!" Ngu sa shaga dat nu ai.
Shaloi Ma Lu mung, "Nu, ninghkri wa bu hpun palawng naw galai nga ai." Nga htan pru wa ra ai. Chyahkring mi re hte: "Nu rai sai, shang wa rit." Ngu sai, ganu gaw gahkri gasha ni hte masum ya sa nga la nna nta bai wa hkyem sai, gasha jan shani shat makai hte sihtu simai ni makai shagun u ai, lam lapran kaw ganu gaw gasha yen gahkri makai shagun ai shani shat naw sha la na re ngu, sa-ra kaw wa dung hyan dat yu yang, aja lungseng matep hkrai rai nga ai hpe mu nu ai. Nta kaw gasha Ma Kaw hpe: "Ndai zawn re lungseng gasup ai ni kaw nang n kam wa ai." Ngu wa tsun shara dat sai, shaloi gana jan gaw kanau jan a la wa hpe bai ra mayu wa ai majaw, kanau Ma Lu a la sa gashun nu ai. Ma Lu hka nawng kaw jamna shatai nna sa yu ai shaloi, gana jan kanau hpe hka nhkun kaw ganawng bang kau sai da, dai hpang gana jan garat wa hte bai sa nga mat sai. N nga mat ai Ma Lu gaw maka hpun tai mat sai da.
Ma Kaw maka hpun nhpang hku lai wa shagu, shi a palawng chyu hkap mahkai je ya ya rai nga ai, shing rai, gana jan gaw shi lai wa shagu palawng hkrai hkap mahkai je ya ai ngu nna maka hpun dai hpe gahtam azat jahkraw nat kau sai. Dai hpang, maka hpun gaw u bai tai sai da. U tai nna gasha yanwa a shat wan kaw shat wa chye bang ya nhtawm, gana jan a shat wan kaw gaw u hkyi wa hkyi ni bang da ya ya rai sai, Ma Kaw pawt mayu nna u dai hpe bai hkan gap sat kau shangun sai da. Rai yang, u mun pun tawn ai kaw gasha yanwa hkauna bai sa galaw sha ang ai shaloi, "Lau lau sa, lau lau wa..." Nga shaga ai u langai bai nga sai, dai u mun taw ai shara kaw Ma Lu gaw shinggyim masha raw rai galang bai sa paw nu ai da. Ma Lu shinggyim masha bai tai ai shani kawn, shannau baren la wa hpe gashun wa masai.
Shing rai, baren la wa kumbang ari jun tawn nhtawm, "Nannau lahkawng ngai jun tawn a ari ndai kaw lu tawt ai jan gaw, ngai a kumbang num rai u ga, n tawt lu ai jan gaw n re ai." Ngu tawt shangun sai. Ma Lu gan tawt lai mat wa nna, gana jan gaw n lu tawt lai ai majaw, ari kaw galun si mat sai. Dai shani kawn baren la gaw shi a kumbang num jan hte gumgai dingla hkra rau nga shakre masai da. Ndai maumwi mausa anhte shinggyim masha ni hpe shadum jahprang mayu ai lam gaw masha ni a la hpe manawn ai myit n mai rawng ai, tinang a hkungran kumbang la hte sari rawng sadang dung let nga ra ai ngu ai myitmang lam madun nga ai rai.
