MAYUN KUMHPA
LABANG ROI BU
Hkawhkam langai gaw shi a asak 60 ning hpring ai poi kaba hpe grai hkyik ai hku galaw mayu ai majaw, shi a htingbu mungdan na hkawhkam manang ni hpe mung shaga la nna, lu sha hpe grai hkum hkra shakya daw jaw u ai. Raitim shat mai myu langai naw ra nga ai majaw, grai myit ndik taw nga nu ai. Dai shani gaw lamu marang htu, laru kaba ru ai majaw dam nga ni nga n lu ma ai. Dai zawn si mai n hkum nna myit n dik taw nga ai hkawhkam a lam hpe, la langai chye nna nga tawn sa wa yang lamu marang grai kaba nna, nbung kaba bai a hpawt rai nga gaw nlu tawn hkraw rai nna myit htum yak hkak taw ai ten hte, nga la langai gaw nga kaba langai hpai rai wa ai majaw, dai nga la manang wa kaw na nga hpe hpyi mari la nna hkaw hkam wang de hpai sa wa yang, hkaw hkam wa gaw ajan kaw nna mu dat nu ai.
Dai majaw shi a hkawhkam manang ni hpe lawan she sa tau la ya marit, nye a lusha poi hta ra nga ai simai hpe lu hkra tam sa wa ya ai majaw grai kabu chyeju dum ai nga tsun let, nga jahpu hpe shi kade hpyi yang kade jaw mu ngu nna tsun dat wu ai. Hkawhkam manang ni mung nga la hpe nga jahpu kade daram hpyi na kun ngu san jang, nga la gaw nga jahpu kaga hpa ja kumhpa n jaw ra ai, ngai hpe dam hkawn manga shi lang sha a byen marit nga tsun ai majaw, hkawhkam ni gaw ndai la wa hkrit na zawn nga ai ga tsun gwi tsun ai ngu, kalang bai gahtap san ai, nga jahpu kade hpyi na kun atsawm sha tsun u! Ngu tim mi na hte maren manga shi lang sha abyen marit nga ai majaw, hkaw-hkam ni gaw shi hpe yu nna, chyawm mani taw nga ma ai, shingrai ndai la gaw loi mi ma nya ai kun, kalang mi bai san yu ga nga nga jahpu kade hpyi ai da aw! Ngu jang, mi lahta na hte maren sha atsun nga ai majaw, hkawhkam manang ni gaw poi madu rai nga ai hkawhkam wa hpe nga la wa a shi ga wa tsun dan manu ai. Dai majaw hkawhkam wa shi a manang ni hpe bai htang dat ai gaw, e le le nga wa hpyi ai hte maren dam manga shi hpe a yet yet sha abyen nna gingdan ai kumhpa jaw dat na matu tsun ai. Dai majaw hkawhkam wa a manang ni gaw nga la hpe 1, 2, 3, 4, 5 ngu hti nna, yet yet sha abyen nga ma yang, hkun manga lang du ai hte nga la gaw naw hkring mu! Naw hkring mu! Naw kring mu! Ngai hte hpaga pawng da ai manang langai naw nga ai majaw, shi hpe mung alawan garan jaw ra ai ngu tsun ai majaw, nga la hpe chyawm abyen ai hkawhkam la ni gaw galang bai chyawm mani mahka la nna she hkawhkam wa hpe bai tsun dan masai.
Shaloi she hkawhkam wa gaw mau mung mau, mani gaw mani mayu rai, kadai re ta nang hte hpaga pawng ai la wa gaw she tsun dan yu rit ngu jang, nga la wa gaw kaga kadai n re law, hkawhkam wang chyinghka lam e sin ai la gaw e! Ngai hkawhkam wang de nga hpai sa wa yang hkawhkam wa kumhpa grai law jaw na re. Dai kumhpa hpe shi hte maren brang karan ya jang she, wang kata de shang wa shangun na nga tsun ai majaw, ngai shi hpe jaw na ungai ngu ga sadi jaw da ai re Dai majaw lawan dik ai hku karan jaw ya marit nga nna tsun jang, hkawhkam wa grai masin pawt ai hte chyinghka lam sin ai wa hpe bai shaga nna, san yu yang, dai la wa nlu ndang sai lam hpe chye sai majaw, hkawhkam wa san ai ga hpe yin la kau ai, dam nga la hte pawng shut kau sai mawjaw re ngu nna mara hkam la sai hpang, hkawhkam wa a manang ni hpe ndai wa hpe laja dik ai hku hkun manga lang abyen nna chyinghka lam sin ai bungli kaw na ja kring kau mu nga nna matsun dat wu ai.
Nga kumhpa sa jaw ai dam nga la pe gaw ndai la hpe chyawm chyinghka lam sin ai bungli hta shatsap da yang kaja na re, hpa majaw nga yang ndai la gaw myit hpaji grai kung kyang nga ai. Lai sai ten hta chyinghka lam sin ai wa mayun kumhpa kade sha kau sai lam hpe kadai n chye ai, ya gaw ndai hpaji rawng ai nga la wa a majaw she anhte chye lu ai re majaw, shi hpe mahtang ndai hkawhkam wang chyinghka sin ai bungli hpe kumhpa jaw ai hte hpawn re nga, hkawhkam wa kaw nna ga jaw da sai hku re. Shawng de chyinghka lam sin ai la wa bungli nlu mat nna grai myit ru let hkawhkam wang hpe nja nhpra rai gayin mada yu kau da nna, baw gaw ga de gum tarung tawn nna hkawm pru wa nu ai.
