MARIP KUMJA

Moi mare gat gahtawng langai mi kaw, sut su dik ai htinggaw langai mi nga lai wa sai, htinggaw mying gaw hpa nga ai re atsawm n lu matsing da ma ai, rai timung dai nta madu wa a shingdu mying Matse Maji Gam nga ai gaw gat mare gahtawng masha ni yawng ngu na chye nga ma ai. Dai Matse Maji Gam gaw gashu gasha mung n lu, nta kaw uhkai pyi gabye sat n mu na ram hpum tsawm ai madu jan gaba sha rem tawn ai hta lai nna, gat seng mali manga hpaw da, nta mung kaga myu mare gahtawng hkan mari shap sha tawn ai hta n-ga, bum gahtawng de nga gumra mung mayam ni hpe law law dat rem tawn shangun rai lusu dik nga ai. Matse Maji Cam madu jan chyabung hpe sha hkrit nna gadai hpe n hkrit nga ai, shana yup tim madu jan a lagaw nhpang de sha yawng nna yup ai. Raitim htingbu htingpyen ni hte nta na ni hpe gaw grai matse grai maji ai majaw Matse Maji Cam nga ai myinghkawt mying she lu hkra rai da nu ai.

Maji dik ai gaw htum hkra, makau grupyin na htingbu htingpyen, manaw manang, lawu lahta gadai hpe pyi garum shingtau ai ngu n nga, bungli galaw shangun sha ai mayam ni hpe gaw matsan mayan zingri zingrat di woi nga, shat lu sha mung, yinam ta gaw hkainu shingrun hte naisam lap, kahkum lap, shakau lap naga ni sha shadu htu sha shangun, ginhtawng ta rai jang gaw chyinghkrang lawbu hparaw lap chyagak hte gala dingsap si ni kaw hkaunan shingrun hte n-gu jat bang ya rai jaw sha ai majaw, nta na mayam masha ni lasi grawm grawm rai, wa kyi gui kyi ni zawn yu matsan dum si nan rai nga ai. Moi na gaba ai ni tsun ai: "Myit n gaja ai, masu magaw ai, matse labye re ni gaw prat sak gadun ai." she nga ai raitim, Matse Maji Cam htinggaw yanla rai jang, ahpum asau rai nga pyaw ai hta n-ga, asak manga kru shi ning lai wa hkra ali awo pyi n wo yu ai majaw, "Lamu na sagya mung ganing rai ndai htinggaw hpe n mu woi la ai hprai kau da ai wa re kun?" nga makau grupyin na gahtawng masha ni hte shan a mayam ni jawm lagu matsa si rai nga ma ai.

Matse Maji Cam asak 60 ning hpring ai shalawi, mali nhtawi gaja ai lata la hkra rai, hkuhkau ai manaw manang ni hpe shaga jahkum la nna, shat sha poi woi galaw nga ai. Dai shaloi sa du hkalum ai makyin jinghku ni gaw shat dung sha ai shalawi, mani mayu pawt mayu rai, matsa mawa ga hte jawm gahte angun let sha la nna wa mat masai. Hpa majaw nga yang, jaw sha ai shat simai, shat saboi 10 kaw ula lahkawng sha sat nna, sihtu mung ushan hkyep lahkawng mi hte gala kahkum si gangau chyalang tawn, simai ntsin kaw ushan hkyep lahkawng mi hte zawnhtang bang nna gala kahkum si shadu brungbrang jaw, japhtu ngu na gaw shakau pawt chyaja hte hparaw lap chyagak htu adep tawn, saga si hte gaju si ju malu la nna htu jahka tawn, lawbu lap chyaja hkranghkri gayau tawn, tsabyi mung gade ning lai sai nchyang tsapa shup shadun jaw rai, shat simai gaw kan sha mase la na zawn re hkrai rai, sa du ai ni kumhpaw kumhpa pyi la sa shut dum let sa sha gari wa nga ai.

Manam bra ai hpang Matse Maji Gam htinggaw yan gaw: "Aga an htinggaw n lu su n mai nan re, masha ndai ram rai yang, hkyem ai simai gumhpraw mali manga tsa pyi n du, ya shanhte la sa ai tsa byiya, udi, htang malut ni gat seng kaw dut la yang hkying lahkawng masum lu chyalu rai sai." nga jawm mani haha gabu let yup pyaw mat wa masai. Matse Maji Cam grai yup pyaw nga ai ten hta, nta kaw marang nbung agajawng sha bung htu gaba wa nna, nta gang ashun ganawn wa ai zawn nga rawt gajawng tsap hkawm yu yang, shinggan de lamu mung asin amang, nta kaw shachyi tawn ai wan kawk na wan lap gaw lapu tsit zawn shaw galu mayon pru wa ai mu dat nna, gari ashun hkrit si wa ai kara laji pyi nhtang tu mat ai zawn nga nga yang, shingdu shakum de gaw masha langai mi lagu azi yu ai zawn nga, galang ta gayin yu dat ai shalawi, gaja sha kara galu shayan tawn, myitum lele wak wak rai shale shatu tawn, shinglet shaw ayan da, htawnglawng ladi hku sai lui amya ai masha tsap taw nga ai mu dat ai majaw, hkrit let galaw praw di yu dat yang, ganoi chye na zawn re masha rai nna, myit shaja la hkra atsawm yu dat yang, shawng de shi hte hpaga jawm galaw yu ai shalwi, shi e mawp sha nna ja gumhpraw sum mat, yi sun hkauna n lu mat rai, gasha dut sha kau, madu jan mung hka kaw gumhtawn si mat re majaw, myit htum nna mare shingnawm kaw sa noi si mat ai Gareng No rai nga la sai.

Gajawng ai myit hte "Ndai wa daina ngai hpe nat tai nna hka sa ji ai rai sai." ngu myit let, ndai kaw n mai nga sai ngu rawt hprawng kagat pru mat wa sai. Rai yang, chyinghka lam hku wanhkut chyang gayop lang let hkum ting sai hkrai mya mya re masha langai bai htim gamyet shang wa re hpe mu rai, shawng de shi gumhpraw amyat tsaw tsaw hte hkawi ya ai gumpraw n lu wa mat nna, hka ji shadut shakyin hkrum ai gata, sai hten mana bu hkawm ai ten, mawdaw lam lamaw kaw mawdaw e adawt gamyet sat kau ai Zinwa La hpe bai mu nu ai.

"N rai sai, daina ndai wa ngai kaw asak hka ji sa ai she rai sai." nga myit la let hkalap hku bai rawt gumhtawn pru mat wa hkyem yang, hkalap shinggan kaw shawng de shi nga rem shangun ai shaloi, zingri sat kau ai jahkrai yannau buri ja tawn nna hkap dagraw la hkyem ai hpe mu dat nna, nhku de bai gayin hprawng shang wa ai hte, nta nhku ting shi hte seng nna si hkrum mat ai masha ni, shi kaw hka sa ji ai hkrai tup mat ai hpe mu nna gari let: "Ganing ndi sai, daina gaw ngai gara ku tim n lawt sai, ngai si na rai tim, shanhte langai ngai hpe sha gaw naw gamu gawa makret sat woi ga." ngu myit shadik la let, hka ji nat langai mi hpe htim ahpum manat la nna, myidi chyip ladi kaw krut nga ai she na hkra gawa makret dat nu ai. "Aka law! Lasa si na sa-wa Cam e, hpa rai nye lagaw ganu makrut ya ai re ni e, aka ka ka!" Nga madu jan wa mawn ganu rawt hkindit shachyai dat jang she, Matse Maji Cam gaw salat hte li rai rawt gajawng dum mau mahka let, "Aga, yupmang she rai nga hka!" Nga krit gajawng bran wa ai shalawi, dukrung machyi mat, ana gadu mat, ladi gaprep machyi mat, lagaw lata lagyi laga gatsi mat rai ai majaw, gaungwi sha lanyan rawt nna, ahpum n pawt re madu jan a gahpa kaw lata ahpum mara tawt: "Nta ndai kaw n mai nga sai, anat gaman re, hpawtni njang nta kaga de htawt saga." Nga madu jan hpe shi mu ai hkrit hpa yupmang tsun hkai dan nu ai.

Madu jan mung na hkrit si wanna nta htawt na lam myit hkrum rai, shanla a rung rai ni rawt hta shabawn let, "An htawt mat tim, nta ndai yu na kam ram ai masha gaw tam sin da shangun ra ai." nga tsun jang, Matse Maji Gam hpang jahpawt nhtawi htawi ai hte, mayu e shi loi kam ram dum ai mayam lahkawng yan hpe lagu shaga la nna: "Ngai nan hpe tsun na, an htinggaw nta ndai nau n nga pyaw mat ai majaw, kaga gahtawng de htawt nga na ngu myit ai, nta ndai nan hpe gan ap da na, atsawm sha yu sin, bungli ndai gaw kaga mu ni hta grau galaw pyaw ai re, salu salat mung..." "Lauban wa, hkum tsun sa, nta ndai kaw nat nga ai, an jau jau chye sai, anhte hpe pyi gade lang she jahkrit mana sai." "Kaga de bungli garai n-gan mu tam nna she nga shakut nga ai rai ga ai." Nga lauban wa ga pyi garai n tsun ma yang, mayam yan hkrit lahkrit ngu jawm tsun gari dat sai.

"Aga, nan gan chye kau ai hku i? N kam sin jang gaw yau sai, ya jang lawan hkawm mat wa mu!" Matse Maji Cam pawt let shachyut kau dat sai. Mayam masha kaga ni hpe bai shaga jinghkum la nna tsun jahkrup yu tim, "Ngai ganing di n lu sin ya sai, sat kau tim n gui sin ya ai." "Shinggan de mawhpyi hpyi sha nna nga hkawm tim rai sai." "Anwa nga rem mu lit madung la na, nta sin gaw kaga ni hpe she tam u." Nga tsun garu let, naw ai gaw naw, hkrap ai gaw hkrap, hprawng ai gaw prawng rai mat nga ai. Jahtum e, mayam langai mi naw tsap nga ai mu nna: "Hkrak sai, gui ai langai sha ngam tim rai sai." Ngu tsun gabu let, sa shaga dat yang, tsap dingda taw nga ai mayam dai jit she tat rai hkrit gari matep tsap nga ai hpe mu jang, "Sa-wa nanhte yawng gaw sharaw garawt na ni hkrai she rai nga madai!" Nga pawt bu mang let ganing ndi mau dauyin taw nga nu ai. Dai shaloi, "Lauban wa, ngai sin nga ta na." Nga tsun let mayam la langai nta shingdu maga de nna hkawm pru wa ra ai. "Aga! Si n hkrit ai masha mung nga i?" "Kadai mana bairi wa re kun gaw?" Mayam ni jawm tsun gajai let gayin mada dat yang, mayu e gadai hte mung nau n shaga ai, nga gumra walawng sin masawp lajang ai Marip Tu rai nga ai.

Marip Tu gaw jahkrai ma rai nna, jinghku nta masha ni Matse Maji Gam kaw sa dut ya ai shani kaw nna, dai nta kaw nga gaba, gaji ai ten hta, shana kawsi jang nta madu ni a wa shat di kaw na naisam gatsi ni sha shaw sha rai, bungli ngut jang gan yup malap mat rai gade lang gayet ai hkrum, buhpun palawng gapa nna bai gapa ai hpun rai nga gaba wa ai rai da nu ai. "Rai sai, nang sin nga ta u, kaga ni yawng rai lawan hkyem garum, daini daina njang htawt na re, lawan ladan rai shajin mu." Marip Tu hpe mu hprai ap da kau rai, mayam kaga ni hpe gaw rai htawk shajin na hku tsun shakyin let, shan htinggaw mung ahkyak ai rung rai ni lawan htawm lajang bang la rai, jan garai n shang yang rung rai ni yawng htawla-kyi mawdaw lahkawng masum kaw htawm matsut bang, nga gumra dusat ni hpe gaw mayam masha ni hpe gawt woi shangun rai, dum nta hpe gade nja tim, mana na yupmang dum dat jang nshung si ahprui nga, lawan n hkawm jang shana jan du nna, nat ni bai hkan gang jahkring shingdang gapat la na myit dum hkrit gari let, shingdu pyi n gayin hkra htaw ru mat wa masai. Nta madu ni htawt mat wa ai hpang, Marip Tu mayu e n gui yu garet hkawm ai, gaba dik ai htingnu nta wang gata hkan yu shinggrup hkawm chyai rai sin taw nga nu ai.

Marip Tu gaw gaji ai kawn myit dinghpring ai, lagu lagut, lagawn lamawn re myit n rawng, masha wa hte nangshawi nangsha nga ai kyang lai len ni n rawng, jinat tsadan pe mung n hkrit ai la wa rai u ai. Nta madu ni tawn da ya ai lusha ni sha sha, namlaw namlap simai ni hkai sha, gadai a aming ga n madat ra, hpa bungli gaba n galaw ra, htingnu n prawng mat dingsang kam ai hku nga, htingbu dam chyai, nta wang na nga lawk hkan na nga ni hkui sha, nta wang tsingdu pa hkan lahpyaw sha hpyaw kau, lagaw tawkya gawiwat kau rai nga pyaw nga nu ai. Lani mi na ten hta, shat sha hkru la rai, wang gata na numri pan sun kaw, ta latsa hkrup chya di bunghkum tawn nna galeng chyai let, yup malap mat wa sai. Bungli gatsi sui sha nga bung ahpawt dat ai hte dum dat nna rawt wa yu yang, dingla langai baw gahtan akrin rai, myikaw mun ahpraw galu samsam rai, na hte ladi papa dindin yatyat rai, n-gup nhka mun ahpraw rai lagaw lahput kaw du hkra shen galu ayat tawn, hkra lata kaw magui kawng dawhkrawng hkrawng tawn, pai ta hta utawng ningmai layit sha yit chyai rai nna, shi hpe mani saisai rai yu shati nga ai mu gajawng dat ai hte: "Jidui e, Matse Maji Cam mani ma-ni htawt mat wa masai law, ngai gaw nta sin ya ai shangun ma sha re, hpa ra yang shi hpe hkan tam su." Ngu tsun dan sai.

Dingla wa gaw: "Tu wa hpa hkum hkrit, ngai kaw hkan nang yu rit!" Aga, dingla ndai ngai Tu re mung naw chye i? Ngu lagu myit let, Marip Tu gaw ndum shami lagaw atsang wo wo sha nga nna, ahkum mung pyen rawt wa na zawn nga let, hkan nang yu nu ai. Shi a prat mi ngu na yu ye lajang ai nga walawng chyinghka lam kaw du ai hte, dingla wa gaw shi a magui kawng dawhkrawng hte madi madun let tsun ai: "Tu wa e, nang gaw matsan mayan rai gaba wa ai jahkrai ma raitim, lagu lagut gasup myit n rawng, myit su myit gawp dinghpring ai wa rai ndai majaw, lamu sagya hpan wa garai myi hpaw mu mada matsan dum ai hkrum nit dai, ndai ngai tsun ai kaw htu dat yu u, ja gumhpraw sutgan gaba rawng ai shara re." "Jidui teng a ni? Ngai aprat ting sin ai walawng kaw me aja rawng ai nga gaw kam na zawn n nga ai." Nga baw masawp let gayin dat yang, dingla galawi na lapran rai mat wa ai pyi n mu kau dat sai. "Jidui, jidui." Ngu hkan shachyut tam wa yang, tsingdu pa na hpundu gasha kaw lagaw ganu lamyin she ga hkra ahtu gale machyi taw nna, dum gajawng hprang pru wa nu ai.

Marip Tu shani mu ai yupmang hpe asan sha dum nu ai, shingrai, shana gade myidi yup yu tim n mai yup hkraw nna, hkrit wa ai zawn nga ai myit hte, nat nga ai nga gaw teng sam ai ngu, tsam mari mara nhtawi jahtawi la ai hte, mana law, yupmang wa mi rai rai, hpa hkyi chyahkraw mi rawng rawng, alaga laban she nga shalai kau ai, la gam naw chyam yu na re, nga myit shadik la nna, shat jaujau rawt shadu sha la rai, nachye gaba hta hpai lang rai yupmang kaw dingla wa madun ai walawng chyinghka lam jut kaw sa achye htu gamawng bang wa nu ai. Htu ai gade nsung yang, ja ja nga ai rai mi mu achye hkra ai zawn nga, gabu gabu ngu ai myit hte atsawm ku let htu krawk shang wa ai hte, gaja wa ayam dibu zawn zawn re rai mi kra pru wa nna, gabu htukhtak let: "Arai mi gaw she rawng nga a." Ngu madu hkrai tsun anyam let, gui gasha a hkatawn htu hkrup hpa, ta lagaw brawng, ninghpu hte hput, salat pru jang labu palawng ni ma hkra raw gabai kau rai, ba pyi nna hkra htu ahkrai shang wa yang, ahpum pawt ram re yambu 2 yep sha rai kra pru wa ai hpe mu gabu nna, ba galawp ai nsa gaba gaw ashawk nga raitim n hkring ai, tsap lamyin zawn re lata hte gari gawa rai yambu sa ashep hpaw dat nu ai.

Yambu gata kaw ahtawi hprap hprap re ja tawng hte moi na gumhpraw yinpau tup hpring rawng nga ai hpe mu gajawng nna, nsa pyi sa jahtum kau na zawn nga hkra mau mahka hputdep dung gazut mat nu ai. Marip Tu tsawmra na hkra dung awai la rai, ja yambu kaw na ja tawng gumhpraw tawng ni hpe shaw akawk dat yu u ai, ja gumhpraw teng teng she rai taw nga tim, yupmang shadu nna ta layung bai gawa la yu, ta layung machyi nna jahtau dat, ja tawng bai hta la nna gahtan kaw akawk dat yu, baw ganan machyi wa rai, mani yupmang mu gajawng nna nampan sun hpundu gaji kaw rawt ahtu shaye la ai lagaw lamin bai mahti chyam dat yu yang "Aka law!" Ngu madu hkrai she gajawng hkra machyi jahtau kyek wa, raitim n kam nna jit bai sa ji yu, namdum sa dung yu rai yang mung asan sha re majaw, "Oh, ngai yupmang mu ai n rai nga ai, rai jang gaw gadai a rai na i? Matse Maji Gam htinggaw a rai yang htawt mat wa na shawng e pyi nta htungwung htingwai atsai awai masawp yu, yu hku du hkra pyi ht krawk nna hpa n rawng jang, hka ru bang kau tawn da hkra she rai sai wa mi? Gadai na n rai jang gaw, hpan wa garai ngai hpe matsan yu dum nna, shaman jaw ya ai re kun?" Nga shi hkrai tsun anyam chyai jin la ai hpang, "Wai, n rai na re, gara hku tim ngai gaji kaw nna rau ganawn gaba wa ai manang mare baw sutdu nta kaw mayam yam ai Kumja Tang hpe naw wa saw la nna jawm bawng yu na re." Ngu myit jahkawn dawdan la let, ja yambu lawan bai ahpre gaput kau da nhtawm, mare baw de lung mat wa sai.

Kumja Tang gaw Marip Tu e byin ai lam tsun dan ma ai htawm, "Hkau Tu, nang ja gumhpraw awng na ten du sai rai nga lit dai, lamu garai jaw ya ai nan rai nga ai le, hpa wa naw hkrit tsang da nu?" "Hkau Tang e, awng yang mung anhkau rau awng le, lusu yang mung anhkau rau lusu ga le, moi gaji kawn rau ganawn gaba wa ai tsawra myit gaw daini du tim maren sha re, ya ndai ja gumhpraw tawng ni hpe ganing di lajang na she lau jawm myit yu ga." "Rai jang gaw ndai hku di u, nang hpawtni njang Matse Maji Gam htinggaw hpe wa tam nna ga manaw yu su: Lauban wa e ngai na nta n lu sin sai, nat dingyang naw sa jahkrit ai, ahka hkrai sa ji ma ai, nta htingnu hpe dut ai rai yang dut kau, shing nrai gadai sin gui yang gadai hpe wa galai sin shangun u, ngai mung hkrit sai, n lu sin ya sai ngu wa tsun yu su, ja gumhpraw tawng shi ya rai yang, shalawi shi nta n dut hkraw na re, lama dut kau hkyem jang, ngai sumtsan de na hpaga lauban tai nna wa mari la masu na." "Mai sa, ngai dai hku nan wa tsun chyam yu na." "Grai hkrit sawng ai hku she tsun ra ai re lu, shi hpe n mai yu shapraw kau shangun ai." "Mai sa, hkum tsang, ngai mala la bawnu n rawng ai nrai yang me." Ngu jawm bawng la manu ai.

"Tu e, nang pyi n sin gui jang gaw gadai naw sin gui na rai? Dut kau nga yang mung gadai hpe wa masu dut ya na re ta e?" Shi na n rai re nga ai ngu myit kaw lagu gabu let, Marip Tu gaw hkrap bat she bai mawng masu hkra "Ngai nan n lu sin sai law lauban wa, dik nna makau hkan na masha ni gadai n gui mari jang gaw ngai kaga tsan ai gahtawng de na masha tam matut yu yang yi mai rang?" "Mai ai, mai ai, nang lawan wa matut hkawm yu su, nga walawi 10 dang daram re manu sha lu jang lawan dut kau ga, raitim..." "Caning bai rai wa sa lauban wa?" Marip Tu gaw Matse Maji Gam bai n hkraw mat na tsang nna, ndai lang gaw gaja wa nan hkrap ga she lawm hkra gan san gajawng nhtang dat jang, Matse Maji Gam gaw Tu wa ndai nta garai n lu dut yang hprawng gatsat kau da na tsang nna, shi hpe grai kam let: "Hpa wa hkrit nu e Tu wa, nde nlaw ya pyi nga nna me, ngai nta sin shabrai gaji gajaw jat ya na, nta lu matut dut jang kumhpa shagrau na, raitim nta sha n lu dut ai ten laman hta atsawm kyet kyet naw sin ra ai, na sa?" "Na sai na sai lauban wa, shabrai kumhpa ni n tsun saga, nta lawan dut kau na she myit yu ga." "Nang gadai hpe n chye shangun ai sha kaga gahtawng de sa matut hkawm yu su, makau hkan na htingbu ni chye mat jang tsun shabra kau ya na." "E e, lauban wa, mai sa, ngai gadai hpe n tsun dan na." "Kam sai re law, matsun ai hku law." "Mai sa mai sa." Marip Tu lauban wa a chyinghka lam kaw pyi ganoi ahtu baila taw hkra lagu gabu nga nu ai, kraw gata kaw "Nang sha hkrit i? Ngai grau makau hkan na ni chye nna sa gan gashun mari kau na tsang ai." Ngu lagu myit let kagat pru mat wa nu ai.

"Dai yu le, nang ja lungseng awng na ten nan du sai ngu sai." "Kaga hkum tsun sa, awng tim anhkau lahkawng rau awng, ngai nga pyaw jang nang mung nga pyaw chyalu re." Nga jawm tsun gabu la nna, shanhkau gaw ja gumpraw tawng nkau mi hpe htu shaw garan gun rai, Kumja Tang gaw manu dan ai buhpun palawng ni sa mari buhpun jahkrak lang, gumra leng langai shap jawn rai, nta sa mari dawdan la manu ai. Matse Maji Cam gaw: "Ga, nat nga ai nta daini tsawm mari lu dut kau sai, ganang na lauban gaba mana wa re kun? Manu pyi n dara hkra." Nga grai lagu gabu mat nu ai. Marip Tu hkawm mat wa hkyen ai hte, shawng e tsun tawn sai kumhpa naw lagu jaw ra ai dum dat nna: "Tu nang naw gan hkring yu." Hkan shaga dat u ai. "N lu hkring sai law lauban wa, jan garai n du yang, hpa sutgan n lu tim, ngai na rai ni naw wa hta shabawn la ra ai, n kring sana re lauban wa htingnu dingsa de naw wa yu dat ga le lauban wa." Ngu Marip Tu hte Kumja Tang yan gahti galai saw jang, Matse Maji Gam a myit hta htingnu mari ai lauban la nta bai shabai wa na mung tsang ai hta n-ga, shi a nta nsa de she bai nhtang wa yu ga nga yang gaw sat kau tim n gui mat ai majaw: "Mai ai mai ai, rai jang gaw jan mung du wa sai, nan a lam shingdang ya na tsang ai majaw, shat sha n saw sai, hkum mung n hkum sana, nan lawan hkawm manu." Nga ta hte lang rai shabawn kau sai.

"Aga, ngai gaw ngai hpe bai chyahkring la nna, bungli kaga bai matut galaw shangun na gan tsang kau ni ai." "Ngai mung shi bai shabai kau na gan tsang kau ai le." "Hkau Tang e, nang chyo lauban tai hkrang raw she rai nga, nang ngai a lauban bai galai tai u le?" "Hpa wa mi ajawp nga ta, ngai pyi n dagraw yu ai lauban palawng hpyi nnan hpun tawn nna, hkyenghka de salat she lui mat re sai." Nga jawm mani shatu hkat chyai let, Kumja Tang gaw labu palawng raw kau bang wa nu ai. "Aga hkau Tang e, daini kaw nna htingnu ndai gaw Matse Maji Gam a n rai sai, htingnu hpe hpa ngu shamying la na kun? Nang a mying gang lang na kun?" "E, nang she rawng ai nta mi, nang a mying lang yang she jaw ai." "Ngai ya mying n mai lang law, lani mi Matse Maji Cam chye na tsang ra ai." "N tsun ganawng hkat nga saga, nta mung maren, ja gumhpraw tawng mung maren brang garan, anhkau daini kaw nna gaw anhkau n rai sai, annau ngu shaga hkat ga, nang Tang rai tim, nang sak lawi shawng ai majaw, nang hpe ngai gahpu ngu na, htinggaw mying mung daini kawn 'Marip Kumja ni' ngu nna lai kau la ga." "Mai ai, hkrak sai, daini kaw nna anhpu annau rai sai, hpa lam hta mung jawm madi shadaw garum hkat, myit hkrum myit ra hte matut nna jawm shakut sa wa ga."

Marip Tu yan Kumja Tang myit jawm jahkrum la ai hte maren, htingnu garan ja gumhpraw tawng jawm garan rai, shan lahkawng a mayam prat hpe jahtum kau rai, hpaga yumga kaga tam galaw sharin rai, num ma mung lani jan e jawm hkungran la rai, ngui ngui pyaw pyaw hte dinghku de sha nga masai. Marip Kumja yannau gaw, yi sun hkauna galaw, hpaga yumga ga raitim, manang wa hte matai malai nga ai lam n nga, masu magaw mawp lu mawp sha ai lam mung n galaw re hta n-ga, matsan shayan re lawu lahta ni hpe mai byin ai daram pawnba madi shadaw re majaw, makau grupyin hkan na makyin jinghku lani hte lani, shaning hte shaning law she law wa, shannau a gashu gasha mung mayet law htam rai ai majaw, hpang e, dai mare gahtawng hpe mung "Marip Kumja" gahtawng ngu shingteng amying shamying la masai rai.

Ma Ja