NYAU GWI WA NI
Maru Gawng
Moi hkawhkam langai mungdan hpe grai chye woi awn ai majaw, shi a mungdan na mung masha ni grai lu su nga mai ma ai da. Laning mi hta, yunchyun manu mana dabak wa ai majaw, mungdan ting na hkai nmai naimam ni hpe sha chyu sha, shaza hkrai shaza jahtum kau ya bang wa ai kawn, mungdan ting yuli hku hku bang wa masai. Yu dai ni gaw hkawhkam wa a hpun nba bunghkum rai ni du hkra gawa azat kau ya nga sai. Shing rai, hkawhkam wa mung myit she htum rai wa nu ai. Yu ngu ai hyen hta grau nga a hka! Ndai zawn she rai yang gaw, buga de na mung masha ni kaning rai na taw? Hkai ningmai kade hkai tawn timung, lu su na n rai, shani shana lagu hkrai lagu krawk jahtum sha ma wa ai gaw, yunchyun ndai ni hpe kaning di shamyit kau na kun i Ngu myit la ai hpang, mungdan ting mahkam hkam na hku aming jahkrat nu ai. Yu ni gaw grai zen ai re majaw, ladat amyu myu hte dingyang lagu sha hkawm nga ma ai. Hkawhkam wa baw machyi taw nna, gwi she rem yu na re ngu, mungdan ting na mung masha ni hpe htinggaw mi gwi jahku hku rem ngu bai dawdan sai. Masum ning gwi bai jawm rem yu yang mung, gwi dai ni gaw sha la nna yup yup rai, yu langai mi pyi n rim ya nga ai. Yu ni gaw yupmang hku nna hkawhkam wa hpe: Hkawhkam wa e, dai na mungdan na gwi ni hpe malu masha mumu maimai jaw sha u, shaloi shanhte ahpum asau rai jang, anhte hpe n-gun kaba hte lu shachyut rim na re, ngu yupmang mu shangun sai. Shing rai, hkawhkam wa gaw shi mungdan masha ni hpe bai matsun ai:
Gwi ni hpe malu masha hkruhkru katkat, mumu maimai jaw sha mu! Shaloi gwi ni yu law law rim sha ya na ra ai ngu aming bai jahkrat nu ai. Dai hpang, gwi dai ni sha la nna yup, yup nna sha rai, shani shana yuphkawk hte di nga shamu shamawt pyi n mai hkra hpum apung mat sai. Yu ni shanhte shada tsun ai: Manang ni e, dai gwi ni hpe hkum hkrit mu, majoi shingkang ai she re, shanhte anhte hpe lu shachyut dep na n re, ya gaw kam ai hku she lagu sha hkawm saga nga sai da. Htawm e, hkawhkam wa gaw yu hku she bai hkan htu hkawm saga ngu nna yu bai woi htu kau tim, yu hku kaw n rawng ai tsip sha tsip tawn nna shara shagu nga hkawm ai yu ni pe kaning di ndang tam sat mat nga ai. Lana mi yu ni hkawhkam wa a gashu a myi sa akrawk sha kau ya ai kaw du sai. Shing rai, hkawhkam wa gaw hkrit ai hte, pawt mayu ai hte, yawn ai hte rai, kaning gaw n chye di rai nna, hkrap myiprwi hte raw rai: Lamu e, aga e, Karai Kasang e, ndai zawn re gaw hpa baw maroi yubak wa rai ta e, hkye la rit law, ngu shi nta npan kaw sa jahtau marawn nga nu ai. Kade nna yang, shana de nsin rimrim nga wa ai ten hta, mu hte gung, myihprap hte lam rai nbung bungga bung ahpawt wa ai htawm, lamu marang ni htu wa ai shaloi, hkawhkam hkaw nbang maga hku myi gaw atu tu, kaka kawkkawk re maka ka ai, lagaw mali tu ai rai lama mi nhku de gat she gat bang wa mara ai. Hpa re n chye ai, lam hkawm yang gaw abwi yawt yawt sha rai hkawm ai re majaw, dai lam hkawm yang shara n na ai, lanyau she ngu ga ngu nna, dai lanyau 9 hpe rem tawn da sai da.
Hkawhkam hkaw na yu ni hpe nyau e atsai awai rim sha kau ya ma sai. Hkawhkam wa gabu dik htum nna, nyau dai ni hpe mumu maimai shan chyahkraw ni hte shat maya jaw rai mayat maya shangun di, nyau la kaba hpe gaw shi a bunghkum kaw yup shangun rai 3 ning du ai hte, nyau manu mana law htam wa ai shaloi, poi kaba galaw nna shi a mungdan na mung masha ni hpe nyau garan rem shangun nu ai. Dai kawn htinggaw shagu rem ai nyau ni mayat law wa nna mungdan ting na yu hpe atsai awai bai hkan rim sha kau ya sai, mung masha ni gabu gara hte lagawn lamawn n rai ai magam bungli galaw shakut ai majaw, moi na zawn ngangwi nga pyaw let pra nga masai. Yuli hkoi ai hpang, hkawhkam wa gaw gwi ni hpe hpa n chye galaw shangun ai nga yang, wa hte gwi hpe yi sa chye shangun u ai. Yi du ai hte wa ni gaw shat hkru hkru sha la sai majaw, n-gun rawng marawng hte yi ganaw htu shakut nga masai. Gwi ni rai jang gaw, yi kaw du ai hte shingnawm kaw jan kra let yuphkawk hte di nga sa yup hkala hka garai jawng nga ai da. Shana de jan du wa ten hta, wa ni yi ganaw ngut kau da nna shawng nta de wa mat masai.
Hkawhkam wa gaw wa ni jau nna nta du wa ai hpe mu nhtawm: Nanhte hpa rai nanhte hkrai wa ai rai? Ngu san dat nu ai. Shaloi wa ni hkawhkam wa hpe tsun dan ai: Anhte yi kawng kaba mi htu ngut kau da nna shawng wa mat saga ai. Ngu htan masai. Hkawhkam wa: Ataw gwi ni gaw? Ngu bai san jang, wa ni gaw: Gwi ni yi du sa ai hte yi mung n chye ai, daini tup yi shingnawm kaw yuphkawk hte di nga yup nga ta masai, ngu htan manu ai. Gwi ni gaw shana de jan shang ai hpang she dum hprang wa yang, wa ni yi htu ganaw ngut kau da nna nta wa kau da nga la sai. Shaloi, gwi ganu langai hkrit gajawng ai hte rai: Ngai hpaji langai mi chye da we ai, anhte nlang wa ni htu da ai yi-ngam kaw wa lagaw hka she n mu hkra gabye gumchya kau da ga, ngu tsun ai hpang, gwi wunawng mi gaw wa ni htu ganaw da ai yi-ngam hta gagat hkrai gagat gumchya lai kau da nna, shana de ningrim rim wa sayang she nta du pru wa masai. Hkawhkam wa gaw gwi ni hpe: Nanhte hpa majaw, ya she du wa ai? Ngu hkap san ai shaloi, gwi ni gaw: Anhte pyi daini tup yi lau n chye ma hkraw nna, ya she du wa ga ai, wa ni yi mung n chye ai, jaujau nta wa mat ma ai, ngu nhtang de shi pau tsun sai. Hkawhkam wa gaw gwi ni masu ja tsun nga ai hpe chye ai majaw, hpang shani gwi ni, wa ni yawng hpe yi de woi sa wa shangun nhtawm, kadai ni chye ai gara hte re hpe sa madun shangun u ai.
Shaloi, gwi ni gaw hkawhkam wa a shangun ma hpe: E myit su wa e, nang atsawm yu u le, anhte chye ai hkrai re nga sai, hkawhkam wa a shangun ma mada yu dat yang mung, wa lagaw hka ntsa hku gwi lagaw hka hkrai re sa mu ai lam hpe hkawhkam wa hpe wa tsun dan nu ai. Hkawhkam wa gaw gwi ni hpe: Nanhte hpe shat alaga jaw kau sai, nanhte gaw nteng nman ai, masu magaw, lagawn lamawn re gwi ni rai nga madai, daini kawn nanhte gaw masha rawng ai nhku gata kaw n mai yup sai, shinggan ntawt kaw she yup manu! Ngu tsun sai. Shing rai, daini du hkra gwi gaw nta ntawt kaw sha nga mat ai majaw, wa hte nyau hpe gwi grai n ju nga u ai, hpa majaw nga yang, nyau gaw hkawhkam lahkum lu dung ai ngu nna pawt n ra nga ai da. Bai nna, "Gwi a wa hkang shamat" ngu ai ga malai mung ndai maumwi kawn wa ai re nga ma ai.
