GAIDA JAN A GASHA NUM TAM
MARU GAWNG
Moi ma langai shi grai naw kaji ai ten hta kawa si kau da nna kanu hte sha nga nna kaba wa nu ai. Kanu gaw sak prat naw ram ai tim la gasha shingtai hpe yu bau maka nna, shi a mahkawn prat pyaw ngawn chyai na ten hpe shalai kau nu ai. Hpa majaw nga yang, madu wa naw hkrung nga ai ten hta shan gaw shada manu mana tsawra hkungga let, ningrum ningtau rai nga pra lai wa yu sai re majaw, madu wa si kau da tim myit shingran mu let, ma hpe yu nna marit ningtsing hpe shawai in nga lai wa sai. Lawu lahta kagu garat ni sa gahkyin na ngu bawng yu tim, nanhte mi na ma a kawa zawn re tsawra myit gaw nchye rawng chye na re, ngai nye gasha shingtai ndai hpe yu kaba nna nga lai, prat jahtum na ngu nna, la n lu mat ai yawn hkyen lam hpe laning hte laning malap kau mat wa ai ten hta, ndum ai zawn nga yang gasha lani hte lani, laning hte laning rai kaba wa nna num la sak ram wa ai ai hte rau, kanu mung gumgai wa in lagaw lata nkung nkang rai wa sai. Shingrai gasha gaw kanu hpe nu e nang nkung nkang re majaw, nu nang hpe matsan yu dum nga ngai, dai re majaw nu e, ganam tam na matu na lawu lahta nta na ganam daw ai ni hpe myit yu u ngu jang, ma e, ganam daw ai ni grai gaw law nga ma ai, raitim ngai ningnu zawn re gaida jan a ganam kadai mung n kam tai na ma ai. Raiyang, yawng yawng gaw dai zawn re myit nchye rawng na re ngu nna, kanu gaw mare na myitsu salang ni hpe shaga la nna bawngban wa sai. Shaloi salang langai mi gaja wa sha "E hke, nannu zawn re jahkrai gaida kaw kadai jan wa kam, wa gwi na kun? Ngai hpe shum shangun mu, ngai gaya ai, dai zawn re jahkrai gaida ni a shangun ma tai ya na hpe mung gaya ai." Nga sai da.
Bai salang langai gaw "Gara mi hku rai yang rai, hpa nga yang nga hpyi mada yu ga." Nga ai majaw, gaida jan grai na gabu ai hte dai salang wa hte gasha hpe woi rai, nta langai mi kaw shana de nsin loi rim re hte nta npan kawn sha naw shaga dat yang, nhku de nna: "Le Hpunggan kawng ya na hkrai chyip hkrai mak nre ni? Nye nta de hpa sa la a ta?" Ngu gwi hte shawk ngu nna shachyut nhtang ai hkrum sai da. Dai kawn gaida jan a gasha grai yawn mat ai myit hte "Aga, mungkan ntsa wa ngu ai n lu yang, pali lasa n rawng ai pali lapu hte she bung nga hka i!" Ngu nna, dai shani kawn myit grai gaya daw mat ai hte kanu hpe: "Nu e, ngai hpe laning mi shinggan de pru hkawm na matu ahkang jaw rit, ngai nu a ganam tam hkawm na ngai, sinpraw kawng maga de majoi shingran mu, agu tu chyu ngoi garu nga ai law." Ngu tsun ai shaloi, kanu langa hpaw hte shat makai shagun dat jang, dawnggawng kawa lahpaw sha lang kau rai nna hkawm mat wa sai. Shingrai hkawm mat wa yang, Nioi ya ngu ai gahtawng kaw sa du sai da, ugum jan shang wa ai gaw yawm yawm, daina ganang wa shang manam yu na i ngu myit ru taw nga nu ai. Shi hkrai sha gara hku nga tim ndai ngai nhan sa du ai nta ndai kaw shang manam ai baw she rai na sai ngu nna, nta ndaw kaw dung nga ai shaloi, sun nhpan kaw kahkrudu mi agu tu tu nga nna shaga dung nga ai hpe mu dat sai, shaloi lahpaw ret re ai hte wut di gap dat yang, sinda kaw pawk, u dai sa hta la nna ndaw kaw bai wa dung ngau ai, dai ten hta dai nta na numsha yi de nna hpun lit mung gun rai wa ra ai. Num sha gaw shanhte nta ndaw kaw la sha langai dung nga ai mu nna: "Jan du wa sayang, tsa nang ganang na rai?" Nga san dat nu ai,
"Hkri ma e, ngai gaw grai tsan ai Hpunggan kawng lagat hpun kaba kaw shani shana u sha gap sha nna nga ai nu a ma shingtai rai nngai law." Ngu htan jang, num gasha mung: "Tsa e, ngai mung nu yan wa a num gasha shingtai rai nngai law. Raitim, tsa e nang daina anhte nta kaw n mai manam na re." Nga tsun u ai. Shingrai la sha gaw hpa rai n mai manam ai re ngu san jang, num sha gaw: "Tsa e, nu yan wa ngai hpe num sha shingtai re nga nna, nta kaw la manam n jaw manam ai." Ngu tsun sai, shaloi la sha myit hta jaw gaw jaw re sai, ang gaw ang re sai, shi mung shingtai, ngai mung shingtai ngu shi hkrai myit la nna, hpaji ladat langai daw bang wa nu ai. Num sha hpun gan hta gawng ai lapran e, shi lu gap ai kahkrudu hpe gan makoi tawn da sai da. Dai hpang num sha hpun gawng ngut nna chyinghka hpaw dat ai hte nhku na pru wa ai lanyau gaw la sha makau tawn ai u dai hpe ret rai hpai la nna, nhku de tawm rai mat wa ai hte la sha gaw, hkri ma e na lanyau ngai na u hpai mat wa sai law ngu jahtau tsun dat let, nhku de lanyau hkan shachyut mat wa nu ai, shan lahkawng nhku kaw jawm shachyut nna lu shachyut la ai hpang, la sha gaw rapdaw kaw abwi ayang rai u mun pun chyai nna jan shadu nga jang, num sha gaw: "Tsa e, nu yan wa yi de na lau du wa sai, nang lawan hkawm mat wa na rai u." Ngu tsun tim, shi u mun naw apun shama kau na nga nha dung nga nu ai.
Hkring n rai, gaja wa kanu yan nta npan kaw hpun lit wa shayu ai "Rang." Nga ai na dat ai hte num sha gaw kaning nchye di, alawan wan rapdaw htingre kaw na nka kaba kaw la sha dai hpe makoi tawn da nu ai. Kawa nhku rapdaw kaw u mun taw ai hpe wa mu nna, gasha pe ndai rapdaw kaw u mun taw nga ai, ganang na u rai? Nga san sai. Num sha gaw mi yat ngai shang wa ai shaloi, nyau gam u langai sha taw nga la ai ngu kawa hpe masu nu ai. Shana shat shadu sha ngut nna, kanu yan kawa mung yup malap mat ai hpang, yupgrep du jang she la sha gaw: "Asi si, asi lu..." Ngu dat jang, num sha nba hpajawng langai sa la ya sai. Raitim la sha dai nyan hpaji hte asi lu lu ngu bai gashung gari ajawp masu nga nu ai, num sha gaw kanu yan kawa na kau na pe hkrit nna shum shaga sa, nu yan wa pawt na ngu tim, la sha dai je grau nna: "Asi iu iu, ngai nta kaw yup yang masha panyep she nyep ai." Nga bai ajawp nga nna, num sha kanu yan kawa na kau na pe hkrit tsang ai majaw, shi mahtang dai mam nka kaw sa shang yup lawm mat nu ai.
Hpang jahpawt nhtoi pyi asan nga hkra chyawm yup malap kau ai nga yang, num sha a kanu yan kawa, ma ndai dai pawt gaw ya du hkra wa ayup nga ai gaw ngu rawt tam yu hkawm yang she, mam nka nhtang dagum hku taw nga ai sa mu nna, htu galeng dat yang, gasha jan la he jawm yup nga ai hpe sa mu jang: "Ja e, num sha shingtai ndai, ya manam gade du ai hpe pyi n jaw n ya ai wa mi, ning arai ai gaw ngu nna, ya mana gaw ngai sha hten mat na sai." Ngu gasha pe sa dun sharawt dat ai ngu yang, la sha a ta kaw wa jum hkra nna, la sha hpe mahtang dun sharawt dat krup ai majaw, ganing nchye di nna: "Daini kawn ni tsa she ngu rit." Ngu nna: "Ngai nang hpe hpa hpu ja mung hpyi na ngai, an hpe mu laning mi sha galaw jaw da." Ngu nna la sha shingtai dai mung kanu kaw ahkang laning mi sha hpyi ai re majaw, num sha a nta kaw mu laning mi galaw jaw kau da nna, num mung woi rai Hpunggan kawng kanu kaw bai nhtang wa sai da. Matsan jahkrai ai ngu nna shum yawn, myit shum kaji, shakut shaja ai myit hpaji rawng ai wa, na gam maka hte ang gatut a shaugawn ku rai na ra ai.
