AGA SA AI
Hpan Ja
(Sara ma kaba Maji Bawk gaw sumrai laika ka shalat de yi-ngam grai kaba ai laika ka ninghkring re, " Wunpawng» ka shinggyin hpung kaw myit atsam n-gun shaw nna grai shakut lai wa sai. Laika ka shalat lam hta ningshawng shaw ai jan re majaw, shi gaw yawng a kasi sara kaba langai mung re. Ningka mying: Hpan Ja)
Ngwi pyaw dik ai laban jahpawt, Ja Nu manap shat n shadu ai sha, gasha yanwa hpe, bu hpun tsawm tsawm rai shakya ya, shi mung shapyan dat yang dangbau ntsa hta hprwi rai hkra galu ai, yu dat yang nak nak rai hkra law nna galu tsawm ai kara hpe, du krung ntsa kaw jaw hpawng kaba law nna jaw hpawng hpawng tawn, sumpan chyang kaw maka grai jahkum nna da ai Jinghpaw hpakang bu shakya la, krawn rawn sinda ang kaw ai hpawp di nna hkum hta chya rai chywi ai htawl san re lawngta gadun palawng hpun la, shanhpyi hte chywi ai, gabye dat yang wawp wawp sha nga ai kyephtap htap la, shanhpyi nhpye ahkyeng re mi hta gun, madu wa Naw Tawng mung tsit maw mang re hka hku dangpai hta lawai la, lawnghpraw hpun nna htingnai kyephtap sha htap la rai, gasha Sin Wa hpe gaw palawng matu hku kazu maka re htu shakap ai lawnghpraw hte labu shakung hku kashun magyi maka htu shakap ai bu chyang hta galai shabu la rai nna, shannu wa ni niang lagaw lam hte Mangshi myu sinpraw dingdung mayan, Hkawshi lam baw maga Hungsin gat de mu hpa mulu masha tam sha mat wa masai.
Hkawshi lam Hungsin gat na malu masha gaw, manap shat rai n hkrup ai Sin Wa hpe, hkumbai she gahte hkra Sha mayu shangun nga ai. "Nu, Nu, ngai shan chyahkraw gangau sha mayu ai, u magyi ma sha ga law nu, u shan hte gayau ai misen mung sha mayu ai, sa hpye ma sha ga yi, wa nang hpa sha mayu rang? Nu hpe lawan mari shangun nna sha saga, ngai grai kawsi sai, ngai grai sha mayu sai." Abawm alang rai nna, myiman shan grai hpraw mani tsawm ai Sin Wa gaw, gat dut seng gran langai hta dam dut ai lu sha amyu myu hpe ta layung hte madi tawn nna, n ji n gu Shadut bang wa sai. "Naw Tawng nang nhpa sha mayu rang?" "Nannu hpa htet yang hpa sha ga le. Mara dai Bangsai sa hpye hte hpalap si htu mung htet sha ga le, ka-ni si shakap ai shan chyahkraw ma shalawm dat u." Naw Tawng sumbu na salik zinghkat mi shaw lu dat nna tsun u ai. "Nu, ngai Yenan kyenfun mung sha mayu ai, hkum hkra mari gahkyin la nna sha ga." Sin Wa gatu garu hpyi wa ai majaw, shannu wa ni niang sa hpye seng kaw dung bang wa nna, shan chyahkraw shawng htet la rai, ma shanwa hpe sha shangun nga nhtawm, Ja Nu shi hkrai seng langai hte langai kaw hkan yu let, mu hpa htawm mari wa nu ai, gasha yanwa hpa ra sharawng ai re shi chye chyalu re majaw, palang hpe shadung hte gayau chyaw ai palang chyaw, shaba si chyaw, naisam chyaw, nawngnai chyaw, wa hpyi chyaw, hpauluda, nbaw bapa makai, u lagaw shayap ai, Jinghpaw shat gada re ni mari jahkum la nna, Bangsai sahpye dut ai seng kaw tawn sha bang wa masai. "Aga, myit gaw kaba, shat kan gaw gaji re rai na lu, shade de wa." "Wa, hpa ntsang ra ai, ngai lu sha ai, ngai grai kawsi sai." Sin Wa ganu bala satik tingsan kaw mari bang wa ai lu sha ni hpe, nmu sha kau na tsang ai zawn rai hkra, hpaw sha bang wa nu ai.
"Nu a gasha gaw law, nau ma ai, gaungwi sha sha u, kadai n gashun sha kau ya ai gaw e." "Nu, grai mu ai, wa nang mung lawan sha u le." Sin Wa gawa hpe di gram tsip zawn re palang chyaw pa mi bagan tsa hta mara tawn ya nu ai. "Ma shawng sha magang u, wa salik naw pak shakre kau na. Gai, Ja Nu, ngai hpe byiya palin mi shalawm ya rit le." Naw Tawng salik daw hpe maisau loi manai di tawn ai kaw anyaw sat kau nna tsun dat nu ai. "La ga la ga, daini mawdaw gawt ra ai mung n rai sai. Ma mung jawng n sa ra, nu yan wa mung rung bungli hkring sa sai, myit mi apyaw sha lu sha chyai na re, raitim ningwa a tsa gaw palin mi sha yaw." Ja Nu byiya htet jang, Sin Wa mung brep si lu na nga rai, hkum hkra mari jahkum la nna, myit mi alawm rai sha sateng bang wa masai. Sin Wa shat sha nau lawan, sahpye jap ai majaw, n-gup mi sha nna ntsin bai lu dat dat rai jang, kan hten wa nu ai. "Wa, ngai nau sha hkru kau sai, kan machyi sai." "Myi kaw nna nau sha lawan sai ngu yang me, ya nga yak sai n rai yi? Hpa nra ai, shinggan pru kau, nam sa kau rai jang mai na ra ai." Naw Tawng gasha hpe mani sai rai let tsun dat jang she, gasha mung du maga mi de nhkyeng tawn nna nta lam de hkawm magang sai. "Aga, daihpawt gaw mam nli pyi dut sha kau saga ngu na zawn she nga hkra hkru mat sai re, daini gaw apyaw sha naw wa yup la sana, hpa mung n kam galaw sai.
Sin Wa, nang a tan laika shaman ni yawng galaw kau sani?" "Mani jau jau galaw kau sai, wa ngai hpe hka sa woi hpungyawt yaw." "E law, raitim wa loi mi naw yup la ai hpang she woi sa na, nang mung naw yup la u, yup kru jang she n-gun ja ai, pawtni gaw jawng sa ten bai rai sai, nau ba jang jawng lung myit n lawm hkraw ai yaw." "Shaloi gaw ngai mung nu yan wa hte rau yup na, yi mai rang?" Sin Wa gaw shi matsing chye wa ai kaw nna, kaga yup ai, galang lang gaw ganu yan gawa hte yep sha yup mayu ai majaw, hpyi shawn nga u ai. "Dai ni sha law. Nu a gasha kaba sayang, nu yan wa hte sha ayup mayu nga la ndai." "Galang lang sha she rai yang me." Sak shi ning ladu hkrum sai Sin Wa gaw, ganu yan gawa hte lu yup na rai sai majaw, gawa kaw hkan dun nang nna, she gumjawt hkra kabu mat nu ai. Ja Nu gaw n sha ma ai lu sha ni hpe bai hta mazing hpai rai, nta du wa yang, chyinghka lam makau kaw, htingbu Sam num gumgai langai shi hpe hkap shaga dat ai: "Ja Nu, ngai nang hpe grai na hkra la kau sai, daihpawt jau kaw nna manang ni hte paijang gasup na hku saw tawn ai re, ya ngai hpe ngaisha Ma Kaw jan ma naw gan woi ya nga sa tawn da ya nga ai.
Loi kring mi sha gaw re da, nang naw sa gan malai ya rit, loi hkring ma a ganu wa jang ngai bai sa galai na." "Nu ba nang bai sa galai na rai jang gaw mai gaw e, nang woi nga su." "Maw, ndai gumhpraw lahkawng tsa hte sa gasup magang su yaw." Sam gumgai Ja Nu hpe gumhpraw lahkawng tsa shaw ladawn dat nu ai. "Nu ba, gumhpraw ngai gun ai, ngai gasup jang gaw ngai a hku sawn na re, ngai nang a matu nkam jasum kau ya ai. Nang jin ai hpang na matu bai sa matut gasup jang rai sai." Ja Nu Sam gumgai a gumhpraw ladawn ai ta htu ganawng nhtang kau ya nu ai. "Shaloi gaw lawan sa wa nu, shanhte masum hkrai grai jau kaw nna la nga masai re." Sam gumgai jan shadut dat nu ai. Sin Wa gaw ganu yan gawa hte yup la na ngu jang she, ganu hpe Sam gumgai bai shangun kau ya nna, n-gup gaw ju ju di tawn nhtawm, gawa a hpang kaw gup gup rai hkan nang Shang wa nu ai. Ja Nu nhku de lu sha ngam ni wa tawn kau da nna, gumgai dingla ni a gasup shara de sa wa nu ai. Hpaijang da shara gaw, Ja Nu ni a rung nta htap lahkawng de lung wa ai lakang magaw gata kaw kum di tawn ai, gawk ga ji ai ma jaw hpaida saboi lahkawng sha mai tawn nna, gayin gayaw pyi nau nmai ai shara rai nga ai.
Gata maga nbang lam de gaw dingla ni mali shakri taw nga magang masai. "Nu tung ni, nante grai la kau sai nrai yi?" Ja Nu mani sha sai rai shang wa jang, gumgai dai ni shi hpe hkap yu nna, yawng mayawng a myiman hta, grai la ndawt kau ai hku: "Eh Nun hpa rai nsa mat ai da kun? Saw gaw shi shawng shat sha ndawt gasup chyai ga nga na saw, anhte pyi shat mung jau jau shajin sha kau rai sa wa yang me, nhtang de masha shayak ai." Ga shawng hkap san ai gumgai jan gaw. lasi gru gru rai, myiman hpyi gaw shat dap hkan tawn shalai kau sai gawlahka si shakyip zawn kyip ginchyup, kara tsi hte chya shachyang tawn da ai kara mung, pungding ntsa hta singtsin mi gaw lamu de rawt marawng taw nga ai, dai kara mung gawlahka si matsun tsun wa ai zawn ri ri rai marawng nga nu ai. Ja Nu dung bang wa ndawt, gumgai ni yawng lawan gasup saga, ten shachyut ra ai nga let, hpai jang woi taw bang wa masai. "Gai gai, dung shara lawan tam saga." Gawlahka si myiman man ai gumgai hpaijang maling hkan hpung langai, lahkawng, masum, mali ahpre hta la nna, ma hkra hta dagup kau n htawm, sinpraw lahkum tam na matu, jak dip dat nu ai.
Hpaijang si hkret she nga grai na hkra chyai dauyin nna hkring ai hte: " Nye lahkra maga de gaw sinpraw re, hta la saga." Nga nna, shi shawng langai ret rai la yu nhtawm: "Ngai gaw mali re, ndai kaw dung ang sai." "Ngai gaw masum re." Hkumhkrang nau galu nna, marung gaw lapawp shingma zawn rai hkra runggung mat sai Miwa gumgai, nau hpraw nna, myiman gaw hka kaw tsing tawn ai nbaw bapa hpe, jan kaw agajawng sha shaw lam jahkraw tawn ai zawn rai hkra ganyung nna, kara hpe na lakawng lapran hku hkai di matep tawn nna zen tawn ai kara matu gaw, na latawn kaw gaw gaw sen di tawn nna, magawn mi yu dat yang nrung gale tu ai zawn rai nga nu ai. "Masum. Ndai kaw nan dung ang sai." Sam gumgai hta la ai hpang, Ja Nu a gaw mali rai nna, hku grau kaba ai majaw, sinpraw de dung ang nu ai. Ja Nu sinpraw de dung ang sai majaw, shi Shawng gayat hpang wa nu ai. "Ama nang shawng la u le." Sam gumgai nrau nhtau shi a sumpan tingsan ashap nna kyin nga ai majaw, Ja Nu hpe shawng la shangun nga nu ai. Ja Nu gaw shi n ra ang ai tawng jahku kabai bang kau dat nu ai. Raitim shi a lawu e dung ai Sam gumgai myit gaw tin, tingsan na rai gaw n mu masawp hkraw rai, "Ngai naw, ngai naw, kraw gahtet mai tsi tam ai re, gara jut kaw matep mat sai kun. "Gumgai jan myit tin ai majaw, nhpye manaw ai ta mung angat rai gari nga nu ai.
Ja Nu shi hpe yu dat yang. gumgai dai gaw wuman na wa hta ja hpe asi ten du wa sai shata zawn, gaw gaw di tek tawn, hpyi nu mat nna ma ahpyap mat sai myi npu na myl tingsan hta, ntsin majaw mi noi rawng nga nu ai, dai ntsin majaw hpe achyaw baw nna hkyen kau yang yu tsawm na zawn re ngu yu taw nga yang, tsawm mari tsi lu manaw shaw la nna, hpunlum bu gasha na hpunium hpaw la rai, tsi dai hpe loi gari ashun ai lata hte mawng di gamaw sha kau nhtawm: "Ma hoi law, ntsin bal jahkaw bun la ni ai." Gumgal jan ta gari let hpunlum gawm manal magap kau nna apre hta dat nu ai. "Sam gumgai chyasi, mi Ja Nu rai n du ai shaloi gaw tsi sha magang na mung n dum, ya malaw she bai ashap sha kyin si wa u, nang gaw galoi mung nhtum nwai sha na sha amyit nga ndai." Ja Nu a man ang de dung ai runggung hta dat nu ai. "Hihi, Miwa gumgai chyasi e, nang mung lupba nhkun de lagaw daw mi gabye tawn da sai gaw nga, ngal tsi nsha nna shawng si mat Jang, nanhte hpaijang gasup manang n lu na gaw n tsang re." Sam gumgal tsawm mari hpaijang hta jinghtum la nna, tawng jahku hkan kabal bang let, "Mawk, ngai gaw hkan sai lu, nan byin yang gaw hkan kabai mu re lu, gumpraw tawng rai nga ai." Nga jang, gumgai runggung mung wuman na nachye wutu zawn rai lahkawng sha ngam sai wa hkrat mat n tsang mani let, tawng jahku hpe yat sha bai hkan bang dat nu ai.
Jahtum e, gawlahka si Shakyip zawn re gumgai jan mung shi a wuman na lahta wa lahkawng hkrat mat ai hku, shinglet htu matep shapraw dat nhtawm mani sai rai: "Eh, Ja Nu e. gumhpraw pru ra sai ga rai nga ndai." Nga let, tawng jahku hpe yat sha hkan bang dat nu ai. "N ra ai, dai she mai nga yang. nanhte nu tung ni hpe galang ta rap shara lu ai mung akam she rai nga ai." Ja Nu jak dip dat nna, magyang galang bai taw bang wa nu ai. Dai lang shi gaw mun masum bang dat nu ai. "Aga, shade tsawm ai wa bang kau ai gaw, na ahpre nau tsawm sai rai nga ai law." Sam gumgai gaungwi gauyang ahpre hta jinghtum, jahtuk la let, grai na jang she kawa yan jahku hta bang kau nu ai. Gahtet ta re kaw, lakang npu e bai rai, shara gyip ai majaw, nhku e dung nga tim sa-up up ai gaw, bunghkrawng manka kaw tsap ai zawn she nga taw nga sai. Gahtet sa-up ai majaw, Ja Nu rawt nna shi a shingdu e noi tawn ai nbung layit gang yit dat nu ai. Nbung nsa wi wi nga nna nsa nan sha naw lagyi pyaw wa yang, shi a man ang na runggung jan nbung layit de ta ladawn nna, lawan jahkring kau u nga sai. Shi ladawn tawn ai ta lahpum kawn nu yu wa ai shan hpyi gaw, dumsu duwai zawn noi abya nga ai. "Nanhte jan nja ai ngu?" Ja Nu gahtet n hkam tim, nbung layit bai gang sat kau nha san u ai. "Ma e, nbung layit dai ngai hpang de ang ang kaw yit ai, daini tup yit bun jang, daina ngai machyi mat na chyalu sha re." "Myit zim jang gahtet nna ai, anhte gumgai ni gaw hkum n chying mat sai majaw, nbung n htang lu saga ai, nang mung gahtet tim lani ni sha gaw naw jan kau u."
Ja Nu a lahta na jan bai hkan tsun sai. Ja Nu ntsa lam gaw mai ai, sat kau ga ngu masu tim, gahtet sa- up ai nji n-gu nga, salat she baili wa nna, nhpye na maisau shaw la nhtawm, salat sha gatsut kau kau rai, shi hpe aga saw ai Eh Nun gumgai galoi she du hkrat wa na kun ngu la let, sharang nna gayat ai rai yang, ahpre gaw galang mi pyi n hkat hkraw rai, shi hkrai sha, mi yat Sam gumgai shi hpe gumhpraw lahkawng tsa hte sa da ya nga ai, ngai she htan ya yang, ya gumhpraw dai ma hkra da shapyen kau ya chyalu sha re ngu, naw lagu kabu mat nu ai. Hkying hkum mi jan dang salat hte mya rai da kau tim Ja Nu a ahpre gaw, gade tsawm nna asawn ayan shaga tawn tim n mai hkat, gumgai ni langai sha shaga ai ni hpe hkrai bang ya kau kau rai, gahtet sa-up ai lam mi, gumgai ni ahpre gayat yang lapawp kaw hkyi ma jawn ai zawn nau lanyan ai majaw, n ri wa magang, ahpre n chye hkat magang rai, nchyi nmu ngu let da dung nga nu ai. "Ja Nu, daini nang gaw Eh Nun a matu gumhpraw sa gun bang ai she rai mat nit dai, hka, ya ngai bai hkat mat sai gaw rang." Shi lawu na sam gumgai Ja Nu jahkrat dat ai ahpre tawng kru hta la nna, Ja Nu gumhpraw shaw ya jang, shani tup Ja Nu hkrai gumhpraw shaw ai hpe yu jin wa nna tsun u ai.
"Hpa n ra ai, nanhte atung ni sha byin yang gaw, daini ngai gun ai gumhpraw ma hkra sum ya kau tim hpa n tsang ra ai, lau she shakut mu." Ja Nu gumhpraw shaw ya let tsun nu ai. N-gup hta gaw shing nga tsun tim, kraw hta gaw hkying hkum lahkawng jan hkra da wa yang ahpre galang mi pyi n chye hkat ai majaw, madu hkrai sha pyin rai dum mat wa nu ai. Hpaijang gasha sha gasup ai re nga tim, marai langai sha n chye hkat jang gaw, lahkawng masum tsa jan ma mat wa sai. Gahtet sa-up ai, gumgai ni ahpre da lanyan ai, kadai hpe yu dat yang mung ahpraw numchying hkyet mat ma sai majaw, ganyung ganyang re hkrai rai mat, ahpre gaw n hkat rai hkam sha yak taw nga ai ten, Sam gumgai tingsan bai hta la let: "HKa hka, chyahkring naw, chyahkring naw, ngai nawngnai shadung naw gayau sha la we ga." Nga nna, shi a tingsan bal ashap bang wa nu ai. "Lawan gayau naw la u, gumgal nang hte ahpre da yang mu law la ndai. Ngai mung shinggan naw pru na re." Ja Nu a lahta na gumgal jan rawt lanyau mat wa nu ai. Ja Nu man ang de na gumgai jan rawt tsap dat yang, marung nau runggung nna, baw lahkawng tu ai zawn she rai mat nu ai, shi mung nam dum de hkan sa mat wa sai. Sam gumgai nawngnai shadung hpaw sha hkyem ai, ta loi gari nna n lu mahti hpaw jang, Ja Nu yu yak nna: "HKa hka nu tung, ngai hpaw gayau ya de ga." Ngu la baw gayau ya nu ai.
"Sak kaba sai majaw, lu sha hpe galang ta law law sha na mung n mai, n sha jang gaw bai kawsi lawan rai nna gaw e, maw, ndai gawm kaw ahpu bang dat ya rit, chye ju kaba sai yaw." "Hpa n ra ai gaw e tung, hpun tawng hpai lawm ai mung n rai yang me." Ja Nu Sam gumgai Jan hpe nawngnai shadung hpaw bang nna ntsin bai ru bang ya rai jang, gumgai jan hkrawk She nga gayau sha bang wa nu ai. Ja Nu nshang madi kau na naw tsap nga yang, shinggan pru ai gumgai yan shang wa mara ai. "Gumgai na sha n jin jin wa, shani Shagu n-gup chyu ningyau, hpa rai n Sha hkru hkraw ai re mung n chye." "Gumgai mana yan e, ngai pyi sak gaw kaba mat, hpa mung sha mayu yang, wa n tai mat ai majaw, ndai Ja Nu ni zawn, nhpa sha tim krawp she ngu maya sha n mai mat, gumhpraw lu t m h at n yawn Si N-a ai ngu yang me, hpa wa yu nji mu ta." "Nma sha ai gumhpraw hpe ningshu ningsha ni hpe tawn da ya u le, nang n sha jahtum kau da n lawt ngu?" "Anhte Sam ni gaw nanhte Miwa ni hpa, tinang gaw mahkri hpahka ntsin hte shat gayau sha nna, gashu gasha hpe ngam da ya na hkrai n myit ai, nanhte Miwa ni she gashu gasha ni a mayam sha tai nna pra ai rai myit dai." Sam gumgai mani let azun hte shi a nawngnai jahku chyagawt lu nna tsun nga nu ai. "Ganu gawa ni shakut ai gaw gashu gasha ni a matu she rai le, hpa mung ntawn da ya yang gaw, gumgai dingla jang yup sha shara pyi n iu ai gaw e. Nang myit ai hku rai yang nsha jahtum kau n lawt re ngu? Mang pyi gade nhta na n hkrit kun?" "Sha le, hpa rai n sha, tinang tam la ai ja gumhpraw hpe me n sha nga ai gaw.
Dai sha n rai ngaishu ngaisha ni lu ai hkrai rai ma ai, ngai hpe tinang a gumhpraw kadai hpe jaw da na mung hkum myit, sha kam ai sha, hpun kam ai hpun, gasup kam ai hku gasup rai nga nna she matsun ma ai, raitim, nanhte hte sha gasup yang gaw. gumhpraw mung hkoi hkun sumshi sha woi gasup, gumhpraw nan nan jai n ma nga ai le." "Na mau dik sai, gumhpraw hpe gashu gasha ni hpe ntawn da ya na nga ai gaw, nang hpe she na yu ai." "Nanhte Miwa ni gaw tinang gaw gumgai sai nga nna, bu hpun palawng mung gat ya hkan hkoi shi hkoi hkun nga nna dut ai sha mari hpun, tinang gashu gasha ni hpe gaw ji nu pyi gashawt na daram ram shakya shangun ai, lachyum n pru myit dai. Tinang tam la ai ja gumhpraw hpe gingdan ai hku jai lang nna si wa yang, sagya gaw ahka n nga na re. Grau na du ai gaw nanhte Miwa ni gaw tinang ganu gawa hpe bau shakre na rai yang, hpunau hkum shagu gumhpraw jawm shapraw nna bau, n kam shapraw jang gaw shada wunawng wubang rai, gumgai dingla ni hpe matsan jahkrum chye myit dai, dai gaw nanhte a gashu gasha ni hpe ganu gawa gaji gawoi ni hpe bau maka ra ai lam n matsun sharin, gashu gasha ni hpe tam jaw na sha myit ai majaw byin ai re."
"Nang tsun ai hku rai yang, n ma ma gaw shaza kau na hku yi? Manya dik ai Sam gungai she rai nga ndai." "Nang she manya nga ndai, ya gaw si ntawn hkrai rai sai, nang naw hkrung nga yang, madu a matu lani mi sha gaw pra la mu, ma ni a matu hkrai tsun, ngai nang hpe pyi nri ai rai sa, hpre gasup yang mung gaji ai hku hkrai woi gasup, nanhte she kam yang me gaw, hpaida tsa lam, hkying lam hku gasup ga nga tim ngai grai kam ai." "Sa gasup su le, nang hpe anhte gang da ai ngu!" Miwa gumgai n-gup pyi chyum chyum rai wa nu ai. "Ngai gaw kam sa, dai re, ramma ni ngai hpe lanyan la ai nga n dawt ma ai majaw sha re, he, dai sha nrai yang. Shanhte a gumhpraw shawng ma mat na she tsang ai, ngai gaw hpa n tsang ra ai." "Nanhte Sam ni chyahtam gaw hkausoi sha sha tim kadai mung kadai gumhpraw pawng la nna she sha ai ni mi rang." Ja Nu a man ang de na gumgai jan a kadu hka dingla a wa zawn re wuman wa npawt du hkra mani shakra tawn nna tsun dat jang she, sam gumgai bai tsun ai: "Dai hku she rai le, kadai mung kadai tam la ai gumhpraw she re ngu yang me, anga laban ni hpe hpa ngu jaw kau na rai." "Nang gaw lu nna rai dum ai she re, anhte gaw nang zawn gumhpraw law law n chye tam nna, lu ai sha gaw gashu gasha ni hpe ngam da ya mayu ai re le." "Hkum anya nga sa lawl Ja Nu pyl na mau sadawng.
Ja Nu, nanhte Jinghpaw ni gaw gumpraw lu jang gara hku jai ma ta?" "Anhte Jingghpaw ni gaw, gumhpraw lu jang shawa yawng hpe wawl jai na, mu ai lu sha lu jang htingbu htingpyen ni hpe shaga la nna woi sha na hku she myit ga ai, ja gumpraw law law lu jang gaw, pyaw lam shawng hkaja ai hku rai sam ga ai. Ja gumpraw hpe mung tinang tam la nna tinang nan myit mi adu jai kau ai baw nhten rai sam ga ai." Ja Nu shingngu htan dat jang. shi a man ang de na gumgal jan shi hpe grai yu mau la ai zawn, kring mi yu la nna: "Gumgal yan e, ten hkum shama masa, lawan she gasup saga. Dai Ja Nu galang mi pyi rai n hkat yu al rai nga al." Nga nha, shi shawng hta ang ai majaw, hpaijang bai hta bang wa nu ai. Masum mali lang dang bai grup mat wa tim, Ja Nu a ahpre gaw, yu yang gaw tsawm she tsawm, nat lawm ai zawn, n mai hkat hkraw nga nu ai. Jan gadang wa magang, nhku gata e sa-up magang. Ja Nu a myit hta nzim nzam nga wa magang rai, nhpa byin ai ga rai sai kun, loi kring gumgai ni ngai hpe kam shade n gaja ai nga nna mani kau sai ga re ngu, myit lawm n lawm rai da dung nga yang she, shi a man ang de na gumgal jan tsun ai: "Ja Nu, lawan hkat u le. anhte hpe gumgai sai nga nna hkum yan, hpa n tsang ra ai." Ngu dat nu ai. "Atung, ngai n kam hkat nna n hkat ai nre, shi hkrai mi n hkat hkraw nna ngai pyi she mau mat ni ai, dai she yu mu, ngai mi jau kaw nna ahpre shaga sai, hka, she yu mu e, ngai ra ai n pru nga ai gaw." Ja Nu Shi ahpre ganawng gadawng dan nu ai.
Dai shaloi na lang shaga ai ahpre gaw, kawa yan masum, kru, jahku rai taw nga ai. Shi a lahta na gumgai jan gaw shi manat tawn ai apre ni ma-hkra Ja Nu ra ai baw kra rai jang she, mani sum rai, "Ngai n kam n gwi kabai mat nna manat tawn da we ai. "Ngu dat nu ai. Shi a man ang de na jan mung Ja Nu ra ai ahpre ni ayai aya di lang tawn nna: "Npru yu ai majaw ngai n kam gayat sai. Dai gaw, ngai mahkra lang tawn da we ai." Nga nna ahpre hta ladawn dat ai ta lahpum hku nna ren yu wa shan hpyi gaw, nau hpa mat nna, shan hpyi hku nna shi a miman pyi lau mu mada sai. Ja Nu mau mat nu ai. Gumgai ndai ni gaw ahpre gasup grai kung ai ni she rai nga ma hka, shanhte zawn ndi nda di da yang she mai sai ngu, shi ra nga ai hpre hpe dingsang sang langai lahkawng run jahkrat, hpan shagu na ahpre kabai jang, gumgai ni yawng Ja Nu ra ai apre hpa re n chye tak mat wa masai. Gumgai ni naw tau ta nga yang, Ja Nu ahpre langai hpe "Bung!" Ngu saboi kaw aja wa adep shangoi dat nhtawm: "Mawk, ya chyau hkat sai!" Ngu tsun dat ai shaloi, shi lahta maga dung ai gumgai jan: "Goil Goi sha e!" Nga gajawng let, sinda magum nna nyin dung mat wa nu ai. "Udi kawp gumgai, wa nsi htan mat wa nni? Ja Nu, gumgai dai salum ana lu nna, gajawng kaja re nsen hte n htuk ai rai nu ai, yat sha gasup u yaw."
Sam gumgai gaw sagoi ga hku san let mada yu dat nu ai. "Atung, tsirung nsa ra na re ni?" Ja Nu a laji pyi rawng nga hkra, daini gaw wa si hka hta ai ngu ai baw rai ang sai ngu rawt tsap nna san dat nu ai. Gumgai jan masin hku e magum tawn nna, myidi shim rai grai na kra dung la nna she: "Ama nang ngai hpe ganoi gajawng sat kau nga ndai, yat sha tawn u, ngai gaw salum ana lu ai majaw, gajawng kaja nga nna ngoi pru wa jang grai chye gajawng ai re." Nga nna shaga pru wa jang she, Ja Nu myit loi pyaw mat nna, hka gawm hta hpun lum ru bang ya di, shut sai, daini tup ahpre n hkat hkraw ai, tsawm mari hkat dat nna, kabu dinglai kau dat ai re ngu jang she, Sam gumgai mani let bai tsun ai, nang chyau kabu, dai gumgai gajawng si mat jang, anhte hpaijang gasup manang taw mat na she ngu bai nga sai. Shaloi she Miwa gumgai mung. manang pyi si wa na zawn ngu nga yang, na kahka n-gup dai gaw ayan sha manang wurum na chyu chye. Nga nna pawt dat nu ai. Shaloi, Sam gumgai gaw shinggan naw sa kau na nga nna bai rawt mat wa sai. Shi bai nhưang shang wa ai shaloi, htungba gata de gasawk hkrai gasawk nna htang langai bai shaw baw maum la rai, ahpre lawan gasup na matu shadut dat nu ai.
Ja Nu gaw salat hte li rai, Eh Nun galoi wa she du na kun ngu myit la let bai gasup bang wa ma yang, matut nna jahku lang ting awng sha jang she, gumgai ni shi hpe ta gasup shadu nna, ahpre hta na she n dum hkra, Ja Nu a lata de sha jawm yu nga manu ai. Shingrai Ja Nu gaw gumgai ni shi hpe ntsen wa magang, shi hta la ai ahpre ni hpe saboi gaang de hkrai sa tawn, shi a ahpre ni pe mung saboi nten hku hkan nna jinghtum tawn di gasup taw nga jang she, gumgai ni yawng mayawng lapawp hkyi majawn ai hku, mi nna sha lanyan nga yang, grau lanyan ai hku bai da mat manu ai. Ja Nu myit nji wa sai, shi gaw myit loi tin ai akyang rawng nga yang, gumgai ni shi hpe jang ai hku galaw jang, shi masin hkat hkat ngu let, kan machyi si wa ni ai ngu masu nna, namdum kaw ta gyenan na shi ga amyu myu sa hpaw yu nhtawm, tsawmra na jang she bai shang wa nu ai. "Ma nang hpe nam dum kaw di hkrat bang mat sam sai ngu ga ai." Sam gumgal shing nga jang, Ja Nu bai tsun ai gaw, daihpawt sahpye sha nna gala majap loi sha jap kau sam ai, kan mase mat nna re ngu tsun jahpai kau nu ai.
Dai hpang kaw nnd, Ja Nu a ahpre gaw, shagu lang ngu na shi hkrai awng sha mat nu ai. Shaloi Ja Nu hte man ang dung ai Miwa gumgai ta nayi loi n hkring ai yu ai majaw, Ja Nu san ai: "Atung ni, hkying gade du hkra gayat na re ta?" Ngu jang, shi lahta na jan gaw: "Gumhpraw dang jang tawn kau mayu wa sai kun?" Nga nna ga loi n pyaw al tsun dat ai majaw, Ja Nu grai n kam madat nna: "Ngai ya yang grai gayat pyaw wa jang, nanhte hkying hkrai yu wa ai majaw, bra mat hkyem sam ai ngu she myit taw nga yang me, lau she gayat yu ga, atung ni a gumhpraw agying dang la mayu nga nngal." Ngu dat nu ai. "Anhte gaw shani shagu hkying manga tup kaw hkring ga ai." "Eh, mi yat grai dang sai ngu jang, ya atsai sha bai mahtoi kau sai re, ya gaw Ja Nu e hkrai dang sha kau sam sal re le." Lahta maga de na gumgai shing nga let, shi hta la ai ahpre hpe kabai na n kabai na nga nawn na taw nga let, sai lam gaw lagat hpunru zawn arawn nga ai du hpe shawn shawn rai saboi gaang de chyan mada taw nga jang, Ja Nu myit yu htum mat nna: "Tung e, nang kabai dat ai ahpre ngai n ra na, hpa n tsang ra ai, dai yu, ya ngai shaga ai ahpre grai law nga ai, nanhte kabai ai hpe ngai n hkap la jang rai sai." Ngu nha, ahpre shanhte hpang de ganawng pya madun tawn nu ai. "Teng teng n ra na kun?" Gumgai ni kam n kam gayau nna, Ja Nu hpe san shagrin nga nu ai. "Cha e, nanhte kaba ai ni hpe kaning ngu masu na rai, nang she kabai u, num ga galang dat, gumra lagaw galang hkat she re, n ra ai ngu sai kaw nna teng sha nra na le, ngai masu ga n chye tsun ai jan she re." Ja Nu ga tsun n ngut yang, mun lahkawng bai hta la nna hkat mat nu di. "Eh Nun chyasi ndai, jan du wa tim n sa ai, mahkoi n sa sai ga rai nhten."
Sam gumgai ga hkrai hkrai nga let bai da bang wa masai. Ja Nu a ahpre gaw gara hku da yang gara hku awng taw nga ai hpe, shanhte masum grai n kam yu let taw nga ai loi zim nga mat wa ai hpang, Ja Nu a man ang na gumgai jan ta na nayi galang bai yu dat nhtawm: "AWh, hkying manga du wa sai, lani mi bai lai tu sai law." Nga nna, shi a man hku na ahpre ni hpe htu ganawng bang kau dat nu ai. Shaloi she Ja Nu mung salat hte li rai gumhpraw hti gahkyin la nna, rawt wa let: "Atung ni e, nanhte a gumpraw loi dang la kau sai, grai tawngban sai law." "Manya hkum shabu, nang dang ging nna dang la ai she re, kadai hpe mung n tawngban ra ai." Sam gumgai palawng hta hpun la let tsun u ai. Raitim Ja Nu yu dat yang, Miwa gumgai yan gaw myit loi n pyaw mat ail hku rai nga ma ai. Lakang nhpang na hpaijang gawk kaw nna pru wa yang, jan grai naw tsaw ai majaw, jan du mahka na jan ja, ngu ai ga malai hpe Ja Nu dum let, shinggan le re shaloi, nsa loi hkoi ai zawn nga jang she, nsa kaba shaw la nna, daini na daram gasup n pyaw ai ten gaw, kaning di dang hkam na ngu myit nga ninglen, shi a myit hta: Htawm hpang de ngai bai gumgai wa jang, ramma ni ngai gasup ai lam hkan gasup lawm na matu aga la da ai rai u ga ngu myit shapyaw la nna, gumgai ni hpe n la ai sha, shi shawng ta lam de achyan rai nkawm mat wa nu di.
