LAPU PANWI NINGTUK NRAWNG MAT AI LAM
Moi shawng de du sat hte masha ni a ga naw shaga rum ai ten hta, punggyi kaba hte lapu panwi shan gaw tinang kadai mung kadai a atsam rawng ai lam shapraw dan hkat mayu ai majaw, jawm shingjawng hkat bang wa masai da. Shing rai, dai punggyi wa gaw lapu panwi hpe ya nang htaw ra lagat hpun na nam lam hpe ma hkra gawut sharun kau dat yu u ngu nna tsun jang, lapu panwi gaw shi a ning tuk hte lagat lap hpe atsai awai gawut sharun kau dat nhtawm, punggyi wa hpe gai ya nang hpun lap bai shalap dat yu u ngu nawa bai tsun sai da. Shaloi dai punggyi wa gaw u ra ni hpe shaga dat jang, u ra manu mana pyen hkrat wa nna lagat hpun ninghkri lakung shagu hta sa dung jawng nga masai.
Dai hpe lapu panwi mu jang shawng na zawn zawn di nna bai gawut dat u yang, gade gawut tim, dai ura ni gaw hkrung ai re nga yang nlu gut shamawng kau lu nu ai. Dai majaw, lapu panwi gaw punggyi wa hpe gaya si wa nna shi a hkum hta na ningtuk hpe atsai awai ahprup gamung kau dat nu ai. Dai shini kaw nna tsamat, lagat, machyi kagyin re gasawt hkra gawa hkra yang bum lapau wa shangun ai tu hkrung rai ma hkra gaw lapu panwi a ningtuk wa gamang hkra sai ni hkrai rai nga ai da. Dai shani lapu panwi a ningtuk nwa gamang hkra ai gaw machyi ni ma rai ma ai, shingrai nna shanhte machyi ni hpa hta pyen dung tim ta sha gayup nna, n-gup hte nkawa chye ma ai. Lama machyi dai ni ningtuk she rawng yang gaw kadai ndang hkam na rai nga ai. Dai shani kaw nna gaw lapu panwi hta ningtuk nrawng mat nna, masha dusat mi mayu tim alawan nsi mat lu nga ai, masha ni nshi lama tsat ai rai yang mung gadoi ga pru wa lu ai da.
(Maumwi ka ai: BAWM LI TOI)
