Jinghpaw Wunpawng Amyu sha ni a num wawm num la lam hta hpuga jaw bang nna num wawn num la ai htunghking gaw majun hte ep lachyum rau prep manu shadan jai lang hkrat wa ai htunghking laida lam rai nga ai. Majum lachyum hpe malap mali tawn kau nna hkrang masa hku sha jai lang ai rai yang manu shadan ai myit masa yawm wa ai hte mat wa na matu aloi sha byin wa mai nga ai.
Htunghking lai da ni hpe ban hte ban hti ginlen nga na ahkyak ai. Dai rai nna num wawn num la hpuja hpuga nkau mi lachyum hte laida dat ai lam hpe ginlen dat ai.
Ningsin Ja
Ningsin ja ngu ai hpe mayu ningnan ni kaw num hpyi sa ai shaloi lang ai. Shawng e garai nla yu ai mayu ningnan katsing galang mayu dama hku hkau lam ningsin chyip naw re kaw num wa ai jan a hpu bang ai hta nsawn shalawm ai nba yan langai kumhpa masa, mayu dauma lam nnan hpaw la ai hpe ningsin ka ngu ai. Kanam makyin mayu makyin ni kaw num hpyi sa yang nlang ra ai.
Bwimung Bwitsang Gayen
Bwimung bwitsang gayem ngu ai ja hpuga mung nsin ja hte masa bung ai. Jinghpaw Wunpawng ni gaw dum nta ni hpe tinggaw, hkindu, shingbwi, prang hkinmu ni hte galup ai hpe shangu nga ma ai. Nta galup ai shangu matu hpe bwimung ngu bai tsun ai. Mayu ningnan ni kaw num hpyi sa ai shaloi hkungga madin malai tawn ai masa hte num wa ai jan a hpu bang ai hta nsawn shalawm ai hpuga langai laksan lang sa ai. Ya na prat masa hku nga yang kumhpa lama ma lang nna ga hpaw ai. Nta shang ja, nta galup ai bwi mung hpe gayen ai madin malai kumla re. Mayu makyin mayu dingsa kaw num hpyi sa ai shaloi bwi mung bwi tsang gayen shing nrai ningsin ja ngu, langai ngai shamying nna lang ai.
Hkau Hkri Hpuga
Wunpawng ningpawt hta Marip wa kumja, Lahtaw Naw Lawn, Lahpai Daina La ni yawng gaw chyu pawng kahpu kanau hkrai hkrai rai nga ai. Hkau hkri hpuga ngu ai hpe mabyin masa hta hkan nna lang ra ai kaw lang ai hpuga re. Jinghpaw Wunpawng ni gaw mayu dauma kahpu kanau ru sai daw ang, hku hkau masa hte nga pra ai. Mayat maya law htam nga pra wa ai shaloi mayu hpan dauma hpan ngu hkrang jasi masat hkat n mai wa ai. Ru sai labau gum ran nga pra ai hpe yu nna kahpu kanau daw ang ai kaw num wa num la mayu dauma byin wa ra ai lam ni nga wa ai. Marip Sumlut, Marip Lama ngu ai Marip hpan hte hpan, Lawhkum Lahtaw, Kadaw Lahtaw nga nna Lahtaw hpan amyu myu nga ai. Marip bung nna marip hpan nbung ai shada num jaw num la ra wa yang ru sai hku hkan yang marip shada re majaw kahpu kanau daw ai rai tim gum ran ai labau galu sai rai nna marip hpan nbung sai majaw mayu dauma tai na ni shawng shabyin dai ai majaw kahkau ngu kahkri ngu shaga lai na laksan hpuga langai shaw nna daw ang shaga lai na jaw ai kahkau kahkri hpuga hpe, hkau hkri hpuga ngu shamying lang ai.
Yu Htang Ja
Jinghpaw Wunpawng amyu ni daw ang ai ru sai hku hkan nna hku sat ai hpe htung tara hte hkrak manu shadan ai. Amyu hku hkan yang dauma daw ang ai kahkri ma sawng n re. Marip Lama gaw dama daw ang ai Nhkum Lamai hpe mayu shatai ra wa ai shaloi hpuga langai laksan shaw ra ai, htung tara shut ai lachyum re. Dauma daw ai kaw mayu nhtang shabyin ai majaw yu htang ja ngu num wa ai jan a hpu bang ai hta nsawn shalawm ai, mayu dauma htung tara nhkan ai ngu je-wat ai lachyum hte laksan hpuga langai shaw shangum ai hpe mayu nhtang ja, yu-htung ja ngu shamying ai.
Kana Shingkawt Ja
Jinghpaw Wunpawng htunghking num wa, num la ai lam hta shinggyim ahkaw ahkang lam ni lawm nga ai hpe mu lu ai. Shangai shaprat ai shaloi shawng hpang shangai shaprat pra sa wa ai hte maren num wa, num la ten du yang mung, shawng shangai prat pra ai ni shawng num wa, num la ra ai. Dai ahkaw ahkang (right) nhkan nna num shawng wa ra ai kana jan hpe nhpyi ai sha kana hpe shingkawt lai kau nna kanau jan hpe hpyi la ai majaw jewat ai lachyum hte kana jan ra sharawng ai rai lama ma shing nrai nba yan langai shaw ya ra ai hpe kana shing kawt ja ngu shamying tsun ai.
Writer - Chyana
