JINGHPAW GA SI GA NGAU

Chyurum ai Wunpawng (Kachin) Jinghpaw laika ga si ga ngau ni hpe tsun shaga jai lang sa wa ai shaloi," shi shara hte shi" " shi lamang hte shi" bungli hta hkan, hpan hte hpan hta hkan nna, shamying shachyaw shaga jai lang ai Jinghpaw ga si ga ngau ni grai lu ga ai hpe mu chye lu ga ai.

Mungkan hta Chyurum Wunpawng amyu ni sha n rai, mungkan hta danhkung gumhkawng nga ai mungdan kaba, amyu kaba, kaga amyu ni hta mung, shap lang ga, ga bau gale la ai ga ni hte prat masa hta hkan nhtawm shalat la ai ga ni law law wa jai lang nga ai hpe mu ai.

Rai yang anhte Jinghpaw ga madung majing nga nga ninglen maigan ga (Myen ga) kaw nna lachyum dantawk gale la nna tsun shaga jai lang sa wa ai law law nga wa ai majaw Jinghpaw ga madung ni mat ma wa ai. N chye mat ma wa ai lam nga ai. Dai majaw Jinghpaw ga si ga ngau ni zaibru jang na zaibru zawn law htam nga ai kata ka jasu jahprang shadum dat ai lam rai li ai.

MAKOI MAYANG AI HTE SHALIM SHATSIM AI NGU AI GA HKAW JAI LANG AI LAM.

Makoi Mayang ai

Ndai "makoi mayang ai" ngu ai ga si ga ngau gaw, machyi makaw, ana ahkya lama ma byin nna (snr) asak ugut gu, nga jin shanut nu nna kaja ai hku si wai mat wa ai (shawa lam/ kaja lam de wa ai) ni a lamang hta jai lang ai lam rai nga ai.

Shalim Shatsim Ai

Ndai "shalim shatsim ai" ngu ai ga hkaw, ga si ga ngau gaw, masha katsing si ai, sawn ningdang si, hka hkrat lim si ai, hpun kaw nna di hkrat si ai, nam na dusat matse e kawa sat/ galun adawt kabye dingsa sat hkrum ai hte shingra hpyen amyu myu hkrum katut ai majaw si ai, "sa wa si ai" (n kaja ai lam de wa ai) lamang hta jai lang ai ga si ga ngau re hpe chye lu ai.

DUSAT HTE SHINGGYIM MASHA SHANGAI CHYINGHKAI SHAMYING AI LAM.

Ma Shangai Ai Ngu Ai Ga Si Ga Ngau

Ndai shangai ai ( ma shangai ai) ngu ai gaw, shinggyim masha ni shangai chyinghkai mayat ai hta jai lang ai ga si ga ngau re hpe chye lu ai.

Kasha Hkai Ai, Hkalung Hkai Ai, Hkalung Yu Ai

Ndai ga ngau masum gaw, yu maya nta dusat hte nam na dusat dumyeng ni kasha hkrat, hkalung yu ai, hkalung hkai ai ngu shamying jai lang sa wa ai re hpe chye lu ai.

Hkalung Ja Ai (Ja Ai) Ga Si Ga Ngau

Ndai "ja ai" ngu ai ga si ga ngau gaw, adi di ai baw hpan u galang, lapu hte hkalung ja ai dusat matse hpan rai nga ai, sharaw, tsap ni,hkalung ja ai hpe "ja ai" ngu jai lang hkrat ai hpe chye lu ai.

Loiyang Hkru Ji