WUNPAWNG AEROBICS KABUNG

Anhte a htunghking ka manawt ni law law nga ai kaw na kabung a lam jawm yu yu ga. Htingnai kabung, Hkahku kabung hte kaga ginra ni hkan na mying gang ai kabung ni nga ai. Kabung hpe gaw "DUM AI" nga ai.Manau rai yang "NAU" ai nga ai. Gara buga kaw mi dum ai rai timung bau masum dum gindawng nna ka manawt ai hpe ngu ai. Shawng de gaw gumgai dingla si wai mat ai shaloi shalum shala ai hku kabung dum ai.

Gumgai dingla, mahkawn shabrang ma kaji du hkra laksan shaman shakyang la n ra ai sha wuhpung hku mai dum ai. Kabung shawng ai wa hpe "Bungla" manau shawng ai wa hpe "Naushawng", Lawng Waw (Maru) Ka Ji Byu shawng ai wa hpe "Ka Ji Kanu" ngu ai. Kabung Bungla wa gara hku hkrang woi shala yang hpang hkan ai ni yawng hkan nang ai ka hkrang rai nga ai.

Kabung Dum hpang wa ai lam gawn yu ga. Shawng de anhte a ji woi ni gaw bau, dumhpau sinat, nga wuloi, nai mam law law lu ai wa arawng ningsang kaba ai.. Bau (10) rai jang dum mi ngu ai, mam dum hpring hkra lu ai ngu tsun mayu ai. Bau law law lu ai salang wa si wai mat ai shaloi shi tam mahkawng da ai bau lu malu ni hpe moi mang tawn da ai makau kaw shanat dingren da ma ai.

Moi na kaji kawoi ni gaw nga wuloi hte jahpu dat yang she tsu ga (sumsing mungdan, katsan ga) du ai ngu hkam la ma ai. Rai timung nga wuloi ni hpe rem shani da ai lam gaw n nga, dat shalam da nna shazai hku sha tawn da ai. Akajawng sha nga wuloi sat ra wa ai shaloi, la wangan waja ni hte mu shabrang ma ni gaw ga gyip gyeng ai shara, nga wuloi ni lai manu ai mahkrun ang ai hkan, shara mi kaw na shara mi de kumhtang htawt kum kum rai bat shadang, nhtoi law law na hkra nga gyit hkawm ra ma ai.

Shingrai nga wuloi sha n lu rim dingsa nta e si kren taw nga ai wa hpe mung sin tik tik, manam wa ai zawn nga jang hpun tinghkum nawng hpe ga nna krawk da ai Du-u hta bang, Du-u hpe chyip hkra ri pali pa hte ngang ngang gyit shajup, sumprat dit bang nna shachyat, dumsu hkyi hte ga dingnya dik da ai hte chya shachyip tik tik di nna rem sin ma ai.

Moi mang sin ai aten na wa jang yup daw yup mayu ai hkrai rai wa ai. Yup ai masha nau law wa jang n yup ai ni gaw moi mang makau kaw tawn dingren da ai bau kaji kaba ni hta dum nna yup ai ni hpe jasu sharawt rawt re ai kaw na shaning na na rai jang bau dum gindawng ai de du wa ai, kabung bau byin wa ai.

Masha law majaw jang gaw kaning re ai masha mung pru wa chye nga ai hte maren, shi hkam baula ngut, matsat hkam bauram baudawng dawng, kru hkam baumawng kawk tawng tawng nna bau dum gindawng dat ai nsen madat sham bang wa jang, ndai ya si wai mat ai dingla/dinggai gaw shi asak hkrung nga ai shaloi bungli galaw yang ndai zawn chye rai, wawra zawn chye galaw ai nga nna langai hte langai hpe hkrang shala dan ai kaw na jahtum e gaw kabung ka ai hkrang pru wa ai.

Kabung ka hkrang ni hta, htinghput htingra yu ai, yi sun shara yu yaw ai zawn re hkrang shala yang gaw baw daw shamu shamawt ai, mam ting mam hkai amu galaw ai hkrang shala ai shaloi gaw lata hte mashi nshang shamu shamawt ai, hkai ningmai hkai ga dip pat ai hkrang shala ai shaloi gaw lagaw daw shamu shamawt rai nna hkamja lam hte grai htap htuk ai Wunpawng ka manawt Aerobics langai mi rai nga ai. Sinna mung ni a Aerobics manawt pyi gaw anhte a kabung kaw na yu jahtuk la ai masa pru ai ngu na zawn rai nga ai.

Ji jaw nat jaw prat hta gaw dumsa hkingwa, hkinjawng hkingmang ni a ahkaw ahkang lu ai hte kabung dum hpang ai. Nta ndaw, npan maga de nna bau dum ai ni shawng, dai hpang bungla wa woi nhtawm nta nhku de dum shang wa ai. Dai hpe 'kabung shawn ai' nga ma ai. Si ai wa a numla shabawn, tsu shabawn ngut ai hpang 'kabung sat' ai ngu ai ginchyum kabung dum ma ai. Kabung sat ai shaloi nta nhku kaw nna shinggan de kabung dum let pru wa ai. Kabung dum lang ai shingna ni hpe shagyi nga jahpu nga dun sat ai karoi nhkrun de yawng kabai sharu bang kau ai. Kabung bungla wa shinggan de pru le wa ai hte bau nsen jashai kau sai kalang ta rau jahkrum dum kau ai rai nga ai.

Moi na ji woi ni kabung dum ai shaloi kahtan tsa dinghkang langai hpra lang nna ka ai. Kabung dum kade daram hkrum ra ai gaw, shi dap htingnu dapnu dap, (si shat shadu dap) kaw nna dawdap, nbang dap maga de mada sumra dat yang kawa yan langai sha hpe tek jum nna manawt ai zawn rai hkra hkrum ra ai. Bai lagaw shamu shamawt dat ai shaloi mung Roma majan sumla hkrung yu ai hpa, hkrum....hkrum.... hkrum... re ai.

Kabung dum let mung, ningchyin ningkawn ga, poilung kanghpoi ga ni hte, du wa tai na, magam la wa tai na, mayat kanu tai na, sahti jan tai na, nai mam sut hpring, yamnga sut ladi chying na ngu nna shakawn awlaw hkat, shada ginla hkat nna nhtoi htoi she ndum alum aja rai kabung dum ai.

Ya hpang daw de gaw myit n su ai masha nkau mi ningsin hpe ninggang la nna nhpru n ru, masai marai, nse nsa, matsa mawa, yu nhtuk matsat shabat re law wa ai. Dai hpe myi shawng hpaw sai makam masham sara salang ni myit yu ai shaloi kaja ai ka manawt hpe kyem mazing na maga de n yawng ai sha, Wunpawng sha ni lai akyang byak na maga de tsa hta shadang grau law wa na hpe mu mada wa ai. Dai majaw htunghking kabung hpe yup kaba hte shayup kau dat ai gaw ya du maten rai nga sai. Buga shara shagu hkan kabung bau nsen zim mat sai. Kabung dum ai shaloi na bau dum gindawng ai zawn dum shangoi yang pyi masha si wa ai baw re nga chye tsun wa ai. Kabung dum nna masha si ai rai kun, masha si nna kabung dum ai rai kun, kabung n dum ai aten ni hta gaw masha n si ga ai rai kun ngu na lam nga wa ai.

Ya prat bau hpe gaw n lang mat nna nawku jawng, laika sharin jawng ni hkan mung nbungli bawm kawp hkrai dum shangoi ai.

Kabung gaw gumgai dingla si shagu dum ai re majaw laning mi yawm dik kalang lahkawng lang gaw dum byin ai htunghking ka manawt re. Manau gaw shi ning hkun ning na jang she nau byin ai. Dai pyi, du magam ni byin tai yang she mai manau ai. Lawngwaw Ka Ji Byu mung dai hte maren dum nta nnan htingshawn htingwawn ai shaloi she ka byin ai.

Ya prat gaw anhte Wunpawng sha ni hpaji machye machyang nga ai law sai. Zai ai lai akyang ni yawm mat tsai mat ai daram rai sai. Dai re majaw htunghking Kabung hpe Hkristan hpung jashawn la nhtawm kabung bai dum yang mai na sai. Ji woi ni jaw da ai Wunpawng htunghking Aerobics ka manawt sali wunli grin nga u ga.

Kumshan