BAHKAP NBA

Wunpawng sha ni a num wawn num la lam htunghking laida shagu hta majun hte lachyum hpe manu shadan la ai laida maka ni hkrai rai nga ai, num ni num wa ai shaloi bahkap nba jahpye dat ai lachyum gaw mayu ni kaw nna kashu kasha mayat maya law htam rai nga na matu ma nbat hpe shaman ga hte sharung shakau kungdawn jaw ai ma ba hkap na matu jaw dat ai nba yan nba tawn hpe bahkap nba ngu tsun ai.

Bahkap nba hpe mayu maga na mayat maya, lai kyang myit su mahkun hku ai kanu kawa langai ngai hkung-ran na ningtawn nba yan (nba tawn) hpe ma nbat makyit ai zawn matu lahkawng hkrum ginsu makyit hkawng wang nna num ningnan jan a lahkra lahpa kaw ginsu makyit majaw ra lapai maga hkawng wang ye re hku shaman ga rau ep, shakawn ga hte prep, hpa bai jahpye ya ai.

Num wawn num la ai gaw mayat maya law htam galu kaba lam hpe madung tawn ai hte maren sharung shakau kungdawn rai ni hpe mung lachyum rau ep, shaman ga hte prep jaw dat ai.

Shaman ga;- Oh…law..e.. ya dai ni mali ninghtoi kaja, wa nang chyinghka kaba, shalun ninghkrun kaw lung, shadun lahkum kaw dung, shawang a myit gawp, kraw wang sindai shawp, rai nit dai majaw, .Dama makam panglai hka dam, ni a sut htingnu kaw shingja, mayat kanu galai nna nga, shayi shadang mayat law, mayat htinggaw rawn shachyaw, marawn shagu htingnu gap, hka shi shagu hka shawn shap, bum shagu jan pru dinghkang shagu wan tu nna mayat maya ginrawng ginra rai nga nu ga law….

Moi na ji woi ji wa ni tsun ai hta chyu chyu ai ma chyangai si yang, si ai ngu n tsun ai nbat di mat ai, ngu tsun ma ai. Nbat di ai ngu tsun ai lachyum gaw ma hpe nbat hte ba da ai hpan rai nna kanu a lahpyen shingma kaw nga ra ai ten si wa ai hpe nbat di mat ai lachyum hku tsun dat ai. Dai majaw moi prat bahkap nba di ai kadai n lang ma ai. Hkawngwang nbat hkrang hte jahpye ya ai.

Num wa ai hpang kasha lu ten n lu, ma kap n hkraw ai shaloi mayu nta de si shat magun lit hte mayu shakawn sa hpyi la yang ma nbat ngu nba yan nba tawn (ma nbat ) hpe shaman ga hte jaw dat yang kasha bai lu wa ai ni nga ai.Dai rai nna Wunpawng sha ni a num wawn num la htunghking laida hta bahkap nba ngu ai gaw lachyum hte manu rawng ai htunghking laida maka langai rai nga ai. Mayat maya na hpe ra ai re majaw mayu ni bahkap nba atsawm n jaw yawng dama ni hpu pyi n kam bang ai du hkra manu shadan shareng nna jai lang hkrat wa ai re.

Chyana