U YAWM A LAM

Anhte Wunpawng Mundan, Jinghpaw Amyu bawsang ni jai lang hkrat wa ai “U Yawm” a lam ka shaleng garan gachyan dat nngai.

Wunpawng Jinghpaw Amyu sha ni chyaloi ninghkoi prat kaw nna jai lang hkrat wa ai Kawa Pali hte galaw “wa” da ai “ U Yawm” U ka hte seng nna;-

1. “ U Yawm” a lachyum hku nga yang “U” kaji kaba hta hkan nna U langai sha bang na hku wa da ai (galaw da ai) “U Ka” hpe “U Yawm” ngu shamying lang ai re lam lachyum chye lu ai.

2. “U Yawm” a labau hku gawn ga nga yang moi chyaloi ninghkoi prat kaw nna, Jinghpaw Wunpawng Amyu sha ni nga pra lai di hkrat wa ai majoi 9 Tsa Ban 21 Myitkyina Majoi hte rai yang Majoi 10 hkrum lam hta Majaw Mahpan shing-ra arung arai Hpun, Kawa, Sumru Sumrawng, Sumkrung, Ri Dawnggoi ni hpe shamyet shanat jai lang hkrat wa ai re. Kawa Pali hte wa ai (galaw ai) “UYawm” (U ka) hpe shamying ai re lam labau hta rawng ai hpe chye lu ai.

Ndai “U Yawm” (U ka) gaw, anhte Jinghpaw Wunpawng Amyu sha ni hpa baw makam masham, Jinat makam masham, hkristan makam masham hpe mung garai n chye ai prat kaw nna “Htung Shingni” arung arai langai hku jai lang hkrat wa ai re lam chye lu ai. Nat jaw htunghking maka hta chyu sha jai lang ai “U Yawm” n re ai lam chye lu ai.

3. “U Yawm” Hpe Jai Lang Ai Lam

Tinang a Kaji, Kawoi, Kanu, Kawa, Makyin Jinghku, Kahpu Kanau, chyeju madu ni hpe “U” kumhpa jaw yang ndai “U Yawm” kaw bang jaw ai lam nga ai.

Kabu gara ai, Wunli Manau, Padang Manau, Hkung-ran Poi, Ma Dai Daw Wunli la poi, Dum nta dingshawn htingawn poi, Nlung nnan sha poi hte U nli nhpang garan jaw ai shaloi mung Du Magam, Darat Daroi, Mayam n lata ai ndai “ U Yawm” kaw bang nna garum jaw, kumhpa jaw ai re lam chye lu ai.

Yawnhkyen hkrum ai rung shing-ra machyi makaw si hkrung si htan poi, shing-ra hpyen rai nga ai Wan Hpyen, Hka Hpyen, Dusat Hpyen, du daw sai hkaw hkrum ai poi lamang ni hta raitim, “ U Yawm” kaw bang nna “Lahpu U” hku sa jaw kumhpa ai lam chye lu ai.

Ji jaw nat jaw prat hta nat hpe “U” hkungga sak jaw ra ai lam pru wa yang “U Yawm” kaw shawng bang nna hkungwa dumsa wa nsoi nsa dumsa ap nawng sa wa ai re lam chye lu ai.

Hkristan nawku htung, Karai masa hpe hkap la kam sham ai prat hta raitim shagawng bumring bumga hkan shanu nga ai Jinghpaw Wunpawng amyusha ni hta, lahta e ka shaleng da ai hte maren kabu gara poi, yawn hkyen poi, wunli wungau la ai poi, shawang kumhpa sak jaw ai shaloi “U” kumhpa rai yang, “U Yawm” ka kaw bang nna jaw ya hkat ai re lam mu chye lu nga ai re.

Loi Yang Hkruji