JINGHPAW GA SI GA NGAU(V-9, Issue 1 Matut)

Ningka Sara Loi Yang Hkruji ka ai JINGHPAW GA SI GA NGAU ngu ai hpe Volumme (9) Issue (1) hta Masat 1 kaw nna 36 du hkra bang sai hpe bai matut ai.

37.KASHU

“Kashu” ngu ai ga hkaw gaw, asak kaba sai dinggai dingla ni asak naw kaji ai ma ni hpe “Kashu / Kasha” ngu shaga ai lam nga ai. Rusai sairu hku nna, tinang a kasha a kasha, tinang a kahkri ma (numsha) ni a kasha num / la yawng hpe mung, prat asak tinang hta grau kaba tim, kaji tim “Kashu / Shu” ngu tsun shaga lang ra ai htung nga ai. Tinang a kanu kawa ni ntsa na kani kawoi ni gaw, tinang a npu na kashu kasha ni yawng hpe “Kashu” ngu ra ai. Shu mashi / shu masha) ngu shaga ra ai.

38.KANA

“Kana” ngu ai ga hkaw gaw, tinang hta asak grau kaba ai num kasha ni hpe shaga ai re. Num shada raitim, tinang hta asak grau kaba jang kana ngu shaga ra ai htung nga ai.

39.KAHPU

“Kahpu” ngu ai gaw, chyu tauba rum ai kahpu kanau rai rai, lawu lahta kahpu kanau mi rai rai, tinang hta asak grau kaba ai la sha wa hpe num / la ni yawng “Kahpu” (Hpu) ngu shaga ra ai htung nga ai. Buga shara n kau mi hta, tinang hta asak grau kaji tim, tinang a kawa a kahpu a kasha, tinang a kanu a kana ni a kasha ni hpe kahpu / kana ngu shaga ra ai htung nga ai zawn, tinang hta asak kaba tim, tinang a kawa, kanu ni a kasha ni hpe kanau ngu shaga ra ai htung mung nga ai lam chye lu ai.

40.KANU TUNG

“Kanu Tung” ngu ai gaw, tinang a kawa a kahpu a ningrum jan, tinang a kanu a kana numsha ni hpe “Kanu Tung / Tung” (Nu Tung) ngu shaga lang ai ga hkaw rai nga ai.

41.KAWA DI

“Kawa Di” ngu ai ga hkaw gaw, tinang a kawa a kahpu, tinang a kawa hta asak grau kaba ai la sha ni hpe tsun shaga ai re lam chye lu ai. Raitim, Mali Nmai Wa Lawng kaw nna lahta daw nga ai Jinghpaw ni hta, kawa a kahpu hpe “Wa Ba” “Wa Ji” ngu nna shaga lang hkrat wa ai lam chye lu ai.

42.KANAU

“Kanau” ngu ai gaw, tinang a hpang e shangai ai chyu tauba rum ai numsha / la sha yawng hpe tsun ai re. Tinang hte asak grau kaji ai numsha, la sha mahkra hpe kanau ngu shaga ai re lam chye lu ai.

43.MA MYING JAW AI LAM

Anhte Jinghpaw amyu ni num langai hte la langai dinghku de nna kasha shangai ai shaloi lawu e madun da ai hte maren ma mying shamying dai daw mayat maya law htam hkrat wa ai amyu ni re hpe chye lu ai.

Wunpawng Mungkan, Jinghpaw amyu ni hta, shinggyim num langai hte, shinggyim la langai kaw nna shangai shaprat ai kasha ni a mying gaw la sha maga na “Kying Nang” hte numsha maga na “Kying Nang” yan kaw ma mying htum sai lam nga ai. Kying Nang kaw nna matut shaprat jang, la sha shangai yang “Htang Gam”, Numsha shangai yang “Htang Kaw” “Htang” ngu hkrum nna jaw hkrat wa ai re lam chye lu ai. “Htang” ngu ai gaw, mying htum mat nna mi na mying ni hpe bai lahtang hta “Htang” shamying ai ngu ai lachyum re lam chye lu ai.

Bai nna, Htang Gam, Htang Kaw ngu ai mying htum ai hpang, n’ta dinghku kata lang ai arung arai mying hte Shingnoi, Htingga, Ka Htang, Hkuwawn, Jahtai, N’htu ninggang, Nri, Da hkawng Da Lim da byen, Da Lang ngu nna bai matut shamying lai wa ai re hpe chye lu ai.

MA MYING NI

LA SHA MAGA NA MYING

NUM SHA MAGA NA MYING

1. Ma Gam (La N-gam)

1. Ma Kaw (Num N Kaw)

2. Ma Naw (La N Naw)

2. Ma Lu (Num N Lu)

3. Ma La (La N La)

3. Ma Roi (Num N Roi)

4. Ma Tu (La N Tu)

4. Ma Htu (Num N Htu)

5. Ma Tang (La N Tang)

5. Ma Kai (Num N Kai)

6. Ma Yaw (La N Yaw)

6. Ma Hka (Num Hka)

7. Ma Hka (La N Hka)

7. Ma Pri (Num Pri)

8. Ma Sharoi (La N Roi)

8. Ma Yun (Num Yun)

9. Ma Yun (La N-Yun)

9. Ma Kying (Num Kying)

10. Ma Kying (La N Kying)

10. Ma Nang (Num Ma Nang)

11. Ma Nang (La Ma Nang)

11. Ma Kying Nang (Num Kying Nang)

12. Ma Kying Nang (La Kying Nang)

12. Htang Kaw (Num Htang Kaw)

13. Htang Gam (La N-gam)

Loi Yang Hkruji