HPAN DA AI LAM AHTIK LABAU

HPAN DA AI LAM AHTIK LABAU

BUM SHANG HKAWNG

Hpan wa Ningsang Shagyit Pawt Ninghpang e gaw, Sing hte Sam shawng hpan da, hpajang da. Sing gaw lawng alawng rai nna, Sam ngu ai gaw hawng ahawng re da. Sing ngu ai gaw gatsi ai baw hpan rai na, Sam ngu ai gaw gahtet ai baw hpan rai nga ai.

Sing ngu ai gaw lawng lawng da, Sam ngu ai gaw hawng ahawng da lu oi....-nga ai.

Sing hte Sam katut nna, samyen tum daram mi kaba, udi tum daram mi chya wa ai gaw, din adin lum alum, tum atum rai nna, jum tek na shara mung n nga, htingnat (hkatna) mung kata da lu yaw nga nna tsun ai. Ndai din adin, lum alum tum atum gaw, hku-awn daram mi bai kaba, jahku bye htai yawng daram mi bai pra jat nna, kaang e gran rai wa nna, lahta na chyen mi gaw Sumsing lamu tai nna ntsa de kap ap rai nna magap, lawu de na chyen mi gaw Ginding aga tai nna, sap a da... nga ai. Ninghtoi ningsin ngu ai mung garai n nga, san asan wan awan, ahkrin ayang da lu oi nga nna bai jaiwa ai. Dai majaw Hpan Ningsang e gaw, yat e gaw Shinggyim ngu ai pra, Mashang ngu ai ni nga yang gaw e, Ninghtoi ngu ai nga ra, Ningsin ngu ai mung sin ra ai gaw Chyi nma hte Pri npra, Hproi ninghpra ngu ai hpe hpan shalat nu ai nga ai. (Jan, Shata, Shagan ni yawng hpe hpan ai. )

Chyi nma = Ninghtoi (Jan) Pri npra = Ninghtoi hte ningsin gaw yawng hpe hproi ai, shan kaw na lawt ai arai langai mi mung n nga ai.

Lahta na hproi ninghpra ngu ai gaw, jan, shata, shagan ni hte dinghta mung- kan ni shada da gang hkat ai ninggun atsam hpe mung ngu ai re nga ma ai. Shing rai ga si kau mi a lachyum hpe shateng mayu ngai.

1. Ninghtoi ginlawng = Htoi tu ai shara kaw nna htoi tu ai de hku ai hku kaba Ninghtoi ginlawng hku kaba.

2. Ningsin ginlawng = Htoi ai shara kaw na sin mak ai shara de hku ai hku ga- ba.

3. Ninghtoi daw lawng = Sin ai kaw na htoi ai de hku ai hku kaba.

4. Ningsin daw lawng = Sin ai shara kaw na sin ai shara de hku ai hku kaba (Ningsin chyip re hku kaba. ) Ndai ni mali gumhpawn nna nga ai hpe mungkan ngu ai re nga ma ai. Daini na hpungtang ninghkring sara ni gaw Milky way shing nrai Glaxy ngu shamying ai rai. Lahta de na ni hkum tsup ai hpang e gaw, Wik awawp ngu ai nbung hte Hkrip ahkrawp ngu ai hka hpe hpajang ai rai.

Wik = Koik sha mai ai. Wawp = Manu mana kya ai. Hkrawp = Hkrang galai ai. Hkrip = Atsam galai ai.

Gintawng, wuntawng, chyi nma pri n pra, Wik awawp hte Hkrip ahkrawp ni hkum tsup ai hpang, hproi ninghpra ningpun atsap hte rik ara chyik achya rai nna, gyin shalat hpan hpajang sai rai. Tinang hkrai tinang mung gayin, shada da mung gayin shinggrup ai hpe gaw, hting ahtang, ying ayang, wing awang ngu tsun ai rai. Rik ara chying achya ngu ai gaw shada da a ntsa e mara nga ai zawn sawn ai hpe ngu ai re nga ma ai. Ga shadawn: Shata mai ai shana, mungkan e nga ai masha gaw shata hpe yu yang, lamu de mada yu ra ai, raitim, dai ten hta shata ga e nga ai masha gaw, mungkan hpe yu yang, gum nna n yu ra ai sha, shata a ntsa de mung- kan ga bai du nga ai zawn ntsa de mada yu ra ai, ndai zawn tai ai masa hpe ngu ai re nga ma ai. Lamu ganghkau hpatwat e noi da ai zawn byin ai.

1. Hting ahtang = Jan hpe gang tawn nna shinggrup hkawm ai, ya pru ai shara de bai du wa ai. Gayin shinggrup hkawm ai mabyin.

2. Ying ayang = Grai lawan ai lapyin.

3. Wing awang = Lu da sai atsam hpe n mat hkra, n yawm hkra gang gayin ai lam nga nna, kaga ni hpe nan shachyi lu ai atsam. Lahta na ni hkum tsup ai hpang e gaw, Hkrawp sumhkran dum sumwan byin ai nga ma ai law. Hkrang galai shai nna poi mawng hkawm ai hpe hkrawp sumhkran nga ma ai. Ga shadawn; Hka gaw samwi tai ai, hkyen atawng apa tai ai, ntsin tai ai lam ni hte nbung e ahpawt yang poi mawng hkawm ai rai. Dum sumwan gaw myi hte mu nga ninglen, masawp magra lu nga ninglen, dum ladum mu lamu e hkrang galai shai, atsam galai shai ai lam ni hpe tsun ai rai nga ai. Ning re mabyin ni hte hpan pajang ai majaw nli tum ni tu kaba tsit lali tsawm htap ai hpun kawa hte maling mala ni nga wa ai, dusat dumyeng ni pring tsup ai mungkan tai sai nga nna hkai ai rai.