UDI LAWM AI HTE UDI N LAWM AI MAGUN LIT

Moi kaju bakjak, Ji woi lakhtak prat kaw nna dai ni du mateng Wunpawng amyu sha ni gaw magun lit gun jaw nna hkungga nga pra hkrat wa ai rai ga ai. Magun lit hta buga ginra hte ginra lusha bang jahkum ai lam n bung, loili shai chye mali ai. Rai timung law malawng maga gaw bung shajang ai. Magun lit majun hta Dauma nta ni sha Mayu Du ni hpe shat lit gun jaw gun ya hpang hkrat wa ai hpe mu lu ai. Ya dai ni na aten hta gaw; Mayu lit, Dauma lit, Kahpu kanau lit, nga nna lang nga sai hpe mu lu na ga ai. Malu masha hte hkungga ai gaw kaja ai lam re.

Ndai zawn shada hkungga la ra jaw lu jaw sha ai kaw maka kumla, lachyum shapraw ai lam ni shara hte shara, lamang hte lamang jashai nna lang nga ga ai. Magun lit ni hta Udi gup gup (atai n re ai) bang ga ai. Makai mung shagup nna bang ai re ai. Buga ginra nkau hkan gaw Udi hkum 100 (latsa) du hkra gun ai nga ma ai.

Udi Bang Shalawm Ai Magun Lit Ni

Dauma ni mayu ni hpe gun jaw ai magun lit hta Udi bang shalawm ai. Kahpu kanau shada gun jaw ai magun lit hta Udi bang shalawm ai. Du magam ni hpe hkungga sak jaw ai magun lit hta Udi bang shalawm ai. Hting-rai hting-rat hkat ai shani mayu daw ai wa gun ai magun lit hta Udi bang shalawm ai.

Lachyum Shapraw Ai Lam

U kanu langai di ai Udi gaw kade law timung nsam langai sha re zawn, myit masa langai sha hte mayawn shabawn nga ga ngu lachyum shapraw ai. Udi hta matu n kra hkra pri manen tsawm ai zawn shada da a lapran na hku hkau lam hta mung tsun shara hkat na n nga hkra pri nen nga ga ngu lachyum shapraw ai. Udi grai ga loi ai hpe n ga hkra sadi aku chye ga ai zawn shada mahku mara lam hta ahtik ahtawk n nga hkra Aku hkungga hkat ga ngu lachyum shapraw ai. Udi kaw shinggan na nbung n shang ai zawn manawn masham sumprat ga n lu shang hkra sadi maja nga ga ngu nna lachyum shapraw ai. Udi kraw wa jang U law law mayat wa ai zawn; hku hkau ai lam hta grau grau ngang kang wa na hte law htam mayat maya wa ga ngu lachyum shapraw ai. Udi hpe kawp hte makawp da ai zawn anhte shada da makawp maga hkat nga ga ngu ai lachyum shapraw ai.

Udi Shalawm N Ra Ai Magun Lit

Mayu nta ni dauma ni hpe jaw lu jaw sha ai kaw Udi n bang shalawm ai. Mayu yuji ni dauma kashu kahkri ni hpe jaw lu jaw sha ai shaloi Udi n bang shalawm ma ai. Ndai shara kaw lahta na lachyum shapraw ai hte mahkyawp n lawm ai ngu ai lam n re ai. U kanu gaw Udi hpe shimlum hkra hpum nna kasha shakraw ai zawn; mayu mung dauma ni hpe galoi mung pawn ba nga ai; Makawp maga kawm lawm nga ai; Shim lum lam jaw ya nga ai. U kanu hte Udi arau re ai zawn; mayu hte dauma mung arau re ngu ai lam rai nga ai.

Magun lit hta Udi bang ra ai kaw bang, Udi bang n ra ai kaw gaw n bang rai gun jaw gun ya, jaw lu jaw sha nna hkungga manu shadan hkat nga ga law.

Sara Maju Tu Ja