Moi prat kaw ningna Wunpawng sha ni a htunghking manau hta, shadung hpe Dung La, Dung Yi, Dung Tsun, Dung Sha, Ga Tawng, Ngau Gum, Dung Tep, ngu shamying lang let, Dung La, Dung Yi hte Dung Tsun ni hta jan ningna, Jan hpe la, Shata hpe yi ngu ka soi shakap lang sa wa nga ga ai.Dai rai yang, htunghking chyanun ninglen kau mi hkai ai hta, Shata hpe, Shata Wa Zau Doi; Jan hpe Jan Jan Nang Koi (sh) Shata hpe Shata Wa Zau Krim, Jan hpe Jan Jan Hpraw Shim, nga ningna mung tsun lang sa wa nga ga ai hpe mu lu nga ga ai hpe mu lu nga ai.
Rai timung, dai ni na prat shingra maka hte shabung shapre wa yu yang, Jan hpe num di kau, Shata hpe la di kau re ai lam gaw, shingra maka hte ninghtan shai nga ai ngu mu lu ai lam tsun ma ai.Hpa majaw nga yang, manau nau hpang ai Jan Ga Jan Rung e nau ai manau hta, u numji numjoi ni shawng Jan Ga Jan Rung de manau lung ningna manau shawng nau hpang wa ai hpe , manau hkringhtawng chyanun ninglen jaiwa dumsa ni yawng hkai nga ma ai. Jan Ga Jan Rung ngu ai gaw num rung n rai na re nga ningna mung tsun nga ma ai.Dai sha n ga Jan Ga Jan Rung ngu ai hta dai ni prat dep sai hpungtang hpaji chye chyang sai ni mung jan Shata hpe num, la ngu ningna masat ka hkai da ai lam n mu lu ai lam tsun nga ma ai.
Dai hta n ga Karai Kasang a Chyum Mungga ni hta mung, jan Shata hpe num, la ngu masat da ai lam n mu lu ai lam tsun nga ma ai. Bai anhte Wunpawng sha ni kadai wa mung Jan Ga de du da yu ai nga maumwi hta n mu n na yu ai lam mung tsun nga ma ai. Hpungtang hpaji chye chyang ai hta jan ningna gaw mungkan e Karai Kasang sha nga sai. Dai kaw pyi Jan Shata hpe gara gaw num, la nga ningna n tsun n masat da ai re majaw, Jan Shata a lam hpe anhte Wunpawng sha ni ningdang kalang nga shada da tsun htailai hkat nga na malai masha law malawng e tsun lang nga ai hpe mahtang masat lang sa wa ai gaw madung rai na re ngu myit sawn lu ai.
Dai majaw masha law malawng e, jai masat lang nga ai hpe yu yang Jan hpe la, Shata hpe num di ningna masat lang sa wa ai gaw n shut sai ngu kam lu ai. Hpa majaw nga yang, anhte Wunpawng sha ni dum ningta ningnan gap rawng ai ni, ningta ningchyun kaw dumhpren pekleng noi ai hta Jan Wa hpe Shata Wa hta ladawng mi n yawm ai sha shatsaw noi ninghtawm, Shata Wa hpe Shata ladawng mi shayu noi ai hpe mu lu ga ai.Bai ningta ningchyun, numgaw ningchyun ningtsa kaw, nga rung hte nga baw shakap da ai gaw, Nga Shaga hpe sat sha ningna, Nga Shaga a hkum hpe yu la let, Wunpawng sha ni dum ningta gap hpang wa ai hkrang kumla hku majun gawn ai lam rai nga ma li ai hpe chye lu ai. Dai rai ningna shinggyim wuhpawng hku yu ga nga yang , anhte Wunpawng amyu sha ni hta na Lawngwaw, Lachit ni gaw Shata Mahkawn shayu ai lam hpe htunghking langai ni hku galaw nga ma ai hpe mu lu nga ga ai. Bai kaga mungkan mungdan amyu masha ningkau mi Jan hpe makam masham hku nawku ai lam, mungdan dawnghkawn ni hkan shakap jai lang ai lam zawn re ai lam zawn re ai lam ni hpe mu lu nga ga ai re.
Dai sha n ga japan amyu sha ni gaw, shanhte a amyu hpe Jan amyu rusai ni rai ga ai nga ningna mung tsun hkai la nga ma ai. Dai re ai majaw, amyu mying mying ai hte htinggaw mying mying ai gaw, la hte num nga pra ai mungdan kahtawng htinggaw ni hpe masat da ai lam rai sai ngu ningna mu lu ai. Dai hte maren jan shata yan mung, Shata Ga, Jan Rung Jan Ga ngu ai nga ai re majaw num, la gaw masat ra nga ai ngu mu lu ai. Shing rai, jan shata hpe ga garan lang ga nga yang jan hpe la ngu masat la ninghtawm, shata hpe num hku masat lang sa wa ai gaw shingra tara hku ningna htap htuk manu ai lam rai na re ngu mu lu ai. Dai majaw ningdai manau laika buk kaw law malawng tsun hkai nga ai hpe maram masam dinglik yu ai hte shagrin masat lang sa wa yang mai kaja n hten ngu ningna ka masat bang tawn sai rai.
Ningdai jan shata hpe masat lang sa wa ai lam hta, n jaw ai lam mu mada ai rai yang teng man ai labau sakse hte madi madun ninghtawm galaw shading sharai la sa wa na matu mung ga saw lajin dat ai rai. Mabyin chyateng labau sakse madi madun lu mai ai lam kaga ni n mu, n nga ang sai rai yang mung, ya masat ka da ai hku mahtang galaw shagrin shagang lang sa wa yang mai kaja na re, ngu mayu ai law. Madung gaw anhte Wunpawng sha ni a htunghking ningli manau ningdai hpe sinpraw, sinna, dingdung, dingda buga ginra shagu hkan nga pra shajang nga ai Wunpawng amyu baw pa yawng jawm lang sa wa ai lam hta bung pre ai hku rai wa u ga ngu yaw shada ai lam re ai rai.
Ka ai – Du Kaba Maji Doi Lat, Dip;-Mangshi Myithkrum Shi Laika Dap, November 2000
