Htunghking Magun Lit ngu ai gaw, Wunpawng Htunghking hta n lawm n mai ahkyak dik, tsaw dik ai lamang langai myi re ai. Kaning re ai ruhka ni, bunglat hka, kaning re ai manghkang ni hpe raitim shaprai kau ya lu ai. Shapri shanem kau ya lu hkra, lachyum sung ai Htunghking Magun Lit rai nga ai. Matsaw shayi la ai kaw na Htunghking Magun Lit gun hpang ai ngu na hkai tsun yu wa ai. Matsaw Mayu Du ni hpe nbaw shat lit hte sa gun jaw hkungga ai lam galaw hpang ai re nga hkai tsun ma ai. Nbaw shat lit gaw lit langai myi hpring tup hkra baw gun ai hpe Htunghking Magun Lit ngu ai re. Htunghking Magun Lit hpe tsan ai shara hkan na ni gaw jahkum nna gatsing gun sa ai ni nga ai. Hpan Ningsang, Du Magam, Mayu du, Kanu Kawa, Kahpu Kanau ni kaw gun jaw gun ya ai lam re. Pandung : Prinem tsawm htap ai hte myithkrum kahkyin gumdin, myithkrum mangrum, magyep shingni rawng, myit-su myit gawp, kasi ningli tai lu ai Mayu, Dama, Kahpu Kanau, Wuhpung Wuhpawng, Hpawng shing-ra byin tai lu ai. Ngwipyaw simsa rapra ai hte makyit sumri ngang ai amyu bawsang ni byin tai wa lu nga ai. Yawshada Ai Lam : Myit mada yawshada ai lam, hkungga lara ai lam, manu shadan ai lam, yakhkak dutdang ai lam, ruhka hkrum ai lam ni hpe shapri shanem shatsaw sharawt, shagrau sha-a, shatsawm jahtap ai lam hpe mangan nga awngdang lam lu la na matu yawshada ai lam re.
Htunghking Magun Lit Ni
1. Matsaw ntsa lit
2. Ja ka
3. Nbaw shat lit
4. Bunghkaw lit
5. Tsu lit
6. Hkadung lit
7. Kungdawn lit
Htunghking Nbaw Shat Lit Hta Lang Ai Arung Arai Ni
1. Shingnoi
2. Nbaw Shat
3. Magyep Tsahku
4. Kawa Nhtung (2)
5. Langa hpaw/ hpaw goi
6. Shat gada
7. Simai shapung/gapung (2)
8. Shan
9. Nga
10. Udi
11. Uhkrawng
12. Ngachyu, Jumdui
13. Kumhpa makai
14. Pali
15. Lit magap ni bang lang ai.
Shingnoi :
Hkawtaw ai lam n nga, Ring Chying ai, Shaman chyeju hkam la na chyingraw ngu lachyum shapraw ai. Dai majaw kaga htingga zawn re ni n lang ai sha, shingnoi nan gun ai lam rai nga ai. Hpanwa Ningsang Chye Wa Ningchyang sutgan garan ai maumwi na ga nga ga ai hte maren, sali sut, wunli sut shaman chyeju n hkaw mat na matu chying ai shingnoi hpe gun nna shaman wa hkam la ai lam rai nga ai.
Nbaw Shat Makai
Nbaw Shat :
Nbaw shat dabyen langai myi lawm ai. Nbaw shat makai kaba hpe ngu ai re. Nkau myi hta shingnoi htumpa kaw htun gun ma ai. Magyep kap ai, hkau chyap hkat ai, N daw n hka ai, nbaw shat zawn rai magyep kap hkau chyap nga ga ngu ai lachyum re. Hkamja lam a matu n-gun jaw ai lu sha mung re ai. Dai majaw nhpaw shat hpe kadai n lang ai. Nbaw shat zawn rai shada da magyep kap hkat ga, marit hkauchyap hkat ga ngu nna lachyum shapraw ai.
Magyep Tsahku :
Chyanun chyu ngu nna lang ai ai. Jaiwa ga hta tsun da ai hte maren, Majan Woishun a chyu kaw nna tu pru wa ai matsi hpun ni hte galaw da ai tsahku hpe lang ai. Dwi sau mu ai tsahku sha mai lang ai. Hka ai, hkri ai ni n lang ma ai. Dwi sau mu ai magyep tsahku jawm lu jawm sha nna, hpum sau galu kaba rawtjat wa ga ngu ai lachyum shapraw jai lang ai. Ga-ngwi gapyaw tsun na, gadwi, gasau tsun shaga na ngu ai lachyum shapraw ai. Gamung sumtu rum udi hkaubum bum ga ngu ai rai nga ai.
Kawa Nhtung :
Kawa nhtung lahkawng bang ai. Dai nhtung kaw magyep tsahku bang nna, lahpaw hte matsut kau ai. Matsut kau ngut ai magyep tsahku nhtung hpe lahpaw hte gayawp nna, nhtang gumba shajup kau ai. Dai hpe nhtung bunghkaw ngu ai re. Nhtung lahkawng bang ai gaw myithkrum myitra ai ngu azum lang ai lam re. Kawa nhtung hpe hpan lahkawng hku na lang ai. Langai myi gaw nhtung mahka hpe lamyi ntsa kaw nna dumhpyawt ai hku na lang ai. Dai gaw matut nna mayat maya maden zinghka pra sa wa na, rai n tup shi ai ngu ai lachyum re. Mayu Dama hpuji hpuga naw jawm jahkrup ra ai lachyum mung rai nga ai. Lahkawng ngu na gaw lamyi npu kaw nna hkyawt shara kau nna lang ai. Dai gaw si poi zawn re kaw lang ai. Htum mat sai tup mat sai ngu ai lachyum re ai. Nhtung a htumpa (snr) htumban (snr) n-gawt de lamyi a mali pyen (snr) lahpa myi, lahpa lahkawng ngam nna daw ai. Nhtung htumpa (snr) htumban (snr) n-gawt a lachyum mali hku nna shapraw lang ai. Langai gaw lamyi kaw jahtum kau ai lam n galaw ai sha matut nna pra sa na ngu ai, masa n htum ai hku nna lachyum shapraw ai. Lahkawng ngu na gaw, mayu dingsa kaw mali pyen/ lahpa myi daw nna lang ai. Mayu ningnan kaw rai yang lahkawng pyen ngam nna daw lang ai. Masum ngu na gaw, magyep tsahku du ai shaloi, jum lang shara hku nna mung masat ai. Hkra maga ta gaw htumban kaw jum nna lapai maga gaw nhtung ga-ang kaw jum rai du jaw ai. Lapai maga htumban kaw jum nna du jaw ai gaw si poi hta si mang ni kaw du tawn ya ai shaloi galaw lang ma ai. Mali ngu na gaw nhtung a yu tsawm shingni a matu ngam da ai lam ni mung rai nga ai. Buga ni hta hkan nna tsun lang ai, lachyum shapraw ai lam loi li shai hkat ai lam nga ai.
Langa hpaw/ hpaw goi hpaw :
Lahpaw hpe katsing lang ai. Dai gaw asak rawng ai, ahkrung nga ai ngu lachyum shapraw ai. Hkraw mat ai rai yang gaw si mat sai nsa n rawng sai ngu ai masa hku lang ai. Dai majaw lahpaw katsing hpe lang ai lam re. Hpaw goi hpaw hpe grau lang ai lam gaw n hkrawp ai n baw, n je loi ai. Ngang ai, chying ai, prinen tsawm ai ngu lachyum shapraw ai hte grau lang ai lam re. Tsit ai gaw, tsit lali tsawm ai, marit ningtsing hpring tsup ai hte hkungga la ra ai ngu ai hku nna lachyum shapraw ai. Nhtung gayawp ai. Dinghku makai gayawp ai. Shat lu sha makai ai. Kumhpaw kumhpa makai ai. Lamyi lamang shagu kaw lahpaw lang ai lam re.
Shat gada :
Shat makai kaji langai myi lawm ai. Simai matep masum lawm ai. Simai matep masum hte shat makai pawng yang mali ngu nna shagup bang gada ai. Shan hpraw, udi, shanam jap htu zawn re ni bang ai. Shat gada hpe 2, 4, 6, 8, 10, 12 rai nna shagup bang ai. Yawng langta rau lu jawm hpyan sha na matu law law shagup bang ai re. Buga hta hkan nna n bung ai lam ni nga ai. Shat bang ai shara ni nga ai zawn nbaw shat bang ai ni mung nga ai.
Udi :
Udi gaw prinen tsawm ai. Ningra ai lam hpa n nga ai ngu ai lachyum re. Udi a matu tam n mu ngu ai gamalai zawn, Prinem ga, hkrum ga, ra ga ngu ai lachyum re ai. Udi hpe 20, 40, 60 shagup ai hku nna galaw ra ai. Lahpaw hte atsawm sha makai nna bang ai.
Uhkrawng :
Uhkawng bang ai lam gaw ya hpang daw de masha law ai hta hkan nna yawng amu amai lu jawm sha na matu shalaw bang jahtuk ai lam re ngu chye lu ai. Shawng daw hta gaitsu Makai bang lang ai a malai hku nna lang ai lam mung rai nga ai.
Ngachyu, Jumdui :
Shawng de n lang ai. Ya hpang daw de Magyep tsahku a malai ngachyu, jumdui, namsi ntsin ni hpe grau jahkum shatsup ai hku na lang wa sai. Ngachyu, jumdwi a manu dan akyu rawng ai, dwi sau mu namchying rawng ai hpe lachyum la nna lang mat wa nga sai. Hkaja lam a matu akyu rawng kaja ai hte masha law law hpe daw jaw lu ai. Hkum shalum, ba jahkoi ya lu nga ai. Yawng yawng myitngwi myitpyaw lam lu la shajang ai lam rai nga ai. Kumhpa makai : Moi laika n lu mat ai hpang, kumhpa makai shadu ai hte laika galaw lang lai wa sai. Dai kumhpa a kata kaw bang ai arung arai hpe yu nna lachyum hpyan shaleng ai. Kumhpa makai gaw myit shadu ai lam a yawshada lam hpe ading tawk shadan shadawng ya ai arung arai makai langai myi mung rai nga ai. Dai re ai majaw, kumhpa makai n lawm n mai ai hte lachyum sung ai arung arai ni hpe makai bang lang ma ai. Gsd. Jum, Majap hte kaga arai ni makai bang ma ai.
Pali :
Pali gyit ai hpe masa grai sung ai hku nna lang ai. Pali hpe shara lahkawng (snr) mali (snr) kru hku nna shajup makyit lang ai. Num wawn num la ai hta dinghkru kaw shara kru makyit ai. Dinghkru htinggap kaw shara lahkawng, dinghku kanu kaw shara mali shajup makyit lang ai. Kaga yu maya lamang ni hta mali (snr) lahkawng lang ai. Htinggap na shajup makyit lahkawng gaw mayu hte dama makyit mahkai ai ngu lachyum shapraw ai. Dinghkru kanu a ga-ang kaw shajup makyit da ai gaw, janghtung hte kasa makyit mahkai ai ngu ai lachyum shapraw da ai. Jahtum na lahkawng gaw Num ningnan hte La ningnan yan a makyit mahkai ai ngu lachyum shapraw tawn ai re. Dai hte makyit mahkai yang she dinghku langai lu shagrin tawn ai ngu ai lachyum re. Pali shajup makyit ai hpe hkra maga hku makyit ai. Makyit ngut ai pali matu lahkawng maga hpe hkra maga hku manai nna pali matu shada bai manai mahkai tawn kau ai. Dai hpe Sumri sumdam makyit mahkai ai ngu lachyum shapraw ai. Makyit mahkai ai ngu ai gasi gaw dai kaw na la nna lang wa ai re.
Dinghkru Gayawp Ai Shaman Ga
Sinwa hpaw hkrai hte yawp, Unai pali hte kyit, Ningtsing hpaw li hte hkawp, Unai pali hte kyet, ndai dinghkru bunghkaw e magyep tsa hku mazing, pan salat shading nga nna shaman let dinghkru gayawp ma ai. Ndai gayawp tawn ai dinghkru hpe numsa shabrai hkungga ngut ai hpang, mayu ni kaw nna gayawp tawn ai dinghkru hpe hpyan da ma ai.
Lit magap :
Lit magam ngu ai gaw nbaw shat lit a magap ngu masat ai. Magap a lachyum gaw, magum bu ai, shatsam shara jahtuk jahtap ai ngu ai re. Gsd. shatdi kaw rai yang gaw shatdi magap, nta rai yang gaw, magum bu ai ngu ai lachyum re. Bunghkup makawp maga ai ngu nna lachyum shpraw ai lam re. Lit magap hpe Ja Nba hte magap ai. Ja Nba gaw Lairi, jari hte da la ai nba yan galu re ai. Lairi nba da lang wa ai labau hpe yu ai shaloi, Miwa mung kaw Miwa amyu ni Lai kanu shawng chye rem sha hpang wa ai. Lairi hpaga kaba galaw sha wa ai. Lai sumpan hpe Miwa mung kaw shawng galaw shapraw lang wa sai. Kachin amyusha ni hta Jan Hkawhkam a kasha Jan Hkawhkam shayi sha shawng rem hpang ai labau nga ai. Lai sumpan gaw grai manu dan ai hte manu hpu ai majaw yu maya masha ni kadai n lu bu hpun lang ai. Hkawhkam hkawseng ni Du Magam ni sha bu hpun palawng hku nna lu lang ai re. Dai zawn rai dai ten dai prat hta manu dan dik htum ai Ja Nba hpe lit magap shatai lang ai lam re. Dai gaw shagrau shatsaw dik ai hku nna manu shadan jailang ai lam re. Lit magap hku nna lang ai Ja Nba hte bu hpun palawng ni hpe maka n bung hkra ginhka kau nna akyu jashawn ai lam nga ai. Ya ten masa hta hkan nna basi nba, prangtai mun nba, panep hte kaga sumpu sumpan ni hpe bang lang ai mung nga nga ai.
Shaman ga :
Shamanga (snr) hkamhkaw ga tsun ai lam gaw, Hpan Ningsang Chye Ningchyang kaw na shaman chyeju hpyi ginlen jaw ya ai lam re ai. Shaman chyeju gam jaw gam ya ai, hkringhtawng, htauchyi ginlen dagraw la ai lam re. Mayu ni dama ni hpe shaman ya ai shaman ga. Kanu kawa ni kashu kasha ni hpe shaman ya ai ga. Kahpu kanau shada shaman ya ai shaman ga. Shada da shaman chyeju ginlen shagrau shatsaw sharawt pawn ba la ai lam rai nga ai.
Ga hpungdim
Anhte a htunghking kaw lang ai arung arai ni hpe yu ai shaloi, manu dan ai, manu tsaw ai arai ni n re ai zawn raitim, shi a lachyum shayawn ai lam, lachyum shapraw ai lam ni gaw grai sung htum ai htunghking ningli rai nga ai. Manu dawdan n lu ai. Gumhpraw jaw nna mari la n lu ai lachyum ni hte jahkum shatsup tawn ai Htunghking Magun Lit re ai. Aja gayawp ai hta grau manu dan nga ai. Aja gayawp yang gaw aja a manu sha lu la nga ai. Htunghking Htunghking Magun Lit gaw, sung htum ai myit masa, myit marai, atsam marai, manu shadan shadawng ai lam, manu jahpu dawdan ai lam hta kuptsup madang tsaw ai hku nna jahkum shatsup tawn ai hte manu dawdan n lu hkra lachyum sung ai hku jailang nga ai Htunghking Magun Lit rai nga ai. Dai majaw Kaning re ai manghkang ni hpe raitim shatsawm jahtap shapri shanem kau ya lu ai lam rai nga ai. Daini na ten hta anhte ni kadai pyi n myit madawm ai myit masa ni hpe myit shapraw nna galaw yu wa ai jiwa ni a myit masa hpe hkungga shagrau chyeju dum ging nga ga ai. Galoi mung, tsawra kamhpa nga ai Kachin amyu a Ningli Kaja Shayi Shadang amyusha ni e… Dingsa hpe mung n tat. Ningnan hpe mung shalat. Zau Janmau, Ja Ningja rawng Manudan ai Kachin amyusha ni byin tai wa na hpe myit mada kamhpa let garan gachyan ginlen dat nngai.
Mahta ai lam N-gup aga hte san jahkrup ai. 1. Slg. Myitung Brang Seng. (Nba Pa) 2. Slg. Zinghtung Kawn Tu. (Nba Pa) 3. Du Kaba Manam Tawng. (Mangshi) 4. Sumdu La San. (Gyu Sai) (Photo)
Manmaw Hkawn (HLD)
