Manau Hte Majun
Manau
Manau gaw kaga manawt dingsawt langai ngai kaw na hpre pru ai shing nrai amyu kaga na shap la ai htunghking manawt dingsawt n re ai sha, tinang a “Sumdai” manawt dingsawt rai nga ai. Shawng nnan manau byin hpang wa ai ten hta gaw manau ngu nna n shamying ai. Labau htik poihpawng shingra sha re. Manau ngu ai lachyum gaw lahta de tsun ai makan masham hte seng nna tsun ai shaloi Mu ngu ai hpe tsun shaga ai. Dai Mu ngu ai ni gaw Matsaw Ningtsang Nat ni hpe tsun ai n rai, Hpan NingSang Chye Ningchyang hte de a lahta na ni mung Mu hta lawm ai. Shinggyim masha a asak hkrung lam hta mala la n tsawm n htap n tara ai hte katut ai shaloi “Mu e” nga tsun chye ai. Dai gaw teng man ai hpe ra nna, teng man ai wa hpe shaga ai lam rai nga ai. Shawng de na manau ni hta nta ningchyun ang ang kaw Hpanwa NingSang Chye wa Ningchyang a shara galaw da chye ma ai. Shi mung Mu rai nga ai majaw shi hpe shagrau ai hku nna Mu Nau ai ngu tsun ai. Mu Nau ai ngu ai kaw na Manau Nat ni hpe Mung shaga ai. Matsaw yan nau ni marai kru kaw na kanau kaji htum Uma wa hpe Mu ni a Ginjaw gindai jum ai wa ngu ai hku Mu Dai ngu shamying ai. Mu Dai ngu ai kaw na Madai byin wa ai. Rai timung hpang na daw hta Hpan Ningsang Chye Ningchyang hpe nau ai lam gaw nip mat wa nna, Madai hpe jaw jau ai zawn byin wa sai.
Manau Majun
Manau majun hte ginru ginsa gaw rau sha byin pru wa sai. Ginru ginsa majun hpe tsun ai shaloi ka-ang shing-ra ga hte ka-ang shingra Masha ni a lam tsun saga ai. Dai shara kaw lungpu ni nga shajang ai hte dai lungpu hta Bazip ni hte pilan ni mung tsip tsip nga ma ai. Ka-ang shingra Masha ni gaw tinang a labau hpe hkai tsun sharawng ai ni rai ma ai. Labau hpe htuk ngut ai hte kabu gumjawt chye ma ai. Dai kabu gumjaw ai gaw manau a ningpawt majun tai wa sai. Labau htuk ai shaloi gaw Bazip shan ju sha ngut jang kabu gumjawt nga chye ma ai. Kabu gum jawt ai shaloi kawa tawng shada shing nrai nlung shada, hpun tawng shada adep shangoi rai ma ai. Dai gaw chying bau a ningpawt majun tai wa sai. Hpang na daw hta gaw gum jawt ai hku sha nrai chyingma hpun hpe shing-grup ai hku nna manawt wa masai. Dai ten hta gaw kawa hte lat la ai kawa hkawnglawng ni dum yang ngoi ai, hpun hpunkraw ni dum shangoi nna manawt wa masai. Labau htik pilan shan ju sha nna ka manawt rai nga ma ai. Kawa hkawnglawng ni hpun hpungkraw tawng ni noi na matu chyingma shadaw ni mung lahkawng ra wa sai. Dai aten hta ginru ginsa Ningbaw langai mi paw pru wa ai. Shi a mying hpe Shawa Hpung shing nrai ka-ang Gam ngu shamying ai. Dai ka manawt poi ni mung shi woi galaw ai majaw ka-ang Gam poi ngu shamyin chye ma ai. Shing nrai ka-ang gam Manau ngu hkrang hku kaw du hkra naw shamyin ai nga ma ai. Masha law htam wa ai shaloi lungpu kaw sha n shang wa ai shaloi nta galu langai mi gap jat la ai.
Dai nta kaw dap shi lawm ai. Dai hpe ka-ang htingnu ngu shamying ai. Jaiwa ga hta dinghta Lungpu ka-ang Htingnu ngu shamying da ai. Dai Lungpu hte htingnu gawk a-ang ga kaw nga ai ten re. Dai ka-ang Masha ni nga ai makau grup-yin kaw kaga amyu kaba ni mung nga shajang ma ai rai nna, dai ni hta baren maka lang ai amyu lawm ai. Dai amyu hpe baren amyu ngu shamying ai. Ka-ang Gam e la ai gaw dai amyu kaw na baren shayi sha re. Shing rai ka-ang Masha ni a htunghking ningli ni hta mayu re ai Baren amyu ni a htunghking ningli ni mung du shang wa sai. Tsun lai wa sai chyingma hpun shadaw hta hprang shatsawm nhtawm baren yi sumla hte baren la sumla ka shakap sai. Baren la kap ai hpe dung la ngu nna baren yi kap ai hpe dung yi ngu shamying sai . Baren amyu ni hta kaga Madai amyu ni, jan amyu ni mung nga nga ma ai. Ka-ang Masha ni a manau poi de bai ni mung sa du ma ai rai nna, sa du ai shaloi Madai wa gaw shana sa yup ai a majaw shi sa yup ai Gawk hpe dai ni du hkra Madai dap ngu shamying ai. Jan wa gaw shana n yup ai sha naura pa kaw sa du kau da ai, shi sa du ai shara hpe Jan hkungri ngu Manau shadung pawt kaw dai ni du hkra mu lu nga ai. Manau shadung kaw mung jan wa a masat dingsat hku jan shata sumla kap nga ai. Shing rai ndai prat na Manau hta raitim, Jai wa hte Kaiji Kanu yan Shinggyim Masha hte nta masha ni a labau htik ai lam hpe madung tawn nga ai. Labau htik ngut ai hte Manau mung ngut mat sai. Dai majaw manau dum ai gaw labau hpe shabyin ai lam, labau hpe shagrin ai lam, labau hpe awlaw ai lam, labau hpe matut ai Hkinghtawng sha rai nga ai.
Credit-Sara Kaba Pungga Ja Li
