LHAOVO HTUNGHKING BU HPUN HKING

Moi anhte Wunpawng ni nlung lungpu hkan sha naw nga ai aten sumpan hte galaw ai bu hpun palawng ni n bu hpun shi ai.Laisi hpun hpyi ni hpe shawng chye jai lang wa ai.Rai tim gaya magap ai, Jan,marang makawp ai hku sha naw shawng jai lang wa ai re.

Dai hpang Lachyit prat de bai du wa ai.Ndai Lachyit hpun hpyi hpe ri hku nna bai chye ri wa ai. Dai hpe sumpan hku bai chye da lang wa sai. Pasi lang wa ai shaloi gaw maka nsam ni hpe mung bai chye jai lang wa ga ai.

Anhte Wunpawng amyusha Lhaovo htunghking bu hpun sumli ai hta Num palawng La palawng ngu nna nga ai. La bunghkaw, Num bung hkaw mung nga ai,Num ni kaw gaw kachyi,Na latan nga ai. Moi gaw la ni mumg Na latan tan ma ai.Ta lahkawn gaw Num ni, La ni kaw nga ai. Num Shingbang, Hpundang nga ai. Hpun dang hpe la hte num lang ai, Num ni gaw Laraw hte Shingkyit kyit ai La ni kaw Nhpye, N-ga lawm ai hpe mu lu ai. Bunghkaw gaw Num mung, La mung hkaw ai. Num ni a Bunghkaw hpe galu di da nna hkayawm tawn da ma ai, La ni gaw Num ni hta grau htat hkra kaba hkra di nna bunghkaw hkaw ma ai.Hpyen wa hte gasat gala re ai shaloi laknak nhtu ni baw shan de kalang ta n hkra lu na matu makawp ai re hpe chye lu ai.

PALAWNG A LAM;-

Shawng de palawng hpe sumpan pa pa di da nna du dagraw hpun ai. Kashung ai shaloi hkayawp ai, shana yup ten nba hku nna jai lang ai, shani hkan gaw palawng hku nna jai lang ai.La ni a palawng law malawng hpraw ai nsam hpe mu lu ai.Lhaovo la ni a ntsa palawng gaw ya du hkra ahpraw sha naw re.Num ni a palawng achyang re ai.

KACHYI A LAM;-

Lhaovo kachyi gaw ahkyeng nsam re, Shanhte a makau grup yin hkan nga ai hpun, kawa ni kaw na lu ai asi ni hpe shajoi gali hpang wa ai.Lang ai law jang shanhte a htunghking bu hpun sumraw ai lam tai wa ai.

NA LATAN A LAM ;-

Na shajut waw nna na latan tan ma ai. Moi gaw na latan num la tan ma ai. na hku grai kaba hkra baw da ai ni mung nga ai. Lhaovo ni na kaw hkawngwang kaba ba re ai ni bang da nna na latan tan ai mung nga ma ai.

TA HKAWN A LAM ;-

Ta hkawn gaw shanhte a makau grup yin hkan nga ai arung arai ni hte galaw lang ai re, moi na jaugawng kaba ni lata hkan lagaw hkan ginshi hkri nna grai htat hkra hkawn da ma ai.Jaugawng gawng sa ai shaloi nam na dusat ni hte hkrum yang n lu gawa hkra makawp ai re.Num ni gaw hkumhkrang tsawm daw hku nna sha lang chye ma ai.

SHINGBANG HTE HPUN DANG A LAM;-

La ni Shingbang n lang ai, num ni shingkyit mung kyit shingbang mung ban ma ai,Shingbang hpe moi gaw Lagrang ru hte galaw ma ai. Ya hpang de gaw Ri grai tsawm hkra mali la nna hkri ntsin hte chya jahkraw da ma ai,Shingbang hpe nshang kaw bat lang ai,

Num ni shingbang ban ai gaw shanhte a kan magap da ai hku re, dinghku shang ai hpang shata lahkawng masum nga yang kan dawng wa ai gaya nna magap da na matu re nga tsun ma ai. Hpang de gaw htunghking bai tai wa ai re. Lagaw lahkap lapai lahkra lahkawng maga hpungdang dan ma ai.Moi na ni gaw laraw dagraw nna jai lang ai, ya hpang daw gaw hpundang n nga ai majaw laraw kaw sumri shakap hkayawp lang ra mat ai. Shinggan pru hkawm nam maling kata hkan shang yang agret agrat n nga na matu wawt, ji grawng n gawa na matu shakap lang ai kaw na htunghking hku jai lang nga ai re.

SHINGKYIT HTE NHPYE N-GA A LAM;-

Numsha ni labu bu ai shaloi ngang na matu jai lang ai re. Num kasha ni hpye ai ka tawng kasha hte Nhpye a lachyum gaw moi na kaji kawoi ni malut shaji bang lang na matu, yi sa yi wa re shaloi shat,simai ni hpe makai gun bang na matu jai lang ai lam rai ma ai. Nhpye jinghpa ni hta shawun shakap ma ai.Daini na prat hta gaw ri da maka hte shatsawm nna shawun a malai hkindang hpe shakap lang ai. Nhpye jinghpa kaw pat shakap ai lachyum gaw mahkawn shabrang ni shada shala hkat ai aten numsha ni tinang a myi man yu shatsawm la lu na matu re. La sha ni hpye ai N-ga hpe Chyam N-ga ngu shamying ma ai. N-ga hpe gaw lahkra hku hpye nna lapai maga de jahkrat hpye, Nhpye hpe gaw lapai maga hpye nna la hkra maga de jahkrat hpye ai re.

Wunpawng htunghking bu hpun mawn sumli ai hta num hte la ngu nna hpun palawng masat da ai re majaw prat kade mi galai mat wa tim num ni a hpun palawng hpe num ni sha lang nna, la ni a hpun palawng hpe la ni sha bu hpun lang ga ai.

Daini na prat hta la dangpai ni hkan num labu maka ni shakap bu hpun ai ni nga wa ai. Ndai zawn re lam ni hpe shading sharai let anhte a htunghking bu hpun palawng mawn sumli ai lam hpe ladat jaw jaw hte chye hpun sumraw lang na matu hte Lhaovo bawsang amyusha ni a htunghking hpun palawng mawn sumli ai hta jailang ai arung arai langai hpra lachyum ni hpe ramma ni chye na hkawnhkrang hkannang hkansa lu na matu Saranum Nding Tawng Ra tsun jahpra ai hpe ka tang madun dat ai.

Peter Ah Ze