RI DA MAKA MYING NKAU MI

RI DA MAKA MYING NKAU MI

Nhkum Ja Hkawn

KANU MAKA

Kanu maka ngu ai gaw, rida maka hta na maka kanu rai nga ai. Ji woi ji hkai ni a maka ka wa ai labau lasang hpe sagawn yu ai shaloi, ndai maka gaw maka yawng a kanu re hpe chye lu ai. Ndai maka hpe chye sai ni gaw maka yawng hpe aloi ali hte chye da ai. Dai majaw ndai maka hpe maka yawng a kanu, ngu shamying nga ma ai. Da da nna maka ka ai ni yawng ndai maka hpe shawng n chye n mai ka hpang wa ai rai.

KUNG LATA MAKA

Kung lata maka ngu ai gaw, nu num ni da da nna maka ka wa ai shaloi, tinang makau grupyin e nga ai arung arai lama ma a hkrang ni hpe yu nna hkrang shapraw, rida maka hta ka ai akyang rawng ma ai. Kung lata maka ngu ai gaw, shanhte da da ri ri ai tut nawng lang nga ai ri layin la ai kung a lata hpe yu la nna, ka da ai maka re majaw, kung lata maka re ngu shingteng amying jaw da ma ai.

RI LAYIN MAKA Ri

layin maka ngu ai gaw, maka ka hpang wa ai, Jinghpaw nu num ni a akyang hte maren, shi makau na arung arai hpe chyaw raw rai hkra ka bang da ai rai nga ai. Ndai maka gaw da da ri ri lang ai, ri layin hpe yu la nna ka da ai maka re. Ri layin a ga-ang kaw na galu shawn nna ri hpe gaboi gayin la ai re.

BAREN SEP MAKA

Baren sep maka ngu ai gaw, moi Ninggawn wa Baren shayi num ma Ja Kai hpe hkungran la nna, mayaw htinggaw de wa ai da. Dai aten hta hka nawng de du jang baren tai, hkarang de du jang shinggyim tai re ai baren shayi ni hte mayaw htinggaw de ai sakse law law nga ai. Dai zawn Jinghpaw wunpawng ni a gawoi ni bu hpun sumraw lai wa sai sep ni hpe yu nna da da maka ka chye wa ai shaloi, dai baren sep ni hpe maka ka nna, bu hpun lai wa sai re. Sep ni hpe yu nna, da da maka ka chye wa ai shaloi, dai baren sep maka ni hpe maka ka bu hpun lang wa ai re nga ma ai.

MANANG DUN MAKA

Manang dun maka gaw, maka hpe yu dat ai hte masha shada da, manang tai nna, lata gindun let nga nga ai maka re hpe adan pra mu lu nga ai. Jinghpaw wunpawng myu sha ni gaw rusai baw pa hpe myit yu nna, mayu dama, gahpu ganau, gashu kasha, gahkri nga let pu gang sin machyi nna, shada da garum shingtau, ga tsun ga la re ai amyu re ai hpe maka nnan ka hpang ai jan gaw sumru nna, maka shapraw ka da ai re. Yi galaw sha ai aten ni hta mung yinwa ni hta manang tam nna she hkyen lu hkyen sha chye ma ai.

ULAI LAP MAKA

Ulai lap maka ngu ai gaw, ji woi ni ulai chye dup sha hpang wa ai prat kaw nna, maka ndai ka lang wa sai rai nga ai. Ulai gaw lai hkru lai si ni hte bung ai hpun hpan amyu mi rai nga ai. Ndai ulai hpun kaw nna sha hpa shadung hpe hka hta jahtaw la ai hpe ulai nu ai, ngu tsun ai re. ulai hpe dup, nu nna lu wa ai shadung hpe ji woi ni hku hku ai ten hta malu masha shatai lai wa ma ai. Dai ulai lap a hkrang hpe yu nna, maka ka da ma ai rai nna, dai maka hpe ulai lap maka ngu shingteng amying jaw ai re.

SHABAN HPAW MAKA

Shaban hpaw maka ngu ai gaw, Wunpawng sha ni a manang gaba tai ya jai masat nampan nan mung rai nga ai. Dai nampan hpe yi galaw sha ai Jinghpaw myu sha ni galoi mung, hkai lang nga ai pan hkrawng, pan hkyeng pan ni re, yi nampan hpe ngu ai re. Ndai pan hkrawng, pan hkyeng ni hpe yi wa grupyin ni hte yi hte lam shing krawn pai hkra hte yi shingnawm ni hta hkai da ma ai. Shaban pan hkyeng ni pu wa ai shaloi, yi mam ni hpe sha, jahten shaza chye ai latung sumbra hpan amyu myu ni gaw shaban pan hkyeng sama hpe n hkam lu nna, hprawng mat ma ai. Shingrai ndai pan hkyeng gaw Jinghpaw wunpawng ni a manang nampan nan rai nga ai, dai shaban pan hkyeng hpaw pyan wa ai ni hpe yu nna ka da ai maka rai nga ai.

KAWNGCHYA MAKA (MAJAN DANG MAKA)

Kawng chya maka (majan dang maka) ngu ai gaw, chyurum sha ni gaw yi galaw sha let, wa la ni gaw nam maling mala gata de, mahkam hkam shan gyam sha ai hte, du sat du myeng ni hpe hkam nna mung, gyam nna mung gap lu rim lu ai kaw na kawng tu ai du sat ni n-gup ni nyin dat ai shaloi dawng pru wa ai, kawng ni lawu lahta ginchya ai kawng ni hpe yu la nna, kawngchya maka hpe ka hpang da ai nga ma ai. Ndai maka hpe ka ai shaloi ri mahta si hta hkan nna, kawngchya gaji, kawngchya gaba maka ngu shamying lang ma ai rai. Ndai maka hpe sha, Mali Nmai wa lawng ga de gaw majan dang maka mung nga ma ai. Dai mying lu wa ai lam gaw, madu wa majan rawt sa mat wa ai aten ladaw hta, da da nga ai madu jan gaw dai maka hpe ka nga u ai da. Dai rai nna ndai maka hpe majan dang maka ngu shamying dat ma ai. Mali Nmai wa lawng bu ni ndai maumwi hkai nga ma ai.

U LATSANG JASAT MAKA

Ndai maka ni hpe yu dat ai hte u ni a lagaw latsang hkrang re hpe mu lu nga ga ai. Dai da ai jan a makau grupyin hkan mu lu ai u kanu, u tang gawng hte uhkai ni a lagaw, hkang ni hpe yu nna ka da ai maka re majaw, u latsang maka ngu shamying ai re lam chye lu ai.

TSU LEN MAKA

Ndai tsu len maka ngu ai a maumwi gaw ning nga ai re. Kanu maka ka ninghkring jan gaw n myit mada ai sha si mat wa sai, kasha gaw kanu kaw na maka ka hpaji yawng garai n sharin la lu ai ten rai nga ai, lani mi kasha gaw maka ka nna da da dung nga u ai, raitim maka hpe n chye ka shakre nna mau mat let, da raw kau nna da ra kaw yup malap mat sai. Shaloi kanu gaw tsu ga kaw nna yupmang hta maka ndai kaning di ka na lam, sharin dat yu ai. Kasha gaw yup hprang nna maka ndai ka shakre yang aloi sha lu ka shakre sai da. Shangrai tsu ga na bai sharin len ya ai re majaw, ndai maka hpe tsulen maka ngu shamying ai re da.

SHU GINSHANG MAKA

Shu ginshang maka ngu ai maka gaw, shu ni a ginshang ke ke re hpe yu la nna ka ai maka re majaw, shu ginshang maka ngu shamying lang wa ai re.

CHYAHKAN LADAU MAKA

Chyahkan ladau maka ngu ai gaw, Jinghpaw bum ga yi tawm la ngut ai hpang gaw, Jinghpaw num ni hka shi hka wam hkan e nga gawt, tsin dim rai nna, hkatsu, chyahkan hkwi sha ai lam shaning shagu galaw ma ai, Jinghpaw num ni gaw tinang hkwi lu wa ai chyahkan hpe yu nna, maka ka ma ai, dai maka gaw chyahkan hkandau hte chyaw raw rai nga ai.

URI MYI MAKA

Uri myi maka gaw, Jinghpaw bum ga maling mala hkan, uri, u gaw ni nga ma ai. Uri myi gaw kaga ni a myi hta grau htoi tu gabrim nga ai. Jinghpaw la ni gaw bum ga maling mala hkan mahkam, singgau ni hpe hkam da ma yang, uri ni aloi ali lu mai nga ai. Uri ni a myi hpe yu nna, nta madu jan ni gaw da maka ka da ma ai. Shingrai uri a myi hpe yu la nna ka da ai maka re majaw, uri myi maka ngu shamying ai re lam chye lu ai.

LAMU NINGNI MAKA

Lamu ningni maka byin wa ai labau gaw, da maka ka ai shayi sha jan a grai tsawra ai sumtsaw wa, madu wa, shing nrai gashu kasha langai ngai si shakram da nna yawn hkyen gawng garut ningtsang tsang nga ai ten hta, da da maka ka nga tim, myit shingran gaw nsim nsa nga lu ai rai nna, lamu de mada yu let myit hpe shalan yu u ai. Shaloi, lamu ntsa e samwi ningni ni gahtap gala rai mawng yan hkawm nga ai hpe mu mada u ai, dai gahtap gala rai yawng mawng nga ai samwi ni hpe yu nhtawm, da maka ka dat u ai da. Dai rai nna, dai maka hpe lamu ningni maka ngu shamying ai re lam labau hkai ma ai. Ningtsang hte ningchyang gaw lachyum langai sha rai nna, buga nkau hta gaw ningchyang hkrap maka mung nga ma ai lam chye lu ai.

MALI ZUP MAKA

Jinghpaw buga e gaba dik hte dan dawng dik ai hka nu gaw Mali hka hte Nmai hka rai nga ai. Mali hka hte Nmai hka lwi zup ai hpe Jinghpaw ni Mali zup (Mali Nmai zup) nga ma ai, shingrai Mali hka hte Nmai hka zup ai kumla la nna maka dai ka hpang wa ai re majaw, Mali zup maka ngu shamying ai re nga hkai nga ma ai.

KA WAI MAKA

Ka wai maka byin tai wa ai shingdu maumwi hpe hkrak nchye lu nga ai. Rida shingni hku nna pai hkra wai wai di gawai singgaw nna shatsawm jahtuk la ai maka re majaw, ka wai maka ngu shamying ai rai na re nga nna tsun nga ma ai.

NINGKRAU MAKA

Jinghpaw ni lit gaba gun na rai yang, ningkrau shalawm nna gun chye ma ai. Ningkrau ngu ai gaw lit hpe gahpa lahkawng maga hte gun hpai na matu yin shalat da ai rai langai mi rai nga ai. Ningkrau a hkrang hpe yu nhtawm, rida maka ka ai Jinghpaw num ni gaw ri da maka hta shapraw ka da u ai.

HKATAN SUM-UP MAKA

Hkatan sum-up maka ngu ai gaw, hkatan si, hkatan ru, sum-up a hkrang hpe yu nna hkrang shapraw ka da ai maka rai nga ai. BUK GINSHANG MAKA Jinghpaw ni nga pra lai wa ai ginra shingra hta hkan nna lang lai wa ai, ri pali, shan hpyi hte galaw ai sadek hpe buk ginshang nga ma ai, dai ginshang kaw ja gumhpraw hte manu dan asut rai ni hpe bang zing kyem da ma ai. Dai buk ginshang a hkrang hpe yu nna rida maka ka ai myu shayi ni rida maka hta hkrang shapraw nna ka da ma ai. Shingrai nna dai maka hpe buk ginshang maka ngu shamying ai lam Jinghpaw ni tsun hkai ma ai rai.

MUNGHPYI LAYIT LAIKA

Jinghpaw du langai ngai si mat ai ten hta, ngam nga ai gashu kasha ni, makyin jinghku ni si mang hpe layit yit ya chye ga ai. Layit yit let chyeju hkungga ni hpyi shawn ai htung nga ai hte maren, dai yit ai layit hpe mahta nna ka ai maka hpe, munghpyi layit maka ngu ai re.