Nye a mying hpe gaw Da maka labu ngu ma ai. Mungkan ting hta n ngu tim, jinghpaw amyu masha ngu ai sha nga ai mungdan e gaw, nye a mying danhkung nga ai n ngu lu tim mung nye mying prawng nga ai hpe gaw gadai raitim n lu nyet kau nga ai. Da maka ndai hte maren hpawhpye sha n re ai jinghpaw amyusha ni gaw ngai hpe chye ai hkrai rai ma ai. Raitim ngai tsun ai ga hpe gadai garai n na yu ma ai nhten!
Shingrai jinghpaw shayi num ni nga manga ra sharawng dik htum ai Da maka labu ngai hpe ga hkaw mi tsun shangun marit, ngu nna hpyi shawn nngai law!
Jinghpaw amyu shayi num ni gaw, ngai hpe nja nhpra rai nachying ra shawng ma ai. Labau hku nna tsun hkat wa yu ga nga yang, anhte jinghpaw amyu ni bai chye hkat, basi ri chye gaboi, ri amyu myu chye ri, chye jaw, Da chye ring, ri la maka labu chye da bu wa ai prat lak htak nna rai wa yang, anhte da maka labu n tsaw n ra ai jinghpaw shayi num ni gaw langai mi mung n nga ai hpe yawng chye lu nga ga ai. Dai rai nna jinghpaw shayi num ni nlang hte gaw nye a nja manang ni hkrai re, ngu nna tsun lu nga ai. Dai re hkrak bai tam hkrat wa yu yang, ndai prat lakhtak e nye a jet ai manang Da maka labu hpe lu wa mu tam mat wa sai.
Dai rai nna, jinghpaw shayi num ni gaw prat hkan da, gat hkan da, dingshawn shang sa ai shaloi da, hkungran poi shing n rai zuphpawng hpa re ai hpawng shagu hkan sa lawm ai shaloi shayi num ni law malawng gaw, ngai n dang makoi hkra makoi rawng mat tim ngai hpe chyu sha sa tam sawk woi la nna, hpraw htap tsawm ai shayi num ni a hkumgawng shingyan hpe grau tsawm hkra mawn sumli sak ya kau nhtawm, myiman pa pa rai hpawng shingra de sa sa rai shajang ma ai.
Mi moi na anhte jinghpaw amyu htunghking ningli hta hkrak hkan ai hku tsun ga nga yang, Jinghpaw shayi num ni nga manga gaw, masha hkum gu hkra da maka labu lam lam lu na htung nga ai. Ganing rai nme law nga yang, amoi da hpang anhte a aji chyanun awoi Woishun anhte jinghpaw amyu ni hpe shanga daidaw wa ai prat lak kaw nna, jinghpaw shayi num ni hku nna jinghpaw amyu ni hpe lamu wun gau na mungkan ga ntsa hta, maigan sha ni a man e, myiman shapa ya hkrat wa ai, tsawm htap dik ai hte manu grin dan dik ai buhpun myu mi rai li. Dai re ya na prat madang tsaw wa ai lakhtak e raitim mung, jinghpaw shayi num ni a hkumgawng shyingyan hpe grau nna mawn sumli shatsawm jahtap ya lu ai. Nye manang ajet da maka labu wa she mana maka grit yawm mat wa nga ai. Ndai gaw anhte jinghpaw amyu ni a ra ahkyak ai htunghking ningli myu mi shamat kau wa nga ai lam prut pru matsui hpang wa nga ai mabyin masa manghkang gaba hpe shadan da nga nngai rai.
Dai rai nna, ngai tsawra la ai Jinghpaw shayi num ni, dai hta grau nna gaw tsawra nja ai hkawnsek shayi sha ni ra sharawng dik htum ma ai Da maka labu ngai, ganing gaw n di masin gaw n si rai, kraw lawang hkru mat na zawn nga hkra myitru bu si nga nngai oi!
Ndai lam a jaw e jinghpaw shayi chyujaw chyinghkai nu num ni hte hkawnsek shayi ni nga manga a hpang maga de, hpyi lajin ai ga hkaw mi tang shana dat nngai oi!
Hkungga tsawra gindan nga ai jinghpaw amyu a hpraw htap tsawm ai nye a manang shayi num ni e, Da maka labu gaw, anhte jinghpaw amyu sha ni a hkikhkam tsawm htap ai Ri da maka hpaji myu mi nan rai nga ai. Shingrai, Da maka labu ngai gaw anhte shayi num ni yawng hpe hpung shingkang rawng shangun lu nga ai; Masha ni amyu ni a man raitim mung nanhte a myiman n jasum yu ai sha n ga, anhte jinghpaw amyu yawng a myiman hpe shapa ya lu nga ai; Mungkan ntsa e rai jang gaw, jinghpaw amyu ni mungkan hta danhkung ai lachyum hpe dan pru ya lu shangun nga ai.
Dai re majaw, anhte jinghpaw amyu a htunghking ningli rai nga ai Rida maka hpaji majing nan rai nga ai Da maka labu hpe n shamat kau na hku di nna, shaning shagu na walang ginhtawng Ri Da maka ten ladaw hpe gaman n lahpawt shalai kau ai sha, Ri Da maka hpaji hpe sharin hkaja la let Da maka labu law law da la shajang ga, ngu nna nye a nden ja marai rawng jinghpaw amyu a bunbu hpraw shayi num ni yawng hte hpe akoi angoi hpyi lajin dat nngai oi!
Hparat Panglai
Chumlot Ton
